Tindo Awuvivi po Kọdetọn Dagbe po Dogọ to Nupinplọn Whenu

Nawẹ mí sọgan mọ awuvivi dogọ to Biblu pinplọn whenu gbọn? Nawẹ mí sọgan hẹn ojlẹ nupinplọn tọn mítọn tindo kọdetọn dagbe dogọ gbọn? Mì gbọ mí ni gbadopọnna afọdide titengbe atọ̀n to kleun mẹ he na gọalọna mí nado nọ mọaleyi to gigọ́ mẹ sọn Biblu pinplọn mẹdetiti tọn mítọn mẹ.

1 NỌ HODẸ̀: Afọdide tintan wẹ nado nọ hodẹ̀. (Ps. 42:8) Etẹwutu? Mí dona nọ tindo numọtolanmẹ dọ Ohó Jiwheyẹwhe tọn pinplọn yin apadewhe sinsẹ̀n-bibasi mítọn tọn. Enẹwutu, mí dona nọ biọ Jehovah dọ ni hùn ahun mítọn bo na mí gbigbọ wiwe etọn. (Luku 11:13) Barbara he yin mẹdehlan sọn ojlẹ dindẹn die dọmọ: “Whedepopenu he n’jlo na hia kavi plọn Biblu, n’nọ hodẹ̀. To enẹgodo, n’nọ mọdọ Jehovah tin hẹ mi bo kẹalọyi nuhe wà n’te.” Dẹ̀hiho jẹnukọnna nupinplọn nọ hùn ahun po ayiha mítọn po nado kẹalọyi núdùdù gbigbọmẹ tọn susu he yin zizedonukọnna mí lẹ to gigọ́ mẹ.

2 NỌ LẸNAYIHAMẸPỌN: Na whenu ma tin wutu, mẹdelẹ nọ hia Biblu poun. Ṣigba, ale he yé sọgan mọ sọn Biblu pinplọn mẹ lẹ nọ gbọ yé go. Carlos he ko to Jehovah sẹ̀n na nuhe hugan owhe 50 ko wá mọdọ nujọnu wẹ e yin nado nọ de whenu dovo na ayihamẹlinlẹnpọn, na nupinplọn etọn nido sọgan tindo kọdetọn dagbe. E dọmọ: “Todin, eyin n’jlo na hia Biblu, n’masọ nọ hia weda susu ba—weda awe de janwẹ n’nọ hia egbesọegbesọ. Enẹ zọ́n bọ n’nọ yí whenu susu zan nado lẹnayihamẹpọn do nuhe n’hia lẹ ji nado sọgan plọn nujọnu lẹ sọn e mẹ.” (Ps. 77:12) Eyin mí nọ de whenu dovo nado lẹnayihamẹpọn, oyọnẹn po nukunnumọjẹnumẹ mítọn po gando ojlo Jiwheyẹwhe tọn go na siso dogọ.—Kọl. 1:9-11.

3 NỌ YÍ YÉ DO YIZAN MẸ: Eyin mí mọdọ nuwiwa de họakuẹ to nukun mítọn mẹ, mí nọ mọaleyi sọn e mẹ. Matin ayihaawe, enẹ yin nugbo gando Biblu pinplọn go. Gabriel, yèdọ mẹmẹsunnu jọja de he tindo tito Biblu pinplọn gbesisọ tọn de dọmọ: “Nupinplọn nọ gọalọna mi nado doakọnna nuhahun egbesọegbesọ tọn lẹ bosọ nọ hẹn mi penugo nado gọalọna mẹdevo lẹ.” E yidogọ dọmọ: “N’nọ dovivẹnu nado yí nuhe n’plọn lẹpo do yizan mẹ to gbẹzan ṣie mẹ.” (Deut. 11:18; Jọṣ. 1:8) Mọwẹ, oyọnẹn Jiwheyẹwhe tọn he mí sọgan plọn bo yí do yizan mẹ lẹ sù taun.—Howh. 2:1-5.

BLADOPỌ: Lẹblanulọkẹyi nankọ die mí tindo nado nọ plọn oyọnẹn sisosiso he Jehovah, Asisa nuyọnẹn lẹpo tọn wleawu etọn dai na mí! (Lom. 11:33) Enẹwutu, to whedevonu he hiẹ jlo na plọnnu, hẹn ẹn diun dọ hiẹ hodẹ̀ na Jehovah jẹnukọn bo biọ dọ ni hùn ahun towe bosọ na we gbigbọ wiwe etọn. Enẹgodo, nọ yiagbọji sọn ojlẹ de mẹ jẹ devo mẹ nado lẹnayihamẹpọn do nuhe hiẹ hia lẹ ji. Humọ, nọ lẹnnupọndo nuhe hiẹ plọn lẹ ji bosọ nọ yí yé do yizan mẹ to gbẹzan egbesọegbesọ tọn towe mẹ. Eyin hiẹ ze afọdide titengbe ehelẹ, hiẹ na mọdọ Biblu pinplọn towe na hẹn awuvivi po kọdetọn dagbe po wá na we dogọ.