Dọdai 6. Azọ́n Yẹwhehodidọ Lẹdo Aihọn Pé Tọn
“Yẹwheho wẹndagbe Ahọluduta lọ tọn ehe na yin didọ to aigba fininọ lẹpo ji.”—MATIU 24:14.
● Nawe de he nọ yin Vaiatea bo nọ nọ̀ lopo Pacifique tọn he to olá pete de ji, to pipli Lopo Tuamotu tọn lẹ gblamẹ. Dile etlẹ yindọ Tuamotu tindo nudi ageklo pẹvipẹvi 80, he lilẹdo aigba de he gblo na 802 900 kilomètres carrés linlán, gbẹtọ he nọ nọ̀ finẹ lẹpo ma hugan 16 000. Etomọṣo, Kunnudetọ Jehovah tọn lẹ tẹnpọn bo wá lẹdo he mẹ Vaiatea po kọmẹnu etọn lẹ po te. Etẹwutu? Na Kunnudetọ lẹ nọ jlo na má wẹndagbe Ahọluduta Jiwheyẹwhe tọn hẹ gbẹtọ lẹpo wutu, mahopọnna fidepope he yé nọ nọ̀.
ETẸWẸ KUNNUDENU LẸ DOHIA? Wẹndagbe Ahọluduta lọ tọn to yinyin lilá na gbẹtọ lẹpo lẹdo aihọn pé. To owhe 2010 kẹdẹ mẹ, Kunnudetọ Jehovah tọn lẹ yí hugan gànhiho liva dopo daa zan nado lá wẹndagbe lọ to aigba 236 ji. Eyin yè má do zẹnzẹn, e dohia dọ Kunnudetọ dopodopo nọ zan nukunwhiwhe 30 nado dọyẹwheho egbesọegbesọ. To nudi owhe ao he wayi lẹ gblamẹ, yé ko de owe sinai do Biblu ji hugan liva 20 tọ́n bosọ má yé pé.
LINLẸN TẸWẸ GBAYIPE? Owẹ̀n Biblu tọn ko to yinyin lilá sọn owhe fọtọ́n susu lẹ die.
BE NUGBO WẸ ENẸ YA? Na nugbo tọn, mẹsusu wẹ ko dọyẹwheho gando adà owẹ̀n he Biblu bẹhẹn tọn de go. Ṣigba, suhugan yetọn wẹ wàmọ na ojlẹ vude podọ gbọn lẹdo delẹ mẹ poun. To vogbingbọn mẹ, Kunnudetọ Jehovah tọn lẹ to azọ́n yẹwhehodidọ tọn he yin tito-basina de wà lẹdo aihọn pé, bo to owẹ̀n lọ hẹn yì gbẹtọ livi susu lẹ dè. Kunnudetọ lẹ yí linsinsinyẹn do zindonukọn to azọ́n yẹwhehodidọ tọn lọ mẹ, mahopọnna nukundiọsọmẹ voovo he yé nọ pehẹ sọn pipli huhlọnnọ delẹ dè, he nọ yinuwa hẹ mẹ po kanyinylan po hugan to whenuho gbẹtọvi tọn mẹ.a (Malku 13:13) Humọ, yè ma nọ na akuẹ Kunnudetọ Jehovah tọn lẹ na yé nido yì dọyẹwheho. Kakatimọ, yelọsu wẹ nọ desọn ojlo mẹ nado yí whenu yetọn do wà ehe, bosọ nọ má owe yetọn lẹ vọnu. Nunina sọn ojlo mẹ wá lẹ wẹ nọ yin bibasi nado nọgodona azọ́n yetọn lẹpo.
ETẸWẸ A LẸN? Be “wẹndagbe ahọluduta lọ tọn” to yinyin lilá lẹdo aihọn pé ya? Be hẹndi dọdai ehe tọn sọgan zẹẹmẹdo dọ nudagbe de to unklẹn ja to sọgodo wẹ ya?
[Nudọnamẹ odò tọn]
a Nado mọ nudọnamẹ dogọ, pọ́n video dodinnanu tọn atọ̀n ehelẹ, “Fidèles dans les épreuves,” “Les triangles violets” gọna “La fermeté des Témoins de Jéhovah face à la persécution nazie,” ehe Kunnudetọ Jehovah tọn lẹ detọ́n.
[Nudọnamẹ tangan lẹ]
“Dile Jehovah na na dotẹnmẹ etọn dẹnsọ, mí na zindonukọn nado to wẹndagbe Ahọluduta lọ tọn lá po zohunhun po, gbọn aliho he mẹ e yọnbasi nado mọ gbẹtọ lẹ te lẹpo yiyizan dali.”—OWHEWÉ KUNNUDETỌ JEHOVAH TỌN LẸ TỌN 2010 TỌN.