‘Be Yẹn Nkọ Sọgan Dọyẹwheho Ya?’
Lẹdo aihọn pé, mí tindo apajlẹ ayidego tọn mẹmẹsunnu po mẹmẹyọnnu lẹ po tọn he nọ tindo mahẹ to azọ́n yẹwhehodidọ tọn mẹ po nugbonọ-yinyin po mahopọnna dọ yé to azọ̀n sinsinyẹn jẹ. Apajlẹ dopo wẹ Dalia, he nọ nọ̀ Vilnius, he yin tatọ́-tònọ Lituanie tọn.
Dalia yin mẹmẹyọnnu de he tindo nudi owhe 35. Sọn jiji-whenu etọn gbọ́n wẹ apọ̀nmẹ-zọ̀n sinsinyẹn de to yadona ẹn. Azọ̀n enẹ ko zọ́n bọ e hò plibọ bo ma sọgan nọ dọho ganji. Enẹwutu, hagbẹ whẹndo etọn tọn lẹ kẹdẹ wẹ nọ mọnukunnujẹ nuhe e nọ dọ lẹ mẹ. Dalia nọ nọpọ́ hẹ onọ̀ etọn Galina, he nọ penukundo nuhudo etọn lẹ go. Dile etlẹ yindọ gbẹzan Dalia tọn gọ́ na yajiji po magbọjẹ lẹ po, e hẹn pọndohlan dagbe go. Nawẹ e wàmọ gbọn?
Galina basi zẹẹmẹ dọmọ: “To 1999, Apolonija he yin hẹnnumẹ ṣie de wá dla mí pọ́n. Mí mọdọ Apolonija he yin dopo to Kunnudetọ Jehovah tọn lẹ mẹ, yọ́n Biblu ganji, podọ Dalia jẹ kanbiọ susu lẹ kanse e ji. E ma dẹn bọ plọnmẹ Biblu de bẹjẹeji hẹ Dalia. To whedelẹnu, n’nọ kọnawudopọ hẹ yé to oplọn lọ whenu nado basi zẹẹmẹ nuhe Dalia dọ lẹ tọn. Ṣigba, n’doayi e go dọ e to alemọyi sọn nuhe plọn e te lẹpo mẹ. To godo mẹ, yẹnlọsu biọ plọnmẹ Biblu de.”
Dile Dalia to nukunnumọjẹ nugbo Biblu tọn lẹ mẹ, kanbiọ de jẹ ahunmẹduna ẹn ji badabada. To godo mẹ, e kanse Apolonija dọmọ: “Nawẹ yẹn nkọ—he hò plibọ—sọgan dọyẹwheho gbọn?” (Mat. 28:19, 20) Apolonija vọ́ jide na ẹn po ogbè fifá po dọmọ: “Ma dibu blo. Jehovah na gọalọna we.” Podọ, Jehovah wàmọ nugbo.
Ṣigba, nawẹ Dalia nọ dọyẹwheho gbọn? E nọ wà ehe to aliho susu mẹ. Mẹmẹyọnnu lẹ nọ gọalọna ẹn nado wleawuna wekanhlanmẹ he sinai do owẹ̀n Biblu tọn ji lẹ. Jẹnukọn whẹ́, Dalia nọ dọ linlẹn etọn na mẹmẹyọnnu lọ lẹ. Enẹgodo, yé nọ wlan wekanhlanmẹ he bẹ linlẹn etọn lẹ hẹn de. Dalia sọ nọ dekunnu gbọn wekanhlanmẹ alokan ji tọn lẹ didohlan mẹdevo lẹ dali. Podọ eyin ninọmẹ aimẹ tọn yọ́n, hagbẹ agun lọ tọn lẹ nọ plan ẹn tọ́n nado dekunnuna mẹhe yé nọ dukosọ hẹ to jipa lẹdo lọ tọn lẹ mẹ podọ to tòhomẹ-liho ji lẹ.
Dalia po onọ̀ etọn po zindonukọn bo basi nukọnyiyi to gbigbọ-liho. Yé omẹ awe lẹ klan yede do wiwe hlan Jehovah bo yí baptẹm to novembre 2004. To septembre 2008, kándo de he nọ do Pologne-gbè yin didoai to Vilnius. Na kándo lọ tindo nuhudo wẹnlatọ Ahọluduta lọ tọn lẹ wutu, Dalia po onọ̀ etọn po kọnawudopọ hẹ yé. Dalia dọmọ: “To osun delẹ mẹ, n’nọ jẹ nuhà ji eyin n’ma ko tọ́n na sinsẹ̀nzọn kunnudegbe tọn. Ṣigba, to dẹ̀hiho hlan Jehovah do whẹho lọ ji godo, e ma nọ dẹn bọ mẹde nọ basi tito nado tọ́n hẹ mi to lizọnyizọn lọ mẹ.” Etẹwẹ yin numọtolanmẹ mẹmẹyọnnu vivẹ́ mítọn Dalia tọn gando ninọmẹ etọn go? E dọmọ: “Nugbo wẹ dọ n’to awukuzọ̀n jẹ, ṣigba ayiha ṣie ma ko kú. Homẹ ṣie hùn taun dọ n’penugo nado nọ dọhona mẹdevo lẹ gando Jehovah go!”