Alọgọ Nankọ Wẹ Mí Sọgan Donukun sọn Jiwheyẹwhe Dè

TO OWHE kanweko ṣinatọ̀ntọ J.W.M., Ahọlu Hẹzekia Juda tọn heyin owhe-39-mẹvi sè dọ azọ̀n he e to jijẹ lọ wẹ na hù i. Na linlin lọ gbàhundona ẹn wutu, Hẹzekia vẹvẹna Jiwheyẹwhe vẹkuvẹku to odẹ̀ mẹ nado hẹnazọ̀ngbọna ẹn. Jiwheyẹwhe sọ gblọn gbọn yẹwhegán etọn gblamẹ dọmọ: “Yẹn ko sè odẹ̀ towe, yẹn mọ dasin towe, doayi e go, yẹn na yí owhe fọtọ̀n dogọ azán towe.”—Isaia 38:1-5.

Naegbọn Jiwheyẹwhe yinuwa bo gọalọ to whẹho enẹ mẹ? Owhe kanweko susu jẹnukọn, Jiwheyẹwhe ko dopagbe na Ahọlu Davidi dodonọ dọmọ: “Owhé towe po ahọludu towe po yè na hẹn lí kakadoi to nukọn towe, yè na hẹn ofìn towe lodo kakadoi.” Jiwheyẹwhe sọ dehia dọ Mẹssia lọ na yin jiji to kúnkàn Davidi tọn mẹ. (2 Samuẹli 7:16; Psalm 89:20, 26-29; Isaia 11:1) To whenuena Hẹzekia jẹazọ̀n, e ma ko tindo visunnu de gba. Enẹwutu, mẹde ma tin sọn kúnkàn Davidi tọn mẹ he na jẹ ofìn lọ ji ba. Alọgọ Jiwheyẹwhe tọn to whẹho Hẹzekia tọn mẹ hẹn lẹndai titengbe lọ di heyin nado basi hihọ́na hukan whẹndo tọn he mẹ Mẹssia na wá sọn.

Nado hẹn opagbe etọn lẹ di, Jehovah yin whinwhàn nado yinuwa do ota omẹ etọn lẹ tọn mẹ to nujijọ susu lẹ mẹ to ojlẹ he jẹnukọnna Klistiani tọn lẹ gblamẹ. Mose dọho gando whlẹngán Islaeli tọn sọn kanlinmọgbenu to Egipti go dọmọ: “Na OKLUNỌ lọ yiwanna mì wutu wẹ, podọ na ewọ na do payi whiwhle lọ go he e whlé hlan otọ́ mìtọn lẹ wutu wẹ, OKLUNỌ lọ do yí alọ hlọnhlọnnọ de do hẹn mì jẹgbonu wá.”—Deutelonomi 7:8.

To owhe kanweko tintan whenu, Jiwheyẹwhe sọ yinuwa ga nado hẹn lẹndai etọn lẹ di. Di apajlẹ, Juvi de he nọ yin Saulu mọ numimọ jiawu de to aliho Damasku tọn ji ehe hẹnalọdotena ẹn sọn homẹkẹndido devi Klisti tọn lẹ mẹ. Didiọzun Klistiani dawe ehe tọn, he wá lẹzun apọsteli Paulu, gọalọ taun to wẹndagbe lọ hinhẹn gbayipe to akọta lẹ ṣẹnṣẹn mẹ.—Owalọ lẹ 9:1-16; Lomunu lẹ 11:13.

Be Alọgọ Nọ Wá to Whepoponu Wẹ Ya?

Be Jiwheyẹwhe nọ yinuwa nado gọalọ to whepoponu wẹ kavi to ojlẹ vonọtaun lẹ kẹdẹ mẹ? Owe-wiwe dohia hezeheze dọ e ma nọ jọ to whepoponu gba. Dile etlẹ yindọ Jiwheyẹwhe whlẹn jọja Heblunu atọ̀n lẹ sọn zòhọ miyọ́n tọn lọ mẹ bosọ whlẹn yẹwhegán Daniẹli sọn odò kinnikinni tọn mẹ, e ma yinuwa nado whlẹn yẹwhegán devo lẹ sọn okú si gba. (2 Otannugbo lẹ 24:20, 21; Daniẹli 3:21-27; 6:16-22; Heblu lẹ 11:37) Pita yin whinwhlẹn to azọ́njiawu-liho sọn ganpa mẹ fie Hẹlodi Aglipa I ko sú i do. Ṣogan, ahọlu dopolọ wẹ hù apọsteli Jakobu, bọ Jiwheyẹwhe ma yinuwa nado glọnalina ẹn gba. (Owalọ lẹ 12:1-11) Jiwheyẹwhe na huhlọn apọsteli lẹ nado hẹnazọ̀ngbọnamẹ bo tlẹ fọ́n oṣiọ lẹ sọnku, ṣigba e ma yigbe nado de ‘owùn to agbasalan mẹ’ he sọgan zẹẹmẹdo madogán agbasa tọn, he to tukladona apọsteli Paulu sẹ̀ gba.—2 Kọlintinu lẹ 12:7-9; Owalọ lẹ 9:32-41; 1 Kọlintinu lẹ 12:28.

Jiwheyẹwhe ma yinuwa nado glọnalina homẹkẹn sinsinyẹn he yin dido devi Klisti tọn lẹ gbọn Ahọluigbagán Lomu tọn Néron dali gba. Klistiani lẹ yin yasana, bo yin mimẹ̀n gbẹ̀te, bọ delẹ yin dindlán hlan kanlin hùnylantọ lẹ. Ṣigba, homẹkẹn ehe ma paṣa Klistiani dowhenu tọn lẹ gba, podọ e họnwun dọ e ma hẹn yise yetọn to tintin Jiwheyẹwhe tọn mẹ gbọjọ gba. Na Jesu ko na avase devi etọn lẹ dọ yé na yin hinhẹn yì whẹdatẹn lẹ podọ dọ yé dona jiya bo tlẹ na yin hùhù na yise yetọn wutu.—Matiu 10:17-22.

Kẹdẹdile Jiwheyẹwhe ko basi wayi do, e sọ penugo to egbehe ga nado whlẹn devizọnwatọ etọn lẹ sọn ninọmẹ owù tọn lẹ mẹ, podọ mẹhe lẹndọ yé ko duvivi hihọ́-basinamẹ etọn tọn lẹ ma dona yin homọdọdego gba. Etomọṣo, e vẹawu nado dọ ẹ tlọlọ dọ Jiwheyẹwhe nọ yinuwa kavi ma nọ yinuwa nado basi hihọ́namẹ to ninọmẹ mọnkọtọn lẹ mẹ. Devizọnwatọ nugbonọ Jehovah tọn susu wẹ yin awugblena to wuwujẹgbonu he jọ to Toulouse mẹ, podọ Klistiani nugbonọ fọtọ́n susu wẹ kú to osla Nazi tọn po Aṣẹglanglanpanamẹtọ lẹ tọn po mẹ kavi to nugbajẹmẹji sinsinyẹn devo lẹ mẹ bọ Jiwheyẹwhe ma yí nudepope wà nado glọnalina ẹn. Naegbọn Jiwheyẹwhe ma nọ yinuwa do ota omẹ etọn lẹpo tọn mẹ to whepoponu?—Daniẹli 3:17, 18.

“Ojlẹ po Kosọ Po”

To whenuena nugbajẹmẹji de jọ, e sọgan gando mẹdepope go, vlavo mẹlọ yin nugbonọ hlan Jiwheyẹwhe kavi lala. To wuwujẹgbonu he jọ to Toulouse, to ehe mẹ Alain po Liliane po họngán sọn, gbẹtọ 30 wẹ kú bọ kanweko susu lẹ yin awugblena, dile e tlẹ yindọ e ma yin owhẹ̀ yetọn wẹ. Gbẹtọ fọtọ́n donu ao susu wẹ nọ jiya sẹ́nhẹngba tọn, hunkunkun to aliho numakiyana tọn mẹ, kavi awhàn lẹ tọn lẹdo aihọn pé, podọ yé ma sọgan gblewhẹdo Jiwheyẹwhe na kosọ ylankan yetọn gba. Biblu flinnu mí dọ “ojlẹ po kosọ po mẹ wẹ onú te” na mẹlẹpo.—Yẹwhehodọtọ 9:11.

Humọ, gbẹtọvi lẹ nọ jẹazọ̀n, poyọnho, bo nọ kú. Mẹdelẹ he tlẹ ko lẹndọ Jiwheyẹwhe whlẹn ogbẹ̀ yetọn gán to aliho jiawu de mẹ, kavi mẹhe dopẹna ẹn dọ e gọalọna yé nado jẹgángán sọn awutu de mẹ lẹ tlẹ dona kú to godo mẹ. Didesẹ azọ̀n po okú po tọn gọna ‘dasin lẹpo sunsunsẹ̀’ sọn nukun gbẹtọvi lẹ tọn mẹ gbẹ́ pò to nukọn ja.—Osọhia 21:1-4.

Na enẹ nido jọ, mí tindo nuhudo nude tọn he gbloada taun bo sẹhundaga hú nuyiwa hihọ́-basinamẹ sọn ojlẹ de mẹ jẹ devo mẹ tọn. Biblu ylọ nujijọ enẹ dọ ‘azán daho Jehovah tọn.’ (Zẹfania 1:14) To nujijọ daho lẹdo aihọn pé ehe whenu, Jiwheyẹwhe na de ylanwiwa lẹpo sẹ̀. Dotẹnmẹ lọ na hundote na gbẹtọvi lẹ nado nọgbẹ̀ kakadoi to ninọmẹ pipé de mẹ, to ehe mẹ “yè ma na flin [onú] hoho tọn, mọ yé ma na wá linlẹn mẹ.” (Isaia 65:17) Yèdọ oṣiọ lẹ lọsu na yin hinhẹngọwa ogbẹ̀, bo gbọnmọ dali dè nuhe yin nugbajẹmẹji daho hugan gbẹtọvi lẹ tọn sẹ̀ sọn aimẹ. (Johanu 5:28, 29) To whenẹnu, Jiwheyẹwhe na ko gbọn owanyi sisosiso etọn po dagbewa etọn po gblamẹ didẹ nuhahun gbẹtọvi lẹ tọn kakadoi.

Lehe Jiwheyẹwhe Nọ Gọalọ to Egbehe Do

Ṣigba, ehe ma zẹẹmẹdo dọ Jiwheyẹwhe nọ blá alọ dogo todin bo nọ to nudida lẹ pọ́n bọ yé nọ to yaji gba. To egbehe, Jiwheyẹwhe hùn dotẹnmẹ lọ dote na gbẹtọvi lẹpo, mahopọnna akọ̀ kavi awà he ji yé wá sọn, nado wá yọ́n ewọ bo wleawuna haṣinṣan mẹdetiti tọn hẹ ẹ. (1 Timoti 2:3, 4) Jesu basi zẹẹmẹ nuyiwa ehe tọn dọmọ: “Mẹdepope ma sọgan wá dè e, adavo Otọ́ he do mi hlan dọ̀n ẹn.” (Johanu 6:44) Jiwheyẹwhe nọ dọ̀n gbẹtọ ahunjijlọnọ lẹ wá Jesu dè gbọn owẹ̀n Ahọluduta tọn he devizọnwatọ etọn lẹ to lilá lẹdo aihọn pé lọ gblamẹ.

To yidogọ mẹ, Jiwheyẹwhe nọ yinuwa tlọlọ do gbẹzan mẹhe jlo nado nọ anademẹ etọn glọ lẹ tọn ji. Jiwheyẹwhe nọ yí gbigbọ wiwe etọn zan nado ‘hùn ahun yetọn’ nado mọnukunnujẹ ojlo etọn mẹ podọ nado yí nubiọtomẹsi etọn lẹ do yizan mẹ. (Owalọ lẹ 16:14) Mọwẹ, gbọn awuwiwlena dotẹnmẹ hundote lọ nado yọ́n ewọ, Ohó etọn, po lẹndai etọn lẹ po dali, Jiwheyẹwhe dohia dọ emi tindo ojlo owanyinọ to dopodopo mítọn lẹ mẹ.—Johanu 17:3.

To popolẹpo mẹ, Jiwheyẹwhe nọ gọalọna devizọnwatọ etọn lẹ to egbehe, e mayin gbọn whiwhlẹn yé gán to azọ́njiawu-liho gba, ṣigba gbọn nina yé gbigbọ wiwe etọn po ‘huhlọn he hú jọwamọ tọn’ po nado pehẹ ninọmẹ depope he pannukọn yé dali. (2 Kọlintinu lẹ 4:7) Apọsteli Paulu wlan dọmọ: “Yẹn sọgan wà onú popo gbọn [Jehovah Jiwheyẹwhe] he to huhlọnna mi mẹ.”—Filippinu lẹ 4:13.

Enẹwutu, mí tindo whẹwhinwhẹ́n lẹpo nado dopẹna Jiwheyẹwhe to azán lẹpo gbè na ogbẹ̀ po todido he e na mí po nado nọgbẹ̀ kakadoi to aihọn he mẹ yajiji ma na tin te de mẹ. “Etẹ yẹn na na hlan OKLUNỌ na dagbewa etọn lẹ hlan dali ṣie?” wẹ psalm-kantọlọ kanse. “Yẹn na ze kọfo whlẹngán tọn lọ, bo dawhá ylọ oyín OKLUNỌ tọn.” (Psalm 116:12, 13) Linlinnamẹwe ehelẹ hihia to gbesisọmẹ na gọalọna we nado yọ́n nuhe Jiwheyẹwhe ko wà, to wiwà, bo nasọ wà to sọgodo he na hẹn ayajẹ wá todin po todido he lodo de po na sọgodo.—1 Timoti 4:8.

[Nudọnamẹ tangan lẹ to weda 6]

‘Yè ma na flin onú hoho tọn lẹ, mọ yé ma na wá linlẹn mẹ.’—Isaia 65:17.

[Yẹdide to weda 5]

To ojlẹ Biblu tọn lẹ mẹ, Jehovah ma glọnalina zannu dindlan do Zẹkalia gba . . .

mọjanwẹ e ma glọnalina homẹvọnọ lẹ hùhù gbọn Helọdi dali

[Yẹdide to weda 7]

Ojlẹ lọ ko sẹpọ whenuena yajiji ma na tin ba; oṣiọ lẹ na tlẹ sọ gọwa ogbẹ̀