NUPINPLỌN 61
Yé Ma Dẹ́ Do Odò
Ojlẹ de to whenue Ahọlu Nẹbukadnẹzali ko kudlọ gando boṣiọ lọ go godo, e basi boṣiọ sika tọn daho de. E ze e tùnte do dankló Dula tọn ji bo ylọ omẹ nukundeji aigba lọ tọn lẹ pli do nukọn etọn, ehe bẹ Ṣadlaki, Meṣaki po Abẹdi-nẹgo po hẹn. Ahọlu lọ degbe dọmọ: ‘Tlolo he mì na sè nudidọ ován lẹ, ajalẹn lẹ po opẹ̀n lẹ po tọn, mì dẹ́ do odò na boṣiọ lọ! Mẹdepope he ma dẹ́ do odò na yin zizedlan zòhọ he to jiji de mẹ.’ Be Heblu atọ̀n lọ lẹ na dẹ́ do odò na boṣiọ lọ wẹ ya, kavi Jehovah kẹdẹ wẹ yé na sẹ̀n?
Todin, ahọlu degbe dọ hànjinu lọ lẹ ni yin hihò. Mẹlẹpo sọ dẹ́ do odò bo sẹ̀n boṣiọ lọ, ṣigba Ṣadlaki, Meṣaki po Abẹdi-nẹgo po ma wàmọ. Delẹ to mẹhe to finẹ lẹ mẹ doayi e go bo dọna ahọlu dọmọ: ‘Heblu atọ̀n enẹlẹ gbẹ́ nado sẹ̀n boṣiọ towe.’ Nẹbukadnẹzali degbe dọ yé ni yin pinplan wá bo dọna yé dọmọ: ‘N’na na mì dotẹnmẹ devo nado sẹ̀n boṣiọ lọ. Eyin mì ma wàmọ, n’na ze mì dlan zòhọ lọ mẹ. Yẹwhe de ma tin he gán whlẹn mì sọn alọ ṣie mẹ.’ Yé gblọn dọmọ: ‘Mí ma do hudo dotẹnmẹ devo tọn. Jiwheyẹwhe mítọn gán whlẹn mí. Amọ́, eyin e ma tlẹ wàmọ janwẹ, Ahọlu e, mí ma na sẹ̀n boṣiọ lọ.’
Homẹgble Nẹbukadnẹzali taun. E dọna omẹ etọn lẹ dọmọ: ‘Mì hẹn zòhọ lọ hùnmiyọ́n whla ṣinawe hú dai tọn!’ Enẹgodo, e degbena awhànfuntọ etọn lẹ dọmọ: ‘Mì blá dawe ehelẹ, bo ze yé dlan e mẹ!’ Zòhọ lọ hùnmiyọ́n sọmọ bọ to whenue awhànfuntọ lọ lẹ dọnsẹpọ ẹ, yé kú to afọdopolọji. Heblu atọ̀n lọ lẹ sọ jai jẹ miyọ́n lọ mẹ. Ṣigba, whenue Nẹbukadnẹzali pọ́n zòhọ lọ mẹ hlan, e mọdọ sunnu ẹnẹ wẹ to zọnlinzin to e mẹ, kakati nido yin yé omẹ atọ̀n. Obu jẹ e ji bọ e kanse ahọluzọnwatọ etọn lẹ dọmọ: ‘Be e ma yin sunnu atọ̀n wẹ mí zedlan miyọ́n lọ mẹ ya? Omẹ ẹnẹ mọ wẹ n’te, bọ dopo to yé mẹ tindo awusọhia angẹli de tọn!’
Nẹbukadnẹzali dọnsẹpọ zòhọ lọ bo dawhá dọmọ: ‘Mì tọ́njẹgbonu, mì devizọnwatọ Jiwheyẹwhe Gigogán lọ tọn lẹ emi!’ Awuji mẹhe to finẹ lẹpo nado mọdọ Ṣadlaki, Meṣaki po Abẹdi-nẹgo po tọ́njẹgbonu sọn miyọ́n lọ mẹ matin awugble depope. Agbasa yetọn, oda yetọn po avọ̀ yetọn lẹ po ma fiọ, podọ miyọ́n ma tlẹ lunwán to yé go.
Nẹbukadnẹzali dọmọ: ‘Jiwheyẹwhe Ṣadlaki, Meṣaki po Abẹdi-nẹgo po tọn wẹ klohugan. E do angẹli etọn hlan nado whlẹn yé. Yẹwhe de ma tin taidi yẹwhe yetọn nkọ.’
Be a magbe taidi Heblu atọ̀n enẹlẹ nado yin nugbonọ na Jehovah mahopọnna nudepope he sọgan jọ ya?
“Jehovah Jiwheyẹwhe towe wẹ hiẹ dona nọ sẹ̀n, podọ ewọ kẹdẹ wẹ hiẹ dona nọ wà sinsẹ̀nzọn wiwe hlan.”—Matiu 4:10