A Gán Gbawhàn Etọn!
DIN wẹ ojlẹ lọ nado “Gboadọ bo jẹ azọ́n ji.” (1 Otànnugbo lẹ 28:10) Afọdide godo tọn tẹlẹ wẹ a gán ze he na hẹn yọnbasi na we dogọ nado dudeji?
De azán de. Azọ́nwatẹn he nọ yin le ministère américain de la Santé et des Services sociaux na ayinamẹ dọ to whenue a magbe nado jo azọ̀-nùnù do, osẹ awe he na bọdego lẹ gblamẹ wẹ a na mọ azán tintan he gbè a na penugo ma nado nù siga te to gbẹzan towe mẹ. Ehe na zọ́n bọ a na tẹdo ojlo dagbe go. Dohiagona azán enẹ to sunzanhiawema towe ji, dọ ẹ na họntọn towe lẹ, bo ma diọ azán enẹ blo eyin ninọmẹ towe lẹ tlẹ wá diọ.
Wleawuna kandai de he na gọalọna we. Nukinkan lọ sọgan bẹ nudọnamẹ he to odò ehelẹ hẹn, gọna nudepope he na yidogọna ojlo towe nado jo azọ̀-nùnù do:
● Whẹwhinwhẹ́n he wutu a jlo na jodo lẹ
● Sọha alokan tọn mẹhe a na ylọ eyin e to jijlo nado nù in lẹ tọn
● Linlẹn delẹ—vlavo wefọ Biblu tọn lẹ taidi Galatianu lẹ 5:22, 23—he na gọalọna we nado jẹ yanwle towe kọ̀n
Nọ hẹn kandai enẹ do dewe ji to whelẹponu, bo nọ hia ẹ whasusu to azán dopodopo ji. Eyin a tlẹ wá jo azọ̀-nùnù do godo, zindonukọn nado nọ gbadopọnna kandai lọ to whedepopenu he azọ̀-nùnù jẹ jijlo we ji.
Dapana ninọmẹ he mẹ a nọ saba nù azọ̀ te lẹ. Jẹnukọnna azán he a de lọ, jẹ ofẹ̀n desọn nudepope he do kanṣiṣa hẹ azọ̀-nùnù mẹ lẹ ji. Di apajlẹ, eyin a nọ nù azọ̀ tlolo he a fọ́n to afọnnu lẹpo, a gán de ma nado nù na ganhiho dopo kavi humọ. Eyin a nọ nù azọ̀ whenue a to núdù kavi tlolo to núdùdù godo, doalọtena aṣa enẹ. Ma nọ yì fie mẹdevo lẹ to azọ̀ nù te lẹ blo. Podọ whenue a to dewe ṣo, nọ dọ po gbèzeyiaga po dọ: “Eyeo mì wanu. N’ma pò nùnù ba,” nado plọn nuhe a na nọ gblọn eyin yé wá whlé we. Afọdide mọnkọ lẹ zize na gọalọna we, e ma yin nado wleawudai na azán he gbè a na doalọtena azọ̀-nùnù kẹdẹ gba, amọ́ yé nasọ nọ flinnu we dọ to madẹnmẹ, a ma nasọ yin azọ̀-nùtọ de ba.
Wleawufo nado jo azọ̀-nùnù do. Dile azán he a de nado jo azọ̀-nùnù do lọ to dindọnsẹpọ, wleawuna nudevo lẹ he a na nọ yí do dán onù taidi: agọ̀nte, ṣingọmu, azín, po mọmọ po sọyi. Flinnu họntọn po whẹndo towe lẹ po gando azán he gbè a de nado jo azọ̀-nùnù do lọ go gọna nuhe yé gán wà nado nọgodona we. Jẹnukọnna azán enẹ, bẹ nuhe mẹ siga nupò lẹ nọ nọ̀ na we, blike kavi ṣána lẹ, gọna ahlidanu devo depope—taidi siga depope he to owhé towe gbè, moto towe mẹ, kavi to apò towe lẹ mẹ kavi to azọ́nwatẹn towe dlan. Nado dọ hójọhó, e nọ vẹawu nado biọ siga to mẹde si kavi họ̀ hugan nado pọ́n nude mẹ poun bo ze! Humọ, zindonukọn nado to alọgọ Jiwheyẹwhe tọn biọ to odẹ̀ mẹ, bo nọ wàmọ po ahun lẹpo po to whepoponu to siga godo tọn towe nùnù godo.—Luku 11:13.
Gbẹtọ madosọha lẹ wẹ ko gbàgbẹ́ họntọn lalo he nọ ze ogbẹ̀ mẹtọn do owù mẹ enẹ tọn, yèdọ siga. E gán pà hiẹ lọsu ga. A na wá duvivi agbasalilo dagbe de tọn bo ma na sọ nọ mọ dewe di afanumẹ aṣa ylankan enẹ tọn ba.
[Yẹdide]
Nọ hẹn kandai enẹ do dewe ji to whelẹponu, bo nọ hia ẹ whasusu to azán dopodopo ji