Baabule La Tɔɣɛ Dipɔ’ɔsegɔ N Boi Zina Beere Wa Yele La Wani?

“Kom kan le bɔna.” Tingɔŋɔ wa kpɛ’ɛndoma n boti ba eŋɛ sɛla n bala ta’an yese asaaleba yeledaaŋɔ n de ba basɛ ti nɛra woo n boi tingɔŋɔ wa zuo nyɛta dia dita tiɣera.a Ge dabeserɛ wan ta bɔna ti kom kan le tara nɛnɛra tingɔŋɔ wa zuo? Baabule la yeti bem?

Baabule la yuun tɔɣɛ biŋe ti dipɔ’ɔsegɔ wan bɔna

Baabule la pu’ulum biŋe ti dipɔ’ɔsegɔ wan bɔna tomam saŋa wa n de ‘ba’asegɔ dabesa la.’ (2 Timoti 3:1) Daɣɛ Naayinɛ n ta’asɛ ti dipɔ’ɔsegɔ bɔna ge a kaɣɛ to mɛ la yele wa. (Yames 1:13) Bisɛ Baabule yetɔɣebiŋ’a ayi.

‘Dipɔ’ɔsegɔ wan bɔna . . . zɛ’ɛsi to’ore to’ore poan.’ (Matu 24:7) Baabule yetɔɣebiŋere wa pa’alɛ ti kom wan bɔna zɛ’ɛsi zo’e zo’e poan. Nɛresɛba n zamesɛ mina ban maalɛ dia ge tɔ̃ta ba se’em la bo lasebaarɛ ti: “Dipɔ’ɔsegɔ n boi tingɔŋɔ wa za’a poan, la nɛreba n ka nyɛti disoma dita tiɣera la kɔ’ɔn gaŋɛ la nu’usin.”b Nɛreba tusa tusa n boi tisi zo’e zo’e poan ka nyɛti ban boti disɛka dita. Nimbaalega la dela, bala basɛ ti nɛreba zo’e zo’e koŋe la ba vom.

‘Bisɛ! yesabega n wana ge ti se’em n bã ka la daa zãli la maɣesega bayi a nu’o poan.’ (Liligere 6:5) Yetɔɣebiŋere wa poan, yeho la, la se’em n bã ka la ze’ele bo la kom n wan bɔna ba’asegɔ dabesa wa poan.c Maɣesega la n boi se’em n bã yeho la nu’o poan la, ba tari maɣesa la dia, lan wan eŋɛ se’em ti nɛra woo ta’an nyɛ fii di. Se’em n bã yeho la n ye’ese la, kɔ̃’a n tɔɣeri yɛta ti dia wan eŋɛ ligeri ge kaɣɛ nɛreba ti ba da sa’ana dia. (Liligere 6:6) Wana kɔ’ɔn makɛ mɛ la kom n kɔ’ɔn bɔna tingɔŋɔ wa zuo zina beere wa la, ti nɛreba tusa tusa ka nyɛta dia dita bii ba da disoma di.

Dipɔ’ɔsegɔ n kan le bɔna se’em

Nɛreba n viiseri yɛla pa’alɛ ti dia zo’e zo’e boi tingɔŋɔ wa zuo n wan ta’an diise nɛra woo n boi ka poan mɛ. San dɛna bala, bem n yi basɛ ti dipɔ’ɔsegɔ bɔna? Ge Baabule la yeti to Naaŋɔdaana Yehowad wan eŋɛ la bem maalɛ yeledaaŋɔ ana wa?

Yeledaaŋɔ: Tingɔŋɔ wa nɛŋadoma kan ta’an yese nɔŋɔ la ŋmɛlema tuuma n basɛ ti nɛreba ka nyɛta dia dita la basɛ.

Sɛla n wan maalɛ yele la: Naayinɛ Na’am la wan tee soe nɛresaaleba gɔmɛt za’a bisera. (Daniel 2:44; Matu 6:10) Zina beere wa, la kpe’em bo sɛba ti nɔŋɔ kɛ̃ ba la mɛ ti ba ta’an da dia di ge Naayinɛ Na’am la wan basɛ ti bala tee. Baabule la pa’alɛ Yezu n de Naayinɛ Na’am la Naba la n wan eŋɛ sɛla: ‘A wan faaɛ sɛba n naseri ge kaasa ɛɛra soŋerɛ la basɛ, la tarendoma la se’em woo n ka tari soŋera la. . . . Dia wan ta buge tingɔŋɔ wa zuo; Zɔya la zuo dia wan wɔm vilegera.’​—Yooma 72:12, 16.

Yeledaaŋɔ: Zaberɛ sa’ani la lɔɣɔrɔ la ligeri yɛla. Bala ni basɛ ti la kpe’em bo nɛreba ti ba nyɛ disɛka ti ba bɔta.

Sɛla n wan maalɛ yele la: ‘Yehowa wan yese zaberɛ tingɔŋɔ wa zuo. A kɔ’ɔri la tahɔ ge sa’ana kanɛ; A dekɛ la bugum nyɔ̃’ɔra sogɛpa zaberɛ toto.’ (Yooma 46:9) Naayinɛ wan sa’am zaberɛ lɔɣɔrɔ, la nɛresɛba n ta’asɛ zaberɛ la. Bala wan basɛ ti la kan kpe’em bo nɛnɛra ti a nyɛ dia. Baabule la pu’ulum biŋe ti: ‘Tontɔɔdoma vom wan ana soŋa, ti suma’asum wan bɔna zɛ’an woo.’​—Yooma 72:7.

Yeledaaŋɔ: Tingɔŋɔ wa yɛla n teeri se’em, la yeledi’ima sa’ani la bunbuura.

Sɛla n wan maalɛ yele la: Naayinɛ wan gu yeledi’ima ge basɛ ti bɔŋa la ana soŋa ti dia wan ta’an maalɛ soŋa. Baabule la yeti: ‘Yehowa n go’e sabekãtɛ la ti ateko komi’isi ma’ɛ za’a. . . . Ti a basɛ ti pɔɣentia za’a lebege bɔɣesi ti tinkɛ’ɛŋa lebege kulesi. Bilam ti a tari sɛba ti kom tara ba la na basɛ . . . ti ba burɛ dia ge sɛ tiisi ti si wɔm vilegɛ.’​—Yooma 107:29, 35-37.

Yeledaaŋɔ: Punyã’anɛdoma la nɛresɛba n ka tari yelemɛŋɛrɛ tari la titɔ kɔɔra dia bii ba gu ti dia la kan paɛ nɛreba zɛ’an.

Sɛla n wan maalɛ yele la: Naayinɛ Na’am la wan yese punyã’anɛdoma la nɛresɛba n ka tari yelemɛŋɛrɛ la basɛ. (Yooma 37:10, 11; Isaiah 61:8) Baabule la tɔɣɛ Yehowa Naayinɛ yele yeti a dela ‘se’em n tɔɣeri soŋera sɛba n boi muɣesego poan ge diisa sɛba ti kom tara ba.’​—Yooma 146:7.

Yeledaaŋɔ: Yuunɛ woo, disebo n ni sa’am bii ka maalɛ soŋa dela kɔbega poan pitã la bãta.

Sɛla n wan maalɛ yele la: Naayinɛ Na’am la poan, ba wan bisera dia soŋa ti la kan sa’am. Yezu n yuun boi tingɔŋɔ wa zuo la, a yuun ka sa’ani dia. Makerɛ, daarɛ deyima a yuun doose la yelekirega sore poan diise nɛreba tusa anuu. Pooren, a yuun yele a podɔleba la ti: ‘Laɣesɛ ya disɛka n gee la, la ya da sa’am ka.’​—Yon 6:5-13.

Naayinɛ Na’am la n wan yese yelese’a n ta’asɛ kom la zuo, nɛra woo wan ta nyɛta disoma n bo’ori imma’asum dita. (Isaiah 25:6) Ho san bɔta ti ho zamesɛ baŋɛ Naayinɛ Na’am la n wan ta eŋɛ sɛla, kaalɛ zaseŋɔ yele la zuo n de “When Will God’s Kingdom Rule the Earth?” (Sankani Ti Naayinɛ Na’am La Wan Pɔsɛ Bisera?)