Be Hogbe lọ “Klistiani” to Zẹẹmẹ Etọn Hẹnbu Wẹ Ya?
ETẸWẸ e zẹẹmẹdo nado yin Klistiani de? Nawẹ hiẹ na na gblọndo gbọn? Gbẹtọ sọha delẹ heyin ṣinṣinyan sọn otò voovo lẹ mẹ yin kanbiọ enẹ pẹpẹ kanse, podọ delẹ die to gblọndo yetọn lẹ mẹ:
“Nado hodo Jesu bosọ nọ wanu taidi ewọ.”
“Nado yin gbẹtọ dagbe de podọ nado nọ má onú lẹ hẹ mẹdevo lẹ.”
“Nado kẹalọyi Klisti taidi Oklunọ po Whlẹngantọ po.”
“Nado nọ yì Mess, nọ hia Odẹ̀ Katoliki tọn, bosọ nọ yí Communion.”
“Yẹn ma yise dọ hiẹ dona nọ yì ṣọṣi dandan nado yin Klistiani dagbe de gba.”
Wezẹhomẹ lẹ tlẹ namẹ zẹẹmẹ voovo mẹpaṣa tọn lẹ. Na nugbo tọn, wezẹhomẹ dopo tindo zẹẹmẹ ao to hogbe lọ “Klistiani” glọ, he dlẹnkan sọn “yise tintindo to kavi yinyin hagbẹ sinsẹ̀n Jesu Klisti tọn de” jẹ “yinyin gbẹtọ sọwhiwhenọ kavi dagbe de” ji. E ma paṣamẹ dọ e nọ sinyẹnawu na mẹsusu nado basi zẹẹmẹ nuhe e zẹẹmẹdo nado yin Klistiani gba.
Nuyiwa Numaylọdọnu Tọn De
To egbehe, to mẹhe ylọ yede dọ Klistiani lẹ ṣẹnṣẹn—etlẹ yin to mẹhe nọ má ohọ̀ dopolọ zan lẹ mẹ—yè sọgan mọ pọndohlan he gbọnvo tlala lẹ do whẹho mọnkọtọn lẹ ji taidi gbigbọdo sọn olọn mẹ wá Biblu tọn, tamẹnuplọnmẹ nulẹ tin yededenu tọn, mahẹ tintindo ṣọṣi tọn to tonudidọ mẹ, po yise mẹtọn mimá hẹ mẹdevo lẹ po. Whẹho walọyizan tọn lẹ, do hosọ lẹ ji taidi hòdide, zanhẹmẹ to vijinu dopolọ lẹ ṣẹnṣẹn, gọna sunnu po yọnnu po ni to pọnọ matin alọwle, nọ saba lẹzun whẹho he nọ fọ́n nudindọn dote lẹ. Nuyiwa he họnwun lọ wẹ numaylọdọnu.
Di dohia, whẹ̀dọhọsa ṣọṣi Plọtẹstant tọn dopo to agọe blavo nado nọgodona jlọjẹ ṣọṣi de tọn “nado dè mẹho he nọ tindo zanhẹmẹ to vijinu dopolọ ṣẹnṣẹn de do pipli anademẹtọ etọn lẹ tọn mẹ,” wẹ linlinwe Christian Century dọ. Sinsẹ̀n-nuplọnmẹtọ delẹ tlẹ ko ze pọndohlan lọ donukọnnamẹ dọ yise to Jesu mẹ mayin dandan na whlẹngán gba. Yé yise dọ Ju lẹ, Malenu lẹ, po mẹdevo lẹ po “sọgan yì olọn mẹ kẹdẹdile [Klistiani lẹ na yì do],” wẹ linlin de to The New York Times mẹ dọ.
Mí ni dọ dọ, Marxiste de to godonọna capitalisme kavi démocrate de to godonọna aṣẹglanglan panamẹ kavi lẹdo-plọntọ de ni to godonọna zungbo vivasudo. “Omẹ enẹ ma sọgan yin Marxiste de kavi démocrate kavi lẹdo-plọntọ nugbonugbo tọn de gba,” wẹ hiẹ na dọ—podọ hiẹ dọ nugbo. Ṣogan, to whenuena hiẹ lẹnnupọndo vogbingbọn he tin to pọndohlan he mẹhe ylọ yede dọ Klistiani to egbehe lẹ tindo lẹ ji, hiẹ na mọ nuyise he gbọnvo tlala lẹ podọ gbọzangbọzan wẹ enẹ nọ sọta nuhe Dowatọ sinsẹ̀n Klistiani tọn, yèdọ Jesu Klisti, plọnmẹ lẹ. Etẹwẹ vogbingbọn he tin to pọndohlan mẹ enẹlẹ dohia gando wunmẹ sinsẹ̀n Klistiani tọn yetọn go?—1 Kọlintinu lẹ 1:10.
Mẹwhinwhàn lọ nado diọ nuplọnmẹ Klistiani tọn lẹ nado sọgbe hẹ linlẹn ojlẹ lọ mẹ tọn lẹ tindo whenuho he dite taun de, dile mí na mọ do. Etẹwẹ yin numọtolanmẹ Jiwheyẹwhe po Jesu Klisti tọn po gando diọdo mọnkọtọn lẹ go? Be ṣọṣi he nọ nọgodona nuplọnmẹ he ma tindo dodonu to Klisti mẹ lẹ sọgan gbọn jlọjẹ dali ylọ yede dọ Klistiani ya? Kanbiọ ehelẹ na yin dogbapọnna to hosọ he na bọdego mẹ.