“Azán Todoai Hlan Nuyise Sinsẹ̀n lẹ Tọn”
NA HODỌDOPỌ he e tindo hẹ Kunnudetọ Jehovah tọn lẹ whàn ẹn wutu, ogán mẹplọntọ lẹ tọn to wehọmẹ de to Pologne klan “Azán Todoai Hlan Nuyise Sinsẹ̀n lẹ tọn” dovo na wehọmẹ etọn. E biọ dọ mẹdezejotọ lẹ sọn wehọmẹvi lẹ mẹ—to Katoliki lẹ, Buddha-sẹ̀ntọ lẹ, podọ to Kunnudetọ Jehovah tọn lẹ mẹ—ni wleawuna nuzedonukọnnamẹ gli de nado hẹn wehọmẹvi devo lẹ jẹakọ hẹ nuyise po nuwiwa yetọn lẹ po. Kunnudetọ Jehovah tọn jọja aflanmẹ atọ̀n ze yede jo to afọdopolọji.
To whenuena azán lọ pé, omẹ tintan he dọho wẹ viyọnnu owhe 15 mẹvi de he nọ yin Malwina. To apadewhe, e dọmọ: “Susu mìtọn wẹ ko yọ́n mí whẹpo mí bẹ wehọmẹ ehe na mí nọ basi dlapọn wá owhé mìtọn lẹ gbè wutu. Vlavo nuhewutu mí nọ wàmọ sọgan nọ paṣa mì. Na mí nọ hodo apajlẹ Jesu Klisti, Dowatọ sinsẹ̀n Klistiani tọn wutu wẹ. E dọyẹwheho wẹndagbe Ahọluduta Jiwheyẹwhe tọn to fidepope he gbẹtọ lẹ sọgan yin mimọ te. Apọsteli lẹ po Klistiani fliflimẹ tọn lẹ po wà nudopolọ. To fisusu, Kunnudetọ Jehovah tọn lẹ ko doakọnna whlepọn sinsinyẹn yise tọn lẹ, ṣigba homẹ mítọn hùn dọ mí to vivi jijọho tọn dù to wehọmẹ mítọn, he mìmẹpo ko nọgodona. Mí dọnudo mì na enẹ!”
To vivọnu nuzedonukọnnamẹ etọn tọn, Malwina dọmọ: “Whẹwhinwhẹ́n devo tin he wutu mí do nọ basi dlapọn wá owhé mìtọn gbè. Mí hò mìtọn pọ́n. Biblu dọ dọ gbẹtọvi na tindo numimọ nujijọ he na hẹn aihọn jọsi lẹ tọn to madẹnmẹ. Enẹwutu whedevonu he mí na basi dlapọn wá mì dè, mì jaale bo dotoai. Mí na jlo nado dọ na mì lehe mí sọgan nọgbẹ̀ dopọ kakadoi to paladisi aigba ji tọn de mẹ do.”
Hodọtọ he bọdego lọ wẹ Mateusz, he yin owhe 15 mẹvi ga. Mateusz dọna mẹplidopọ etọn lẹ dọ to owhe lẹ gblamẹ, Kunnudetọ Jehovah tọn lẹ ko yí aliho voovo lẹ zan nado hẹn wẹndagbe lọ gbayipe. Di apajlẹ, to 1914—to ojlẹ he mẹ sinimoto lẹ ma nọ dọho te—Kunnudetọ lẹ nọ do “Photo-Drame de la création” hia, heyin yẹdide he nọ whàngo bo nọ dọho sọgbe hẹ nudohia lọ.
Mateusz dọhodo dagbe he ladio yiwà to owẹ̀n Ahọluduta lọ tọn hinhẹn gbayipe mẹ ji podọ to enẹgodo e basi zẹẹmẹ do aliho vonọtaun nuhẹn-bọawu zomọ nudọnamẹ-sẹdo tọn he nọ zín ogbè susu jẹgbonu (MEPS) he Kunnudetọ Jehovah tọn lẹ wleawuna ji. E sọ dọ lehe Kunnudetọ Jehovah tọn lẹ ko gọalọ nado dọho hẹ doto lẹ gando nukunpedomẹgo dotowhé tọn he ma nọ yí ohùn zan go ji. “Todin, dotozọ́nwatọ he diyin Pologne tọn lẹ ko dọho dagbe do teninọ mítọn ji bo zinnudeji dọ to owhe dopodopo mẹ awutunọ he mayin Kunnudetọ lẹ susu wẹ nọ yin zizẹ matin ohùndido,” wẹ e dọ.
Mateusz dotana gbọn hodidọ gando Plitẹnhọ Ahọluduta tọn lẹ gbigbá go dali bo dọmọ: “Be hiẹ na jlo nado dla mítọn pọ́n ya? Vọnu wẹ nado biọ e mẹ, podọ akuẹjọ depope ma nọ yin bibiọ.” To hodidọ gando nọtẹn plidopọ tọn go to Sosnowiec, Mateusz dọmọ: “Hiẹ dona yì pọ́n owhé daho ehe heyin awuwlena nado hẹn lẹndai etọn di to aliho yọn-na-yizan de mẹ. Etẹwutu mí ma na zọnpọ yì finẹ? Mí tindo ayinamẹ de, podọ họntọn mítọn Katarzyna jlo nado dọho na mì gando e go.”
Bọdego, Katarzyna owhe 15 mẹvi dọho po zohunhun po dọmọ: “Mí to oylọ basina mì nado wá Sosnowiec na plidopọ agbegbe Kunnudetọ Jehovah tọn lẹ tọn. Hosọ he gando jọja lẹ go na yin hodọdeji.” Katarzyna sọ dlẹnalọdo hùnwhẹ titengbe lọ na Klistiani lẹ—yèdọ Oflin okú Jesu Klisti tọn. E na tuli todoaitọ etọn lẹ dọmọ: “To owhe he wayi mẹ hugan gbẹtọ livi 14 lẹdo aihọn pé wẹ wá hùnwhẹ enẹ. Etẹwutu hiẹ ma na kọnawudopọ hẹ mí to whedevonu?”
To nuzedonukọnnamẹ yetọn lẹ godo, Malwina, Mateusz, po Katarzyna po ze owe lọ Les Témoins de Jéhovah: Prédicateurs du Royaume de Dieu gọna kasẹti video awe he dọhodo nuyise po nuwiwa Kunnudetọ Jehovah tọn lẹ po ji donukọnna mẹplọntọ lọ lẹ.a Mẹplọntọ lọ lẹ kẹalọyi yé po homẹhunhun po bosọ dopagbe nado yí yé zan to klasi whenuho tọn lẹ mẹ.
To vivọnu tito-to-whinnu lọ tọn, Martyna owhe-12-mẹvi hò kasẹti he ji ohàn he hosọ etọn yin “Mí Dopẹ́ Na We, Jehovah” te na mẹplidopọ lẹpo. Kunnudetọ jọja aflanmẹ ehelẹ ‘wleawuna adọgbigbo gbọn alọgọ Jiwheyẹwhe yetọn tọn dali’ bosọ na kunnudide dagbe de. (1 Tẹsalonikanu lẹ 2:2) Apajlẹ dagbe nankọtọn die ehe yin na jọja Kunnudetọ lẹ to filẹpo!
[Nudọnamẹ Odò Tọn]
a Yin zinzinjẹgbonu gbọn Kunnudetọ Jehovah tọn lẹ dali.
[Yẹdide to weda 26]
Malwina to awuwlena hodidọ etọn azán kleun de whẹpo e do zedonukọnnamẹ to wehọmẹ
[Yẹdide to weda 26]
Katarzyna to wefọ lẹ ṣinyan na nuzedonukọnnamẹ lọ