Kanbiọ lẹ sọn Wehiatọ lẹ Dè

Nukun tẹwẹ Klistiani de dona yí do pọ́n gbeyinyan po whèhuhu po?

Biblu ma jẹagọdo gbeyinyan po whèhuhu po gba. (Deutelonomi 14:4, 5, 9, 20; Matiu 17:27; Johanu 21:6) Etomọṣo, Klistiani he nọ yangbé kavi nọ hù whèvi lẹ dona lẹnnupọndo nunọwhinnusẹ́n Owe-wiwe tọn delẹ ji.

Jiwheyẹwhe degbena Noa po kúnkan etọn lẹ po nado hù kanlin lẹ bo dù yé, ṣigba yé dona gbògbèna kanlin lọ lẹ whẹpo do dù yé. (Gẹnẹsisi 9:3, 4) Anademẹ ehe zinnudo nugbo lọ ji dọ mí dona na sisi ogbẹ̀ kanlin lẹ tọn taidi nuhe wá sọn Jiwheyẹwhe dè. Enẹwutu, Klistiani lẹ ma nọ hù kanlin na awuvivi poun kavi na lẹndai ayidedai tọn lẹ wutu matin lẹblanu bo nọ gbọnmọ dali do sisi matindo na ogbẹ̀ hia gba.—Howhinwhẹn lẹ 12:10.

Adà devo he ji mí sọ dona lẹnnupọndo gando walọyizan mítọn go. E yọnbasi dọ homẹ apọsteli he yin whèhutọ lẹ tọn nọ hùn eyin yé hù whèvi susu. Ṣigba, nudepope ma dohia dọ yé nọ doawagun to nugopipe whèhuhu tọn yetọn mẹ kavi dọ yé nọ hù whèvi nado whlẹnagbà hẹ mẹdevo lẹ, nado dohia dọ yé yin sunnu glegbenu kavi nado mọ awuvivi to whèhuhu mẹ.—Psalm 11:5; Galatianu lẹ 5:26.

Enẹwutu, mí sọgan kanse míde dọmọ: ‘Be yẹn yin apajlẹ dagbenọ na nuhe dù sisi didohia na pọndohlan Jehovah tọn gando ogbẹ̀ go ya? Be gbeyinyan kavi whèhuhu ji wẹ yẹn nọ lẹnnupọndo kavi dọhodo hugan ya? Be gbẹzan ṣie nọ dohia dọ yẹn nọ mọ awuvivi to gbeyinyan po whèhuhu po mẹ wẹ, kavi be e nọ dohia dọ yẹn yin lizọnyizọnwatọ Jiwheyẹwhe tọn ya? Be gbeyinyan kavi whèhuhu nọ hẹn mi nado dogbẹ́ pẹkipẹki hẹ mayisenọ lẹ kavi be e nọ hẹn mi nado gbẹkọ whẹndo ṣie go ya?’—Luku 6:45

Mẹhe nọ yangbé kavi hù whèvi delẹ sọgan dín whẹjijọ na yede bo gbẹkọ onú gbigbọmẹ tọn lẹ go to ojlẹ gbeyinyan po osàn whèhuhu po tọn lẹ mẹ. Ṣigba, mí nọ do yise po jidide po hia to Jiwheyẹwhe mẹ eyin mí ma na dotẹnmẹ nudepope nado yitẹn to onú gbigbọmẹ tọn lẹ si. (Matiu 6:33) Humọ, Klistiani lẹ nọ setonuna osẹ́n “Sesali tọn” he gando gbeyinyan po whèhuhu po go lẹpo, vlavo aṣẹpatọ lẹ hẹn osẹ́n mọnkọtọn lẹ sinyẹn kavi lala.—Matiu 22:21; Lomunu lẹ 13:1.

Nado hẹn pọndohlan mítọn sọgbe hẹ Jehovah tọn na nuhe dù whẹho gbeyinyan po whèhuhu po tọn, e sọgan biọ dọ mẹdelẹ ni jla nulẹnpọn yetọn do gando nujinọtedo Jiwheyẹwhe tọn lẹ go. (Efesunu lẹ 4:22-24) Etomọṣo, mí dona na sisi nudide ahundopo tọn he mẹdevo lẹ basi. Apọsteli Paulu na ayinamẹ dagbe de do whẹho ehe ji dọmọ: “Mì dike mí sọ dawhẹna mínọzo ba blo: ṣigba bo kuku gbọ bo nọ dawhẹ he nkọ, dọ mẹde yí zannu ahlida de do aliho mẹmẹsunnu etọn tọn blo.” (Lomunu lẹ 14:13) Owanyi matin ṣejannabi gọna sisi mọnkọtọn didohia nọ zọ́n bọ jijọho nọ tin to agun mẹ bosọ nọ hẹn homẹ Mẹdatọ mítọn tọn hùn, yèdọ Asisa ogbẹ̀ lẹpo tọn.—1 Kọlintinu lẹ 8:13.a

[Nudọnamẹ Odò Tọn]