Jlọ Whẹndo Towe Dote po ‘Ohó He Yọ́nsè’ lẹ Po

DILE nukunwhiwhe dopodopo to yìyì, homẹ to gbigble David dogọ. E to alọkọ-gàn etọn pọ́n gbọzangbọzan dile e to tepọn asi etọn to mọto mẹ. To whenuena asi etọn, Diane, nọ̀ kaka bo wá tọ́n sọn họmẹ, e masọ sọgan dava homẹgble etọn ba.

E wadán dọ, “Naegbọn a do mi te fi sọn whenẹnu gbọ́n? Whenu ján a nọ gbọ! Bọ a ma sọgan sọgbe do ganmẹ whladopo vọ́vọ́ wẹ?”

Diane jẹflumẹ pete. Po avi po, e họ̀nwezun lẹkọ biọ họmẹ. To afọdopolọji, David mọdọ emi ko wanuyindo. Adánwiwà etọn hẹn nulẹ vantan dogọ poun wẹ. Todin, nawẹ e na yinuwa gbọn? E ṣizò na mọto etọn bo gbọ gángán, bosọ hodo e dẹẹdẹ biọ họmẹ.

Apajlẹ ehe do nuhe nọ jọ lẹ hia kavi e ma yin mọ wẹ ya? Be e ko jọ pọ́n bọ hiẹ mọdọ emi dona gọ̀ nuhe emi kọ́ jẹgbonu sọn nùmẹ lẹ mì ya? Eyin mí ma lẹnnupọn whẹpo do dọho, mí nọ saba dọ nuhe nọ wá vẹna mí lẹ. Abajọ Biblu dọmọ “Ayiha dodonọ tọn kàn ayiha [kavi lẹnayihamẹpọn] nado gblọn.”—Howhinwhẹn lẹ 15:28.

Nalete, e ma nọ bọawu nado lẹnnupọn ganji whẹpo do dọho, titengbe to whenue mí gblehomẹ, dibu, kavi yin awugblena. Vivẹnudido depope nado dọ numọtolanmẹ mítọn na mẹhe yin hagbẹ whẹndo mítọn tlọlọ lẹ sọgan yawu sisẹ́ mí nado gblewhẹdo kavi mọhodọdo mẹdevo go. Taidi kọdetọn de, enẹ sọgan fọ́n homẹgble kavi nudindọn dote.

Etẹwẹ mí sọgan wà ma nado yì jẹ obá enẹ mẹ? Nawẹ mí sọgan dava numọtolanmẹ mítọn lẹ ma nado duto mí ji gbọn? Mí sọgan mọ ayinamẹ dagbe delẹ yí sọn Biblu-kàntọ lọ Sọlọmọni dè.

Lẹnnupọndo Nuhe Na Yin Didọ po Lehe E Na Yin Didọ Gbọn po Ji

Dile Sọlọmọni he kàn owe Yẹwhehodọtọ tọn to Biblu mẹ to zẹẹmẹ basi do ovọ́-yinyin ogbẹ̀ tọn ji, ayihaawe ma tin dọ e tindo numọtolanmẹ sinsinyẹn lẹ gando nuhe dọ e te lẹ go. “Yẹn gbẹwanna tintin to ogbẹ̀,” wẹ e dọ. To ojlẹ de mẹ, e ylọ ogbẹ̀ dọ “ovọ́ ovọ́ tọn.” (Yẹwhehodọtọ 2:17; 12:8) Ṣogan, owe Yẹwhehodọtọ tọn ma yin todohukanji flumẹjijẹ Sọlọmọni tọn lẹ tọn gba. Lala, e ma lẹndọ nuhe sọgbe wẹ e yin nado dọhodo adà ylankan gbẹzan tọn lẹ kẹdẹ ji. To vivọnu owe lọ tọn, Sọlọmọni dohia dọ emi ‘dindona nado mọ ohó he yọ́nsè lẹ po kandai ohó nugbo he sọgbe lẹ po tọn.’ (Yẹwhehodọtọ 12:10) Lẹdogbedevomẹ devo dọ dọ “e tẹnpọn nado basi zẹẹmẹ onú ehelẹ tọn to aliho dagbe hugan he sọgbe mẹ.”—Contemporary English Version.

Sọlọmọni yọnẹn hezeheze dọ emi dona dava numọtolanmẹ emitọn lẹ. Na taun tọn, e nọ to kinkanse ede dọ, ‘Be nuhe n’to linlẹn nado dọ ka sọgbe bosọ yin nugbo ya? Eyin n’yí hogbe ehelẹ zan, be yé na yin alọkẹyi bo yọ́nsè na mẹdevo lẹ?’ Gbọn ‘ohó nugbo he yọ́nsè lẹ’ dindin dali, e penugo nado dava numọtolanmẹ ede tọn lẹ ma nado bẹpla nulẹnpọn etọn.

Taidi kọdetọn de, gbọnvona dọ owe he e kàn yin anazọ́n de, e sọ yin asisa nuyọnẹn he yin gbigbọdo gbọn Jiwheyẹwhe dali tọn he dọhodo zẹẹmẹ ogbẹ̀ tọn ji. (2 Timoti 3:16, 17) Be aliho he mẹ Sọlọmọni dọhodo whẹho numọtolanmẹ sisosiso tọn lẹ ji te sọgan gọalọna mí nado tindo hodọdopọ dagbe hẹ mẹyiwanna mítọn lẹ ya? Lẹnnupọndo apajlẹ de ji.

Plọn Nado Nọ Dava Numọtolanmẹ Towe Lẹ

Di apajlẹ, mí ni dọ dọ visunnu de lẹkọ sọn wehọmẹ po kalti azọ́nwiwa wehọmẹ tọn (bulletin) etọn po to alọmẹ bo ylọ́nnukunmẹ. Otọ́ etọn pọ́n todohukanji nupinplọn wehọmẹ tọn lọ bo doayi e go dọ e ma wazọ́n ganji to dopo mẹ. Otọ́ lọ gblehomẹ to afọdopolọji bo flin dọ whlasusu wẹ visunnu lọ ko nọ yí azọ́ndenamẹ wehọmẹ tọn etọn lẹ do gbẹ̀n asajikàn. E wá linlẹn mẹ na otọ́ lọ nado wadán dọ: “Adidọnọ de poun wẹ a yin! Eyin a zindonukọn domọ, a ma na yin nude to gbẹzan towe mẹ!”

Whẹpo do dike adi ni yinuwado nuhe e na dọ lẹ ji, otọ́ lọ na wadagbe nado kanse ede dọ, ‘Be nuhe lẹn n’te ka sọgbe bosọ yin nugbo ya?’ Kanbiọ ehe sọgan gọalọna ẹn ma nado dike numọtolanmẹ etọn lẹ ni ṣinyọnyẹ nujọnu lẹ ji. (Howhinwhẹn lẹ 17:27) Be nugbo wẹ dọ ovi lọ ma na yin nude to gbẹzan etọn mẹ na e ma wazọ́n ganji to nupinplọn wehọmẹ tọn dopo mẹ wutu ya? Be adà gbẹzan etọn tọn lẹpo mẹ wẹ e nọ wàdidọ te, kavi be e nọ yí azọ́ndenamẹ whégbè tọn etọn do gbẹ̀n asajikàn na e sinyẹnawuna ẹn nado mọnukunnujẹ nupinplọn enẹ mẹ ganji wutu wẹ ya? Biblu zinnudeji whlasusu dọ nujọnu wẹ e yin nado nọ wà dẹẹdẹ kavi yí lẹnpọn dagbe do gbeje whẹho lẹ pọ́n. (Titu 3:2; Jakobu 3:17) Nado jlọ ovi de dote, mẹjitọ lẹ dona nọ dọ ‘ohó nugbo he sọgbe lẹ.’

Dín Ohó He Sọgbe Lẹ

To whenuena otọ́ lọ ko magbe nuhe e jlo na dọ tọn, e sọgan kanse ede dọ, ‘Hogbe tẹlẹ wẹ n’sọgan yizan bọ e na yin alọkẹyi bo yọ́nsè na visunnu ṣie?’ Nugbo wẹ dọ e ma nọ bọawu nado mọ hogbe he sọgbe lẹ to whepoponu. Ṣigba mẹjitọ lẹ dona flin dọ jọja lẹ nọ saba tindo ayilinlẹn lọ nado lẹndọ eyin yé ma pegan mlẹnmlẹn, be yé gboawupo pete niyẹn. Yé sọgan tẹdo madogán kavi adà he mẹ yé gboawupo te dopo go majomajo bo na yí nukun enẹ do jẹ yede pọ́n ji. Eyin mẹjitọ de nọ do homẹgble hia zẹjlẹgo, e sọgan yidogọna gbemima ovi etọn tọn dọ emi ma yin nude. Kọlọsinu lẹ 3:21 dọmọ: “Mì hẹn homẹgblena ovi mìtọn lẹ blo, na yé nikaa gblehomẹ.”

To paa mẹ, hójijlẹ zẹjlẹgo wẹ hogbe lẹ taidi “ján” po “gbede” po nọ yin. To whenuena mẹjitọ de dọna ovi etọn dọ, “A ma na yin nude gbede,” e sọgan hẹn ẹn tindo numọtolanmẹ nuvọ́nọ-yinyin tọn. Eyin hogbe sinsinyẹn mọnkọtọn lẹ nọ yin yiyizan tlọlọ na ovi de gbọzangbọzan, e sọgan jẹ ede pọnhlan ji taidi lèlènọ godo tọn. Na taun tọn, gbọnvona dọ hogbe mọnkọtọn sọgan hẹnmẹ gbọjọ, e sọ yin lalo ga.

To paa mẹ, e nọ yọ́n hugan nado zinnudo adà dagbe ninọmẹ lẹpo tọn ji. Otọ́ he mí na apajlẹ etọn wayi sọgan yí hogbe ehelẹ zan dọmọ: “Ovi, n’mọdọ e vẹna we na a ma wazọ́n ganji to wehọmẹ wutu. N’yọnẹn dọ a ma nọ yí azọ́ndenamẹ towe lẹ do daihun. Enẹwutu gbọ mí ni dọhodo nupinplọn wehọmẹ tọn he ji a ma wazọ́n te bo dín aliho de nado duto nuhahun he a sọgan to pipehẹ lẹ ji.” Nado yọ́n aliho dagbe he mẹ e sọgan gọalọna visunnu etọn te, otọ́ lọ sọ sọgan kàn kanbiọ tangan delẹ sè nado yọnẹn eyin ovi lọ gbẹ́ tindo nuhahun devo lẹ.

E yọnbasi dọ aliho hodọhẹmẹ tọn dagbe he yin nulẹnpọndeji ganji jẹnukọn ehe ni tindo kọdetọn dagbe tlala hugan homẹgble didohia. Biblu na mí jide dọmọ: “Ohó vivi taidi owinja, e vivi na ayiha, e sọ hẹn ohú jẹgangan.” (Howhinwhẹn lẹ 16:24) Na nugbo tọn, ovi lẹ gọna hagbẹ whẹndo lọ tọn lẹpo, wẹ nọ tindo ayajẹ to lẹdo jijọho tọn he gọ́ na owanyi mẹ.

‘Sọn Susugege Nuhe Tin to Ayiha mẹ Tọn’

Todin lẹnnupọndo asu he yin nùdego to bẹjẹeji hosọ ehe tọn ji. Be e ma na ko yọ́n hugan eyin e ko yiagbọji bo dín ‘ohó nugbo he yọ́nsè’ lẹ kakati nado wadán do asi etọn ji ya? Asu he tin to ninọmẹ mọnkọtọn mẹ na wadagbe nado kanse ede dọ: ‘Mí ni tlẹ dọ dọ asi ṣie dona wazọ́n do whenu-gbigbọ ji, be nugbo wẹ dọ whenu ján e nọ gbọ ya? Be ojlẹ dagbe hugan lọ die nado fọ́n whẹho ehe dote ya? Be hogbe sinsinyẹn, homẹgble tọn lẹ na whàn ẹn nado jlo nado basi vọjlado lẹ gbede ya?’ Agbọji yìyì nado kàn kanbiọ mọnkọtọn lẹ sè míde sọgan gọalọna mí ma nado hẹn awugblena mẹhe mí yiwanna lẹ to mayọnẹn mẹ.—Howhinwhẹn lẹ 29:11.

Ṣigba, etẹwẹ eyin hodọdopọ mítọn lẹ to whẹndo mẹ nọ saba dekọtọn do nudindọn mẹ? E sọgan biọ dọ mí ni pọnnu hlan nukọn ganji bo lẹnnupọndo numọtolanmẹ he sisẹ́ mí nado dọ ohó lọ ji. Nuhe mí dọ, titengbe to whenuena mí tin to ayimajai kavi kọgbidinamẹ glọ, sọgan do nususu hia gando nuhe mí yin na taun tọn go. Jesu dọmọ: “Sọn susugege ayiha mẹ tọn mẹ wẹ onù to didọ.” (Matiu 12:34) To aliho devo mẹ, nuhe mí dọ nọ saba do linlẹn, ojlo, po walọ mítọn lẹ po hia.

Be pọndohlan mítọn gando ogbẹ̀ go sọgbe hẹ lẹnpọn dagbe bo gọ́ na todido ya? To whenẹnu, e yọnbasi dọ kọnugbè mítọn po nuhe ji mí nọ dọhodo lẹ po ni do enẹ hia. Be mí yin hẹngogonọ, pọndohlan agọ̀nọ, kavi homọdọdomẹgotọ wẹ ya? Eyin mọ wẹ, mí sọgan hẹn mẹdevo lẹ gbọjọ vlavo gbọn nuhe mí dọ kavi lehe mí dọ ẹ do dali. Mí sọgan nọma yọ́n obá he mẹ nulẹnpọn kavi hodidọ mítọn ko lẹzun mẹhẹngbọjọ tọn jẹ. Mí tlẹ sọgan lẹndọ aliho he mẹ mí nọ pọ́n onú lẹ hlan te sọgbe. Ṣigba mí dona tin to aṣeji ma nado klọ míde.—Howhinwhẹn lẹ 14:12.

Mí dopẹ́ dọ mí tindo Ohó Jiwheyẹwhe tọn. Biblu sọgan gọalọna mí nado gbeje linlẹn mítọn lẹ pọ́n bo yọ́n dehe sọgbe lẹ po dehe dona yin vivọjlado lẹ po. (Heblu lẹ 4:12; Jakobu 1:25) Mahopọnna ogú he mí sọgan ko dù kavi aliho he mẹ mí yin pinplọn whẹ́n te, mímẹpo sọgan basi dide nado diọ pọndohlan po nuyiwa mítọn po eyin mí jlo na wàmọ nugbonugbo.—Efesunu lẹ 4:23, 24.

Gbọnvona Biblu yiyizan, mí sọgan kanhose mẹdevo lẹ poun nado yọ́n lehe mí nọ dọho hẹ mẹdevo lẹ do. Di apajlẹ, kanse alọwlemẹ towe kavi ovi towe nado dọ hójọhó na we gando lehe a to nuyiwa do to adà ehe mẹ go. Kanhose họntọn he whèwhín bo yọ́n we ganji de. E na biọ dọ hiẹ ni whiwhẹ dewe nado kẹalọyi nuhe yé jlo na dọ podọ nado basi diọdo depope he e biọ.

Lẹnnupọn Whẹpo Do Dọho!

To godo mẹ, eyin mí jlo nugbonugbo ma nado hẹn awugblena mẹdevo lẹ po hogbe mítọn lẹ po, mí dona wà nuhe Howhinwhẹn lẹ 16:23 dọ dọmọ: “Mẹhe zìn [kavi yọnnuin] lẹ nọ lẹnnupọn whẹpo do dọho; gbọnmọ dali nuhe yé dọ nọ diọlinlẹn namẹ dogọ.” (Today’s English Version) E sọgan nọma bọawu to whepoponu nado dava numọtolanmẹ mítọn lẹ. Ṣogan, eyin mí nọ tẹnpọn nado mọnukunnujẹ mẹdevo lẹ mẹ kakati nado nọ sawhẹdokọna yé kavi de yé pò, e ma na vẹawuna mí nado mọ hogbe he sọgbe lẹ nado yizan.

Nugbo wẹ dọ mímẹpo wẹ yin mapenọ. (Jakobu 3:2) To whedelẹnu, mímẹpo wẹ nọ dọ ohó he ma sọgbe hẹ lẹnpọn dagbe. (Howhinwhẹn lẹ 12:18) Ṣigba po alọgọ Ohó Jiwheyẹwhe tọn po, mí sọgan plọn nado nọ lẹnnupọn whẹpo do dọho bosọ nọ hò numọtolanmẹ po dagbemẹninọ mẹdevo lẹ tọn po pọ́n. (Filippinu lẹ 2:4) Mì gbọ mí ni magbe nado dín ‘ohó nugbo he yọ́nsè lẹ,’ titengbe to whenuena mí to hodọ na hagbẹ whẹndo tọn mítọn lẹ. Gbọnmọ dali, hodidọ mítọn ma na hẹn awugblenamẹ kavi hẹnmẹ gbọjọ, kakatimọ, e na hẹn mẹhe mí yiwanna lẹ jẹgangan bosọ jlọ yé dote.—Lomunu lẹ 14:19.

[Yẹdide to weda 12]

Nawẹ hiẹ sọgan dapana nuhe na wá vẹna we lẹ didọ gbọn?