Be Ehe Sọgan Yin Yanwle He Yọ́n Hugan lọ Na We Ya?
EYIN hiẹ yin Klistiani he ko yí baptẹm de, matin ayihaawe owanyi na Jiwheyẹwhe nọ whàn we nado wà ojlo etọn. Humọ, lizọnyizọn lọ dona yin nuyiwa de he hiẹ jo dewe na taun na jide tọn. To popolẹpo mẹ, Jesu Klisti deazọnna hodotọ etọn lẹpo nado nọ hẹn gbẹtọ lẹ zun devi. (Matiu 28:19, 20) Mọwẹ, hiẹ sọgan to agbasazọ́n wà todin nado penukundo dewe go. Ṣigba taidi hodotọ Jesu tọn de podọ dopo to Kunnudetọ Jehovah tọn lẹ mẹ, tintan jẹnukọn whẹ́ hiẹ yin Klistiani lizọnyizọnwatọ de—yèdọ mẹde he nọ ze azọ́n yẹwhehodidọ-Ahọluduta lọ tọn do otẹn tintan mẹ to gbẹzan mẹ—Matiu 24:14.
Vlavo hiẹ tin to owhe godo aflanmẹ tọn towe lẹ kavi bẹjẹeji owhe 20 towe tọn lẹ mẹ. E yọnbasi, dọ hiẹ ko lẹnnupọndo aliho nuyiwa tọn he hiẹ jlo na doafọna to gbẹ̀mẹ ji tlala. To nulinlẹnpọndo nudide he hundote na we lẹ ji mẹ, e yọnbasi taun dọ pekọ mẹdetiti tọn na yin whẹwhinwhẹ́n nujọnu tọn de.
To whelọnu lo, lẹnnupọndo nuhe Jørgen sọn Danemark dọ gando nudide he e basi go ji. Jørgen basi zẹẹmẹ nudide etọn tọn taidi “aliho gbẹzan tọn he yọ́n hugan de to ehe mẹ hiẹ sọgan ze ayidonugo do azọ́n nujọnu hugan tọn he tin lọ ji.” Eva, yọnnu owhe 31-mẹvi de sọn Grèce, dọmọ: “To gbẹzan ṣie yiyijlẹdo enẹ heyin hagbẹ ṣie lẹ tọn go mẹ, yẹn nọ wá tadona lọ kọ̀n to whepoponu dọ e tindo zẹẹmẹ hugan, tindo pekọ hugan, bosọ yin awuvivi tọn hugan.” Aliho gbẹzan tọn tẹwẹ nọ hẹn pekọ mọnkọtọn wá? Nawẹ hiẹ sọgan doafọna yanwle mọnkọtọn de gbọn?
Be Jiwheyẹwhe Nọ Deanana We Ya?
Nado de yanwle gbẹzan tọn de sọgan yin nuhe sinyẹnawu taun. Na taun tọn, mẹdelẹ sọgan jlo dọ Jiwheyẹwhe ni do nuhe e jlo taun dọ yé ni wà hia yé.
To whenuena Mose tin to Midiani, Jehovah deanana ẹn nado lẹkọyi Egipti nado plan Islaelivi lẹ jẹgbonu sọn kanlinmọgbenu. (Eksọdusi 3:1-10) Angẹli Jiwheyẹwhe tọn sọawuhia Gideoni, he yin dide nado whlẹn Islaeli sọn kọgbidinamẹ glọ. (Whẹdatọ 6:11-14) Davidi to lẹngbọ lẹ yìn to whenuena Jiwheyẹwhe dọna Samuẹli nado de e taidi ahọlu sọgodo tọn Islaeli tọn. (1 Samuẹli 16:1-13) Mí ma nọ yin anadena to aliho mọnkọtọn lẹ mẹ to egbehe gba. Kakatimọ, mí dona gbadopọnna whẹho lẹ bosọ de lehe mí na yí nugopipe heyin ninamẹ Jiwheyẹwhe tọn mítọn lẹ zan gbọn.
Jehovah ko hùn ‘ohọ̀n daho he nọ planmẹ jẹ nuyiwa kọ̀n de’ do nùvo na Klistiani jọja lẹ to egbehe. (1 Kọlintinu lẹ 16:9) Nawẹ e yinmọ gbọn? To owhe ao he wayi mẹ, sọha lilatọ Ahọluduta tọn lẹ ko jideji sọn nuhe hugan 2 125 000 jẹ nuhe hugan 6 000 000 lẹdo aihọn pé. Mẹnu lẹ wẹ gọalọ nado wleawuna Biblu, owe, alọnuwe, linlinnamẹwe, po alọnuwe pẹvi he nuhudo etọn tin na nukunpedomẹgo gbigbọmẹ tọn po azọ́n yẹwhehodidọ wẹndagbe lọ lilá lẹdo aihọn pé tọn lẹ po? Lẹblanulọkẹyi donanọ ehe yin vivi etọn dù gbọn hagbẹ whẹndo Bẹtẹli tọn lẹ lẹdo aihọn pé dali.
Gbẹzan Alemọyi Tọn De
Bẹtẹli zẹẹmẹdo “Owhé Jiwheyẹwhe tọn,” podọ owhé Bẹtẹli tọn lẹ wẹ yin nọtẹn na Klistiani mẹdezejotọ he to sinsẹ̀nzọnwa to tatọ́-tẹnnọ podọ to wekantẹn alahọ Ogbẹ́ Watch Tower tọn lẹ. (Gẹnẹsisi 28:19, NW nudọnamẹ odò tọn) Whẹndo egbezangbe Bẹtẹli tọn lẹ sọgan yin yiyijlẹdo ‘whédo heyin gbigbá gbọn nuyọnẹn dali’ heyin titobasina ganji bosọ yin didoai do owanyi na Jehovah ji lẹ go.—Howhinwhẹn lẹ 24:3.
Etẹwẹ sọgan yin didọ gando ninọmẹ taidi whẹndo nkọtọn he tin to Bẹtẹli go? Owhe 25 mẹvi heyin hagbẹ whẹndo Bẹtẹli tọn de sọn Estonie dọmọ: “Yẹn nọ duvivi numọtolanmẹ tintin to họntọn Jehovah tọn lẹ ṣẹnṣẹn to whepoponu tọn. Ehe gbẹsọ to adà he họakuẹ hugan sinsẹ̀nzọn Bẹtẹli tọn ṣie tọn yin zọnmii.”—Psalm 15:1, 2.
Lẹdo aihọn pé, nudi gbẹtọ 19 500 wẹ to vivi lẹblanulọkẹyi sinsẹ̀nzọn Bẹtẹli tọn tọn dù todin. (Psalm 110:3) To États-Unis, 46 to kanweko ji mẹhe tin to Bẹtẹli lẹ tọn wẹ tin to owhe 19 jẹ 29 gblamẹ. Taidi Isaia, yé ko dọmọ: “Yẹn die; do mi hlan.” (Isaia 6:8) Isaia—dile etlẹ ko klan ede dowiwe hlan Jehovah do sọ—gbẹsọ to ede ze jo na lẹblanulọkẹyi sinsẹ̀nzọn tọn dogọ de. E họnwun dọ ehe zẹẹmẹdo yíyí dagbenu mẹdetiti tọn delẹ do sanvọ́. Mẹhe tin to Bẹtẹli lẹ jo owhé po lẹdo he yé jẹakọhẹ yetọn lẹ po do, gọna onọ̀ lẹ, otọ́ lẹ, nọvisunnu lẹ, nọviyọnnu lẹ, po họntọn lẹ po. Avọ́sinsan ehelẹ yin bibasi sọn ojlo mẹ wá “na wẹndagbe tọn wutu.”—Malku 10:29, 30.
To alọ devo mẹ, dona gbigbọmẹ tọn nankọtọn lẹ die tin to Bẹtẹli! Jọja hagbẹ whẹndo Bẹtẹli tọn de to Russie dọmọ: “Gbọn mẹdetiti-yido-sanvọ́ dali, mí sọgan plọn nususu he na gọalọna mí nado nọgbẹ̀ to aihọn yọyọ lọ mẹ. Yẹn sọgan dọ dọ to whẹho ṣie mẹ, dona Jehovah tọn lẹ sù tlala hugan avọ́sinsan ṣie lẹ.”—Malaki 3:10.
Gbẹzan to Bẹtẹli
Etẹwẹ gbẹzan nọ taidi to Bẹtẹli? Hagbẹ whẹndo Bẹtẹli tọn lẹ yigbe dọ e yin dehe nọ jlọmẹdote bosọ nọ namẹ pekọ, yèdọ tlẹ yin awuvivi tọn. Jens, heyin owhe 43-mẹvi, duvivi sinsẹ̀nzọn Bẹtẹli tọn. Etẹwutu? E dọmọ: “Na numọtolanmẹ lọ dọ mí yin apadewhe vivẹnudido daho de tọn nado hẹn azọngban titengbe de di wutu. Yẹn penugo nado doayi gbigblo po nujọnu-yinyin azọ́n Jehovah tọn po go.”
Sọn lundi jẹ samedi, azán Bẹtẹli tọn de nọ bẹjẹeji po sinsẹ̀n-bibasi afọnnu tọn po. Ehe yin hodọdopọ Biblu tọn de, he nọ yin anadena gbọn mẹho numimọnọ de dali. To lundi whèjai lẹ, ganhiho dopo nọ yin kinklandovo na oplọn whẹndo tọn Biblu tọn po alọgọ Atọ̀họ̀-Nuhihọ́ Lọ Tọn po, bọ to whedelẹnu hodidọ heyin zize sinai do hosọ Owe-wiwe tọn de ji he sọgbe pẹpẹ na whẹndo Bẹtẹli tọn lọ nọ bọdego.
Etẹwẹ nọ jọ to whenuena mẹde ṣẹṣẹ wá Bẹtẹli? Nado hẹn hagbẹ yọyọ lẹ nado jẹakọhẹ gbẹzan Bẹtẹli tọn, mẹmẹsunnu he whèwhín whẹndo lọ tọn lẹ nọ dọ hodidọ he nọ dọhodo adà voovo sinsẹ̀nzọn Bẹtẹli tọn ji lẹ. Na osẹ sọha delẹ to owhe tintan whenu, hagbẹ yọyọ whẹndo Bẹtẹli tọn lẹ nọ yì wehọmẹ dagbe sẹmẹsẹmẹ tọn de heyin awuwlena nado hẹn nukunnumọjẹnumẹ Owe-wiwe tọn yetọn gblodeji. Omẹ yọyọ lẹ sọ nọ duvivi tito-to-whinnu vonọtaun Biblu hihia tọn de. To owhe tintan sinsẹ̀nzọn Bẹtẹli tọn yetọn whenu, hagbẹ yọyọ whẹndo lọ tọn lẹ nọ hia Biblu lọ blebu.
Etẹwẹ nọ yin nugandomẹgo azọ́nplọnmẹ ehe lẹpo tọn? Joshua, owhe 33-mẹvi heyin hagbẹ whẹndo Bẹtẹli Hong Kong tọn, gblọn dọmọ: “Bẹtẹli ko hẹn pinpẹn-nutọn-yinyọnẹn ṣie na Jehovah siso deji na taun tọn. Yẹn sọgan dogbẹ́ hẹ mẹmẹsunnu numimọnọ susu he ko yí suhugan gbẹzan yetọn lẹ zan to Jehovah sinsẹ̀n mẹ. Na taun tọn yẹn nọ duvivi tito-to-whinnu gbigbọmẹ tọn lẹ tọn, taidi sinsẹ̀n-bibasi afọnnu tọn po Oplọn Atọ̀họ̀-Nuhihọ́ Lọ Tọn whẹndo lọ tọn po. Humọ, yẹn yiwanna aliho gbẹzan tọn he tin to tito ji bo bọawu lọ. Ehe nọ hẹn mi vò sọn magbọjẹ he mayin dandan tọn lẹ mẹ. Yẹn sọ plọn lehe yè nọ penukundo onú lẹ go to aliho Klistiani tọn mẹ do, podọ ehe ko nọ saba sọawuhia nado yin alemọyinu.”
Hagbẹ whẹndo Bẹtẹli tọn lẹ nọ yí suhugan ojlẹ po vivẹnudido yetọn tọn po zan to nuhe yé ze yedelẹ jo nado wà mẹ. Enẹwẹ, nado yí nugopipe agbasamẹ po apọ̀nmẹ tọn yetọn lẹ po zan na taun tọn nado penukundo azọ́ndenamẹ he yé yin nina nado wà to Bẹtẹli go. Onú voovo susu wẹ dona yin wiwà. Mẹdelẹ nọ penukundo zomọ wezinzin tọn lẹ go kavi wazọ́n to ofi he owe lẹ nọ yin bibladopọ te, bo nọ wleawuna owe lẹ he nọ yin didohlan agun susu lẹ mẹ. Mẹdevo lẹ nọ wazọ́n to nudatẹn, núdùdù-họsa, kavi avọ̀-yantẹn. Azọ́ndenamẹ lẹ bẹ onú lẹ hinhẹndo wiwe ji, glelilẹ, azọ́n họgbigbá tọn, po mọmọ po hẹn. Mẹdevo lẹ tindo azọngban nado penukundo azọ́nwanu he nọ yin yiyizan to azọ́nwatẹn ehelẹ mẹ lẹ go. Mẹdevo lẹ nọ wleawuna nukunpedomẹgo agbasalilo tọn kavi wazọ́n to wekantẹn lẹ mẹ. Azọ́ndenamẹ Bẹtẹli tọn lẹpo wẹ nọ bẹ avùnnukundiọsọmẹnu awuvivinamẹ tọn lẹ hẹn bosọ nọ hẹn alemọyi jiawu lẹ wá. Azọ́n he nọ yin wiwà to Bẹtẹli lẹ nọ hẹn pekọ wá na taun tọn na e nọ ze dagbenu Ahọluduta lọ tọn lẹ daga bosọ nọ yin wiwà sọn owanyi na Jiwheyẹwhe mẹ wutu.
Hagbẹ whẹndo Bẹtẹli tọn lẹ nọ yin azọ́ndena do agun lẹ mẹ, to fie yé nọ tindo numimọ tlọlọ alemọyi azọ́n yetọn tọn lẹ te. Yé nọ duvivi opli agun tọn lẹ yìyì po mahẹ tintindo to azọ́n yẹwhehodidọ tọn mẹ po tọn. Taidi kọdetọn de, hagbẹ whẹndo Bẹtẹli tọn lẹ ko wleawuna kanṣiṣa he lodo lẹ hẹ mẹmẹsunnu po mẹmẹyọnnu he tin to agun yetọn mẹ lẹ po.—Malku 10:29, 30.
Rita, heyin hagbẹ whẹndo Bẹtẹli Grande-Bretagne tọn de, dọmọ: “Homẹ ṣie hùn tlala na agun lọ! To whenuena yẹn tin to opli lẹ ji podọ to lizọnyizọn lọ mẹ, mimọ mẹmẹsunnu, mẹmẹyọnnu, ovi lẹ, po mẹhomẹ vivẹ́ lẹ po to finẹ nọ hẹn yise ṣie lodo tlala! Mahopọnna nudepope he sọgan jọ, yé nọ tin to finẹ. Enẹ nọ gọalọna mi nado yin zohunhunnọ hugan to sinsẹ̀nzọn Bẹtẹli tọn ṣie mẹ.”
Gbẹzan Bẹtẹli tọn mayin azọ́nwiwa, opli lẹ, lizọnyizọn kunnudegbe tọn, po nupinplọn tọn po kẹdẹ gba. Whẹndo lọ nọ duvivi ojlẹ ayidedai tọn lẹ lọsu ga. Sọn ojlẹ de mẹ jẹ devo mẹ, tito-to-whinnu “Whèjai Whẹndo tọn” he nọ hẹnmẹ nado deayidai bo nọ jlọmẹdote to gbigbọ-liho lẹ nọ tin, he nọ namẹ dotẹnmẹ hundote lẹ nado duvivi nugopipe mẹsusu lẹ tọn podọ nado plọn tulinamẹnu lẹ gando gbẹzan mẹdevo he to sinsẹ̀nzọnwa to Bẹtẹli lẹ tọn go. Podọ, dlapọn ayidedai tọn he sọgbe bo nọ jlọmẹdote lẹ bibasi hẹ mẹdevo lẹ yin ayajẹnu ga. Ayidedai-tẹn delẹ sọgan yin awuwlena, gọna wesẹdotẹn lẹ na wehihia po dodinnanu mẹdetiti tọn po. Podọ dehe ma dona yin jìwọn e go wẹ hodọdopọ awuvivi tọn lẹ to núdùdù whenu to tafo núdùdù tọn lẹ ji.
Tom, heyin hagbẹ whẹndo Bẹtẹli Estonie tọn de, dọmọ: “Ohù madẹn do Bẹtẹli gba, podọ zungbo whanpẹnọ de tin he sẹpọ finẹ to fie asi ṣie po yẹn po nọ duvivi sadidi yì tọn. To whedelẹnu yẹn sọ nọ hò bọlu he yè nọ yí opò do gbá lẹ, po tennis po hẹ họntọn lẹ to agun lọ mẹ podọ to Bẹtẹli. Podọ to whenuena ninọmẹ aimẹ tọn hẹn ẹn yọnbasi, mí nọ disa to zokẹkẹ mítọn lẹ ji.”
Etẹwẹ Hiẹ Sọgan Wà Nado Pegan?
Nugbo wẹ dọ, Bẹtẹli na taun tọn yin nọtẹn de fie Klistiani he whèwhín lẹ nọ wà sinsẹ̀nzọn wiwe hlan Jehovah bo nọ wazọ́n do ota yisenọ hatọ lẹ tọn mẹ lẹdo aihọn pé te. Mẹhe lẹzun hagbẹ whẹndo Bẹtẹli tọn lẹ dona jẹ jẹhẹnu delẹ kọ̀n. Etẹwẹ hiẹ sọgan wà nado pegan na sinsẹ̀nzọn Bẹtẹli tọn?
Taidi Timoti, he wà sinsẹ̀nzọn hẹ apọsteli Paulu, mẹhe yin alọkẹyi na sinsẹ̀nzọn Bẹtẹli tọn lẹ dona tindo teninọ dagbe to agun mẹ. (1 Timoti 1:1) Timoti yin “mẹhe mẹmẹsunnu he tin to Listla po Ikonioni po lẹ to dagbe etọn dọ.” (Owalọ lẹ 16:2) Dile ewọ tlẹ yin jọja de do, Timoti yọ́n Owe-wiwe bosọ lodo ganji to yise mẹ. (2 Timoti 3:14, 15) Mọdopolọ, oyọnẹn Biblu tọn yin nukundo sọn mẹhe yin alọkẹyi na sinsẹ̀nzọn Bẹtẹli tọn lẹ dè.
Hagbẹ whẹndo Bẹtẹli tọn lẹ dona tindo gbigbọ mẹdetiti-yído-sanvọ́ tọn de. Gbigbọ mẹdetiti-yído-sanvọ́ po ojlo etọn nado ze dagbenu Ahọluduta lọ tọn lẹ po do nukọnna edetiti tọn Timoti tọn lẹ sọawuhia hezeheze sọmọ bọ Paulu sọgan dọ gando ewọ go dọmọ: “Yẹn ma tindo gbẹtọ ayihamọnọ de di ewọ, he na yí homẹ etọn lẹpo do jẹtukla to mì ji gba. Na yé omẹ pó wẹ to onú yede tọn dín, e mayin onú heyin Jesu Klisti tọn gba. Ṣigba mì yọ́n zinzan etọn dọ kẹdẹdi ovi to otọ́ dè, mọwẹ ewọ ko to azọ́nwa hẹ mi dopọ to wẹndagbe mẹ ga.”—Filippinu lẹ 2:20-22.
Sinsẹ̀nzọn Bẹtẹli tọn nọ biọ sunnu po yọnnu po heyin gbigbọnọ lẹ. Tito heyin awuwlena na hagbẹ whẹndo Bẹtẹli tọn lẹ nọ hẹn ẹn yọnbasi na yé nado whẹ́n deji to gbigbọmẹ gbọn Biblu pinplọn, tintin to opli Klistiani tọn lẹ ji po lizọnyizọn kunnudegbe tọn po mẹ to gbesisọ mẹ, podọ gbẹdido hẹ Klistiani he whèwhín lẹ dali. Gbọnmọ dali mẹhe tin to Bẹtẹli lẹ nọ yin alọgọna nado hodo ayinamẹ Paulu tọn dọmọ: “Mì ni nọ to zọnlinzin to [Klisti Jesu] mẹ . . . na yè ni yí afọ mìtọn hẹnai, na yè ni sọ do mì daga to e mẹ, bo hẹn mì lodo to yise mẹ, yèdọ dile yè plọn mì do, na mì ni sọ to susudeji to [yise] lọ mẹ po pẹdido po.”—Kọlọsinu lẹ 2:6, 7.
Na wunmẹ azọ́n he tin to Bẹtẹli tọn wutu, mẹhe yin alọkẹyi na lẹblanulọkẹyi sinsẹ̀nzọnwiwa tọn ehe lẹ dona tindo huhlọn to agbasamẹ bosọ tindo agbasalilo dagbe. Eyin hiẹ jẹ jẹhẹnu he ko yin nùdego ehelẹ kọ̀n, yin owhe 19 mẹvi kavi humọ, bo ko sọ yin bibaptizi e whè gbau na owhe dopo, mí na tuli we nado lẹnnupọndo sinsẹ̀nzọn Bẹtẹli tọn ji.
Mímẹpo Wẹ Tindo Mahẹ De
Taidi Klistiani lẹ, na jide tọn mímẹpo wẹ nọ jlo nado ze dagbenu Ahọluduta tọn lẹ do otẹn tintan mẹ to gbẹzan mẹ podọ nado yin ahundoponọ to sinsẹ̀nzọn mítọn mẹ hlan Jehovah. (Matiu 6:33; Kọlọsinu lẹ 3:23) Mí sọgan sọ na tuli mẹhe to sinsẹ̀nzọnwa to Bẹtẹli lẹ nado to sinsẹ̀nzọn wiwe de basi zọnmii to finẹ. Podọ na titengbe tọn, mẹmẹsunnu jọja he pegan na sinsẹ̀nzọn Bẹtẹli tọn lẹ ni yin tudohomẹna nado doafọna lẹblanulọkẹyi donanọ ehe.
Sinsẹ̀nzọn Bẹtẹli tọn yin aliho gbẹzan tọn he nọ hẹn pekọ wá to gbigbọ-liho de—yèdọ dehe sọgan yin yanwle he yọ́n hugan lọ na we. E yinmọ na Nick, mẹhe jẹ sinsẹ̀nzọnwa ji to Bẹtẹli to owhe 20-mẹvi mẹ. To owhe ao sinsẹ̀nzọn Bẹtẹli tọn godo, e dọmọ: “Yẹn nọ saba hodẹ̀ hlan Jehovah nado dopẹna ẹn na dagbewanyi etọn. Etẹwẹ yẹn sọgan sọ biọ hugan mọ? Tofi, mí yin lilẹdo pé gbọn Klistiani nugbonọ lẹ dali he to nuhe go yé pé lẹpo wà nado sẹ̀n Jehovah lẹ.”
[Apotin to weda 22]
ETẸWẸ MẸHO LẸ PO MẸJITỌ LẸ PO SỌGAN WÀ?
Mẹho lẹ po nugopọntọ tomẹyitọ lẹ po na taun tọn dona nọ na tuli jọja sunnu lẹ nado yì Bẹtẹli. To agọe, dodinnanu he mayin tlọlọ tọn de to hagbẹ jọja whẹndo Bẹtẹli tọn lẹ ṣẹnṣẹn dohia dọ 34 to kanweko ji yetọn wẹ yin tudohomẹna na taun tọn gbọn nugopọntọ Klistiani tọn lẹ dali nado yí sinsẹ̀nzọn Bẹtẹli tọn do basi yanwle yetọn. Mọwẹ, agun yetọn sọgan jẹdò yetọn. Ṣigba nuhe yọ́n wẹ e yin nado flindọ dile etlẹ yindọ Timoti matin ayihaawe tindo nuyiwadomẹji mẹjlọdote tọn do jọja devo lẹ ji to agun Listla po Ikonioni tọn lẹ po mẹ do sọ, mẹho he tin to finẹ lẹ ma glọnalina ẹn sọn sinsẹ̀nzọnwiwa hẹ Paulu mẹ gba. Yé ma wá tadona lọ kọ̀n dọ didike na Timoti ni zọnhẹ Paulu na dekọtọn do nuhẹnbu daho de mẹ na agun yetọn gba.—1 Timoti 4:14.
Mẹjitọ Klistiani lẹ na taun tọn dona dín nado yin nuyiwadomẹji nujikudo tọn do ovi yetọn lẹ ji to whẹho ehe mẹ. To dodinnanu he ṣẹṣẹ yin nùdego lọ mẹ, 40 to kanweko ji mẹhe yin hokanse lẹ tọn wẹ donù mẹjitọ yetọn lẹ go taidi asisa tangan tulinamẹ tọn na sinsẹ̀nzọn Bẹtẹli tọn mẹ bibiọ. Mẹmẹyọnnu de he ko to sinsẹ̀nzọnwa to Bẹtẹli na owhe vude lẹ dọmọ: “Gbẹzan mẹjitọ ṣie lẹ tọn to sinsẹ̀nzọn Jehovah tọn mẹ yin mẹwhinwhàn huhlọnnọ de na mi nado biọ sinsẹ̀nzọn Bẹtẹli tọn mẹ. Gbọn apajlẹ yetọn mimọ to lizọnyizọn whenu-gigọ́ tọn mẹ dali, yẹn yọnẹn poun dọ ehe na yin aliho gbẹzan tọn he yọ́n hugan bo nasọ yin pekọnọ hugan he yè sọgan dè.”
[Apotin to weda 24]
YÉ YỌ́N PINPẸN SINSẸ̀NZỌN BẸTẸLI TỌN
“Yẹn yọ́n pinpẹn sinsẹ̀nzọn Bẹtẹli tọn ṣie. Yẹn nọ tindo pekọ nado yọnẹn dọ yẹn ko wà sinsẹ̀nzọn hlan Jehovah to azán lọ blebu gbè podọ dọ yẹn na wà onú dopolọ to osọ̀, azán atọ̀n gbè, podọ zọnmii. Ehe nọ na mi ayihadawhẹnamẹnu dagbe de bosọ nọ yí lẹnpọn nujikudo tọn lẹ do gọ́ ayiha ṣie mẹ.”
“Bẹtẹli yin nọtẹn de fie hiẹ sọgan na whenu gọna huhlọn towe lẹpo to gigọ́mẹ hlan sinsẹ̀nzọn Jehovah tọn te matin ayihafẹsẹnamẹ. Ehe nọ hẹn ayajẹ homẹ tọn wá. Ṣigba hiẹ sọgan sọ mọ titobasinanu Jehovah tọn sọn pọndohlan he gbọnvo de mẹ ga. Hiẹ na tindo numọtolanmẹ dindọnsẹpọ ahọ́nkan nuyiwa titobasinanu enẹ tọn pẹkipẹki, podọ ehe nọ hẹn ẹn yin ojlofọndotenamẹnu taun.”
“Bẹtẹli wiwá wẹ yin nujọnu hugan he ko jọ do yẹn go. Tofi wepinplọn ma nọ doalọte gbede. Podọ tofi wepinplọn mayin, na wadotana mẹdetiti tọn ṣie gba, ṣigba na Jehovah. Tofi azọ́n ṣie ma na yin to ovọ́ mẹ gbede gba.”
“Yíyí nugopipe ṣie lẹ zan to Bẹtẹli nọ hẹn mi tindo numọtolanmẹ pekọ po jijọho po tọn na yẹn to yé yizan na Jehovah podọ na mẹmẹsunnu lẹ wutu.”
“Yẹn ma sọgan tindo pekọ po ayajẹ nujọnu tọn po to yanwle ṣie dai tọn mẹ gba. Yẹn ko to nulẹnpọn na owhe susu gando azọ́nwiwa hẹ podọ na mẹmẹsunnu po mẹmẹyọnnu ṣie lẹ po go. Enẹwẹ zọ́n bọ yẹn do wá Bẹtẹli. Yẹn tindo pekọ nujọnu tọn to yinyọnẹn mẹ dọ vivẹnudido ṣie lẹpo na hẹn ale wá na mẹdevo lẹ to gbigbọ-liho bo nasọ hẹn pipà wá na Jehovah.”