Mẹnu lẹ Wẹ to Yẹwheho Wẹndagbe lọ Tọn Dọ?
“ . . . na yin didọ to aigba fininọ lẹpo ji.”—MATIU 24:14.
KUNNUDETỌ Jehovah tọn lẹ wẹ to yẹwheho wẹndagbe lọ tọn dọ lẹdo aihọn pé. Aliho voovo mẹ wẹ yé nọ wà ehe te. Aliho dopo wẹ gbọn hodidọ dali.
Hodidọ. Taidi Jesu po devi etọn lẹ po, Kunnudetọ Jehovah tọn lẹ nọ hẹn wẹndagbe lọ yì na gbẹtọ lẹ. (Luku 8:1; 10:1) Yé ma nọ donukun poun dọ gbẹtọ lẹ ni wá yé dè. Kunnudetọ lẹpo—he sọha yetọn ko hugan livi ṣinawe—wẹ nọ dekunnu na gbẹtọ lẹ gando Ahọluduta Jiwheyẹwhe tọn go. Yé nọ dọyẹwheho sọn whédegbè jẹ whédegbè, to tòhomẹ-liho ji, gbọn alokan ji, podọ to aliho devo lẹ mẹ. To owhe he wayi mẹ, Kunnudetọ lẹ yí hugan gànhiho liva dopo daa zan to azọ́n ehe mẹ.
Yé ma nọ plọnnu mẹdevo lẹ gando Ahọluduta Jiwheyẹwhe tọn go kẹdẹ gba, ṣigba yé sọ nọ plọn yé ‘nuhe Jesu ko degbe etọn lẹpo.’ (Matiu 28:20) Yé nọ deanana plọnmẹ Biblu gbesisọ tọn vọnu he hugan livi ṣinatọ̀n.
Kunnudetọ lẹ to yẹwhehodọ lẹdo aihọn pé—to otò 236 mẹ. Yé nọ dọyẹwheho na gbẹtọ wunmẹ lẹpo. Yé nọ dọyẹwheho to otò po tòdaho lẹ po mẹ, to zungbo daho Amazonie tọn po zungbo he nọ yin taïga to Sibérie po lẹ mẹ, podọ to danfafa Aflika tọn lẹ po Osó Himalaya tọn lẹ po ji. Yé ma nọ yí akuẹ na azọ́n ehe; akuẹ yelọsu tọn po whenu yetọn titi po wẹ yé nọ zan, podọ owanyi na Jiwheyẹwhe po kọmẹnu po wẹ nọ whàn yé nado wàmọ. Yé sọ nọ hẹn wẹndagbe lọ zun yinyọnẹn gbọn owe zinjẹgbonu lẹ gblamẹ.
Owe Zinjẹgbonu Lẹ. Linlinnamẹwe ehe, he hosọ etọn blebu yin Atọ̀họ̀-Nuhihọ́ lọ Tọn He to Ahọluduta Jehovah Tọn Lá, nọ yin zinzinjẹgbonu todin to ogbè 185 mẹ podọ vọkan livi 42 linlán zinjẹgbonu dopodopo tọn wẹ nọ yin mimá. Linlinnamẹwe he nọ zọnpọ hẹ ẹ, yèdọ Réveillez-vous!, he sọ nọ lá Ahọluduta lọ, nọ yin zinzinjẹgbonu to ogbè 83 mẹ podọ nudi vọkan livi 40 zinjẹgbonu dopodopo tọn wẹ nọ yin mimá.
Owe lẹ, alọnuwe lẹ, alọnuwe pẹvi lẹ, CD kavi MP3, po DVD lẹ po he nọ basi zẹẹmẹ do nuhe Biblu plọnmẹ lẹ ji tin-to-aimẹ to nudi ogbè 540 mẹ. Kunnudetọ lẹ ko de hugan liva 20 nuyizan voovo ehelẹ tọn tọ́n bosọ má yé to owhe ao agọe tọn lẹ mẹ, podọ eyin sọha ehe yin mimá do zẹnzẹn, dopodopo mẹhe to aigba ji lẹ tọn na mọ atọ̀n yí!
Kunnudetọ Jehovah tọn lẹ ko sọ zín kavi basi tito na lẹdogbedevomẹ Biblu voovo lẹ tọn nido yin zinzinjẹgbonu. Biblu lọ, Les Saintes Écritures—Traduction du monde nouveau—blebu kavi apadewhe etọn he Kunnudetọ lẹ lẹdogbedevomẹ, zinjẹgbonu, bosọ má—tin-to-aimẹ todin to ogbè 96 mẹ. Hugan vọkan livi 166 wẹ ko yin mimá. Kunnudetọ lẹ sọ nọ lá wẹndagbe Ahọluduta lọ tọn to opli Klistiani tọn lẹ whenu.
To Opli Klistiani Tọn lẹ Whenu. Opli sẹmẹsẹmẹ tọn he nọ yin bibasi to Plitẹnhọ Ahọluduta tọn mẹ lẹ ma yin nuwiwa sinsẹ̀n tọn lẹ poun gba; yé yin awuwlena nado plọnnumẹ. Hodidọ he sinai do Biblu ji lẹ nọ yin nina, podọ linlinnamẹwe Atọ̀họ̀-Nuhihọ́ lọ Tọn po owe devo lẹ po nọ yin yiyizan nado plọn Biblu. To opli lẹ whenu, Kunnudetọ lẹ sọ nọ plọn nado pegan dogọ na wẹndagbe lọ lilá.
Kunnudetọ lẹ nọ plọn nudopolọ to hugan agun 107000 mẹ lẹdo aihọn pé, ehe nọ yidogọna pọninọ yetọn. Mẹlẹpo wẹ sọgan wá opli ehelẹ tẹnmẹ. Yé ma nọ ṣinyan akuẹ. Na nugbo tọn, ehe lẹpo na yin ovọ́ eyin Kunnudetọ lẹ gboawupo nado nọ yí nuhe yé nọ dọyẹwheho etọn lẹ do yizan mẹ. Enẹwutu, yé nọ hẹn mẹdevo lẹ nado kẹalọyi wẹndagbe lọ gbọn apajlẹ mẹdetiti tọn yetọn dali.
Apajlẹ Mẹdetiti Tọn. Yé nọ dovivẹnu nado yin apajlẹ dagbenọ to walọyizan Klistiani tọn yetọn mẹ, bo nọ wà nuhe go yé pé lẹpo nado yinuwa hẹ mẹdevo lẹ dile yé jlo dọ mẹdevo lẹ ni nọ yinuwa hẹ yelọsu do. (Matiu 7:12) Mahopọnna dọ yé yin mapenọ bo nọ ṣinuwa to whedelẹnu, yé nọ tindo ojlo ahundopo tọn nado yinuwa po owanyi po do ota mẹlẹpo tọn mẹ, e ma yin gbọn wẹndagbe lọ lilá dali kẹdẹ gba, ṣigba gbọn alọgigọna mẹdevo lẹ to whedepopenu he e yọnbasi dali.
Kunnudetọ Jehovah tọn lẹ ma to yẹwhehodọ po linlẹn lọ po dọ gbẹtọ lẹpo na lẹzun hagbẹ agun yetọn tọn gba. Kakatimọ, eyin Jehovah mọdọ azọ́n lọ ko yin wiwà dile e jẹ do, opodo lọ na wá, dile Jesu dọ dọdai etọn do. Etẹwẹ enẹ na zẹẹmẹdo na aigba po mẹhe tin to e ji lẹ po?
[Yẹdide to weda 7]
Kunnudetọ Jehovah tọn lẹ to yẹwheho wẹndagbe lọ tọn dọ lẹdo aihọn pé