Nuplọnmẹ Biblu Tọn Nọ Jlọ Yise Dote — WESẸDOTẸN INTẸNẸT JI TỌN Watchtower Tọn

Nuplọnmẹ Biblu Tọn Nọ Jlọ Yise Dote

“LẸBLANULỌKẸYI nankọ die nado na ayidonugo linlẹn Mẹdatọ mítọn tọn lẹ bo plọn nado tindo pọndohlan dopolọ taidi ewọ to osun atọ́n he wayi lẹ gblamẹ!” Nuhe afọzedaitọ klasi 122tọ Wehọmẹ Biblu Pinplọn Watchtower Giliadi tọn dọ to azán gbedewema-yíyí tọn gbè niyẹn. Azán 10 mars 2007 tọn na gbọṣi ayiha mẹ na hagbẹ 56 klasi lọ tọn lẹ, he na bẹ sinsẹ̀nzọn mẹdehlan tọn yetọn jẹeji to madẹnmẹ to otò voovo 26 he mẹ yé yin didehlan lẹ mẹ.

To kuavọ zohunhun tọn didona mẹplidopọ 6 205 lẹ godo, Theodore Jaracz, he yin dopo to Hagbẹ Anademẹtọ lọ mẹ, dọmọ: “Na mì wá tito-to-whinnu gbedewema-yíyí tọn ehe tẹnmẹ wutu, mí deji dọ mì na yin hinhẹn lodo to gbigbọ-liho bọ yise mìtọn nasọ yin jijlọdote.” Enẹgodo, e basi oylọna hodọtọ ẹnẹ debọdo-dego he wleawu tulinamẹ po ayinamẹ sinai do Biblu ji he wá do ganmẹ lẹ po tọn na nuplọntọ lọ lẹ, ehe na gọalọna yé nado tindo kọdetọn dagbe to azọ́ndenamẹ mẹdehlan tọn yetọn lẹ mẹ.

Hogbe Tulinamẹ Tọn lẹ Nado Jlọ Yise Mẹdevo lẹ Tọn Dote

Leon Weaver, he yin hagbẹ Wedegbẹ́ Alahọ États-Unis tọn de, dọhodo hosọ lọ, “Zindonukọn to Dagbewiwa Mẹ” ji. E flinnu nuplọntọ lọ lẹ dọ dopodopo yetọn ko yí madozẹnzẹn owhe 13 tọn zan to sinsẹ̀nzọn whenu-gigọ́ tọn mẹ, nado hẹn nuplọnmẹ Biblu tọn he nọ jlọ yise dote gbayipe. E dọmọ: “Azọ́n dagbe de wẹ, na e bẹ ogbẹ̀ gbẹtọ lẹ tọn whinwhlẹngán hẹn, podọ hú popolẹpo, e yin azọ́n dagbe de na e nọ pagigona Otọ́ mítọn olọn mẹ tọn, Jehovah.” Enẹgodo, Mẹmẹsunnu Weaver na tuli nuplọntọ lọ lẹ nado nọ “dó hlan gbigbọ” bo ma dike “nuṣikọna [yé] to dagbewiwa mẹ blo.”—Galatianu lẹ 6:8, 9.

David Splane, dopo to Hagbẹ Anademẹtọ lọ mẹ, wleawuna nuflinmẹ yọ́n-na-yizan lẹ dile e to dogbapọnna hosọ lọ “Hẹn Ẹn Diun dọ Hiẹ Bẹjẹeji to Aliho Dagbe Mẹ.” Mẹmẹsunnu Splane na tuli mẹdehlan yọyọ lọ lẹ nado bẹ azọ́ndenamẹ yetọn lẹ jẹeji to aliho dagbe mẹ gbọn nuhe bọdego helẹ wiwà dali: “Mì nọ hẹn pọndohlan dagbe go. Mì ma nọ yawu wá tadona kọ̀n blo. Mì nọ konu yẹsẹ. Mì ma nọ mọhodọdomẹgo blo. Mì yin whiwhẹnọ, bo nọ na sisi mẹmẹsunnu lẹdo lọ tọn lẹ.” Enẹgodo e yidogọ dọmọ: “Whenuena mì jẹte sọn agahun mẹ, mì tẹnpọn bo bẹjẹeji to aliho dagbe mẹ, podọ na Jehovah ni dona afọ whanpẹnọ mìtọn lẹ dile yé hẹn ‘wẹndagbe onú dagbe’ tọn yì na gbẹtọ lẹ.”—Isaia 52:7.

Mẹplọntọ Giliadi tọn Lawrence Bowen gbadopọnna hosọ lọ “Ogú Dejidego De.” Mẹmẹsunnu Bowen flinnu nuplọntọ lọ lẹ dọ didoai Wehọmẹ Giliadi tọn to Wẹkẹ-whàn II whenu sinai do jidide mlẹnmlẹn to hẹndi Ohó dọdai Jehovah tọn mẹ ji. (Heblu lẹ 11:1; Osọhia 17:8) Sọn whenẹnu gbọ́n, Giliadi ko hùn dotẹnmẹ dotena nuplọntọ lẹ nado hẹn yise yetọn lodo. Yise dolido nọ whàn gbedewema-yitọ lọ lẹ nado zindonukọn po zohunhun po to nugbo lọ lilá mẹ.

Mark Noumair, mẹplọntọ Giliadi tọn devo, dọhodo hosọ ojlofọndotenamẹ tọn lọ “Hiẹ Hẹn Mi Flin Mẹde” ji. E dọ̀n ayidonugo wá apajlẹ yẹwhegán Eliṣa tọn ji, mẹhe do yise po adọgbigbo po hia to azọ́ndenamẹ etọn mẹ. To zẹẹmẹ etọn lẹ zize sinai do 1 Ahọlu lẹ 19:21 ji, Mẹmẹsunnu Noumair dọmọ: “Eliṣa desọn ojlo mẹ bo basi diọdo lẹ to gbẹzan etọn mẹ, bo wọnji yanwle mẹdetiti tọn lẹ go, bosọ nọgodona lẹndai Jehovah tọn.” E pà gbedewema-yitọ lọ lẹ dọ yelọsu ko do gbigbọ dopolọ hia podọ e na tuli yé nado zindonukọn to mọwiwà mẹ to azọ́ndenamẹ yọyọ yetọn lẹ mẹ.

Yise Nọ Yidogọna Awuvivo Hodidọ Tọn

Dile mẹdehlan sọgodo tọn lọ lẹ to yise yetọn jlọ dote to ojlẹ nupinplọn lọ tọn whenu, yé nọ yí dotẹnmẹ hundote sẹfifo lẹ tọn zan nado dọyẹwheho wẹndagbe lọ tọn na mẹdevo lẹ. Ehe dekọtọn do numimọ dagbedagbe lẹ mẹ he yin didọ bọ wadohia yetọn lẹ sọ yin bibasi to adà tito-to-whinnu lọ tọn de mẹ he yin anadena gbọn mẹplọntọ Giliadi tọn devo, Wallace Liverance dali. Hosọ adà ehe tọn, he yin “Míwlẹ Yise Enẹwutu Wẹ Mí do Dọho,” hẹn mí flin nuhe apọsteli Paulu dọ to 2 Kọlintinu lẹ 4:13 mẹ.

Bọdo adà ehe go, Daniel Barnes po Charles Woody po, he yin hagbẹ whẹndo Bẹtẹli tọn lẹ, deanana hokansemẹ lẹ hẹ delẹ to mẹhe ko yin mẹdehlan wayi po mẹhe to yinyin to alọnu lẹ po. Ehe zinnudeji dọ Jehovah nọ penukundo mẹhe to sinsẹ̀n ẹn po nugbonọ-yinyin po lẹ go bosọ nọ dona yé. (Howhinwhẹn lẹ 10:22; 1 Pita 5:7) Mẹdehlan dopo dọmọ: “Yẹn po asi ṣie po tindo numimọ nukunpedomẹgo Jehovah tọn to nuplọnmẹ he mí mọyi to Giliadi lẹ mẹ. E jlọ yise mítọn dote nugbonugbo. Yise yin nujọnu taun, na devizọnwatọ Jiwheyẹwhe tọn lẹpo, kakajẹ mẹdehlan lẹ ji na pehẹ whlepọn, nuhahun po magbọjẹ lẹ po.”

Zindonukọn to Nuplọnmẹ Biblu Tọn He Nọ Jlọ Yise Dote Hinhẹn Gbayipe Mẹ

To ojlẹ he sọgbe hugan to tito-to-whinnu gbedewema-yíyí tọn lọ mẹ, Samuel Herd, dopo to Hagbẹ Anademẹtọ lọ mẹ, dọhona mẹplidopọ lẹ do hosọ lọ “To Mẹmẹsunnu Towe lẹ Jlọ Dote Zọnmii” ji. Etẹwẹ yin lẹndai nuplọnmẹ he nuplọntọ lọ lẹ mọyi tọn? “Lẹndai etọn wẹ nado plọn mì lehe mì na yí odẹ́ mìtọn zan do nado pà Jehovah, bo plọn nugbo etọn mẹdevo lẹ to aigba-denamẹ yọyọ mìtọn ji, bosọ jlọ ode awetọ dote to yise mẹ,” wẹ Mẹmẹsunnu Herd dọ. Ṣigba, e flinnu nuplọntọ lọ lẹ dọ odẹ́ sọ sọgan ze nuhe ma nọ jlọmẹdote lẹ daga. (Howhinwhẹn lẹ 18:21; Jakobu 3:8-10) E na tuli nuplọntọ lọ lẹ nado hodo apajlẹ Jesu tọn to odẹ́ yetọn yiyizan mẹ. To nujijọ dopo whenu, to todidoai na Jesu godo, devi etọn lẹ gblọn dọmọ: “Be ayiha mítọn ma hunzo to ohò mítọn mẹ, . . . whenuena e hùn Owe-wiwe hlan mí?” (Luku 24:32) Mẹmẹsunnu Herd dọmọ: “Eyin hogbe mìtọn lẹ nọ jlọmẹdote, yé na whàn ahun mẹmẹsunnu po mẹmẹyọnnu mìtọn lẹ po tọn to azọ́ndenamẹ mìtọn mẹ.”

Bọdo enẹ go, gbedewema-yitọ lọ lẹ mọ gbedewema yetọn lẹ yí. Enẹgodo wekanhlanmẹ pinpẹn-nutọn-yinyọnẹn klasi lọ tọn yin hihia. Nuhe e dọ die: “Mí tindo numọtolanmẹ sisosiso azọngbannọ-yinyin tọn nado yí nuhe mí ko plọn lẹ zan to azọ́ndenamẹ mítọn lẹ hinhẹndi po nugbonọ-yinyin po mẹ taidi mẹdehlan lẹ. Dile mí wleawufo nado yì opodo aigba tọn, odẹ̀ mítọn wẹ yindọ vivẹnudido mítọn lẹ na dekọtọn do awhágbe daho pipà tọn mẹ hlan Nuplọnmẹtọ Daho mítọn, Jehovah Jiwheyẹwhe.” Mẹplidopọ lẹ yigbe gbọn pẹhiho ahundopo tọn dali. Na nugbo tọn, tito-to-whinnu gbedewema-yíyí tọn lọ jlọ yise mẹplidopọ lẹpo tọn dote.

[Apotin to weda 15]

SỌHA NULINLẸN KLASI TỌN

Sọha otò he mẹ yé wá sọn tọn: 9

Sọha otò he mẹ yé yin didohlan tọn: 26

Sọha wehọmẹvi lẹ tọn: 56

Madozẹnzẹn owhe mẹhodido tọn: 33,4

Madozẹnzẹn owhe to nugbo mẹ tọn: 16,8

Madozẹnzẹn owhe lizọnyizọn whenu-gigọ́ tọn: 13

[Yẹdide to weda 16]

Gbedewema-Yíyí Klasi 122tọ Wehọmẹ Biblu Pinplọn Watchtower Giliadi Tọn

To yinkọ he tin to odò lẹ mẹ, hukan lẹ yin sọha yí na sọn nukọn yì godo, bọ yinkọ lẹ yin sislẹ sọn amiyọnwhé yì adusiwhé to hukan dopodopo ji.

(1) Howitt, R.; Smith, P.; Martinez, A.; Pozzobon, S.; Kitamura, Y.; Laud, C. (2) Fiedler, I.; Beasley, K.; Matkovich, C.; Bell, D.; Lippincott, W. (3) Sites, W.; Andersen, A.; Toevs, L.; Fusano, G.; Rodríguez, C.; Yoo, J. (4) Sobomehin, M.; Thomas, L.; Gasson, S.; Dauba, V.; Bertaud, A.; Winn, C.; Dobrowolski, M. (5) Yoo, J.; Dauba, J.; Mixer, H.; Newton, M.; Rodríguez, F.; Mixer, N. (6) Laud, M.; Lippincott, K.; Martinez, R.; Haub, A.; Schamp, R.; Pozzobon, L.; Toevs, S. (7) Howitt, S.; Kitamura, U.; Newton, D.; Haub, J.; Sites, J.; Thomas, D. (8) Sobomehin, L.; Matkovich, J.; Fusano, B.; Winn, J.; Schamp, J.; Andersen, D.; Dobrowolski, J. (9) Fiedler, P.; Bell, E.; Beasley, B.; Smith, B.; Bertaud, P.; Gasson, M.

[Caption on page 17]

“Eyin hogbe mìtọn lẹ nọ jlọmẹdote, yé na whàn ahun mẹmẹsunnu po mẹmẹyọnnu mìtọn lẹ po tọn to azọ́ndenamẹ mìtọn mẹ”