Vom La Na’am Tuuma Zamesegɔ Viisegɔ Gɔŋɔ

JULY 6-12

NAAYINƐ TUULUM YƐLA | YƐHEGA 6-7

“Nananawa, Ho Wan Nyɛ Mam Wan Eŋɛ Faro Wa Se’em”

it-2-E 436 ¶3

Moses

Israel buraasi la me yuun tee mɛ. Ba yuun sakɛ ti Naayinɛ n sirum tɔɣeri bɔ’ɔra Moses ge Faro n yuun ta bo nɔɔrɛ ti ba tum tuunkãra la, ba sunsua n yuun nyie la Moses. Wana yuun basɛ ti Moses giila kɔ’ɔsɛ mɛ ti a keŋɛ ta zusɛ Yehowa. (Yɛh 4:29-31; 5:19-23) Gaŋɛ Za’a Daana la yuun kpemese a giila mɛ ge yele en yeti Eŋa nyaa yeti a tum la yelese’a ti a yuun biŋe nɔɔrɛ la Abraham la Isaak la Yakob la, pa’alɛ ti a wan basɛ ti ba baŋɛ eŋa yu’urɛ Yehowa la vuurɛ doose la eŋa n wan faaɛ Israeldoma la basɛ ge tari ba keŋɛ pu’ulumbiŋere teŋa la ti ba ta dɛna teŋkãtɛ. (Yɛh 6:1-8) Sankaŋa la, Israeldoma la yuun ka kelese Moses. Ge se’em ma’a ti ba yuun nyɛ too buwai la, ba yuun nyaa sakɛ bo en mɛ ge dɔla a nɔɔrɛ. Too pia la pooren la, Moses yuun nyaa wan ta’an tigese ba soŋa ge doose ba yese wuu ba “maahom ba mɛhe mɛ gura zaberɛ.”​—Yɛh 13:18.

it-2-E 436 ¶1-2

Moses

Zɛa Egypt Naba Faro Nɛŋan. Moses la Aron n yuun de sɛba n boi nɛŋa ‘zabera la baɣa la.’ Faro yuun yi la Egypt teŋa tiimdoma la za’a ti Yanes la Yambres dɛna ba nɛŋadoma (2Ti 3:8), ti ba laɣesɛ na zabɛ la Yehowa. La yuun boi bini ti Faro suure yuun kãbɛ mɛ ge yelekiriga la ti Moses yuun yele Aron ti a eŋɛ ti Faro nyɛ la yuun basɛ ti ba baŋɛ ti Yehowa paŋa la gani Egypt teŋa baɣa la mɛ. (Yɛh 7:8-13) Pooren, too se’ere n pa’asɛ butã la n yuun sige ba’asɛ la, tiimdoma la za’a yuun sakɛ ti “Yenɛ n ete dena wa!” Too la yuun ba’ɛ wuŋɛ ba mɛ ti ba yuun puɣum ka ta’an lebe na ze’ele Faro nɛŋa ti ba zabɛ la Moses.​—Yɛh 8:16-19; 9:10-12.

Too ta’an basɛ ti nɛra tee a puti’irɛ bii a kãbɛ suure. Moses la Aron n yuun mɔɔlɛ Too Pia ayima ayima la. Too la za’a n yuun tum la pa’alɛ ti Yehowa n yuun tum Moses ti a ta ze’ele a na’arɛ. Yehowa yu’urɛ la yuun niɛ peelum mɛ ti nɛreba zo’e zo’e yuun tɔɣera de yele Egypt teŋa poan. Yu’urɛ wa yuun basɛ ti basɛba tee ba puti’irɛ mɛ ge ti basɛba me kãbɛ suure. Israeldoma la Egyptdoma basɛba yuun tee ba puti’irɛ mɛ; Faro la sɛba n ka’ani en la sɛba n pa a poore la yuun kãbɛ la suure. (Yɛh 9:16; 11:10; 12:29-39) La wan tuɣum deni ti ba ti’isa ti ba tue ba baɣa la me la, Egyptdoma wa yuun mi ti Yehowa n gãkeri ba baɣa la. Se’em ma’a ti too buwai la yuun tum ba’asɛ la, Moses me yuun dela “nɛre zure Egypt teŋa la poan, la Faro la kpɛ’ɛndoma la nɛŋan.”​—Yɛh 11:3.

Ɛɛra Vo’osum Poan Yɛla

it-1-E 78 ¶3-4

Gaŋɛ Za’a Daana

Yehowa yuun dekɛ la na’asegɔ yu’urɛ ‘Gaŋɛ Za’a Naayinɛ’ (ʼEl Shad·daiʹ) tum tuuma se’em ma’a ti a yuun biŋe nɔɔrɛ la Abraham ti a wan dɔɣɛ Isaak la. La yuun dela Abraham tara sakerɛ ti Naayinɛ tari paŋa n wan basɛ ti pu’ulumbiŋere wa tum tuuma. Ba yuun le dekɛ na’asegɔ yu’urɛ wa tum tuuma mɛ se’em ma’a ti Naayinɛ yuun yeti eŋa wan basɛ ti Isaak la Yakob dɛna sɛba n wan nyɛ Abraham nɔbiŋere la poan kã’a.​—Pin 17:1; 28:3; 35:11; 48:3.

Wana wa zuo ti Yehowa yuun le yele Moses yeti: “Mam nɛɛ n mɛŋa la n yu’urɛ se’ere n de Gaŋɛ Zan’an Yenɛ [beʼElʹ Shad·daiʹ] la poan pa’alɛ Abraham, Isaak la Yakob, ge mam ka nɛɛ n mɛŋa n yu’urɛ se’ere n de [Yehowa] wa pa’alɛ ba.” (Yɛh 6:3) Bala ka pa’alɛ ti to yaabedoma wa yuun ka mi Yehowa yu’urɛ la, se’ere n sɔi la bamam la ba sɔyaabedoma yuun tari yu’urɛ wa tuna tuuma mɛ. (Pin 4:1, 26; 14:22; 27:27; 28:16) Yelemɛŋɛrɛ, Pin’ileŋɔ gɔŋɔ la n boi Hebru gulesegɔ la poan n tɔɣeri to yaabedoma yele la, yelebire “Gaŋɛ Za’a Daana” la boi bini la sugumnɔɔrɛ 6 ma’a ge ti Naayinɛ mea yu’urɛ Yehowa la bɔna bini sugumnɔɔrɛ 172. Ge la ka pakɛ la to yaabedoma wa mea n yuun nyɛ yelese’a n eŋɛ ti la pa’alɛ ti na’asegɔ yu’urɛ “Gaŋɛ Za’a Daana” la kɔ’ɔn makɛ me la Naayinɛ la, ba yuun ka nyɛ yɔ’ɔ nyɛ yu’urɛ wa vuurɛ la yelese’a ti a mea yu’urɛ Yehowa la ze’ele bo. The Illustrated Bible Dictionary (Vol. 1, gɔn. 572) tɔɣɛ de yele ti: “yelese’a ti ba yuun lilige pa’alɛ to Yaabedoma ti la tɔɣera pu’ulumbiŋere se’a n wan tum tuuma beere sa’am la; basɛ ti ba tara sakerɛ ti Eŋa, Yahweh, dela Naayinɛ (ʼel) n tari paŋa (ta’an pa’alɛ ti sadday) wan basɛ ti pu’ulumbiŋa la tum tuuma. Eŋa n yuun niɛ a mea pa’alɛ en goo la poan la yuun ka tã ita, Naayinɛ paŋa la eŋa n yuun kɔ’ɔn bɔna bini la basɛ ti to baŋɛ ti a sirum dela Yahweh.”​—J. D. Douglas n yuun malum gulesɛ de yuun 1980.

it-2-E 435 ¶5

Moses

Naayinɛ yuun ka zaɣesɛ Moses la eŋa n yuun zoti valum bii bɔ’ɔra a mea buurɔ la. Ge Moses yuun bo’ori la a mea buurɔ yɛta ti eŋa ka ta’an tɔɣera soŋa. Moses nyaa tee mɛ, a ka le ana wuu eŋa n yuun ani se’em yuun 40 pooren la, a yuun geele a mea ti eŋa n wan faaɛ Israeldoma la basɛ. A yuun ŋmɛ’ɛri la nɔkpe’ene la Yehowa nyaa ta bɔ’ɔra a mea buurɔ ti eŋa kan ta’an tum tuunɛ la. La boi bini ti Naayinɛ sunsua yuun nyie mɛ ge a yuun ka zaɣesɛ Moses ge yuun dekɛ la a suɔ Aron ti a tɔɣera bɔ’ɔra en. Moses n yuun ze’ele Naayinɛ na’arɛ poan tuna la, a yuun ani wuu “Naayinɛ” bɔ’ɔra Aron, mina n yuun soe a na’arɛ tɔɣera la. Kɔ’ɔn pɔsɛ se’em ma’a ti a laɣesɛ Israel keendoma la, la eŋa n yuun ze’ele Faro nɛŋan, Naayinɛ yuun dekɛ a pa’alegɔ la a nɔya la bɔ’ɔra Moses ge ti eŋa me tɔɣɛ bo Aron. Bala la Aron n yuun de mina n yuun tɔɣeri bɔ’ɔra Faro (eŋa n yuun soe Faro mina zuo ti Moses yuun zɔ yuun 40 n tole la). (Yɛh 2:23; 4:10-17) Pooren, Yehowa yuun yeti Aron dela Moses “nɔdɛ’ɛsa,” pa’alɛ ti wuu Moses n de eŋa nɔdɛ’ɛsa ge ti a pa’ala en la, bala mea nɔɔ ti la nari ti Aron me dɔla Moses ka’aŋɔ. Leyɛ’ɛsa, ba yuun yele Moses ti a nyaa “ana mɛ wo Yenɛ la Faro nɛŋan,” pa’alɛ ti ba bo en la paŋa la kpe’eŋo n ze’ele Naayinɛ zɛ’an ti la gana Faro, bala la, a ka nari ti a zɔta Egyptdoma naba la.​—Yɛh 7:1, 2.

JULY 13-19

NAAYINƐ TUULUM YƐLA | YƐHEGA 8-9

“Faro N Yuun Zɛkeri A Mea La, A Ka Mi Ti A Basɛ Mɛ Ti Naayinɛ Puti’irɛ N Tum”

it-2-E 1040-1041

Tubekirega

Yehowa Naayinɛ la asaala bɔŋa poan, a yuun ni di la sugeri basɛ ti nɛreba la tisi n nari sa’aŋɔ la kelum bɔna. (Pin 15:16; 2Pe 3:9) Basɛba yuun tee ba puti’irɛ mɛ ge ti a di sugeri bo ba (Yos 2:8-14; 6:22, 23; 9:3-15) ge ti basɛba me yuun kɔ’ɔn malum kãbɛ suure zabera Yehowa la a nɛreba. (Tɛ 2:30-33; Yos 11:19, 20) Yehowa n ka gu’uri nɛreba ti ba da dɛna tubekiregadoma la zuo, a yuun yeti eŋa ‘n wan kanbɛ ba suunre.’ A san ni gãkɛ tubekiregadoma la, la ni pa’alɛ la a paŋa ge basɛ ti nɛreba baŋɛ a yu’urɛ la.​—Dekɛ makɛ Yɛh 4:21; Yon 12:40; Arom 9:14-18.

it-2-E 1181 ¶3-5

Putotuuma

Leyɛ’ɛsa, Yehowa Naayinɛ ta’an dekɛ yelese’a n eŋɛ basɛ ti putɔpa tum a puti’irɛ n boti sɛla ge ti ba puɣum kan baŋɛ. La boi bini ti ba ni giisa la Naayinɛ ge a ta’an gu ti ba da basɛ ti a yamesi birikinte la ma’ɛ ge ti ba putotuuma la tuɣum niɛ a tontɔɔ tuuma la peelum. (Arom 3:3-5, 23-26; 8:35-39; Ym 76:10) Ba tɔɣɛ wana wa yele ti la bɔna Magaha 16:4: “Na’ayenɛ maalɛ sɛla woo mɛ la de toonɛ, ge mɛ maalɛ toonfɛn’ɛhadoma daaŋɔ dabeha la zuo.”

Makerɛ n wana, Faro sɛka ti Yehowa yuun doose Moses la Aron poan yele en ti a basɛ Israeldoma la n yuun de yamesi la yese la dela ayima. Daɣɛ Naayinɛ n yuun basɛ ti Egypt naba wa dɛna putodaana ge a yuun bo la yɔ’ɔ ti Faro wa kelum vɔna ge me basɛ ti yɛla ase’a eŋɛ ti la pa’alɛ ti Faro dela putodaana n nari kum. Yehowa puti’irɛ n yuun de se’em yele wa poan la boi la Yɛhega 9:16: “Ge mam bahɛ te ya vɔna la dela, n pa’alɛ n paŋa, ge bahɛ te n yu’urɛ pota teŋparɛ wa zuo.”

Too Pia la n yuun paɛ Egyptdoma la pa’alɛ ti saŋa la nyaa paɛ ya ti Faro la a soogɛpa la nyɛ ba sa’aŋɔ Mɔɣɛ-Mɔɔlega la poan zɛ’an ti Yehowa wan pa’alɛ eŋa n tari paŋa se’em. (Yɛh 7:14–12:30; Ym 78:43-51; 136:15) Yuuma zo’e zo’e yuun tole mɛ ti ba kelum tɔɣera de yele ge ti teŋgɔŋɔ wa zɛ’an woo, nɛreba yuun wum Naayinɛ yu’urɛ la mɛ (Yos 2:10, 11; 1Sa 4:8) Yehowa yuun san eŋɛ ni la kalam ku Faro, la yuun wan basɛ ni ti Naayinɛ paŋa la eŋa n wan eŋɛ se’em ta’an faaɛ a nɛreba basɛ la wan kpe’em ni paa.

Ɛɛra Vo’osum Poan Yɛla

it-1-E 878

Pɔ̃’ɔ

To ka ba’ɛ mina bun-ɛɣɛla sɛka wana mɔpi ti Hebru gulesegɔ la dekɛ tum tuuma Gulesegɔ la poan n tɔɣeri too n pa’asɛ n naasi ti Naayinɛ basɛ ti la sige Egyptdoma la zuo ge Israeldoma n yuun boi Gosen la n yuun tuɣum piɛ. (Yɛh 8:21, 22, 24, 29, 31; Ym 78:45; 105:31) ʽA·rovʹ dekɛ la “pɔ̃’ɔ” (JB, NW, Ro), “bintandugele” (Yg), “zu’usi” (AS, KJ, RS), “dumpibisi” (AT), la “bankabega” (LXX).

Solemiine poan “pɔ̃’ɔ” laɣum dɛna la bun-ɛɣɛla n de wuu mɔsim la zu’usi. Mɔsim bunnya’aŋa ni dum la duŋa bii nɛra nyuura ba ziim. Zu’usi san ni nyɛ gãpa, gãpa wa ta’an kɛ̃ nɛra bii duŋa la inya. Zu’usi ana wa boi la zɛse’esi n tuulegɛ paa. Bala la, pɔ̃’ɔrɔ la n yuun bibige Egyptdoma la ba dusi la zuto la, yuun basɛ ti la wuŋɛ ba mɛ ti la ka tara makerɛ hali saŋa ase’a la yuun ni ta kuura bamam la ba dusi la mɛ.

w04-E 3/15 25 ¶9

Yɛhega Gɔŋɔ La Yelekpina

8:26, 27​—Beni n sɔi ti Moses yuun yeti Israeldoma kãabegɔ la wan dɛna ‘kɛhega bo Egyptdoma’ la? Egyptdoma la yuun na’aseri la dusi buuri buuri. Moses n yuun tɔɣɛ kãabegɔ yele la, pa’alɛ ti Moses yuun belegeri ba mɛ ti ba bo ba yɔ’ɔ ti ba keŋɛ ta pu’usɛ Yehowa.

JULY 20-26

NAAYINƐ TUULUM YƐLA | YƐHEGA 10-11

“Moses La Aron Yuun Eŋɛ Pa’alɛ Ti Ba Tari Sukpe’ene”

w09-E 7/15 20 ¶6

Tɔɣesa Yezu​—Tara Sukpe’ene Mɔɔla

Ti’isɛ bisɛ Moses n yuun tari sukpe’ene se’em, se’em ma’a ti a yuun tɔɣera bɔ’ɔra Faro la. Faro wa yuun dela bisegadaana, se’em n tɔɣeri pɔ’ɔra baɣa, dɛna yinɛ a mea ge me dɛna wuntɛɛŋa baɣerɛ Ra dayɔa. La ta’an dɛna ti a yuun pu’useri la a mea wɔ̃sum wuu Farodoma basɛba n yuun iti se’em la. Faro n yele sɛla woo dela lɔɔ; a yuun dela a tɔɣɛ kan lebese naba. Faro n yuun zɛkeri a mea, tari paŋa ge me dɛna tubekakeriga nɛra la yuun basɛ ti a ka kɛlesa nɛreba n yeti en sɛla la. La yuun dela burakana wa ti Moses, n de sirege n mea daana la, yuun kena a zɛ’an saŋa woo​—ti a ni puɣum ka beem en ti a wa’ana. Moses yuun mɔɔlɛ la bem yele? Too n ka tari makerɛ. Moses yuun boti la a eŋɛ la bem bo en? A yuun boti la Faro basɛ ti a yamesi tusa tusa yese teŋa la poan! Moses yuun nari ti a tara sukpe’ene? Ɛɛ!​—Kan. 12:3; Heb. 11:27.

it-2-E 436 ¶4

Moses

Moses yuun nari ti a tara sukpe’ene la sakerɛ nyaŋɛ keŋɛ Faro nɛŋan. La yuun dela Yehowa paŋa la a vo’osum la n yuun soŋɛ Moses la Aron ti ba ta’an tum tuunse’ere ti a dekɛ bo ba la. Ŋmaɛ Faro kootin la foote ho puti’irɛ poan, Naba sɛka n yuun tari kpe’eŋo gana nɛra woo teŋgɔŋɔ la poan sankaŋa la. Faro wa yuun dela yinɛ a mea, zɛkera a mea ti ho kan ta’an dekɛ nɛra makɛ la en, zɛa ti a kã’aneba, a lengima nɛŋadoma la sɛba n gu’uri en la a yamesi kaɛ en mum. Leyɛ’ɛsa, pu’usegɔ nɛŋadoma, tiimdoma la sɛba n giiseri Moses la laɣum bɔna bini mɛ. Faro san bɔna, buraasi wa yuun dela kpɛ’ɛndoma paa teŋa la poan. Ba za’a yuun tigese la taaba ti ba soŋɛ Faro ti ba pa Egypt baɣa la poore. Moses la Aron yuun keni Faro zɛ’an mɛ, daɣɛ buyina ma’a ge saŋa zo’e zo’e. Faro yuun kɔ’ɔn kãbera la suure, se’ere n sɔi la a yuun ka bo Hebru yamesi wa n tuni bɔ’ɔra en la yɔ’ɔ ti ba keŋɛ. Yelemɛŋɛrɛ, se’em ma’a ti Moses la Aron yuun yele en too banii la ba’asɛ la, Faro yuun sa’ɛ ba mɛ. Ba yuun le yele en too buwai la ba’asɛ la, Faro yuun yeti eŋa ka le bɔta ti a nyɛ ba nɛŋa leyɛ’ɛsa, san daɣena bala a wan ku ba.​—Yɛh 10:11, 28.

Ɛɛra Vo’osum Poan Yɛla

w95-E 9/1 11 ¶11

Tɔɣɛ Zɛregɛ Ba Pumpɔreŋɔ Yinɛ La

Se’em ma’a ti Israeldoma la yuun kelum bɔna Egypt la, Yehowa yuun yele Moses ti: “Keŋɛ Faro wa zen’an, ge mam n bahɛ te enŋa la a kpɛ’ɛndoma la zan’an sunya kanbɛ bala la, te n ta’an doohe ba poan tom n kerehe ana wa, te yamam me ta ta’an dekɛ a tɔgɛ pa’alɛ ya kɔma, la ya yaahe, mam bahɛ te Mizraimdoma wa tom gɔɔn toonse’a taaba, la n kerehe toonse’a te n tom la, ge te ya mina te mam n de Na’ayenɛ.” (Yɛhega 10:1, 2) Israeldoma sɛba n yuun kelese la wan tɔɣɛ Yehowa n yuun tum yelenyalema wa pa’alɛ ba kɔma. Ba kɔma la me wan tɔɣɛ pa’alɛ bamam me kɔma, ti bamam me tɔɣɛ pa’alɛ dɔɣɛ pa’asɛ zo’e zo’e n wan wa’ana. Bala wan basɛ ti ba tɛra Yehowa n yuun tum yelenyalema tuuma se’em. Zina me, la dela dɔɣereba pɛregerɛ tuunɛ ti ba mɔɔlɛ bo ba kɔma.​—Tɛɛnhegɔ 6:4-7; Magaha 22:6.

it-1-E 783 ¶5

Yɛhega

Yehowa n yuun dekɛ a paŋa faaɛ Israeldoma la yuun basɛ ti a yu’urɛ la nyɛ la na’asegɔ. Ba yuun ta paɛ Mɔɣe Mɔlega la yakenɛ bɔba la, Moses yuun basɛ ti Israel dayɔɔsi la yuuna mɛ. A tã Miriam n de nɔdɛ’ɛsa la, yuun laɣesɛ la pɔɣesi la za’a ti ba tara sinyaasi yuuna ge wa’ara ge sakera yuunse’a ti buraasi la yuuna la. (Yɛh 15:1, 20, 21) Israeldoma la yuun ka le bɔna ba dataasi wa zɛ’an. Ba yuun yese Egypt teŋa la, nɛra bii duŋa yuun kan ta’an le daam ba; baa puɣum kan dum ba bii wɛsera ba. (Yɛh 11:7) La boi bini ti Yɛhega gɔŋɔ la ka yeti Faro mea la a lengima la n yuun sige mɔɣerɛ la poan nyɛ sa’aŋɔ ge Yooma 136:15 yeti Yehowa n yuun “ko Faro la a pɛɛntɛɛnreba la Mɔgɔ Mɔlega la poan.”

JULY 27–AUGUST 2

NAAYINƐ TUULUM YƐLA | YƐHEGA 12

“Azootole Malema La N Tari Tuulum Bɔ’ɔra Kristakɔma Se’em”

w07-E 1/1 20 ¶4

“Ya Nari Ti Ya Nyɛɛna”

Yezu yuun ki la Nisan 14, 33 K.P. Israeldoma saŋa la, Nisan 14 yuun dela pupeelum dabeserɛ Azootole malema la poan. Dabeserɛ kaŋa yuunɛ woo poan, deodoma ni laɣum tɔ̃rɛ pebila ti gelegere ka bɔna a poan la nɛnɔ mɛ. Wana ni tiɛ ba la pebila la ziim la n yuun faaɛ Israeldoma yizuo woo dayɔkeema basɛ la, se’em ma’a ti maleka la yuun ku Egyptdoma yizuo woo dayɔkeema Nisan 14, 1513 G.T.K.W. (Yɛhega 12:1-14) Azootole pebila la yuun ze’ele bo la Yezu, se’em ti tuntuna Paul yuun yeti: “Ba kaanbɛ Krista n de to Azootole pebila la.” (1 Korint 5:7) Wuu Azootole pebila la ziim n yuun faaɛ nɛreba basɛ la, Yezu ziim la me faaɛ nɛreba zo’e zo’e basɛ mɛ.​—Yon 3:16, 36.

it-2-E 583 ¶6

Azootole Malema

Yezu yuun eŋɛ la yɛla ase’a ti la makɛ la yɛla ase’a n yuun boi Azootole malema la poan. Ba poan ayima n tum tuuma dela ziim la ti ba yuun dekɛ miise ba yɛa Egypt teŋa la n yuun basɛ ti malaka la ka ku ba yizuo woo dayɔkeema. Paul yuun yeti Krista n yuun dekɛ a ziim la faaɛ loore Kristakɔma la basɛ la pa’alɛ ti bamam n de tansugere la dayɔkeema. (Heb 12:23; 1Te 1:10; Ep 1:7) La yuun ka nari ti ba kɔ Azootole pebila la kɔberɛ. Ba yuun tɔɣɛ biŋe ti ba kan kɔ Yezu kɔberɛ, wana wa yuun tum tuuma mɛ a kum la poan. (Ym 34:20; Yon 19:36) Azootole malema wa ti Yudadoma yuun dɛ’ɛna yuun kɔbesi zo’e zo’e poan la ti la bɔna ba Lɔɔ la poan la basɛ ti to baŋɛ Yezu Krista, “Yenɛ Pebila la” mɛ.​—Heb 10:1; Yon 1:29.

w13-E 12/15 20 ¶13-14

‘Ita Dena Wa La Ya Tɛra N Yele’

Dɔɣɛ pa’asɛ n yuun kɔ’ɔn malum bɔna la, sɔdoma yuun wan pa’ala ba kɔma ninmɔ’ɔrɛ yelese’a n boi Azootole malema la poan. Ayima dela Yehowa n te’ele sɛba n pu’useri en se’em. Kɔma la yuun baŋɛ ti a daɣɛ mina n ka boi. Yehowa boi mɛ, Naayinɛ se’ere n vɔe la nɔŋɛ a nɛreba mɛ ge me kɔ’ɔn tɛ’ɛla ba. A yuun eŋɛ pa’alɛ ti a te’ele Israeldoma yizuo woo dayɔkeema mɛ ge “ko Mizraim teŋa bikeema woo.” A yuun faaɛ yizuo woo dayɔkeema basɛ mɛ.

Yuunɛ woo Kristakɔma dɔɣereba ni ka pa’alɛ ba dayɔɔsi la ba poyɔɔsi Azootole malema kaŋa la vuurɛ. Ge hon pa’alɛ ho kɔma ninmɔ’ɔrɛ yelese’a n boi bini ti Naayinɛ te’eli a nɛreba mɛ? Hon pa’alɛ ba ti ba tara suure lua ti Yehowa kelum dɛna la se’em n Te’eli a nɛreba? (Ym. 27:11; Isa. 12:2) Ge hon ni kɔ’ɔn tɔɣera mɛ bɔ’ɔra ho kɔma bii ho ni basɛ ti la dɛna la sɔsega? Ni tiregɛ basɛ ti ba zamesɛ sɛla n wan basɛ ti ho deodoma la bĩ vo’osum poan.

Ɛɛra Vo’osum Poan Yɛla

it-2-E 582 ¶2

Azootole Malema

Too Pia la n yuun sige Egyptdoma la zuo la yuun dela gãkerɛ bɔ’ɔra Egyptdoma baɣa la, yele yele wuu se’em n pa’asɛ buwai la, yuun ku ba yizuo woo dayɔkeema la. (Yɛh 12:12) Pesigo la (pedaa) yuun dela zilam bo Ra baɣerɛ la, bala la, ba yuun dekɛ Azootole pebila la ziim miise ba yiya la yuun dela gãleŋɔ bɔ’ɔra Egyptdoma. Leyɛ’ɛsa, naahɔ yuun dela zilam, bala la, ba yuun ku naahɔ woo bikeema la yuun daam Osiris baɣerɛ la mɛ paa. Faro yuun bisɛ a mea ti eŋa dela Ra baɣerɛ la dayɔa. Faro mea dayɔkeema n yuun ki la yuun pa’alɛ ti Ra la Faro za’a yuun ka tara paŋa.

it-1-E 504 ¶1

Laɣesegɔ

Sɛla n yuun ni basɛ ti “toolom lagaŋdoma” la bɔna de to’ore dela, nɛreba la yuun ka nari ti ba tum tuunɛ. Makerɛ n wana, yia dabeserɛ la dabese’ere n pa’asɛ n yopɔi Boroboro Sɛka N Ka Tari Mi’isum De’eŋo la yuun dela “toolom lagaŋdoma,” ti Yehowa yuun yeti: “Da tom ya toon toonɛ dabeha ana wa poan, han dagana ya dogɛ dia di ma’an, yan wan eta se’em dabeha ana wa poan n bala.” (Yɛh 12:15, 16) Ge “toolom lagaŋdoma” dabesa la, malemadoma la yuun ni kãabera mɛ bɔ’ɔra Yehowa (Mlm 23:37, 38), wana wa pa’alɛ ti nɔɔrɛ yuun ka boi n pa’alɛ ti ba da tuna ba dabeserɛ woo tuuma. Dabesa ana wa yuun daɣɛ ti nɛreba la da tuna ge ba tuɣum ita vo’osum poan yɛla nyɛ nyuurɔ. Bakwai la ba’asegɔ Vo’osego daarɛ la, nɛreba la yuun ni laɣesɛ la taaba pu’usa ge kɛlesa pa’alegɔ. Ba puurɛ ni pee mɛ la ba ni kaalɛ ge pa’alɛ Naayinɛ Yelesum la pu’usegɔ deo la poan se’em la. (Tm 15:21) Bala la, la boi bini ti nɛreba la yuun ka tuni tuuma Vo’osego daarɛ bii “toolom lagaŋdoma” la poan ge ba yuun kɔ’ɔn zusera mɛ ge ti’isa taɣesa Naaŋɔdaana la n tari putɛsɛka bɔ’ɔra ba la.​—Bisɛ ASSEMBLY.