Yẹwhenọ He to Sinsẹ̀n di Ahọlu lẹ Na Hẹn Ale Wá Na Gbẹtọvi Lẹpo
“Mìwlẹ wẹ ‘akọ̀ dide de, yẹwhenọ he to sinsẹ̀n di ahọlu lẹ, akọta wiwe de, mẹhe yin dide nado yin nutindo vonọtaun lẹ.’”—1 PITA 2:9.
BE HIẸ SỌGAN NA GBLỌNDO YA?
Whetẹnu wẹ opagbe yẹwhenọ he na sẹ̀n di ahọlu lẹ tọn yin dido whla tintan?
Nawẹ alẹnu yọyọ lọ wleawuna yẹwhenọ he to sinsẹ̀n di ahọlu lẹ gbọn?
Ale tẹlẹ wẹ yẹwhenọ he to sinsẹ̀n di ahọlu lẹ na hẹnwa na gbẹtọvi lẹ?
1. Naegbọn “tenu-núdùdù Oklunọ tọn” sọ nọ yin yiylọdọ Oflin, podọ etẹwẹ yin lẹndai etọn?
TO OZÁN Nisan 14 owhe 33 W.M. mẹ, Jesu Klisti po apọsteli 12 etọn lẹ po basi hùnwhẹ Juwayi Ju lẹ tọn godo tọn. To whenue Jesu ko yàn Juda Iskaliọti pàdutọ lọ godo, e ze hùnwhẹ devo de dai he wá yin yiylọdọ “tenu-núdùdù Oklunọ tọn.” (1 Kọl. 11:20) Jesu dọ whla awe dọmọ: “Mì nọ wà ehe to oflin ṣie mẹ.” Nujijọ ehe sọ yin yinyọnẹn taidi Oflin, enẹ wẹ oflin Klisti tọn he gando okú etọn go. (1 Kọl. 11:24, 25) Nado setonuna gbedide ehe, Kunnudetọ Jehovah tọn lẹ nọ basi hùnwhẹ Oflin tọn lọ to whemẹwhemẹ. To 2012, Nisan 14tọ sunzanhiawe Biblu tọn na bẹjẹeji to họyiyi owhè tọn godo to jeudi 5 avril.
2. Etẹwẹ Jesu dọ gando yẹhiadonu he e yizan lọ lẹ go?
2 Devi Luku basi bladopọ nuhe Jesu wà bo dọ to nujijọ enẹ tẹnmẹ lẹ tọn to wefọ awe mẹ dọmọ: “E yí akla de, bo dopẹ́, bosọ wẹ́n ẹn, bo yí i na yé, bosọ dọmọ: ‘Ehe nọtena agbasa ṣie he na yin nina do ota mìtọn mẹ. Mì nọ wà ehe to oflin ṣie mẹ.’ Humọ, e sọ yí kọfo lọ to aliho dopolọ mẹ, to whenue yé ko dù tenu-núdùdù lọ godo, bo dọmọ: ‘Kọfo ehe nọtena alẹnu yọyọ lọ to dodonu ohùn ṣie tọn ji, he na yin kinkọndai do ota mìtọn mẹ.’” (Luku 22:19, 20) Nawẹ apọsteli lẹ na ko mọnukunnujẹ hogbe ehelẹ mẹ gbọn?
3. Nawẹ apọsteli lẹ na ko mọnukunnujẹ nuhe yẹhiadonu lọ lẹ nọtena mẹ gbọn?
3 Na apọsteli lẹ yin Ju wutu, yé jẹakọ hẹ avọ́sinsan kanlin tọn lẹ he yẹwhenọ lẹ nọ basi hlan Jiwheyẹwhe to tẹmpli mẹ to Jelusalẹm ganji. Avọ́nunina mọnkọtọn lẹ nọ yin bibasi nado mọ nukundagbe Jehovah tọn, podọ susu to yé mẹ nọ yin oyẹsu na ylando. (Lev. 1:4; 22:17-29) Enẹwutu, apọsteli lẹ sọgan ko mọnukunnujẹemẹ dọ to whenue Jesu dọ dọ agbasa po ohùn emitọn po na ‘yin nina bo yin kinkọndai do ota yetọn mẹ,’ nuhe dọ e te wẹ yindọ ewọ na ze ogbẹ̀ pipé etọn jo taidi avọ́sinsan de. Avọ́sinsan enẹ na yin nujọnu taun hugan avọ́sinsan kanlin tọn lẹ.
4. Etẹ dọ wẹ Jesu te to whenue e dọ dọ: “Kọfo ehe nọtena alẹnu yọyọ lọ to dodonu ohùn ṣie tọn ji”?
4 Etẹwẹ dogbọn hogbe Jesu tọn lẹ dọ “kọfo ehe nọtena alẹnu yọyọ lọ to dodonu ohùn ṣie tọn ji” dali? Apọsteli lẹ yọ́n dọdai he gando alẹnu yọyọ lọ go he yin kinkandai to Jelemia 31:31-33 mẹ. (Hia.) Hogbe Jesu tọn lẹ dohia dọ ewọ jlo na ze alẹnu yọyọ enẹ dai todin, ehe na diọtẹnna alẹnu Osẹ́n tọn he Jehovah basi hẹ Islaelivi lẹ gbọn Mose gblamẹ. Be kanṣiṣa de tin to alẹnu awe lọ lẹ ṣẹnṣẹn ya?
5. Nukundido tẹlẹ wẹ Islaelivi lẹ tindo gbọn alẹnu Osẹ́n tọn lọ gblamẹ?
5 Mọwẹ, kanṣiṣa pẹkipẹki de tin to lẹndai yetọn lẹ ṣẹnṣẹn. To whenue Jehovah to alẹnu Osẹ́n tọn lọ basi hẹ akọta lọ, e dọna yé dọmọ: “Eyin mìwlẹ na yí ogbè ṣie sè nugbonugbo, bo yìn alẹnu ṣie, whenẹnu wẹ mìwlẹ na yin adọkunnu vivẹ́ de hlan mi sọn ṣẹnṣẹn gbẹtọ lẹpo tọn: na aigba lẹpo wẹ ṣie: mìwlẹ nasọ yin ahọludu yẹwhenọ lẹ tọn de, podọ akọta wiwe de hlan mi.” (Eks. 19:5, 6) Nawẹ Islaelivi lẹ na ko mọnukunnujẹ hogbe ehelẹ mẹ gbọn?
OPAGBE LỌ NADO LẸZUN YẸWHENỌ HE TO SINSẸ̀N DI AHỌLU LẸ
6. Hẹndi opagbe tẹ tọn wutu wẹ alẹnu Osẹ́n tọn lọ do yin bibasi?
6 Islaelivi lẹ jẹakọ hẹ hogbe lọ “alẹnu,” na Jehovah ko basi gbekọndopọ vonọtaun mọnkọtọn lẹ hẹ tọgbo yetọn Noa po Ablaham po. (Gẹn. 6:18; 9:8-17; 15:18; 17:1-9) Taidi apadewhe alẹnu etọn tọn, Jehovah dopagbe ehe na Ablaham dọmọ: “To okún towe mẹ wẹ yè na dona akọta aigba ji tọn lẹpo.” (Gẹn. 22:18) Jehovah basi alẹnu Osẹ́n tọn lọ na opagbe ehe nido mọ hẹndi. To dodonu alẹnu ehe tọn ji, Islaelivi lẹ sọgan lẹzun “adọkunnu vivẹ́ de hlan [Jehovah] sọn ṣẹnṣẹn gbẹtọ lẹpo tọn.” Na lẹndai tẹ wutu? Nado lẹzun “ahọludu yẹwhenọ lẹ tọn de” na Jehovah.
7. Etẹwẹ hodidọ lọ “ahọludu yẹwhenọ lẹ tọn de” zẹẹmẹdo?
7 Islaelivi lẹ yọ́n ahọlu lẹ po yẹwhenọ lẹ po, ṣigba Mẹlkizedẹki kẹdẹ wẹ yin sunnu hohowhenu tọn he Jehovah na dotẹnmẹ nado yin ahọlu podọ yẹwhenọ to ojlẹ dopolọ mẹ. (Gẹn. 14:18) Todin, Jehovah hùn dotẹnmẹ dote na akọta lọ nado wleawuna “ahọludu yẹwhenọ lẹ tọn de.” Dile kandai gbọdo lẹ dohia do to nukọn mẹ, ehe zẹẹmẹdo dọ dotẹnmẹ lọ hundote na akọta lọ nado wleawuna yẹwhenọ he na sẹ̀n di ahọlu lẹ.—1 Pita 2:9.
8. Sinsẹ̀nzọn tẹlẹ wẹ yẹwhenọ he Jiwheyẹwhe de lẹ nọ wà?
8 E họnwun dọ ahọlu de nọ dugán wẹ. Ṣigba, etẹwẹ yẹwhenọ de nọ wà? Heblu lẹ 5:1 basi zẹẹmẹ dọmọ: “Yẹwhenọ daho he yin didesọn gbẹtọ lẹ ṣẹnṣẹn lẹpo wẹ nọ yin dide nado wà sinsẹ̀nzọn Jiwheyẹwhe tọn do ota gbẹtọ lẹ tọn mẹ, na ewọ nido sọgan basi nunina lẹ po avọ́sinsan lẹ po na ylando lẹ wutu.” Enẹwutu, yẹwhenọ he Jehovah de nọ ze afọ mẹhe wà ylando lẹ tọn dai to Jiwheyẹwhe nukọn gbọn avọ́nunina he yin bibiọ lẹ bibasi dali, bo nọ gbọnmọ dali vẹvẹna Ẹn do ota yetọn mẹ. Gbọnvona enẹ, yẹwhenọ de sọ nọ ze afọ Jehovah tọn dai to gbẹtọ lẹ nukọn gbọn osẹ́n Jiwheyẹwhe tọn pinplọn yé dali. (Lev. 10:8-11; Mal. 2:7) Ehelẹ dohia dọ, yẹwhenọ he yin dide lọ nọ gọalọna gbẹtọ lẹ nado gbọwhẹ hẹ Jiwheyẹwhe.
9. (a) Nubiọtomẹsi tẹ kọ̀n wẹ Islaelivi lẹ dona jẹ whẹpo opagbe lọ dọ yé na wleawuna “ahọludu yẹwhenọ lẹ tọn de” nido yin hinhẹndi? (b) Naegbọn Jehovah do de yẹwhenọ lẹ to Islaelivi lẹ ṣẹnṣẹn? (c) Etẹwẹ zọ́n bọ Islaelivi lẹ ma sọgan wleawuna “ahọludu yẹwhenọ lẹ tọn de” to alẹnu Osẹ́n tọn glọ?
9 Alẹnu Osẹ́n tọn lọ gbọnmọ dali hùn dotẹnmẹ dote na Islaelivi lẹ nado wleawuna yẹwhenọ he na sẹ̀n di ahọlu lẹ he na hẹn ale wá na “gbẹtọ lẹpo.” Yé na duvivi nukundido jiawu ehe tọn kiki eyin yé jẹ nubiọtomẹsi ehe kọ̀n: “Eyin mìwlẹ na yí ogbè ṣie sè nugbonugbo, bo yìn alẹnu ṣie.” Be Islaelivi lẹ sọgan ‘yí ogbè Jehovah tọn sè nugbonugbo’ kavi setonuna ẹn ya? Mọwẹ, yé sọgan wàmọ jẹ obá de mẹ. Be yé sọgan wàmọ to gigọ́ mẹ ya? Lala. (Lom. 3:19, 20) Enẹwutu to ojlẹ enẹ mẹ, Jehovah de yẹwhenọ he ma yin ahọlu lẹ to Islaelivi lẹ ṣẹnṣẹn nado nọ basi avọ́sinsan kanlin tọn lẹ na ylando he Islaelivi lẹ wà. (Lev. 4:1–6:7) Ylando yẹwhenọ lẹ tọn lọsu to e mẹ ga. (Heb. 5:1-3; 8:3) Jehovah kẹalọyi avọ́sinsan mọnkọtọn lẹ, ṣigba yé ma sọgan súdo ylando mẹhe basi yé lẹ tọn to gigọ́ mẹ gba. Yẹwhenọ he tin to alẹnu Osẹ́n tọn glọ lẹ ma sọgan hẹn Islaelivi he tlẹ yin ahundoponọ lẹ nado gbọwhẹ hẹ Jiwheyẹwhe. Apọsteli Paulu dọ ẹ dole dọmọ: “E ma yọnbasi na ohùn oyìnsú lẹ tọn podọ gbọgbọẹ lẹ tọn nado de ylando lẹ sẹ̀ gba.” (Heb. 10:1-4) Na Islaelivi lẹ gbà Osẹ́n lọ wutu, yé wá biọ dẹ̀hodo de glọ. (Gal. 3:10) To ninọmẹ mọnkọtọn mẹ, e na vẹawu dọ yé ni yin yẹwhenọ he na sẹ̀n taidi ahọlu do aihọn lọ ji lẹ.
10. Etẹwẹ yin lẹndai alẹnu Osẹ́n tọn lọ tọn?
10 Enẹwutu, be ovọ́ wẹ opagbe Jehovah tọn dọ yé sọgan wleawuna “ahọludu yẹwhenọ lẹ tọn de” yin ya? Paali. Eyin yé dovivẹnu nujọnu tọn nado setonu, yé na tindo dotẹnmẹ hundote ehe—ṣigba e ma yin to Osẹ́n lọ glọ. Etẹwutu? (Hia Galatianu lẹ 3:19-25.) Osẹ́n lọ gọalọna nugbonọ he dovivẹnu nado yìn in lẹ nado gbọṣi sinsẹ̀n-bibasi wiwe-ṣeke mẹ. E hẹn Ju lẹ nado yọnẹn dọ yé yin sẹ́nhẹngbatọ bo tindo nuhudo avọ́sinsan he hugan dehe yẹwhenọ daho yetọn sọgan basi tọn. E yin anademẹtọ yetọn he deanana yé yì Klisti, kavi Mẹsia lọ dè, yèdọ tẹnmẹ-yinkọ lẹ he zẹẹmẹdo “Mẹyiamisisadode.” Ṣigba, eyin Mẹsia lọ wá, e na ze alẹnu yọyọ he Jelemia dọ dọdai etọn lọ dai. Mẹhe kẹalọyi Klisti lẹ yin oylọ-basina nado tindo mahẹ to alẹnu yọyọ lọ mẹ podọ yé na lẹzun “ahọludu yẹwhenọ lẹ tọn de.” Gbọnna?
ALẸNU YỌYỌ LỌ WLEAWUNA YẸWHENỌ HE TO SINSẸ̀N DI AHỌLU LẸ
11. Nawẹ Jesu hẹn ẹn yọnbasi na mẹdevo lẹ nado lẹzun yẹwhenọ he na sẹ̀n di ahọlu lẹ gbọn?
11 To owhe 29 W.M., Mẹsia lọ wá yin yinyọnẹn taidi Jesu Nazalẹti tọn. To whenue e tindo nudi owhe 30, e ze ede jo nado wà nuhe yin ojlo vonọtaun Jehovah tọn na ẹn bo do ehe hia gbọn baptẹm osin tọn yíyí dali. Jehovah ylọ ẹ dọ “Visunnu ṣie, mẹyiwanna lọ,” bo de e, e ma yin po amì po, ṣigba po gbigbọ wiwe po. (Mat. 3:13-17; Owalọ 10:38) Gbọnmọ dali, e yin azọ́ndena taidi Yẹwhenọ Daho podọ Ahọlu sọgodo tọn na gbẹtọvi he do yise hia lẹpo. (Heb. 1:8, 9; 5:5, 6) Ewọ wẹ na hẹn ẹn yọnbasi na mẹdevo lẹ nado lẹzun yẹwhenọ he na sẹ̀n di ahọlu lẹ.
12. Etẹwẹ avọ́sinsan Jesu tọn hẹn yọnbasi?
12 Taidi Yẹwhenọ Daho, avọ́sinsan tẹwẹ Jesu sọgan basi nado súdo ylando mẹhe do yise hia lẹ tọn to gigọ́ mẹ? Dile ewọ lọsu dọ do to whenue e to Oflin okú etọn tọn zedai, ogbẹ̀ pipé gbẹtọvi tọn etọn wẹ yin avọ́sinsan lọ. (Hia Heblu lẹ 9:11, 12.) Sọn baptẹm etọn to owhe 29 W.M. godo, Jesu taidi Yẹwhenọ Daho, jo ede na mẹtẹnpọn lẹ bo plọnnu kakajẹ okú. (Heb. 4:15; 5:7-10) To fọnsọnku etọn godo, e hẹji yì olọn bo ze nuhọakuẹ-yinyin avọ́sinsan etọn tọn donukọnna Jehovah. (Heb. 9:24) Bẹsọn whenẹnu, Jesu penugo nado vẹvẹna Jehovah do ota mẹhe do yise hia to avọ́sinsan etọn mẹ lẹ tọn mẹ bo gọalọna yé nado sẹ̀n Jiwheyẹwhe po todido lọ po nado tindo ogbẹ̀ madopodo. (Heb. 7:25) Avọ́sinsan etọn sọ hẹn alẹnu yọyọ lọ lodo gligli.—Heb. 8:6; 9:15.
13. Nukundido tẹlẹ wẹ mẹhe yin oylọ-basina biọ alẹnu yọyọ lọ mẹ lẹ tindo?
13 Mẹhe yin oylọ-basina nado biọ alẹnu yọyọ lọ mẹ lẹ lọsu dona yin dide gbọn gbigbọ wiwe gblamẹ. (2 Kọl. 1:21) Ju nugbonọ lẹ wẹ yin dide jẹnukọn podọ to enẹgodo Kosi lẹ. (Efe. 3:5, 6) Nukundido tẹlẹ wẹ mẹhe tin to alẹnu yọyọ lọ mẹ lẹ tindo? Ylando yetọn lẹ na yin jijona yé nugbonugbo. Jehovah dopagbe dọmọ: “Yẹn na jona ylanwa yetọn, ylando yetọn wẹ yẹn masọ to na flin ba gba.” (Jel. 31:34) Na ylando yetọn lẹ ko yin hùzẹdeji wutu, yé tin to otẹn dagbe mẹ nado lẹzun “ahọludu yẹwhenọ lẹ tọn de.” To whenue Pita to hodọna Klistiani yiamisisadode lẹ, e wlan dọmọ: “Mìwlẹ wẹ ‘akọ̀ dide de, yẹwhenọ he to sinsẹ̀n di ahọlu lẹ, akọta wiwe de, mẹhe yin dide nado yin nutindo vonọtaun lẹ, na mì nido lá gigo daho’ omẹ lọ he ylọ mì sọn zinvlu mẹ wá hinhọ́n jiawu etọn mẹ tọn lẹ.” (1 Pita 2:9) Tofi, Pita yihodọ sọn nuhe Jehovah dọna Islaelivi lẹ to whenue Ewọ to Osẹ́n lọ zedai mẹ bo yí hogbe lọ lẹ zan na Klistiani he tin to alẹnu yọyọ lọ mẹ lẹ.—Eks. 19:5, 6.
YẸWHENỌ HE TO SINSẸ̀N DI AHỌLU LẸ NA HẸN ALE WÁ NA GBẸTỌVI LẸPO
14. Fitẹ wẹ mẹhe tin to alẹnu yọyọ lọ mẹ lẹ na sẹ̀n te?
14 Fitẹ wẹ mẹhe tin to alẹnu yọyọ lọ mẹ lẹ na sẹ̀n te? To aigba ji fi taidi pipli de, yé na sẹ̀n taidi yẹwhenọ lẹ bo na ze afọ Jehovah tọn dai to gbẹtọ lẹ dè gbọn ‘gigo daho etọn lilá’ po awuwiwlena núdùdù gbigbọmẹ tọn po dali. (Mat. 24:45; 1 Pita 2:4, 5) To okú po fọnsọnku yetọn po godo, yé na sẹ̀n po Klisti po to olọn mẹ taidi ahọlu lẹ po yẹwhenọ lẹ po bo na hẹn azọngban awe topọ enẹlẹ di to gigọ́ mẹ. (Luku 22:29; 1 Pita 1:3-5; Osọ. 1:6) To numimọ de mẹ, apọsteli Johanu mọ nudida gbigbọnọ delẹ to ofìn Jehovah tọn pá to olọn mẹ. Yé to “ohàn yọyọ de” ji hlan “Lẹngbọvu lọ” dọmọ: “Ohùn towe wẹ hiẹ yí do họ̀ gbẹtọ lẹ na Jiwheyẹwhe sọn hẹnnu lẹ, ogbè lẹ, gbẹtọ lẹ, podọ sọn akọta lẹpo mẹ, hiẹ sọ hẹn yé zun ahọluduta de po yẹwhenọ lẹ po hlan Jiwheyẹwhe mítọn, bọ yé na duahọlu do aigba ji.” (Osọ. 5:8-10) To numimọ devo mẹ, Johanu dọ gando gandutọ ehelẹ go dọmọ: “Yé na yin yẹwhenọ Jiwheyẹwhe tọn lẹ podọ Klisti tọn lẹ, yé nasọ duahọlu hẹ ẹ na owhe fọtọ́n.” (Osọ. 20:6) To pọmẹ hẹ Klisti, yé wleawuna pipli yẹwhenọ he to sinsẹ̀n di ahọlu lẹ tọn de he na hẹn ale wá na gbẹtọvi lẹpo.
15, 16. Ale tẹlẹ wẹ yẹwhenọ he to sinsẹ̀n di ahọlu lẹ na hẹnwa na mẹhe tin to aigba ji lẹ?
15 Ale tẹlẹ wẹ gbẹtọ 144 000 lẹ na hẹnwa na mẹhe tin to aigba ji lẹ? Osọhia weta 21 dohia dọ yé yin tòdaho olọn mẹ tọn de, yèdọ Jelusalẹm Yọyọ, he nọ yin yiylọdọ “asi Lẹngbọvu lọ tọn.” (Osọ. 21:9) Wefọ 2 jẹ 4 dọmọ: “Yẹn mọ tòdaho wiwe lọ ga, yèdọ Jelusalẹm Yọyọ, to tejẹ sọn olọn sọn Jiwheyẹwhe dè bo yin awuwlena taidi asiyọyọ he yè doaṣọ́na na asu etọn. Enẹwutu, yẹn sè ogbè lélé de sọn ofìn lọ kọ̀n dọmọ: ‘Mì pọ́n! Gòhọ Jiwheyẹwhe tọn tin to gbẹtọvi lẹ dè, ewọ nasọ nọhẹ yé, yé nasọ yin omẹ etọn lẹ. Podọ Jiwheyẹwhe lọsu na tin po yé po. Ewọ nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba. Onú hoho lẹ ko juwayi.’” Dona jiawu nankọ lẹ die! Na okú ma nasọ tin ba wutu, dasin, aluẹmẹninọ, avi po awufiẹsa po na busẹ. Ehe dohia dọ gbẹtọvi nugbonọ lẹ na yin hinhẹn jẹ pipé kọ̀n, bo na yin hinhẹn nado gbọwhẹ hẹ Jiwheyẹwhe mlẹnmlẹn.
16 Osọhia 22:1, 2 basi zẹẹmẹ dona he yẹwhenọ he to sinsẹ̀n di ahọlu ehelẹ na hẹnwa tọn yinukọn dogọ dọmọ: “E sọ do tọ̀sisa osin ogbẹ̀ tọn de hia mi, he wé taidi klistali, bo to sisà jẹgbonu sọn ofìn Jiwheyẹwhe tọn po Lẹngbọvu lọ tọn po kọ̀n gbọn ṣẹnṣẹn alihogbó [Jelusalẹm Yọyọ] lọ tọn. Podọ to awà tọ̀sisa lọ tọn awe lẹ ji wẹ atin ogbẹ̀ tọn lẹ tin te he nọ sẹ́n sinsẹ́n wiawe, bo nọ to sinsẹ́n yetọn detọ́n to sunmẹsunmẹ. Amà atin lọ lẹ tọn lẹ sọ tin na azọ̀nhẹngbọ akọta lẹ tọn.” Po awuwledainanu yẹhiadonu tọn ehe po, azọ̀n mape tọn he “akọta lẹ” kavi whẹndo he tin to aigba ji lẹpo dugu etọn sọn Adam dè na yin hinhẹngbọ pete. Na nugbo tọn, ‘onú hoho lẹ na ko juwayi.’
YẸWHENỌ HE TO SINSẸ̀N DI AHỌLU LẸ DOTANA AZỌ́N YETỌN
17. Etẹwẹ yẹwhenọ he to sinsẹ̀n di ahọlu lẹ na wadotana to nukọn mẹ?
17 To whenue yẹwhenọ he to sinsẹ̀n di ahọlu lẹ na ko wà sinsẹ̀nzọn he hẹn ale wá na gbẹtọvi lẹ na owhe 1 000 godo, yé na ko hẹn mẹjidugando aigba ji tọn yetọn lẹ jẹ pipé kọ̀n. Taidi Yẹwhenọ Daho podọ Ahọlu de, Klisti na ze whẹndo gbẹtọvi tọn he ko jẹ pipé kọ̀n lọ donukọnna Jehovah. (Hia 1 Kọlintinu lẹ 15:22-26.) Yẹwhenọ he to sinsẹ̀n di ahọlu lẹ na ko hẹn lẹndai he wutu yé do yin dide di.
18. Nawẹ Jehovah na yí gbẹdohẹmẹtọ Klisti tọn lẹ zan to whenue yé na ko dotana azọ́n yetọn gbọn?
18 To enẹgodo, nawẹ Jehovah na yí gbẹdohẹmẹtọ vonọtaun Klisti tọn enẹlẹ zan gbọn? Sọgbe hẹ Osọhia 22:5, “yé nasọ duahọlu kakadoi podọ doidoi.” Do mẹnu lẹ ji? Biblu ma dọ. Ṣigba, ogbẹ̀ wunmẹ he yé tindo po numimọ he yé tindo to whenue yé gọalọna gbẹtọvi mapenọ lẹ po na hẹn yé pegan nado gbọṣi otẹn yẹyi tọn de mẹ to lẹndai Jehovah tọn mẹ kakadoi.
19. Etẹwẹ na yin finflin mẹhe na wá hùnwhẹ Oflin tọn tẹnmẹ lẹ?
19 Nuplọnmẹ Biblu tọn ehelẹ na tin to ayiha mítọn mẹ to whenue mí na pli nado basi hùnwhẹ Oflin okú Jesu tọn to jeudi 5 avril 2012. Pipotọ Klistiani yiamisisadode lẹ tọn vude he gbẹ́ pò to aigba ji na tindo mahẹ to yẹhiadonu lọ lẹ he yin akla madotọ́n po ovẹn vẹẹ po mẹ, bo gbọnmọ dali dohia dọ yé tin to alẹnu yọyọ lọ mẹ. Yẹhiadonu avọ́sinsan Klisti tọn ehelẹ na flin yé dọ yé tindo lẹblanulọkẹyi po azọngban vonọtaun lẹ po to lẹndai madopodo Jiwheyẹwhe tọn mẹ. Nado do pinpẹn-nutọn-yinyọnẹn sisosiso hia na awuwledainanu Jehovah Jiwheyẹwhe tọn—enẹ wẹ yẹwhenọ he to sinsẹ̀n di ahọlu lẹ he na hẹn ale wá na gbẹtọvi lẹpo—mì gbọ mímẹpo ni tin to otẹn enẹ mẹ.
[Yẹdide to weda 29]
Yẹwhenọ he to sinsẹ̀n di ahọlu lẹ na hẹn ale madopodo lẹ wá na gbẹtọvi lẹ