Dọnsẹpọ Jiwheyẹwhe

“E Dín OKLUNỌ”

“N’MỌDỌ nuvọ́nọ de poun wẹ n’yin,” wẹ dawe he danbú sọn aliho Jiwheyẹwhe tọn he yin pinplọn ẹn sọn ovu whenu ji de dọ. To whenue e jẹ afọdide lẹ ze ji nado lẹnvọjọ, e dibu dọ Jiwheyẹwhe ma na jona emi gbede. Ṣigba, kandai Biblu tọn he tin to 2 Otannugbo lẹ 33:1-17 mẹ gando Manasse go, na tuli ylanwatọ he ko lẹnvọjọ ehe. Eyin hiẹ nọ tindo numọtolanmẹ nuvọ́nọ-yinyin tọn na ylando he a ko wà wayi lẹ wutu, apajlẹ Manasse tọn sọgan miọnhomẹna hiẹ lọsu.

Manasse yin pinplọn whẹ́n to whẹndo he nọ sẹ̀n Jiwheyẹwhe de mẹ. Otọ́ etọn Hẹzekia, yin dopo to ahọlu Juda tọn he diyin hugan lẹ mẹ. Manasse yin jiji nudi owhe atọ̀n to whenue Jiwheyẹwhe gbọn azọ́njiawu-liho dlẹnkanna gbẹninọ otọ́ etọn tọn godo. (2 Ahọlu lẹ 20:1-11) Matin ayihaawe, Hẹzekia pọ́n visunnu ehe di nunina de he wá sọn lẹblanu he Jiwheyẹwhe dohia ẹ mẹ bo tẹnpọn nado do owanyi na sinsẹ̀n-bibasi wiwe ṣeke do ahun etọn mẹ. Ṣigba, e ma yin whepoponu wẹ ovi he tindo mẹjitọ budisi Jiwheyẹwhe tọ́ lẹ nọ hodo apajlẹ mẹjitọ yetọn lẹ tọn. Nuhe jọ to whẹho Manasse tọn mẹ niyẹn.

Owhe 12 poun wẹ Manasse tindo to whenue otọ́ etọn kú. E blawu dọ Manasse “wà enẹ he yin oylan to nukun OKLUNỌ tọn mẹ.” (Wefọ 1, 2) Be ayinamẹtọ he ma nọ yí nukun nujọnu tọn do pọ́n sinsẹ̀n-bibasi nugbo lẹ wẹ yinuwado ahọlu jọja lọ ji ya? Biblu ma dọ. Nuhe Biblu dọna mí wẹ yindọ Manasse tlọ biọ boṣiọ-sinsẹ̀n po kanyinylan he sẹhundaga po mẹ. E do agbà lẹ na yẹwhe lalo lẹ, yí visunnu etọn titi lẹ do sanvọ́, doalọ to afinyọnnuwiwa mẹ, bo ze boṣiọ pipà de do tẹmpli Jehovah tọn mẹ to Jelusalẹm. Manasse tasinyẹntọ lọ gbẹ́ nado setonuna avase pludopludo he Jehovah na ẹn lẹ, yèdọ Jiwheyẹwhe he wà azọ́njiawu bọ ewọ do wá yin jiji.—Wefọ 3-10.

To godo mẹ, Jehovah na dotẹnmẹ bọ Manasse yin wiwle yì Babilọni to afọgàn lẹ mẹ. To kanlinmọgbenu dọ́n, Manasse tindo dotẹnmẹ hundote nado lẹnnupọndo gbẹzan etọn ji. Be e wá mọdọ boṣiọ etọn he ma tindo huhlọn bo ma tindo ogbẹ̀ lẹ gboawupo nado basi hihọ́na ẹn wẹ ya? Be e wá lẹnnupọndo nuhe otọ́ budisi Jiwheyẹwhe tọ́ etọn plọn ẹn to ovu whenu lẹ ji wẹ ya? Depope he whẹho lọ yin Manasse lẹnvọjọ sọn ahun mẹ wá. Kandai lọ dọmọ: “E dín OKLUNỌ Jiwheyẹwhe etọn, bosọ whiwhẹ ede tlala . . . E sọ hodẹ̀ hlan ẹn.”a (Wefọ 12, 13) Ṣigba be Jiwheyẹwhe sọgan jona mẹde he ko wà ylando sinsinyẹn mọnkọtọn lẹ nugbonugbo ya?

Lẹnvọjọ ahundopo tọn Manasse tọn yinuwado Jehovah ji. Jiwheyẹwhe sè ovẹ̀ etọn nado wà lẹblanu na ẹn “bosọ vọ́ ẹ hẹnwa Jelusalẹm biọ ahọludu etọn mẹ.” (Wefọ 13) Nado do lẹnvọjọ etọn hia, Manasse wà nuhe go e pé lẹpo nado vọ́ nuṣiwa etọn lẹ jlado, e de boṣiọ-sinsẹ̀n sẹ̀ sọn gandudu etọn mẹ, bo dotuhomẹna omẹ etọn lẹ “nado nọ to OKLUNỌ . . . sẹ̀n.”—Wefọ 15-17.

Eyin hiẹ nọ mọdọ emi ma jẹna jona Jiwheyẹwhe tọn na ylando he a ko wà wayi lẹ wutu, apajlẹ Manasse tọn sọgan na we tuli. Kandai ehe yin apadewhe Ohó gbọdo Jiwheyẹwhe tọn. (Lomunu lẹ 15:4) Na nugbo tọn, Jehovah jlo dọ mí ni yọnẹn dọ emi “nọ wleawu nado jona.” (Psalm 86:5) E ma yin ylando lọ wẹ nọ duahunmẹna ẹn gba, ṣigba ninọmẹ ahun mẹ tọn ylanwatọ lọ tọn wẹ. Ylanwatọ de he hodẹ̀ po ahun lẹnvọjọ tọn po, jo aliho ylankan etọn lẹ do, bo dovivẹnu vẹkuvẹku nado wà nuhe sọgbe sọgan ‘dín Jehovah’ dile Manasse wà do.—Isaia 1:18; 55:6, 7.

[Nudọnamẹ odò tọn]