Devizọnwatọ Jehovah Tọn lẹ Tindo Todido Nujọnu Tọn
‘Pipòtọ Jakobu tọn lẹ na tin to gblagbla gbẹtọ susu tọn mẹ di ahún sọn OKLUNỌ dè he ma nọ ze todido do gbẹtọ mẹ.’—MIKA 5:7.
1. Nawẹ Islaeli gbigbọmẹ tọn yin asisa kọfanamẹ tọn gbọn?
JEHOVAH wẹ paṣẹ do jikun po ahún po ji. Ovọ́ wẹ e na yin nado donukun ahún kavi jikun sọn gbẹtọvi dè. Yẹwhegán Mika wlan dọmọ: ‘Pipòtọ Jakobu tọn lẹ na tin to gblagbla gbẹtọ susu tọn mẹ di ahún sọn OKLUNỌ dè, di jikunfinfan lẹ to ogbé ji; he ma nọ ze todido do gbẹtọ mẹ, mọ ma sọ nọ nọtepọn visunnu gbẹtọ lẹ tọn gba.’ (Mika 5:7) Mẹnu wẹ “pipòtọ Jakobu tọn lẹ” to egbehe? Islaelivi gbigbọmẹ tọn lẹ wẹ, yèdọ pipòtọ “Islaeli Jiwheyẹwhe tọn” lẹ. (Galatianu lẹ 6:16) To nukun “gbẹtọ susu” tọn mẹ to aigba ji, yé tin taidi ‘ahún fifá sọn Jehovah dè’ podọ taidi “jikunfinfan lẹ to ogbé ji.” Mọwẹ, Klistiani yiamisisadode lẹ yin asisa kọfanamẹ tọn to egbehe sọn Jiwheyẹwhe dè hlan gbẹtọ lẹ. Taidi lilatọ Ahọluduta tọn lẹ, Jehovah nọ yí yé zan nado dó owẹ̀n todido nujọnu tọn etọn gbẹtọ lẹ.
2. Naegbọn mí tindo todido nujọnu tọn dile etlẹ yindọ mí tin to aihọn he gọ́ na nuhahun de mẹ?
2 E ma dona paṣa mí dọ aihọn ehe ma tindo todido nujọnu tọn gba. Bẹwlu tonudidọ tọn, doyiyi walọ dagbe tọn, sẹ́nhẹngba, nuhahun akuẹzinzan tọn, nukunbianamẹ, awhàn—nuhe mí donukun sọn aihọn he ji Satani Lẹgba paṣẹ do lẹ niyẹn. (1 Johanu 5:19) Mẹsusu nọ dibu na nuhe sọgodo bẹhẹn. Ṣigba, taidi sinsẹ̀ntọ Jehovah tọn lẹ, mí ma nọ dibu gba, na mí tindo todido he dolido de na sọgodo. Todido nujọnu tọn de wẹ e yin na Ohó Jiwheyẹwhe tọn ji wẹ e sinai do wutu. Mí nọ tindo yise to Jehovah po Ohó etọn po mẹ na nuhe e dọ lẹpo wẹ nọ mọ hẹndi.
3. (a) Naegbọn Jehovah do jlo na sayana Islaeli po Juda po? (b) Etẹwutu wẹ hogbe Mika tọn lẹ sọ yọn-na-yizan to egbehe?
3 Dọdai Mika tọn he Jiwheyẹwhe gbọdo nọ hẹn mí lodo nado zinzọnlin to oyín Jehovah tọn mẹ bosọ nọ na mí dodonu de na todido nujọnu tọn. To owhe kanweko ṣinatọ̀ntọ J.W.M., to whenuena Mika to dọdai etọn dọ, omẹ Jiwheyẹwhe tọn he e basi alẹnu hẹ lẹ yin mimá do akọta awe, yèdọ Islaeli po Juda po, bọ yemẹpo sọ to kọgbẹ́ alẹnu Jiwheyẹwhe tọn go. Taidi kọdetọn de, doyiyi walọ dagbe tọn, atẹṣiṣi sinsẹ̀n tọn, po ojlo tintindo na agbasanu lẹ zẹjlẹgo po gbayipe. Enẹwutu, Jehovah na avase dọ emi na sayana yé. Nugbo wẹ dọ mẹhe nọgbẹ̀ to ojlẹ dopolọ mẹ hẹ Mika lẹ wẹ avase Jiwheyẹwhe tọn lẹ yin didọhlan. Ṣigba, ninọmẹ egbehe tọn lẹ sọzẹn hẹ ojlẹ Mika tọn lẹ tọn sọmọ bọ hogbe etọn lẹ sọ gando ojlẹ mítọn go ga. Ehe na họnwun dile mí na to dogbapọnna nuagokun delẹ sọn weta ṣinawe owe Mika tọn lẹ mẹ.
Nuhe Bladopọ Owe Mika Tọn Dohia
4. Nudọnamẹ tẹwẹ Mika weta 1 jẹ 3tọ bẹhẹn?
4 Mì gbọ mí ni pọ́n nuhe owe Mika tọn bẹhẹn to kleun mẹ. To weta 1 mẹ, Jehovah hùngona atẹṣiṣi Islaeli po Juda po tọn. Taidi kọdetọn tonumase yetọn tọn, Islaeli na yin vivasudo bọ yasanamẹ Juda tọn na tlẹ yì jẹ họngbó Jelusalẹm tọn ji. Weta 2tọ dohia dọ adọkunnọ po huhlọnnọ lẹ po to kọgbidina madogánnọ po agbátọnọ lẹ po. Ṣogan, Jiwheyẹwhe sọ dopagbe de. Omẹ Jiwheyẹwhe tọn lẹ na yin bibẹpli to kọndopọ mẹ. Weta 3tọ na linlin nulila Jehovah tọn lẹ tọn sọta nukọntọ akọta lọ tọn lẹ po yẹwhegán sẹ́nhẹngbatọ lẹ po. Nukọntọ lọ lẹ to kọslona whẹdida dodo, bọ yẹwhegán lẹ sọ to lalodo. Mahopọnna ehe, gbigbọ wiwe na huhlọn Mika nado lá whẹdida Jehovah tọn he ja lọ.
5. Etẹwẹ yin nuagokun Mika weta 4 po 5 po tọn?
5 Weta 4tọ dọ dọdai dọ to azán godo tọn lẹ mẹ, akọta lẹpo na wá osó yiaga ohọ̀ Jehovah tọn ji nado yin pinplọn gbọn ewọ dali. Jẹnukọnna enẹ, Juda na yin hinhẹn yì kanlinmọgbenu to Babilọni, ṣigba Jehovah na whlẹn ẹn. Weta 5tọ dohia dọ Mẹssia na yin jiji to Bẹtlẹhẹm Juda tọn. E na deanana omẹ etọn lẹ bo whlẹn yé sọn akọta kọgbidinamẹtọ lẹ si.
6, 7. Nuagokun tẹlẹ wẹ tin to weta 6tọ po 7tọ po dọdai Mika tọn mẹ?
6 Mika weta 6 bẹ whẹgbledomẹ Jehovah tọn sọta omẹ etọn lẹ hẹn to aliho whẹdidọ tọn de mẹ. Etẹwẹ e wà na yé bọ yé do ṣiatẹ? E ma wà nudepope. Na nugbo tọn, nubiọtomẹsi etọn lẹ tin to jlẹkaji. E jlo dọ sinsẹ̀ntọ etọn lẹ ni yí whẹdida dodo zan bo jọmẹ bosọ tin to jlẹkaji to zọnlinzinzin hẹ ẹ mẹ. Kakati nado wà enẹ, Islaeli po Juda po ko de nado ṣiatẹ bo nasọ jiya kọdetọn ylankan lọ lẹ tọn.
7 To weta godotọ dọdai etọn tọn mẹ, Mika gblewhẹdo ylanwiwa mẹhe nọgbẹ̀ to ojlẹ dopolọ mẹ hẹ ẹ lẹ tọn. Kakati nado gbọjọ, e magbe nado do ‘gbigbọ teninọpọn’ Jehovah tọn hia. (Mika 7:7) Owe lọ wá tadona kọ̀n po hodidọ jidide tọn de po dọ Jehovah na do lẹblanu hia omẹ etọn lẹ. Whenuho dohia dọ todido ehe mọ hẹndi yí. To owhe 537 J.W.M., whenuena mẹplọnlọ he Jehovah do omẹ etọn lẹ go wá vivọnu, e gbọn lẹblanu dali hẹn pipòtọ de gọwá aigba yetọn ji.
8. Nawẹ hiẹ na basi bladopọ nuhe owe Mika tọn bẹhẹn lẹ tọn gbọn?
8 Nudọnamẹ dagbe nankọ die Jehovah dehia gbọn Mika gblamẹ! Owe gbọdo ehe na apajlẹ avase tọn lẹ gando lehe Jehovah nọ yinuwa hẹ mawadodonọ he sọalọakọ́n nado to ewọ sẹ̀n lẹ do go. E dọ dọdai nujijọ he to jijọ to egbehe lẹ tọn. Podọ e na ayinamẹ Jiwheyẹwhe tọn gando lehe mí dona yinuwado to ojlẹ awusinyẹn tọn ehelẹ mẹ nado sọgan hẹn todido mítọn lodo go.
Oklunọ Nupojipetọ Jehovah to Hodọ
9. Sọgbe hẹ Mika 1:2, etẹwẹ Jehovah jlo na wà?
9 Todin, mì gbọ mí ni gbadopọnna owe Mika tọn to gigọ́mẹ. To Mika 1:2, mí hia dọmọ: “Se, mì gbẹtọ lẹ, popo mìtọn; aigba E, tuntoai, po gigọ́ e mẹ tọn po: bosọ gbọ OKLUNỌ Jiwheyẹwhe ni yin kunnudetọ to mì ṣẹnṣẹn, OKLUNỌ sọn tẹmpli wiwe etọn mẹ.” Matin ayihaawe, hogbe enẹlẹ na ko dọ̀n ayidonugo towe eyin hiẹ nọgbẹ̀ to ojlẹ Mika tọn mẹ. Na nugbo tọn, yé na dọ̀n ayidonugo towe na Jehovah to hodọ sọn tẹmpli wiwe etọn mẹ podọ e mayin Islaeli po Juda po kẹdẹ wẹ e to hodọ hlan gba ṣigba hlan gbẹtọ lẹ to filẹpo. To azán Mika tọn gbè, gbẹtọ lẹ ko gbẹkọ Oklunọ Nupojipetọ Jehovah go na ojlẹ dindẹn. Enẹ na diọ to madẹnmẹ. Jehovah ko magbe nado ze afọdide nujikudo tọn.
10. Naegbọn ohó Mika 1:2 tọn lẹ yin nujọnu na mí?
10 Onú dopolọ yin nugbo to egbehe. Osọhia 14:18-20 dohia dọ Jehovah ko sọ to hodọ sọn tẹmpli wiwe etọn mẹ whladopo dogọ. To madẹnmẹ, e na sọ ze afọdide nujikudo tọn, bọ nujijọ ayidego tọn lẹ na hẹn gbẹtọvi lẹ jọsi whladopo dogọ. To ojlẹ ehe mẹ, ‘ovẹn ylankan aihọn lọ tọn’ na yin bibẹ dlan do ahàndanu daho homẹgble Jehovah tọn mẹ, bo na dekọtọn do vasudo mlẹnmlẹn titonu Satani tọn mẹ.
11. Etẹwẹ hogbe Mika 1:3, 4 tọn lẹ zẹẹmẹdo?
11 Dotoaina nuhe Jehovah jlo na wà. Mika 1:3, 4 dọmọ: ‘Doayi e go, OKLUNỌ jẹgbonu sọn otẹn etọn mẹ ja, bo na jẹte wá, bo na tùnafọ otẹn yiaga aigba tọn lẹ ji. Podọ osó lẹ na yọ́ to ewọ glọ, podọ agbàdo lẹ nasọ yin zizẹ, di oda to miyọ́n nukọn, di osin lẹ he yè kọ̀n sọn otẹn sọkọdò de mẹ jẹte.’ Be Jehovah na jẹte sọn nọtẹn etọn to olọn mẹ bo na tùnafọ osó po agbàdo Aigba Pagbe tọn lẹ po ji na ede wẹ ya? Lala. E ma dona wàmọ gba. E na lilẹ́ ayidonugo etọn hlan aigba poun wẹ bọ ojlo etọn na yin hinhẹndi. Podọ ga, e mayin aigba paa lọ wẹ na jiya nuhe yin zẹẹmẹ etọn basi lẹ tọn gba ṣigba mẹhe nọ nọ̀ e ji lẹ wẹ. Eyin Jehovah yinuwa, kọdetọn lọ na ylan na mawadodonọ lẹ taun—taidi dọ osó lẹ ko yọ́ di oda bọ aigba sisọsisọ de ko zẹ̀ agbàdo lẹ wẹ nkọtọn.
12, 13. Sọgbe hẹ 2 Pita 3:10-12, etẹlẹ wẹ nọ hẹn todido mítọn lodo?
12 Hogbe dọdai tọn he tin to Mika 1:3, 4 mẹ lẹ sọgan flin we nujijọ ylankan he dọdai gbọdo devo dọ e na jọ to aigba ji lẹ. Sọgbe hẹ 2 Pita 3:10, apọsteli Pita wlan dọmọ: “Azán Oklunọ tọn ja di ajotọ to zánmẹ, ehe mẹ olọn lẹ na yí lìlì gángán do juwayi, bọ nugonu lẹ nasọ gbọn yozò sinsinyẹn mẹ yọ́, aigba po azọ́n he tin to e mẹ lẹ po nasọ fiọ gbidigbidi.” Taidi dọdai Mika tọn, hogbe Pita tọn lẹ ma gando olọn po aigba paa lọ po go gba. Yé dlẹnalọdo nukunbibia daho he ja titonu ylankan ehe ji.
13 Mahopọnna nugbajẹmẹji he ja enẹ, Klistiani lẹ sọgan tindo jidide to sọgodo mẹ, kẹdẹdile Mika wà do. Gbọnna? Gbọn ayinamẹ heyin mimọ to wefọ he bọdo wekanhlanmẹ Pita tọn go lẹ hihodo dali. Apọsteli lọ dọmọ: “Omẹ nankọ wẹ mìwlẹ lo yin to walọ wiwe lẹpo mẹ, to jijọ-di-Jiwheyẹwhe tọn mẹ, na mì ni to nukundo, bosọ to mizọnmizọn ji hlan wiwá azán Jiwheyẹwhe tọn tọn”! (2 Pita 3:11, 12) Todido mítọn na sọgodo ma na pòali eyin mí wleawuna ahun tonusise tọn de bo hẹn ẹn diun dọ walọ mítọn wé bọ mí sọ yí nuwiwa jijọ-di-Jiwheyẹwhe tọn lẹ do gọ́ gbẹzan mítọn. Nado hẹn todido mítọn lodo, mí sọ dona flin dọ azán Jehovah tọn na wá dandan.
14. Naegbọn Islaeli po Juda po dona yin yasana?
14 Jehovah dọ nuhewutu omẹ etọn lẹ dona yin yasana to hohowhenu. Mika 1:5 dọmọ: “Na sẹ́nmẹjẹ Jakobu tọn ehe lẹpo tin na, podọ na ylando owhé Islaeli tọn lọ tọn. Etẹwẹ sẹ́nmẹjẹ Jakobu tọn? Be e mayin Samalia wẹ? Podọ etẹ otẹn yiaga Juda tọn lẹ yin? Be Jelusalẹm ma wẹ yé?” Jehovah wẹ hẹn Islaeli po Juda po tin. Ṣogan, yé ko ṣiatẹ do ewọ go, podọ atẹṣiṣi yetọn tlẹ dlẹnkan jẹ tatọ́-tònọ yetọn lẹ, heyin Samalia po Jelusalẹm po mẹ.
Walọ Ylankan lẹ Jideji
15, 16. Owhẹ̀ walọ ylankan tẹlẹ tọn wẹ mẹhe nọgbẹ̀ to azán Mika tọn gbè lẹ hù?
15 Apajlẹ kanyinylan mẹhe nọgbẹ̀ to azán Mika tọn gbè lẹ tọn de yin zẹẹmẹ basina hezeheze to Mika 2:1, 2 mẹ dọmọ: ‘Dindọn hlan yé he nọ dewe na oylanwa lẹ bosọ nọ wazọ́n oylan to adọ́zan yetọn lẹ ji! Whenuena afọnnu yin hinhọ́n, yé nọ to wiwà ẹ, na e tin to huhlọn alọ yetọn tọn mẹ wutu. Yé nọ donukunkẹn na ogle lẹ, bosọ nọ yí yé glo; podọ owhé lẹ, bosọ nọ bẹ yé sọyi: yé nọ hẹnawusinyẹn omẹ de po owhé etọn po, yèdọ mẹde po ogú etọn po.’
16 Nukunkẹnnọ lẹ nọ nọ̀ nukle to zánmẹ bo nọ to wede do lehe yé na hò ogle po owhé kọmẹnu yetọn lẹ po tọn yí do ji. Yé nọ whlẹndo to afọnnu nado hẹn wedide yetọn lẹ di. Eyin yé flin alẹnu Jehovah tọn wẹ, yé ma na nọ wà onú ylankan mọnkọtọn lẹ. Osẹ́n Mose tọn bẹ tito he na basi hihọ́na wamọnọ lẹ hẹn. To Osẹ́n lọ glọ, whẹndo de ma dona hẹn ogú etọn bu kakadoi gba. Ṣigba, enẹ ma duahunmẹna nukunkẹnnọ enẹlẹ gba. Yé gbẹkọ ohó Levitiku 19:18 tọn lẹ go, he dọmọ: “Hiẹ na yiwanna kọmẹnu towe di dewe.”
17. Etẹwẹ sọgan jọ eyin mẹhe sọalọakọ́n nado to Jiwheyẹwhe sẹ̀n lẹ ze agbasanu lẹ do otẹn tintan mẹ to gbẹzan mẹ?
17 Ehe do nuhe sọgan jọ to whenuena mẹhe sọalọakọ́n nado to Jiwheyẹwhe sẹ̀n lẹ gbẹkọ yanwle gbigbọmẹ tọn lẹ go bo ze yanwle agbasanu lẹ tọn do otẹn tintan mẹ hia. Paulu na avase Klistiani azán etọn gbè tọn lẹ dọmọ: “Mẹhe jlo nado yin adọkunnọ lẹ [nọ] jai biọ whlepọn de mẹ, po omọ̀ de po, po nulú wantuntun susu he nọ gbleawunamẹ po, ehe nkọ nọ siọ omẹ do vivà po dindọn po mẹ.” (1 Timoti 6:9) Eyin mẹde yí akuẹ tintindo do basi yanwle tangan etọn to gbẹ̀mẹ, yẹwhe lalo tọn, heyin Mamọni kavi Adọkun wẹ e to sinsẹ̀n na taun tọn. Yẹwhe lalo tọn enẹ ma nọ ze todido dejidego sọgodo tọn depope donukọnnamẹ gba.—Matiu 6:24.
18. Etẹwẹ na jọ do mẹhe agbasanu lẹ nọ duahunmẹna to azán Mika tọn gbè lẹ go?
18 Mẹsusu plọnnu to aliho sinsinyẹn mẹ to azán Mika tọn gbè dọ ovọ́ pete wẹ e yin nado ganjẹ agbasanu lẹ go. Sọgbe hẹ Mika 2:4, Jehovah dọmọ: “To azán nẹ mẹ wẹ yé na ze oló de daga do mì go, bo na yí avigbè do doavigbe, yè wà ẹ; bosọ dọmọ, Yè hẹn mí gble patapata: ewọ diọ mimá omẹ ṣie lẹ tọn lọ: nawẹ ewọ fọnyi sọn dè e do! Atẹṣitọ lẹ wẹ ewọ má ogle mítọn lẹ hlan.” Mọwẹ, mẹhe fin owhé po ogle po enẹlẹ na hẹn ogú whẹndo yetọn tọn bu ga. Yé na yin yinyan yì aigba jonọ tọn ji, bọ nutindo yetọn lẹ na lẹzun ogblànnu na “atẹṣitọ,” kavi kosi lẹ. Todido lẹpo na sọgodo dagbe de na yin hinhẹngble.
19, 20. Numimọ tẹwẹ Ju he dejido Jehovah go lẹ tindo?
19 Ṣigba, todido mẹhe dejido Jehovah go lẹ tọn ma na yin hinhẹn jẹflumẹ gba. Jehovah hẹn alẹnu he e basi hẹ Ablaham po Davidi po lẹ di, bosọ wàlẹblanu na mẹhe yiwanna ewọ bo blawu do atẹṣiṣi hatọ yetọn lẹ tọn ji taidi Mika lẹ. Na dodonọ lẹ tọn wutu, hẹngọwa de na tin to ojlẹ sisọ Jiwheyẹwhe tọn mẹ.
20 Enẹ jọ to owhe 537 J.W.M., to aijijẹ Babilọni tọn godo podọ to whenuena pipòtọ Ju lẹ tọn lẹkọyi whé. To ojlẹ enẹ mẹ, hogbe Mika 2:12 tọn lẹ tindo hẹndi tintan tọn de. Jehovah dọmọ: “Jakobu E, yẹn bẹ towe lẹpo pli nugbonugbo; yẹn na dọ̀n pipòtọ Islaeli tọn dopọ; yẹn na bẹ yé pli di lẹngbọ Bozla tọn lẹ: di lẹngbọpa de to gblagbla kanlindugbo yetọn tọn mẹ, yè na basi hùnhlún daho na agundaho gbẹtọ lẹ tọn.” Pọ́n lehe owanyi Jehovah tọn sọ! To mẹplọnlọ dido omẹ etọn lẹ go godo, e dike pipòtọ de ni lẹkọ bo sẹ̀n ewọ to aigba he e na tọgbo yetọn lẹ ji.
Dopolọ-Yinyin Ayidego Tọn lẹ to Egbehe
21. Nawẹ ninọmẹ egbehe tọn lẹ taidi azán Mika gbè tọn lẹ gbọn?
21 Dile mí gbadopọnna weta awe tintan Mika tọn lẹ, be lehe ninọmẹ lẹ yin nudopolọ hẹ egbehe tọn lẹ do yinuwado hiẹ ji ya? Kẹdẹdile e yin do to ojlẹ Mika tọn mẹ, mẹsusu wẹ sọalọakọ́n nado to Jiwheyẹwhe sẹ̀n to egbehe. Ṣogan, taidi Juda po Islaeli po, yé ko klan bo tlẹ ko sọ funawhàn to yedelẹ ṣẹnṣẹn. Suhugan adọkunnọ he tin to Mẹylọhodotọklisti mẹ lẹ ko gbidikọna wamọnọ lẹ. Podọ sinsẹ̀ngán lẹ to alọkẹyi nuyiwa he Biblu gbẹ́ tlọlọ lẹ hú gbede pọ́n tọn. Abajọ, Mẹylọhodotọklisti na yin vivasudo to madẹnmẹ gọna pipòtọ “Babilọni Daho” lọ, yèdọ ahọluigba aihọn tọn heyin sinsẹ̀n lalo tọn tọn! (Osọhia 18:1-5) Sọgbe hẹ nuyiwa ojlẹ Mika tọn mẹ tọn, Jehovah na gbẹ́ tindo devizọnwatọ nugbonọ delẹ to aigba ji.
22. Hagbẹ awe tẹlẹ wẹ ko ze todido yetọn do Ahọluduta Jiwheyẹwhe tọn mẹ?
22 To 1919, Klistiani yiamisisadode nugbonọ lẹ klan yede sẹ sọn Mẹylọhodotọklisti go mlẹnmlẹn bo jẹ wẹndagbe Ahọluduta lọ tọn lá hlan akọta lẹpo ji. (Matiu 24:14) Jẹnukọn whẹ́, yé dín pipòtọ Islaeli Jiwheyẹwhe tọn lẹ mọ. Enẹgodo yé jẹ “lẹngbọ devo” lẹ bẹpli ji bọ hagbẹ awe lẹ lẹzun “apó dopo . . . lẹngbọhọtọ dopo.” (Johanu 10:16) Dile etlẹ yindọ aigba 234 ji wẹ yé to Jiwheyẹwhe sẹ̀n te todin, sinsẹ̀ntọ nugbonọ Jehovah tọn ehe lẹpo ko yin ‘bibẹpli’ na nugbo tọn. Podọ todin, lẹngbọpa ehe ‘gọ́ na awhágbe’ sunnu, yọnnu po ovi lẹ po tọn. Todido yetọn matin to titonu ehe mẹ gba, ṣigba to Ahọluduta Jiwheyẹwhe tọn, he na hẹn Paladisi gọwá aigba ji to madẹnmẹ lọ mẹ.
23. Nawẹ hiẹ kudeji dọ todido towe yin nujọnu tọn gbọn?
23 Gando sinsẹ̀ntọ nugbonọ Jehovah tọn lẹ go, wefọ godo tọn Mika weta 2tọ tọn dọmọ: ‘Yè hẹn ahọlu yetọn juyi to yé nukọn, podọ OKLUNỌ to nukọntọ yin to yé nù.’ Be hiẹ mọ dewe to zọnlinzinzin awhàngbigba tọn enẹ mẹ, to Ahọlu towe, Jesu Klisti hihodo mẹ, bọ Jehovah lọsu to nukọntọ yin ya? Eyin mọwẹ, bo yọnẹn dọ a tin to aliho ji hlan awhàngbigba kọ̀n bọ todido towe sọ yin nujọnu tọn. Ehe na họnwun dogọ dile mí gbadopọnna nuagokun dọdai Mika tọn lẹ yinukọn dogọ.
Nawẹ Hiẹ Na Na Gblọndo Gbọn?
• To azán Mika tọn gbè, naegbọn Jehovah de nado sayana Juda po Islaeli po?
• Etẹwẹ sọgan jọ eyin mẹhe sọalọakọ́n nado to Jiwheyẹwhe sẹ̀n lẹ ze agbasanu lẹ do otẹn tintan mẹ to gbẹzan yetọn mẹ?
• To dogbapọnna Mika weta 1 po 2 po godo, naegbọn hiẹ tindo nujikudo dọ todido towe yin nujọnu tọn?
[Yẹdide to weda 9]
Dọdai Mika tọn sọgan hẹn mí lodo to gbigbọmẹ
[Yẹdide to weda 10]
Taidi pipòtọ Ju lẹ tọn to owhe 537 J.W.M., Islaelivi gbigbọmẹ tọn lẹ po gbẹdohẹmẹtọ yetọn lẹ po ze sinsẹ̀n-bibasi nugbo daga