NUPINPLỌN 80
Jesu De Apọsteli Wiawe
To whenue Jesu ko dọyẹwheho na nudi owhe dopo daa godo, e dona basi nudide titengbe de. Mẹnu lẹ wẹ e na de nado wazọ́n dopọ hẹ ẹ? Mẹnu lẹ wẹ e na plọnazọ́n nado deanananu to agun Klistiani tọn mẹ? Jesu jlo dọ Jehovah ni deanana emi nado basi nudide ehe. Enẹwutu, e yì osó de ji nado nọ edeṣo bo hodẹ̀ to ozán lọ blebu mẹ. To afọnnu, Jesu ylọ delẹ to devi etọn lẹ mẹ pli bo de apọsteli etọn 12 lẹ sọn yé mẹ. Yinkọ mẹnu tọn wẹ a flin to yé mẹ? Yinkọ yetọn lẹ wẹ Pita, Andle, Jakọbu, Johanu, Filipi, Batelemi, Tọmasi, Matiu, Jakọbu visunnu Alfe tọn, Tade, Simọni po Juda Iskaliọti po.
Andle, Pita, Filipi, Jakọbu
Omẹ Wiawe enẹlẹ wẹ na nọ zingbejizọnlin hẹ ẹ. To whenue e ko plọnazọ́n yé godo, e do yé hlan nado yì dọyẹwheho. Jehovah na yé huhlọn nado yàn aovi lẹ jẹgbonu bo hẹnazọ̀ngbọna mẹhe to azọ̀njẹ lẹ.
Johanu, Matiu, Batelemi, Tọmasi
Jesu ylọ omẹ Wiawe lọ lẹ dọ họntọn etọn lẹ bosọ nọ dejido yé go. Falesi lẹ nọ pọ́n apọsteli lẹ hlan di mẹhe ma sewé podọ omẹ tata lẹ. Amọ́, Jesu plọnazọ́n yé ganji. Yé na nọpọ́ hẹ Jesu to ojlẹ tangan gbẹzan etọn tọn delẹ mẹ, taidi jẹnukọnna okú etọn podọ to fọnsọnku etọn godo. Taidi Jesu, suhugan omẹ Wiawe lọ lẹ tọn wẹ wá sọn Galili. Delẹ to yé mẹ dà asi.
Jakọbu visunnu Alfe tọn, Juda Iskaliọti, Tade, Simọni
Gbẹtọvi mapenọ wẹ apọsteli lọ lẹ, podọ yé nọ ṣinuwa. To whedelẹnu, yé ma nọ lẹnnupọn ganji whẹpo do dọho, podọ yé nọ basi nudide ylankan lẹ. To ojlẹ devo lẹ mẹ, yé ma nọ fahomẹ. Yé tlẹ nọ dọnnu gando mẹhe klohugan to yé mẹ go. Amọ́, mẹdagbe wẹ yé yin bo yiwanna Jehovah. Yewlẹ wẹ na yin dodonu agun Klistiani tọn to yìyì Jesu tọn godo.
“Yẹn ko ylọ mì dọ họntọn, na nuhe yẹn sè sọn Otọ́ ṣie dè lẹpo wẹ yẹn ko hẹn zun yinyọnẹn na mì.”—Johanu 15:15