Nuhọakuẹ Hoho Mítọn lẹ Sisẹdo — WESẸDOTẸN INTẸNẸT JI TỌN Watchtower Tọn

Sọn Onú Hoho Sẹdotẹn Mítọn

Nuhọakuẹ Hoho Mítọn lẹ Sisẹdo

OMẸ Jehovah tọn lẹ tindo ogú gbigbọmẹ tọn he họakuẹ taun de. Gbọnvona owe sinai do Biblu ji mítọn lẹ hihia, mí sọgan plọnnu gando ogú enẹ go gbọn fọto, wekanhlanmẹ, kandai mẹdetiti tọn gọna nuyizan hoho he gando sinsẹ̀n-bibasi mítọn, azọ́n yẹwhehodidọ tọn mítọn po otàn mítọn po go lẹ gblamẹ. Ṣigba, ale tẹwẹ tin to e mẹ eyin mí nọ sẹ̀ onú ehelẹ do nado sọgan nọ flin nuhe jọ wayi lẹ? Tatọ́ whẹndo tọn lẹ to Islaeli hohowhenu tọn dona hẹn osẹ́n po onú jiawu he Jehovah ko wà lẹ po zun yinyọnẹn na visunnu yetọn lẹ na yé nido nọ “ze todido yetọn do Jiwheyẹwhe go.”—Ps. 78:1-7.

Dodinnanu bibasi to onú hoho sẹdotẹn lẹ ko yí adà tangan de wà to lẹndai Jehovah tọn hinhẹndi mẹ. Di apajlẹ, to whenue nukundiọsọmẹtọ lẹ tẹnpọn nado doalọtena azọ́n tẹmpli Jelusalẹm tọn gbigbá tọn, gbedide yin nina nado basi dodinnanu to kandai hoho lẹ mẹ to Akmẹta kavi Ẹkbatana, yèdọ tatọ́-tònọ Midiani tọn, bọ kandai he mẹ Ahọlu Kilusi nagbè dọ ohọ̀ mọnkọtọn ni yin gbigbá te de yin mimọ. (Ẹzla 6:1-4, 12) Enẹwutu, tẹmpli lọ yin vivọgbá to kọndopọ mẹ hẹ ojlo Jiwheyẹwhe tọn. Wẹndagbe-kantọ Luku he “dindona onú lẹpo po gbesisọ po sọn bẹjẹeji” lọsu basi dodinnanu to owe hoho lẹ mẹ.—Luku 1:1-4.

Hagbẹ Anademẹtọ lọ tindo ojlo nujọnu tọn to otàn yẹwhehọluduta tọn mítọn mẹ. Dopo to Hagbẹ Anademẹtọ lọ mẹ dọ gando nuhudo lọ nado sẹ̀ ogú gbigbọmẹ tọn mítọn do bo basi kandai gandego bosọ jo e na mẹdevo lẹ go dọmọ: “Eyin mí na yọ́n fie mí jei, mí dona yọ́n fie mí tọ́n sọn.” Enẹwutu, to agọe, Azọ́nwatẹn Onú Hoho Sẹdotẹn tọn yin didoai to tatọ́-tẹnnọ mítọn to Brooklyn, New York, podọ e nọ wazọ́n to anademẹ Wedegbẹ́ Wekinkan tọn glọ.

“FỌTO WHẸNDO TỌN” PO “OGÚ WHẸNDO TỌN” MÍTỌN LẸ PO

Dile ojlẹ lẹ to yìyì, mí masọ nọ flin nuhe jọ wayi lẹpo ba, bọ e nọ vẹna suhugan mítọn dọ mí ma basi kandai gigọ́ nuwiwa whẹndo mítọn tọn. Azọ́n sinsinyẹn to yinyin wiwà todin to Azọ́nwatẹn Onú Hoho Sẹdotẹn tọn nado sẹ̀ ogú susu he fọ́n bo to jijideji mítọn lẹ do podọ nado basi kandai yetọn. Fọto he yin sisẹdo po sọwhiwhe po to Onú Hoho Sẹdotẹn lọ lẹ sọgan yin pinpọnhlan taidi “fọto whẹndo tọn” mítọn lẹ. Zinjẹgbonu mítọn tintan lẹ, kandai mẹdetiti tọn he fọnjlodotenamẹ lẹ, podọ nutindo he nọ flinnumẹ lẹ sọ tin to nuhọakuẹ he tin to Onú Hoho Sẹdotẹn lọ mẹ lẹ mẹ. Onú ehelẹ, he yin “ogú whẹndo tọn” mítọn nọ zọ́n bọ mí nọ yọ́n ogú yẹwhehọluduta tọn mítọn, podọ yé nọ gọalọna mí nado pọ́n sọgodo whẹndo gbigbọmẹ tọn mítọn tọn hlan po jidide po.

Mí basi oylọna we nado wá yọ́n nuhe tin to Azọ́nwatẹn Onú Hoho Sẹdotẹn tọn lọ lẹ gbọn hosọ yọyọ lọ “Sọn Onú Hoho Sẹdotẹn Mítọn” hihia dali. Hosọ ehe na nọ sọawuhia to Atọ̀họ̀-Nuhihọ́ lọ Tọn zinjẹgbonu oplọn tọn mẹ. Di apajlẹ, to zinjẹgbonu he ja de mẹ, mí to tito basi nado wleawuna kandai he bẹ yẹdide lẹ hẹn de he lẹndai etọn yin nado na gblọndo kanbiọ he bọdego ehelẹ tọn: Etẹwẹ yin Saki Kẹkẹfọnọ? Mẹnu lẹ wẹ yí i zan? Whetẹnu wẹ e yin yiyizan, podọ na lẹndai tẹ?

Taidi fọto whẹndo tọn he nọ flinnumẹ lẹ, bẹplidopọ nuhe tin to Onú Hoho Sẹdotẹn lọ tọn lẹ nọ dọ nususu na mí gando mílọsu po tọgbo gbigbọmẹ tọn mítọn lẹ po go—yèdọ gando yise po adọgbigbo mẹhe jẹnukọnna mí lẹ tọn po go, gando ayajẹ po avùnnukundiọsọmẹ he Otọ́ owanyinọ olọn mẹ tọn mítọn sinsẹ̀n nọ bẹhẹn lẹ po go podọ gando anademẹ Jiwheyẹwhe tọn po alọgọ tẹgbẹ tọn he e nọ na omẹ etọn lẹ po go. (Deut. 33:27) Mí deji dọ Jehovah na dona vivẹnu he to yinyin dido nado sẹ̀ otàn gbigbọmẹ tọn mítọn lẹ do, na mí nido gbọṣi pọninọ mẹ bo mọ huhlọn dogọ nado to ojlo etọn wà zọnmii todin hugan gbede pọ́n.

[Apotin/Yẹdide to weda 31]

Lehe Azọ́n lọ Nọ Yì Do

Eyin wekantọ, anazọ́nwatọ, dodinnanutọ mítọn lẹ po azọ́nwatọ devo lẹ po to awuwlena owe sinai do Biblu ji lẹ, DVD lẹ, po nuyizan sinai do Biblu ji devo lẹ po, yé nọ dín nudọnamẹ sọn Onú Hoho Sẹdotẹn lẹ. Enẹwutu, Azọ́nwatẹn Onú Hoho Sẹdotẹn tọn nọ dovivẹnu taun bo nọ ze afọdide yọ́n-na-yizan lẹ nado ṣinyan onú hoho lẹ sọn asisa delẹ dè taidi alahọ lẹ, azọ́nwatẹn he to Bẹtẹli lẹ, agun lẹ, mẹmẹsunnu lẹ, po azọ́nwatẹn aihọn tọn lẹ po bosọ nọ sẹ̀ yé do. Pọ́n lehe azọ́n ehe nọ yin wiwà do to kleun mẹ:

Nutindo lẹ Nọ Yin Mimọyi bo Nọ Yin Gbigbejepọn: Nuyizan vonọtaun lẹ nọ yin yiyidogọ nuhe ko tin to Onú Hoho Sẹdotẹn lọ lẹ. Mẹhe whẹndo yetọn ko yí nugbonọ-yinyin do to Jehovah sẹ̀n na owhe susu lẹ wẹ nọ na mí susu to onú ehelẹ mẹ kavi whé yé na mí. Nuyizan enẹlẹ gbigbejepọn po ode yíyí jlẹdo devo go po nọ gọalọna mí nado mọnukunnujẹ whenuho mítọn po mẹhe nọgbẹ̀ to ojlẹ enẹ mẹ lẹ po tọn mẹ dogọ.

Nutitò Do Whinnu-Whinnu: Nuyizan fọtọ́n susu he delẹ ko tin-to-aimẹ na owhe kanweko linlán wẹ tin to Azọ́nwatẹn Onú Hoho Sẹdotẹn tọn lọ. Yé tindo awusọhia voovo lẹ podọ yé dona yin tito do whinnu-whinnu po sọwhiwhe po nado yin yiyizan to nukọn mẹ.

Nulẹ Vivọjlado po Hihọ́-Bibasina Yé Po: Owe he sọgan yawu vún lẹ po nuyizan hoho lẹ po nọ yin vivọjlado bo nọ yin hihọ́-basina po azọ́nyinyọnẹn po. Kandai lẹ, fọto lẹ, yẹdide to kanji lẹ, sinima lẹ, po hoyidokanji lẹ po nọ yin yíyí do ọdinatẹẹ ji. Gbọnmọ dali, yé sọgan yin dindinmọ to ọdinatẹẹ ji nado dapana kandai kavi nuyizan jọnun lọ lẹ hinhẹngble.

Nulẹ Sisẹdo po Yizan Yetọn Po: Onú hoho lẹ nọ yin sisẹdo do kannu-kannu podọ to aliho de mẹ ma nado hẹn yé bu, yé sọ nọ yin hihọ́-basina na hinhọ́n po hihla po nikaa hẹn yé gble. Tito ọdinatẹẹ ji tọn de to yinyin awuwlena he na gọalọ to dodinnanu bibasi do nuhọakuẹ hoho mítọn lẹ po yizan yetọn po ji mẹ.

[Yẹdide to weda 32]

1. Owe nujijla “Photo-Drame de la Création” tọn. 2. Kandai akuẹdida lẹ tọn. 3. Mọto he tindo zomọ gbèzeyiaga tọn. 4. Wepa Atọ̀họ̀-Nuhihọ́ lọ Tọn 15 avril 1912 tọn. 5. Owe he yin didohlan J. F. Rutherford nado dohia ẹ dọ e na sẹ̀ngàn. 6. Miklo WBBR tọn. 7. Glamafonu. 8. Saki apotin tọn. 9. Kandai mẹdetiti tọn lẹ. 10. Wekanhlanmẹ de hlan J. F. Rutherford.