Whetẹnu Wẹ Ahọluduta Jiwheyẹwhe Tọn Na Wá?
“OKLUNỌ, hiẹ na gọ̀ ahọludu jo hlan Islaeli to ojlẹ he mẹ lo?” (Owalọ lẹ 1:6) Apọsteli lẹ tin to jejeji nado yọ́n whenue Jesu na ze Ahọluduta etọn dai. To egbehe, to nudi owhe 2 000 godo, gbẹtọ lẹ gbẹ́ pò to jejeji nado yọ́n whenue Ahọluduta Jiwheyẹwhe tọn na wá.
To whenuena e yindọ Ahọluduta lọ wẹ yin hosọ titengbe yẹwhehodidọ Jesu tọn, hiẹ sọgan donukun dọ ewọ ni dọhodo whẹho ehe ji. Podọ e wàmọ nugbo! E dọho whlasusu gando ojlẹ tangan he e ylọdọ “tintin tofi” etọn go. (Matiu 24:37, NW ) Tintin tofi etọn tindo kanṣiṣa pẹkipẹki hẹ zizedai Ahọluduta Mẹssia lọ tọn. Etẹwẹ tintin tofi ehe yin? Mì gbọ mí ni gbadopọnna nugbo ẹnẹ he Biblu dohia gando tintin tofi Klisti tọn go.
1. Ojlẹ susu na juwayi to okú Klisti tọn godo whẹpo tintin tofi etọn na bẹjẹeji. Jesu dó oló de to ehe mẹ e yí ede jlẹdo dawe de go he “yì biọ otò dindẹn de mẹ, nado yí ahọludu de na ede.” (Luku 19:12) Nawẹ oló dọdai tọn enẹ mọ hẹndi gbọn? Eyọn, Jesu kú bosọ yin finfọnsọnku; enẹgodo e yì “otò dindẹn” de mẹ, enẹ wẹ, olọn mẹ. Dile Jesu dọ dọdai to oló mọnkọtọn devo mẹ do, kọlilẹwa etọn taidi ahọlu na yin “to ojlẹ dindẹn de godo.”—Matiu 25:19.
To owhe delẹ he Jesu ko hẹji yì olọn mẹ godo, apọsteli Paulu wlan dọmọ: “Dawe he [Jesu], ehegodo e ko sanvọ́ dopo kakadoi na ylando, e sinai to adusilọ Jiwheyẹwhe tọn mẹ; sọn dinvie, e to todo kaka yè nado yí kẹntọ etọn lẹ do basi tokloafọligbe etọn tọn.” (Heblu lẹ 10:12, 13) Enẹwutu ojlẹ gaa de juwayi to whenuena Jesu jẹ olọn mẹ godo. Ojlẹ teninọ tọn lọ wá vivọnu to godo mẹ to whenuena Jehovah Jiwheyẹwhe yí Ovi etọn do basi Ahọlu Ahọluduta Mẹssia tọn he ko yin opagbe etọn do sọn ojlẹ dindẹn die. Ojlẹ enẹ mẹ wẹ tintin tofi Klisti tọn bẹjẹeji. Be gbẹtọvi he tin to aigba ji lẹ na mọ nujijọ ayidego tọn ehe ya?
2. Gbẹtọvi lẹ ma na yí nukun do mọ tintin tofi Jesu tọn. Flindọ Jesu dọhodo “ohia tintin tofi etọn tọn” ji. (Matiu 24:3, NW ) Eyin gbẹtọ lẹ na yí nukun do mọ tintin tofi etọn wẹ, be ohia de sọ yin dandan ba? Di apajlẹ: Mí ni dọ dọ hiẹ jlo na zingbejizọnlin nado yì pọ́n ohù. Hiẹ sọgan mọ ohia alidohiamẹ tọn he na deanana we lẹ to aliji, ṣigba to whenuena hiẹ jẹ huto bo nọte to bẹbẹnu otọ̀ gblagada he ma do vivọnu lọ tọn, be hiẹ na to nukundo nado mọ ohia alidohiamẹ tọn daho de, he ji yè wlan “Ohù” do po wekun dahodaho lẹ po wẹ ya? Paali! Naegbọn ohia de na yin dandannu to whenuena e yindọ hiẹ to ohù lọ mọ po nukun towe lẹ po?
Jesu basi zẹẹmẹ ohia tintin tofi etọn tọn, e ma yin nado do nuhe gbẹtọ lẹ sọgan mọ po nukun yetọn lẹ po hia wẹ gba, ṣigba nado gọalọna yé nado yọ́n nuhe na jọ to olọn mẹ. Abajọ Jesu dọmọ: “Ahọludu Jiwheyẹwhe tọn ma ja po ohia po gba.” (Luku 17:20) To whelọnu lo, nawẹ ohia lọ na hẹn ẹn họnwun na mẹhe tin to aigba ji lẹ dọ tintin tofi Klisti tọn ko bẹjẹeji gbọn?
3. Nuhahun sinsinyẹn lẹ to aigba ji na dohiagona tintin tofi Jesu tọn. Jesu dọ dọ tintin tofi etọn taidi Ahọlu to olọn mẹ na yin hiadogona gbọn awhàn, huvẹ, aigba sisọsisọ, azọ̀nylankan, po sẹ́nhẹngba po dali to aigba ji. (Matiu 24:7-12; Luku 21:10, 11) Etẹwẹ na hẹn ninọmẹ blawu ehe lẹpo wá? Biblu basi zẹẹmẹ dọ Satani, “ahọvi aihọn he tọn,” tin to adi ji badabada, na e yọnẹn dọ whenu gli de wẹ emi tindo todin he tintin tofi Klisti tọn taidi Ahọlu ko bẹjẹeji. (Johanu 12:31; Osọhia 12:9, 12) Ojlẹ mítọn mẹ wẹ kunnudenu yinukundomọ adi Satani tọn po tintin tofi Klisti tọn po sù te hugan. Kunnudenu ehe ko sọawuhia lẹdo aihọn pé to obá he ma ko yin mimọ pọ́n gbede mẹ, titengbe sọn 1914 gbọ́n, yèdọ owhe he whenuho-kàntọ lẹ kẹalọyi taidi ojlẹ ayidego tọn de to whenuho mẹ.
Ehe lẹpo sọgan taidi linlin ylankan, ṣigba e ma yin mọ gba. E zẹẹmẹdo dọ Ahọluduta Mẹssia tọn ko to gandu todin to olọn mẹ. To madẹnmẹ, gandudu enẹ na yí aṣẹpipa etọn zan do aigba lọ blebu ji. Ṣigba, nawẹ gbẹtọ lẹ na plọnnu gando Ahọluduta lọ go nado sọgan kẹalọyi gandudu etọn bo lẹzun mẹjidugando etọn lẹ gbọn?
4. Azọ́n yẹwhehodidọ lẹdo aihọn pé tọn yin ohia tintin tofi Jesu tọn de. Jesu yí tintin tofi etọn jlẹdo “azán Noa tọn” lẹ gbè go.a (Matiu 24:37-39) E ma yin aki kẹdẹ wẹ Noa gbá gba, e sọ yin “yẹwhehodọtọ dodo tọn.” (2 Pita 2:5) Noa na avase gbẹtọ lẹ dọ whẹdida Jiwheyẹwhe tọn ko sẹpọ. Jesu dọ dọ hodotọ etọn he tin to aigba ji lẹ na wà onú mọnkọtọn de to tintin tofi etọn whenu. E dọ dọdai dọmọ: “Yè nasọ dọyẹwheho wẹndagbe ahọludu tọn helẹ to aigba fininọ lẹpo mẹ na okunnu de hlan akọta lẹpo; whenẹnu wẹ opodo na wá.”—Matiu 24:14.
Dile mí mọ to hosọ he wayi mẹ do, Ahọluduta Jiwheyẹwhe tọn na và gandudu aihọn ehe tọn lẹpo sudo. Azọ́n yẹwhehodidọ tọn lọ nọ na avase gbẹtọ lẹ dọ gandudu olọn mẹ tọn ehe na yinuwa to madẹnmẹ bosọ to dotẹnmẹ na mẹlẹpo nado lùn vasudo he ja lọ tọ́n bo lẹzun mẹjidugando Ahọluduta lọ tọn lẹ. Enẹwutu, kanbiọ tangan lọ wẹ yindọ, Nawẹ hiẹ na yinuwa gbọn?
Be Ahọluduta Jiwheyẹwhe Tọn Na Zẹẹmẹdo Wẹndagbe de Na We Ya?
Owẹ̀n he Jesu lá yin owẹ̀n todido mayọnjlẹ de tọn. To atẹṣiṣi Edẹni mẹ tọn godo to owhe fọtọ́n susu lẹ die wayi, Jehovah Jiwheyẹwhe basi tito nado ze gandudu de dai he na jla nulẹ do bo hẹn gbẹtọ nugbonọ lẹ gọwá ninọmẹ he Jiwheyẹwhe jlo dọ yé ni nọ̀ sọn bẹjẹeji—enẹ wẹ gbẹninọ kakadoi to paladisi mẹ to aigba ehe ji. Etẹwẹ sọ sọgan fọnjlodotenamẹ hugan yinyọnẹn dọ gandudu he ko yin opagbe etọn do sọn ojlẹ dindẹn die ko to gandu todin to olọn mẹ? Ehe ma yin hosọ he doglẹ bo ma sọgan yin nukunnumọjẹemẹ de gba ṣigba nujijọ nugbo de!
Todin, Ahọlu dide Jiwheyẹwhe tọn ko to gandu to kẹntọ etọn lẹ ṣẹnṣẹn. (Psalm 110:2) To aihọn he gblezọn bo jẹla sọn Jiwheyẹwhe dè ehe mẹ, Mẹssia lọ to ojlo Otọ́ etọn tọn hẹndi nado dín mẹhe jlo na yọ́n mẹhe nkọ Jiwheyẹwhe yin lẹ mọ bo sẹ̀n ẹn “to gbigbọ mẹ podọ to nugbo mẹ.” (Johanu 4:24) Gbẹtọ lẹpo mahopọnna akọ̀ kavi ninọmẹ yetọn sọgan nọgbẹ̀ kakadoi to gandudu Ahọluduta Jiwheyẹwhe tọn glọ. (Owalọ lẹ 10:34, 35) Mí dotuhomẹna we nado kẹalọyi dotẹnmẹ hundote dagbedagbe he yin zizedonukọnna we ehe. Plọnnu gando Ahọluduta Jiwheyẹwhe tọn go todin, na hiẹ nido sọgan nọgbẹ̀ kakadoi to gandudu dodo tọn etọn glọ!—1 Johanu 2:17.
[Nudọnamẹ odò tọn]
a Hogbe Jesu tọn lẹ gọalọ nado jla linlẹn agọ̀ he Biblu delẹ na to aliho he mẹ yé lilẹ́ hogbe lọ “tintin tofi” te do. Lẹdogbedevomẹ delẹ lilẹ́ hogbe lọ do “wiwá,” kavi “kọlilẹ,” ehe popolẹpo yin nujijọ he ma nọ dẹn-to-aimẹ. Nalete, doayi e go dọ Jesu ma yí tintin tofi etọn jlẹdo Singigọ azán Noa tọn go, yèdọ nujijọ dopo poun, ṣigba yí ì jlẹdo ‘azán Noa tọn lẹ’ go, yèdọ ojlẹ gaa de. Taidi ojlẹ hohowhenu tọn enẹ, tintin tofi Klisti tọn na yin ojlẹ gaa de whenuena gbẹtọ lẹ na hẹn alọnu ján to nuwiwa egbesọegbesọ tọn lẹ mẹ sọmọ bọ yé na gbẹkọ avase he to yinyin nina go.
[Yẹdide to weda 8, 9]
Linlin ylankan he mí nọ sè egbesọegbesọ lẹ dohia dọ ninọmẹ dagbe lẹ tin to yakẹ
[Asisa Yẹdide tọn]
Antiaircraft gun: U.S. Army photo