Dawe de He Yiwanna Ogbẹ̀ po Gbẹtọ lẹ Po

DANIEL SYDLIK, he ko yin dopo to Hagbẹ Anademẹtọ Kunnudetọ Jehovah tọn lẹ tọn mẹ na ojlẹ dindẹn, dotana gbẹzan aigba ji tọn etọn to mardi 18 avril 2006. Owhe 87 wẹ e tindo bo ko wadevizọn taidi hagbẹ whẹndo Bẹtẹli Brooklyn tọn, to New York, na nudi owhe 60.

Mẹmẹsunnu Dan, dile họntọn vivẹ etọn lẹ nọ ylọ ẹ dọ, wá Bẹtẹli to 1946. Jẹnukọnna enẹ, e wadevizọn taidi gbehosọnalitọ titengbe to Californie bosọ yí ojlẹ delẹ zan to ganmẹ to Wẹkẹ Whàn II whenu na kadaninọ Klistiani tọn etọn wutu. Numimọ he e tindo to ojlẹ enẹ mẹ yin zẹẹmẹ basina hezeheze to otàn gbẹzan tọn etọn mẹ, he sọawuhia to Atọ̀họ̀-Nuhihọ́ Lọ Tọn 1^er juin 1985 tọn mẹ, to hosọ lọ glọ “Que ton amitié est précieuse, ô Dieu!”

Mẹmẹsunnu Sydlik yin yinyọnẹn taidi gbẹtọ whiwhẹnọ he yọ́n dọnsẹpọ de. Eyin e to anadena dogbapọn wefọ egbesọ tọn na whẹndo Bẹtẹli tọn, pọndohlan dagbe po owanyi etọn na ogbẹ̀ po nọ saba sọawuhia to hodidọ bẹjẹeji tọn etọn lẹ mẹ dọmọ: “E yọ́n nado tin to ogbẹ̀ bo sẹ̀n Jiwheyẹwhe ogbẹ̀nọ nugbo lọ.” Taidi togunmẹhodọtọ de, e nọ na tuli mẹdevo lẹ nado wleawuna pọndohlan ehe, gbọn togunmẹho didọ do hosọ delẹ ji dali taidi “Ayajẹnọ Wẹ Mẹhe Jiwheyẹwhe Yetọn Yin Jehovah,” “Ayajẹ Jehovah Tọn Didohia,” “Hẹn Nuyiwa Gbigbọ Jiwheyẹwhe Tọn Dote,” podọ “Dagbe Hugan lọ Gbẹ́ to Nukọn Ja.”

To 1970, Mẹmẹsunnu Sydlik wlealọ hẹ Marina Hodson, sọn Angleterre, mẹhe e basi zẹẹmẹ etọn taidi “alọgọtọ de sọn Jiwheyẹwhe dè.” Yé omẹ awe lẹ sẹ̀n Jehovah to pọmẹ na owhe 35 linlán.

To owhe he e yizan to Bẹtẹli lẹ mẹ, Mẹmẹsunnu Sydlik wadevizọn to azọ́nwatẹn voovo lẹ, he bẹ wezintẹn po Azọ́nwatẹn Wekinkan tọn po hẹn. E sọ wazọ́n to azọ́nwatẹn ladio titobasinanu lọ tọn he nọ yin WBBR. Enẹgodo, to novembre 1974, e yin dide taidi dopo to Hagbẹ Anademẹtọ lọ mẹ bo wazọ́n to godo mẹ hẹ wedegbẹ́ Nukunpedomẹgo po Wekinkan tọn po.

Na nuhe lán to owhe 30 ji, azọ́nwiwa Mẹmẹsunnu Sydlik tọn hẹ Wedegbẹ́ Nukunpedomẹgo tọn do owanyi sisosiso he e tindo na gbẹtọ lẹ hia. E na tuli mẹsusu po ogbè zodolanmẹnamẹ tọn etọn po, bo nọ dọ̀n ayidonugo wá lẹblanulọkẹyi họakuẹ he mí tindo nado sẹ̀n Jehovah ji to whepoponu. E nọ zinnudeji gbọzangbọzan dọ ayajẹ nujọnu tọn ma sinai do ninọmẹ he lẹdo mí lẹ ji gba, adavo do haṣinṣan mítọn hẹ Jehovah po nukun he mí nọ yí do pọ́n ogbẹ̀ po ji.

Dile etlẹ yindọ whẹndo Bẹtẹli tọn na jẹdò Mẹmẹsunnu Sydlik tọn taun, apajlẹ etọn taidi mẹhe yiwanna ogbẹ̀ po gbẹtọ lẹ po nugbonugbo na gbọṣi aimẹ. Mí deji dọ ewọ tin to mẹhe yin nùdego to Osọhia 14:13 mẹ lẹ mẹ dọmọ: “Donanọ wẹ oṣiọ he kú to Oklunọ mẹ lẹ sọn dinvie yì: mọwẹ, [gbigbọ] dọ, na yé nido gbọjẹ sọn tukla yetọn lẹ mẹ; azọ́n yetọn sọ to hihodo yé.”