Lilatọ Ahọluduta Tọn lẹ Na Linlin

Akọndonanu Planmẹ jẹ Dona Jiwheyẹwhe Tọn Kọ̀n to Malawi

JOSẸFU yin devizọnwatọ nugbonọ Jehovah tọn. (Heblu lẹ 11:22) E sọ yin sunnu ayidego tọn de he nọ doakọnnanu. Dile etlẹ yindọ e yin didehia gbọn nọvisunnu etọn titi lẹ dali, yin sisà whlaawe hlan kanlinmọgbenu, podọ to enẹgodo yin zize do ganpamẹ na whẹsadokọnamẹ lalo tọn wutu, ayiha Josẹfu tọn ma gbado gba. Kakatimọ, e yí sọwhiwhe do doakọnna nukunbibia owhe susu tọn, bo yí whiwhẹ do nọtepọn dona Jehovah tọn.—Gẹnẹsisi 37:23-28, 36; 39:11-20.

Mọdopolọ to egbehe, Kunnudetọ Jehovah Tọn lẹ to Malawi ko yí sọwhiwhe do nọtepọn dona Jiwheyẹwhe tọn. Na owhe 26 lẹ, Klistiani Kunnudetọ ehelẹ doakọnna alọhẹndotenamẹ ahọlu tọn lẹ, nukundiọsọmẹ sinsinyẹn, po kanyinylan do mẹgo susu lẹ po. Ṣigba akọndonanu yetọn ko yin ahọsuna!

To whenuena homẹkẹn gbajẹgbonu to Malawi to vivọnu owhe 1967 tọn, nudi wẹnlatọ Ahọluduta tọn 18 000 wẹ tin. Lẹnnupọn do ayajẹ Kunnudetọ lẹ tọn ji to whenuena yé sè dọ owhe sinsẹ̀nzọn 1997 tọn bẹjẹeji po agayiyi yọyọ wẹnlatọ 38 393 po—yèdọ hugan whlaawe sọha he tin to bẹjẹeji alọhẹndotenamẹ lọ tọn! Humọ, sọha he wá Plidopọ Agbegbe 13 “Wẹnsagun Jijọho Jiwheyẹwhe Tọn Lẹ” tọn heyin bibasi to Malawi jideji hugan 117 000. Na nugbo tọn, Jehovah ko dona yise po akọndonanu yetọn po.

Apajlẹ dona ehe tọn de wẹ numimọ dẹpẹ owhe 14 mẹvi de tọn he nọ yin Machaka. To whenuena Machaka kẹalọyi nuzedonukọnnamẹ lọ nado plọn Biblu po Kunnudetọ Jehovah Tọn lẹ po, mẹjitọ etọn lẹ lẹzun adìnọ tlala. Yé dọmọ: “Eyin hiẹ jlo na lẹzun Kunnudetọ de, hiẹ dona bẹagbàn tọ́n sọn whégbè.” Ṣigba, budonamẹ ehe, ma hẹn ẹn gbọjọ nado zindonukọn to oplọn etọn mẹ gba. Taidi kọdetọn de, mẹjitọ Machaka tọn lẹ yí avọ̀ etọn lẹpo sọn e si. Mẹmẹsunnu lẹ kẹalọyí ì gbọn avọ̀ devo lẹ hihọ̀ na ẹn dali. To whenuena mẹjitọ Machaka tọn lẹ sè ehe, yé dọ na ẹn dọmọ: “Eyin Kunnudetọ lẹ jlo nado nọgodo na we, be hiẹ dona tọ́n bo yì nọ yé dè.” To whenuena whẹho lọ yin linlẹnpọn ganji, Machaka tọ́n sọn whégbè, bọ whẹndo Kunnudetọ tọn de to agun lẹdo lọ tọn mẹ kẹalọyí ì do owhé etọn gbè.

Homẹ gble mẹjitọ Machaka tọn lẹ sọmọ bọ yé basi dide nado bẹagbàn sọn lẹdo lọ mẹ nado sọgan dapana kanṣiṣa lẹpo hẹ Kunnudetọ lẹ. Nugbo wẹ dọ, ehe hẹn ayimajai wá na Machaka, ṣigba e yin homẹmiọnna whenuena mẹmẹsunnu lẹ dọhodopọ hẹ ẹ do Psalm 27:10 ji, ehe dọmọ: “Whenuena otọ́ ṣie po onọ̀ ṣie po gbẹ́ mi dai, whenẹnu wẹ OKLUNỌ na dealọyí mi.”

To madẹnmẹ, adi mẹjitọ Machaka tọn lẹ tọn wádò, bọ e sọ basi dide nado lẹkọyi mẹjitọ etọn lẹ dè. E họnwun dọ gbemima ovi yetọn tọn nado sẹ̀n Jehovah tindo huhlọn do yé ji na yé lọsu jlo plọnmẹ Biblu de hẹ Kunnudetọ Jehovah Tọn lẹ! Yewlẹ lọsu yì Plidopọ Agbegbe azán atọ̀n tọn “Wẹnsagun Jijọho Jiwheyẹwhe Tọn Lẹ” tọn, bọ to enẹgodo yé yin whinwhan nado lá dọmọ: “Na nugbo tọn, ehe wẹ titobasinanu Jiwheyẹwhe tọn.”

Mọwẹ, nukundiọsọmẹ sọgan yin whlepọn sinsinyẹn de, ṣigba wẹnsagun nugbonọ Jiwheyẹwhe tọn lẹ ma nọ jogbe gba. Yé nọ zindonukọn po tugbigbo po, to yinyọnẹn mẹ dọ “[nukunbibia, NW ] nọ wazọ́n homẹmimiọn tọn; whlepọn sọ nọ wazọ́n todido tọn.” (Lomunu lẹ 5:3, 4) Kunnudetọ Jehovah Tọn lẹ to Malawi sọgan yigbe po nujikudo po dọ akọndonanu nọ planmẹ jẹ dona Jiwheyẹwhe tọn kọ̀n.