Oylọ-Basinamẹ de Na Mẹlẹpo! — WESẸDOTẸN INTẸNẸT JI TỌN Watchtower Tọn

Oylọ-Basinamẹ de Na Mẹlẹpo!

OYLỌ tẹwẹ yin bibasina mẹlẹpo? Oylọ-basinamẹ lọ nado wá dla dopo to wekantẹn alahọ Kunnudetọ Jehovah tọn lẹ tọn he nọ saba yin yiylọdọ Bẹtẹli pọ́n. Nọtẹn mọnkọtọn 118 tin to otò voovo lẹ mẹ. Mẹhe nọ wá dla Bẹtẹli pọ́n lẹ nọ saba do pinpẹn-nutọn-yinyọnẹn ahundopo tọn hia na nuhe go yé doayi to finẹ lẹ wutu.

To whenue dẹpẹ he to Biblu plọn de doayi azọ́n sinsinyẹnwatọ susu he yí ayajẹ do to devizọnwa na Jehovah to wekantẹn alahọ Mexique tọn mẹ go, e yin nuyiwadeji sọmọ bọ e kanse dọ: “Etẹwẹ n’dona wà nado sọgan nọfi?” Nuhe yè dọna ẹn wẹ yindọ: “Tintan, hiẹ dona yí baptẹm. Enẹgodo, e na yọ́n dọ a ni sẹ̀n taidi gbehosọnalitọ—enẹ wẹ lilátọ Ahọluduta whenu-gigọ́ tọn.” Dẹpẹ lọ wà nuhe yin didọna ẹn lọ lẹ, podọ to owhe awe godo e yin oylọ-basina nado wadevizọn to Bẹtẹli Mexique tọn, fie e to devizọnwa te na owhe 20 linlán.

Etẹwẹ Bẹtẹli Yin?

To Heblugbe mẹ, “Bẹtẹli” zẹẹmẹdo “Ohọ̀ Jiwheyẹwhe tọn.” (Gẹn. 28:19, nudọnamẹ odò tọn) Nọtẹn wekantẹn alahọ voovo lẹ tọn nọ yin yiyizan nado zín Biblu po owe sinai do Biblu ji lẹ po jẹgbonu bo má yé, podọ nado na alọgọ gbigbọmẹ tọn agun Kunnudetọ Jehovah tọn lẹ tọn he lán to 100000 ji lẹdo aihọn pé. Diblayin azọ́nwatọ Bẹtẹli tọn 20000—sunnu po yọnnu po he wá sọn ninọmẹ po aṣa voovo lẹ po mẹ—desọn ojlo mẹ wá bo yí whenu-gigọ́ do to devizọnwa na Jehovah gọna mẹmẹsunnu po mẹmẹyọnnu yetọn lẹ po. Mẹhe ko yí owhe susu zan to azọ́n Klistiani tọn ehe mẹ lẹ nọ wadevizọn dopọ hẹ jọja huhlọnnọ lẹ. To whèjai po sẹfifo lẹ po, hagbẹ whẹndo Bẹtẹli tọn lẹ nọ hùnhomẹ nado kọnawudopọ hẹ agun Kunnudetọ Jehovah tọn he sẹpọ lẹ tọn to opli lẹ ji podọ to lizọnyizọn Klistiani tọn mẹ. Yé sọ nọ yí whenu he vò na yé lẹ zan na Biblu pinplọn, ayidedai, podọ nukunpipedo whẹho mẹdetiti tọn lẹ go.

Hagbẹ whẹndo Bẹtẹli tọn lẹ nọ mọ apòmẹ-kuẹ kleun de yí to sunmẹsunmẹ. Yé nọ dù núdùdù hunsindagbe tọn bo nọ nọ̀ ohọ̀ he tin to wiweji bọ yè sọgan voawu te lẹ mẹ. Owhé Bẹtẹli tọn lẹ ma nọ yin owhé vẹnpẹn vẹnpẹn lẹ. Etomọṣo, yé nọ yọnwhanpẹ bo nọ to jlẹkaji. E ma yin lehe ohọ̀ lẹ po lẹdo lọ blebu po yin nukunpedego ganji do gọna lehe azọ́n lọ to tito ji do kẹdẹ wẹ nọ yinuwado jonọ lẹ ji gba, ṣigba gbigbọ mẹtọnhopọn po gbekọndopọ po tọn he yin ayidego to Bẹtẹli ga. Mẹlẹpo wẹ nọ wazọ́n sinsinyẹn, etomọṣo alọnu mẹdepope tọn ma nọ ján sọmọ bọ e ma nado jọmẹ. Mẹhe nọ wazọ́n to Bẹtẹli lẹ ma nọ ṣinyan hagbẹ kavi tindo numọtolanmẹ lọ dọ yé yiaga hugan mẹdevo lẹ na azọ́n he yé nọ wà wutu. Azọ́n lẹpo wẹ yin nujọnu, yèdọ nukunpipedo wiwejininọ, jipa lẹ, nudidà go, azọ́nwiwa to nọtẹn wezinzin tọn kavi to wekantẹn de. Hagbẹ Bẹtẹli tọn lẹ po mẹhe nọ wá wazọ́n to Bẹtẹli lẹ po yin yinyọnẹn taidi mẹhe nọ wazọ́n dopọ nado nọgodona lizọnyizọn Kunnudetọ Jehovah tọn lẹ tọn.—Kọl. 3:23.

Nuhe Hagbẹ Bẹtẹli Tọn Delẹ Dọ

Mì gbọ mí ni plọnnu vude dogọ gando mẹhe wleawuna whẹndo lẹdo aihọn pé tọn ehelẹ go. Etẹwẹ whàn yé nado tindo ojlo nado wadevizọn to Bẹtẹli? Mì gbọ mí ni lẹnnupọndo apajlẹ Mario tọn ji. To whenue Mario lẹzun dopo to Kunnudetọ Jehovah tọn lẹ mẹ, azọ́nwhé daho Allemagne tọn de he nọ sà ohún wunmẹwunmẹ lẹ wẹ e nọ wazọ́n te podọ agbasazọ́n etọn pekuẹ taun bọ dotẹnmẹ lọ hundote na ẹn nado yinukọn. To whenue e yí baptẹm, e ma dẹn bọ e ze ede jo nado wazọ́n to Bẹtẹli otò etọn tọn na osẹ dopo. E yin azọ́ndena nado gọalọ to nọtẹn wezinzin tọn. Mario doayi e go dọ vogbingbọn daho de tin to mẹhe po e po to azọ́nwa to Bẹtẹli lẹ po hagbẹ agbasazọ́n etọn tọn lẹ po ṣẹnṣẹn. Enẹwutu, e doalọ owe mẹ nado basi sinsẹ̀nzọn whenu-gigọ́ tọn to Bẹtẹli. Dile etlẹ yindọ e vẹawuna susu hagbẹ whẹndo tọn etọn lẹ po azọ́nwatọgbẹ́ etọn lẹ po nado mọnukunnujẹ nudide etọn mẹ, Mario yí ayajẹ do to sinsẹ̀n to Bẹtẹli Allemagne tọn to alọnu din.

Mẹsusu he ma yì wehọmẹ sọmọ kavi ma mọ azọ́nplọnmẹ vonọtaun yí lẹ nọ biọ sinsẹ̀nzọn Bẹtẹli tọn mẹ. Numimọ enẹ wẹ Abel he ko sẹ̀n to Bẹtẹli Mexique tọn na owhe 15 tindo. E dọmọ: “N’plọn nususu to Bẹtẹli. N’plọn nado nọ yí maṣinu wezinzin tọn he gẹdẹ taun lẹ do wazọ́n. N’yọnẹn dọ po azọ́nyinyọnẹn ehe po, n’sọgan wazọ́n bo mọ akuẹ susu to gbonu Bẹtẹli tọn, ṣigba n’ma na duvivi nuhe tin tofi tọn—gbẹzan he vò sọn magbọjẹ po agbàwhinwhlẹn he tin to ajọwhé susu po si, yèdọ gbẹzan blẹomẹninọ po pekọhẹnwanamẹ po tọn. N’tindo numọtolanmẹ lọ dọ azọ́nplọnmẹ dagbe he ko gọalọna mi nado yọ́n azọ́n bo whẹ́n to gbigbọ-liho wẹ n’mọyi. N’ma na ko penugo nado mọ ale gbigbọmẹ tọn mọnkọtọn yí etlẹ yin to wehọmẹ alavọ tọn he diyin hugan.”

Dlapọn de Bibasi Sọgan Jlọ We Dote

Eyin mẹde dla Bẹtẹli pọ́n, enẹ sọgan yinuwado gbigbọnọ-yinyin etọn ji to aliho dagbe mẹ. Ehe jọ to whẹho Omar tọn mẹ, to Mexique. Onọ̀ etọn plọn ẹn nugbo Biblu tọn lẹ. Ṣigba, to whenue Omar tindo owhe 17, e doalọtena opli Klistiani tọn po lizọnyizọn gbangba tọn po. To godo mẹ, e doalọ to onú he ma sọgbe lẹ wiwà mẹ bo jẹ afọdona agbasanu lẹ ji. To whenue Omar jẹ azọ́nwa na azọ́nwhé kàntitẹ tọn de ji, e yin dopo to plipli de mẹ he yin didohlan Bẹtẹli Mexique tọn nado do lehe maṣinu de nọ wazọ́n do hia. Omar basi zẹẹmẹ dọmọ: “To whenue mí fó, mẹhe yí jonọ mítọn lẹ basi dlapọn Bẹtẹli tọn na mí. Nuhe n’mọ po lehe yé yinuwa hẹ mi do po hẹn mi lẹnnupọndo gbẹzan he zan n’te ji, gbẹzan he hẹn mi jẹla sọn Jehovah dè. To afọdopolọji, n’vọ́ opli lẹ yìyì bẹjẹeji bosọ jẹ Biblu plọn ji. Osun ṣidopo to dlapọn ṣie yì Bẹtẹli godo, n’yí baptẹm. N’dopẹna Jehovah na mẹwhinwhàn he n’mọyi sọn Bẹtẹli yìyì enẹ mẹ.”

Masahiko he tin to Japon lọsu yin pinplọn whẹ́n to whẹndo Kunnudetọ tọn mẹ. Ṣigba, e wá jẹ mimọ ji dọ gbẹzan Klistiani tọn yin gbẹzan hẹngogo tọn. E jẹ mahẹ tindo ji to nuwiwa wehọmẹ tọn lẹ mẹ bo doalọtena opli lẹ po azọ́n yẹwhehodidọ tọn po. Masahiko flin dọmọ: “To gbèdopo whẹndo mítọn po họntọn Klistiani delẹ po basi dide nado yì dla Bẹtẹli pọ́n. Na whẹndo ṣie tẹkudeji dọ ma hodo yé wutu, n’wàmọ. To dlapọn Bẹtẹli tọn whenu, n’mọ tulinamẹ yí hugan gbede pọ́n. Awuvivi he n’mọyi sọn gbẹdido hẹ Klistiani devo lẹ to gbejizọnlin lọ whenu yin nude he n’ma ko tindo numimọ etọn hẹ họntọn ṣie he ma yin Kunnudetọ lẹ pọ́n. N’wá tindo ojlo lọ nado zan gbẹzan Klistiani tọn, podọ n’basi dide nado biọ plọnmẹ Biblu de.” Todin Masahiko to sinsẹ̀n taidi lizọnyizọnwatọ whenu-gigọ́ tọn de to agun etọn mẹ.

Mẹmẹyọnnu Kunnudetọ de sẹtẹn sọn France nado yì wazọ́n to Moscou. E hẹn kanṣiṣa hodọdopọ tọn he e tindo hẹ omẹ Jehovah tọn lẹ bu bo gbọjọ to gbigbọ-liho. E doalọ to ylanwiwa mẹ podọ to godo mẹ e wlealọ hẹ mẹhe mayin Kunnudetọ de. Enẹgodo, mẹmẹyọnnu gbigbọnọ de wá sọn France nado pọ́n ẹn, podọ yé basi gbejizọnlin yì St. Petersburg, to Russie nado dla Bẹtẹli pọ́n. E wlan dọmọ: “Yé yí mí po zohunhun po to Bẹtẹli, podọ ehe yinuwado ji e. Jijọho tin to finẹ. N’mọdọ gbigbọ Jehovah tọn to finẹ. Etẹwutu n’gbọn nuṣiwa dali tọ́n sọn titobasinanu Jehovah tọn mẹ? To dlapọn ṣie yì Bẹtẹli godo, n’hodẹ̀ bo biọ alọgọ Jehovah tọn podọ whladopo dogọ n’magbe bo jẹ Biblu plọn viyọnnu ṣie lẹ ji.” Gbọnvona alọgọ gbigbọmẹ tọn devo he Kunnudetọ he gbọjọ wayi ehe mọyi, e yin hinhẹn lodo taun gbọn dlapọn he e basi yì Bẹtẹli dali, podọ to enẹgodo e basi nukọnyiyi dagbe.

Etẹwẹ dogbọn nuyiwadomẹji he dlapọn Bẹtẹli tọn sọgan tindo do mẹhe ma jẹakọ hẹ Kunnudetọ Jehovah tọn lẹ ji dali? To 1988, Alberto he peve to tonudidọ mẹ dla Bẹtẹli Brésil tọn pọ́n. Wiwejininọ, titojininọ, podọ titengbe lehe azọ́n he to yìyì lọ to nùvo na mẹlẹpo do yinuwado e ji taun. Ojlẹ kleun de whẹpo Alberto do yì dla Bẹtẹli pọ́n, e basi dlapọn yì wehọmẹ sinsẹ̀n-nuplọnmẹ tọn he yọnwẹn etọn to sinsẹ̀n te taidi yẹwhenọ de. Alberto doayi vogbingbọn lọ go. Alberto dọmọ: “To wehọmẹ sinsẹ̀n-nuplọnmẹ tọn lọ, nulẹpo nọ yin wiwà to nuglọ.” Ojlẹ kleun de to dlapọn Bẹtẹli tọn godo, e kẹalọyi plọnmẹ Biblu, jo tonudidọ do, podọ e to sinsẹ̀n taidi mẹho agun tọn de todin.

Mì Wá Dla Bẹtẹli Pọ́n!

Mẹsusu ko dovivẹnu taun nado dla wekantẹn alahọ otò yetọn tọn pọ́n. Di apajlẹ, to Brésil Paulo po Eugenia po sẹ̀ akuẹ do na owhe ẹnẹ nado sọgan dohún bo basi gbejizọnlin azán awe tọn he yì kilomẹtlu 3000 nado dla owhé Bẹtẹli tọn otò lọ tọn pọ́n. Yé dọmọ: “Dlapọn lọ jẹna vivẹnu lẹpo. Todin, pọndohlan mítọn gando titobasinanu Jehovah tọn go gbloada dogọ. To whedelẹnu, eyin mí basi zẹẹmẹ azọ́n he nọ yin wiwà to Bẹtẹli tọn na plọnmẹ Biblu mítọn lẹ, yé nọ kanse dọ, ‘Be mì ko yì dọ́n pọ́n?’ Bẹsọn din, mí sọgan gblọn dọ, mọwẹ.”

Be wekantẹn alahọ tọn po owhé Bẹtẹli tọn de po tin to otò he mẹ a te kavi otò he to yakẹ de mẹ ya? Mí to oylọ-basina we nado yì dla nọtẹn lọ pọ́n. E họnwun dọ hiẹ na mọ kuavọ zohunhun tọn yí podọ hiẹ na mọ ale gbigbọmẹ tọn susu yí sọn dlapọn Bẹtẹli tọn mẹ.

[Yẹdide to weda 18]

Mario

[Yẹdide to weda 18]

Abel

[Yẹdide to weda 18]

Allemagne

[Yẹdide to weda 18]

Japon

[Yẹdide to weda 18]

Brésil