Ma Pọ́n “Onú He to Godo lẹ” Blo
“Omẹ depope he doalọ glepọnu go bo pọ́n onú he to godo lẹ ma jẹna ahọluduta Jiwheyẹwhe tọn.”—LUKU 9:62.
NAWẸ HIẸ NA NA GBLỌNDO GBỌN?
Naegbọn mí dona “flin asi Lọti tọn”?
Onú atọ̀n tẹlẹ ji wẹ mí ma dona nọ to nulẹnpọn do mapote?
Nawẹ mí nọ zinzọnlin afọsu-afọsi hẹ titobasinanu Jehovah tọn gbọn?
1. Avase tẹwẹ Jesu na, podọ kanbiọ tẹwẹ fọndote?
“MÌ FLIN asi Lọti tọn.” (Luku 17:32) Avase sinsinyẹn he Jesu Klisti na to nudi owhe 2 000 die enẹ yin nujọnu todin hugan gbede pọ́n. Ṣigba etẹ dọ wẹ Jesu te taun? Juvi he to ohó etọn sè lẹ mọnukunnujẹ nuhe dọ e te mẹ hezeheze. Yé yọ́n nuhe jọ do asi Lọti tọn go ganji. To whenue ewọ po whẹndo etọn po to hinhọ̀n sọn Sodọmi, e vẹtoli bo pọ́n godo bosọ lẹzun dòtin ojẹ tọn.—Hia Gẹnẹsisi 19:17, 26.
2. Naegbọn asi Lọti tọn na ko pọ́n godo, podọ etẹ mẹ wẹ tolivivẹ etọn dekọtọn do?
2 Ṣigba naegbọn asi Lọti tọn do pọ́n godo? Be e jlo na pọ́n nuhe to jijọ do tòdaho lọ go wẹ ya? Be e pọ́n godo na e vẹawuna ẹn nado yí nuhe to jijọ lọ sè wẹ, kavi na yise etọn ko miọn wutu? Kavi, be e gbẹ́ tindo ojlo vẹkuvẹku na nuhe e jodo to Sodọmi lẹ wẹ ya? (Luku 17:31) Depope he whẹho lọ sọgan yin, ogbẹ̀ etọn wẹ e yí do suahọ na tolivivẹ etọn. Yí nukun homẹ tọn do pọ́n! E kú to azán dopolọ ji hẹ mẹylankan he nọ nọ̀ Sodọmi po Gomọla po lẹ. Abajọ Jesu do dọmọ: “Mì flin asi Lọti tọn”!
3. Nawẹ Jesu dohia dọ mí ma dona pọ́n godo to yẹhiadonu-liho gbọn?
3 Mọdopolọ to egbehe, mílọsu ma dona pọ́n godo to yẹhiadonu-liho. Jesu zinnudo nuagokun ehe ji to whenue e dọna dawe de he kanse eyin emi sọgan yì dọ e yì whedenu na whẹndo emitọn whẹpo do lẹzun devi de dọmọ: “Omẹ depope he doalọ glepọnu go bo pọ́n onú he to godo lẹ ma jẹna ahọluduta Jiwheyẹwhe tọn.” (Luku 9:62) Be gblọndo Jesu tọn sinyẹn gbau wẹ ya? Lala, na e yọnẹn dọ whẹjijọ dín wẹ dawe lọ te poun ma nado kẹalọyi azọngban. Jesu dohia dọ mẹhe yinuwa to aliho mọnkọtọn mẹ to “onú he to godo lẹ” pọ́n. Etẹwẹ yin vogbingbọn lọ eyin glesi he to azọ́nwa de pọ́n godo bleun kavi tlẹ ze azọ́nwanu etọn dai pete bo pọ́n godo? Nuyiwa awe lọ lẹpo wẹ na fẹayihasẹna ẹn sọn nuhe e to wiwà ji, podọ ehe sọgan bẹpla azọ́n etọn.
4. Etẹ ji wẹ mí dona ze ayidonugo mítọn lẹpo do?
4 Kakati nado to nuhe wayi lẹ flin, mí dona ze ayidonugo mítọn lẹpo do nuhe to nukọn lẹ ji. Howhinwhẹn lẹ 4:25 do ehe hia hezeheze dọmọ: “Gbọ nukun towe ni to titengbe pọ́n, na nukunga towe ni nọ pọ́n dín in to nukọn towe.”
5. Whẹwhinwhẹ́n tẹwẹ mí tindo ma nado pọ́n nuhe to godo lẹ?
5 Mí tindo whẹwhinwhẹ́n dagbe ma nado pọ́n nuhe to godo lẹ. Etẹwutu? Na mí tin to “azán godo tọn lẹ” mẹ wutu. (2 Tim. 3:1) To madẹnmẹ, aihọn ylankan lọ blebu wẹ na yin vivasudo, e ma yin tòdaho ylankan awe poun gba. Etẹwẹ na gọalọna mí nado dapana nuhe jọ do asi Lọti tọn go nkọ? Jẹnukọn whẹ́, mí dona yọ́n nuhe to godo delẹ he mí sọgan yin whiwhlepọn nado pọ́n. (2 Kọl. 2:11) Enẹwutu, mì gbọ mí ni gbadopọnna nuhe onú enẹlẹ yin bo pọ́n lehe mí sọgan dapana ayidonugo mítọn zizedo yé ji do.
LINLẸN LỌ DỌ OJLẸ HE WAYI LẸ PỌNTE
6. Naegbọn mí ma sọgan dejido nugopipe nufinflin tọn mítọn go to whepoponu?
6 Mí sọgan jai jẹ owù lọ mẹ nado lẹndọ ojlẹ he wayi lẹ pọnte. Nugbo lọ wẹ yindọ mí ma sọgan dejido nugopipe nufinflin tọn mítọn go to whepoponu. To mayọnẹn mẹ, mí sọgan yí nukunpẹvi do pọ́n nuhahun he mí pehẹ wayi lẹ bo lẹndọ mí tindo ayajẹ to whenẹnu taun. To hogbe devo mẹ, mí jẹ linlẹn ji dọ onú lẹ pọnte taun to whenẹnu dile etlẹ yindọ ninọmẹ lọ ma yinmọ. Pọndohlan agọ̀ mọnkọtọn sọgan zọ́n bọ ojlẹ he wayi enẹlẹ na jẹ jijlo mí ji. Ṣigba Biblu na mí avase dọmọ: “Hiẹ dọ dọ, etẹwutu wẹ azán nukọn tọn pọnte hú ehelẹ blo? na hiẹ ma yí nuyọnẹn do kanse gbọn ehe tọn dali gba.” (Yẹwh. 7:10) Naegbọn linlẹn mọnkọtọn tintindo do yin owùnu?
7-9. (a) Etẹwẹ jọ do Islaelivi lẹ go to Egipti? (b) Whẹwhinwhẹ́n tẹlẹ wẹ Islaelivi lẹ tindo nado jaya? (c) Etẹ go wẹ Islaelivi lẹ hlunnudọ gando?
7 Lẹnnupọndo nuhe jọ do Islaelivi lẹ go to azán Mose tọn gbè ji. Dile etlẹ yindọ Islaelivi lẹ yin pinpọnhlan taidi jonọ to aigba Egipti tọn ji to bẹjẹeji, to okú Josẹfu tọn godo, Egiptinu lẹ “de azọ́ngán lẹ do [Islaelivi lẹ] ji nado yí agbàn yetọn lẹ do bianukunna yé.” (Eks. 1:11) To godo mẹ, Falo degbe dọ omẹ etọn lẹ ni hù viyẹyẹ sunnu Islaelivi lẹ tọn nado sọgan de sọha yetọn pò. (Eks. 1:15, 16, 22) Abajọ Jehovah dọna Mose dọmọ: “Nugbonugbo yẹn ko mọ nukunbibia omẹ ṣie he tin to Egipti lẹ tọn, bo ko sọ sè awhá yetọn gbọn azọ́ngán yetọn lẹ tọn dali; na yẹn yọ́n awufiẹsa yetọn lẹ.”—Eks. 3:7.
8 Yí nukun homẹ tọn do pọ́n ayajẹ he Islaelivi lẹ na ko tindo dile yé mọ tundote yí bo tọ́n sọn kanlinmọgbenu! Yé ko mọ huhlọn Jehovah tọn to aliho ayidego tọn de mẹ to whenue e hẹn Azọ̀nylankan Ao lẹ wá Falo goyitọ lọ po omẹ etọn lẹ po ji. (Hia Eksọdusi 6:1, 6, 7.) Na nugbo tọn, e ma yindọ Egiptinu lẹ wá na dotẹnmẹ Islaelivi lẹ nado yì kẹdẹ wẹ gba, ṣigba Egiptinu lẹ vẹ̀ yé nado yì bo na yé sika po fataka susugege po sọmọ bọ Biblu dọ dọ omẹ Jiwheyẹwhe tọn lẹ “bẹ adọkunnu Egiptinu lẹ tọn yì.” (Eks. 12:33-36, NW) Islaelivi lẹ sọ jaya to whenue Falo po awhànpa etọn lẹ po yin vivasudo to Ohù Vẹẹ mẹ. (Eks. 14:30, 31) Lehe nujijọ ojlofọndotenamẹ tọn enẹlẹ mimọ dona ko hẹn yise yetọn lodo do sọ!
9 Ṣigba e vẹawu nado yise dọ to ojlẹ vude godo he yé ko yin whinwhlẹngán to azọ́njiawu-liho, omẹ ehelẹ dopolọ jẹ nuhlundọ ji. Gando etẹ go? Núdùdù! Yé ma tindo pekọ to nuhe Jehovah nọ na yé lẹ mẹ ba bo jẹ lewu ji dọmọ: ‘Míwlẹ flin whèvi lọ, he mí nọ dù to Egipti mẹ vọnu; ojipamẹnu lẹ lọ, opẹ̀ lẹ lọ, po omá lẹ po, po alubasa lẹ po, po amà lẹ po: ṣigba yè hẹn alindọn mítọn hú; nudepope ma tin: mí ma tindo nude adavo manna he nado pọ́n hlan.’ (Sọh. 11:5, 6) Mọwẹ, yé wleawuna pọndohlan agọ̀ sọmọ bọ yé tlẹ jlo na lẹkọyi aigba he ji yé ko yin kanlinmọ te! (Sọh. 14:2-4) Islaelivi lẹ lẹkọ pọ́n nuhe to godo lẹ bo hẹn nukundagbe Jehovah tọn bu.—Sọh. 11:10.
10. Etẹwẹ mí plọn sọn apajlẹ Islaelivi lẹ tọn mẹ?
10 Etẹwẹ mí plọn sọn ehe mẹ? Eyin mí pehẹ nuhahun po whlepọn lẹ po, mì dike mí ze ayiha do ninọmẹ he taidi nuhe pọnte wayi lẹ ji blo—etlẹ yin whẹpo mí do mọ nugbo. Dile etlẹ yindọ mí sọgan plọnnu sọn numimọ he mí tindo wayi lẹ mẹ kavi lẹnnupọndo ojlẹ dagbe he mí duvivi etọn wayi lẹ ji, e jẹ dọ mí ni tindo pọndohlan jlẹkaji tọn gando yé go. Eyin e ma yinmọ, ninọmẹ mítọn dintọn sọgan nọ blawu na mí zẹjlẹgo bọ mí na yin whiwhlepọn nado jẹ gbẹzan he mí ko jodo dai zan ji.—Hia 2 Pita 2:20-22.
AVỌ́SINSAN HE MÍ BASI WAYI LẸ
11. Nukun tẹwẹ mẹdelẹ nọ yí do pọ́n avọ́sinsan he yé basi wayi lẹ?
11 E blawu dọ mẹdelẹ nọ flin avọ́sinsan he yé basi wayi lẹ bo nọ pọ́n yé hlan taidi dotẹnmẹ hundote he yin hinhẹngú lẹ. Vlavo dotẹnmẹ lọ ko hundote na hiẹ lọsu nado doafọna wepinplọn dahodaho lẹ, yindidi, kavi nado jẹ adọkun, ṣigba a de ma nado doafọna yé. Susu to mẹmẹsunnu po mẹmẹyọnnu mítọn lẹ po mẹ wẹ ajọwiwa, ayidedai, wepinplọn kavi aihundida lanmẹyiya tọn ko nọ hẹn akuẹ wá na taun, ṣigba yé jo ehe lẹpo do. Todin, owhe lẹ ko juwayi bọ opodo lọ ma wá. Be hiẹ nọ to nulẹnpọn do nuhe sọgan ko jọ eyin a ma basi avọ́sinsan enẹlẹ ji wẹ ya?
12. Etẹwẹ Paulu lẹn gando nuhe e jodo lẹ go?
12 Nususu wẹ apọsteli Paulu yí do sanvọ́ nado sọgan lẹzun hodotọ Klisti tọn. (Flp. 3:4-6) Etẹwẹ e lẹn gando nuhe e jodo lẹ go? E dọna mí dọmọ: “Nuhe yin ale na mi lẹ, onú ehelẹ wẹ yẹn ko pọnhlan di onú gúgú na Klisti tọn wutu.” Etẹwutu? E zindonukọn dọmọ: “Na ehe tọn wutu wẹ yẹn pọ́n onú lẹpo hlan di onú gúgú na yẹyi daho hugan oyọnẹn Klisti Jesu Oklunọ ṣie tọn wutu. Na ewọ tọn wutu wẹ yẹn ko gbẹkọ onú lẹpo go podọ yẹn pọ́n yé hlan taidi ogbó lẹ, na yẹn nido sọgan duale Klisti tọn.”a (Flp. 3:7, 8) Kẹdẹdile mẹde ma nọ wá wule gando ogbó he e bẹ dlan go do, Paulu ma wule gando dotẹnmẹ hundote he e jodo to aihọn mẹ lẹ go. E masọ wá tindo numọtolanmẹ dọ nuhe e jodo lẹ yin nuhọakuẹ ba.
13, 14. Nawẹ mí sọgan hodo apajlẹ Paulu tọn gbọn?
13 Etẹwẹ na gọalọna mí eyin mí wá jẹ nulẹnpọn ji gando dotẹnmẹ hundote he mí lẹndọ mí hẹngu lẹ go? Hodo apajlẹ Paulu tọn. Gbọnna? Nọ lẹnnupọndo yẹyi kavi nuhọakuẹ-yinyin nuhe a tindo todin lẹ tọn ji. Hiẹ tindo haṣinṣan dagbe de hẹ Jehovah podọ ewọ yọ́n we taidi gbẹtọ nugbonọ de. (Heb. 6:10) Etẹwẹ aihọn sọgan zedonukọnna mí he na họakuẹ sọ dona gbigbọmẹ tọn he mí to vivi etọn dù todin lẹ bo nasọ duvivi etọn to sọgodo lẹ?—Hia Malku 10:28-30.
14 Enẹgodo, Paulu donù nuhe na gọalọna mí nado zindonukọn po nugbonọ-yinyin po go. E dọ dọ emi to “jiwọn nuhe to godo lẹ go bo to vivẹnudo na nuhe to nukọn lẹ.” (Flp. 3:13) Doayi e go dọ Paulu zinnudo afọdide awe he dopodopo yetọn yin dandannu ji. Tintan, mí dona wọnji nuhe mí jodo godo lẹ go bo ma na nọ hẹn huhlọn po whenu họakuẹ mítọn lẹ po gú gbọn nulinlẹnpọn do yé ji zẹjlẹgo dali. Awetọ, taidi wezundotọ he ko sẹpọ vivọnu de, mí dona to vivẹnudo na nuhe to nukọn lẹ gbọn ayidonugo mítọn lẹpo zizedo yé ji dali.
15. Ale tẹwẹ ayihamẹlinlẹnpọn do apajlẹ he devizọnwatọ nugbonọ Jiwheyẹwhe tọn lẹ zedai ji nọ hẹnwa na mí?
15 Ayihamẹlinlẹnpọn do apajlẹ he devizọnwatọ nugbonọ Jiwheyẹwhe tọn lẹ zedai to hohowhenu podọ to egbehe ji sọgan whàn mí nado to nukọnzindo kakati nado to nuhe to godo lẹ pọ́n. Di apajlẹ, eyin Ablaham po Sala po nọ to nulẹnpọn do Uli ji to whepoponu wẹ, “yé na ko tindo dotẹnmẹ hundote nado lẹkọyi.” (Heb. 11:13-15) Ṣigba yé ma lẹkọyi. Nuhe Mose jodo to Egipti họakuẹ hugan nuhe Islaelivi depope wá jodo to nukọn mẹ. Ṣogan, mí ma mọ hia to fidepope dọ e nọ to nulẹnpọn do onú enẹlẹ ji. Kakatimọ, Biblu dọna mí dọ “e pọ́n vlẹko Klisti tọn hlan taidi adọkun he klohu adọkun Egipti tọn lẹ; na ewọ pọ́n ale ahọsumẹ lọ tọn hlan tlintlin wutu.”—Heb. 11:26.
NUMIMỌ YLANKAN HE MÍ TINDO WAYI LẸ
16. Nawẹ numimọ he mí tindo wayi lẹ sọgan yinuwado mí ji gbọn?
16 Delẹ to numimọ he mí tindo wayi lẹ mẹ sọgan nọma yin dagbe. Vlavo ylando kavi nuhe mí ṣiwà wayi lẹ nọ hẹn mí jẹflumẹ. (Ps. 51:3) Ayinamẹ sinsinyẹn he mí mọyi wayi de sọgan pò to vivẹ́ na mí. (Heb. 12:11) Vlavo mawadodo kavi nuhe mí lẹndọ e yin mawadodo bọ mí jiya etọn delẹ gbẹ́ gbọṣi ayiha mítọn mẹ kakajẹ din. (Ps. 55:2) Etẹwẹ sọgan gọalọna mí ma nado nọ to nulẹnpọn do numimọ mọnkọtọn lẹ ji? Mì gbọ mí ni gbadopọnna apajlẹ atọ̀n.
17. (a) Naegbọn Paulu ylọ ede dọ “mẹhe whè hú mẹhe yin pẹvi pete to omẹ wiwe lẹpo mẹ”? (b) Etẹwẹ gọalọna Paulu bọ linlẹn agọ̀ lẹ ma do hẹn ẹn jẹflumẹ?
17 Nuhe mí ṣiwà wayi lẹ. Apọsteli Paulu ylọ ede dọ “mẹhe whè hú mẹhe yin pẹvi pete to omẹ wiwe lẹpo mẹ.” (Efe. 3:8) Naegbọn e do lẹnmọ? “Na yẹn dohomẹkẹn agun Jiwheyẹwhe tọn wutu,” wẹ e dọ. (1 Kọl. 15:9) Pọ́n nuhe na ko yin numọtolanmẹ Paulu tọn to whenue e mọ delẹ to mẹhe e ko dohomẹkẹn wayi lẹ mẹ! Kakati nado dike linlẹn agọ̀ ehelẹ ni hẹn ẹn jẹflumẹ, e ze ayidonugo do nukundagbe majẹhẹ he yin didohia ẹ ji. (1 Tim. 1:12-16) Taidi kọdetọn de, Paulu gọ́ na pẹdido bo yin whinwhàn nado zindonukọn to lizọnyizọn lọ mẹ. Ylando he e wà wayi lẹ tin to nuhe e magbe nado wọnji e go lẹ mẹ. To whenuena e yindọ mí ma sọgan diọ nuhe mí ṣiwà wayi lẹ, nulinlẹnpọn do yé ji mapote ma na hẹn ale depope wá na mí. Kakatimọ, mí dona nọ flin lẹblanu he Jehovah dohia mí bo yí huhlọn mítọn lẹpo do wà azọ́n he e zedo alọmẹ na mí lọ.
18. (a) Etẹwẹ sọgan jọ eyin ayinamẹ he mí mọyi wayi de pò to vivẹ́ na mí? (b) Nawẹ mí sọgan yí nuhe Sọlomọni dọ gando alọkikẹyi ayinamẹ go do yizan mẹ gbọn?
18 Ayinamẹ sinsinyẹn. Eyin ayinamẹ sinsinyẹn he mí mọyi wayi de pò to vivẹ́ na mí lo? Ehe sọgan hẹn mí gblehomẹ kavi duadi bọ ‘agbọ́ na pé mí.’ (Heb. 12:5) Vlavo mí gbẹ́ ayinamẹ lọ dai to afọdopolọji kavi mí kẹalọyi ayinamẹ lọ bo wá dovọ́na ẹn to nukọn mẹ wẹo, nudopolọ wẹ e zẹẹmẹdo—mí ma dike ayinamẹ lọ ni hẹn ale wá na mí. Nuhe yọ́n hugan wẹ nado wà nuhe Sọlomọni dọ dọmọ: “Hẹn oplọn [kavi mẹplọnlọ] go; a jo e do blo: yí i whlá; na ewọ wẹ ogbẹ̀ towe.” (Howh. 4:13) Taidi mọto-kùntọ he nọ setonuna ohia aliji tọn lẹ, mì gbọ mí ni nọ kẹalọyi ayinamẹ bo nọ yí i zan bosọ zindonukọn.—Howh. 4:26, 27; hia Heblu lẹ 12:12, 13.
19. Nawẹ mí sọgan hodo apajlẹ yise Habbakuk po Jelemia po tọn gbọn?
19 Mawadodo kavi nuhe mí lẹndọ e yin mawadodo lẹ. To whedelẹnu, mí sọgan tindo numọtolanmẹ yẹwhegán Habbakuk tọn nkọ, mẹhe dawhá jẹgbonu bo biọ dọ Jehovah ni dawhẹ dodo, na e ma mọnukunnujẹ nuhewutu Jehovah na dotẹnmẹ nuhe ma sọgbe delẹ nado nọ jọ mẹ. (Hab. 1:2, 3) Nujọnu wẹ e yin dọ mí ni hodo apajlẹ yise yẹwhegán enẹ tọn, mẹhe dọmọ: “Ganṣo yẹn na jaya to OKLUNỌ mẹ, yẹn na jẹaglin to Jiwheyẹwhe whlẹngán ṣie tọn mẹ.” (Hab. 3:18) Taidi Jelemia hohowhenu tọn, eyin mí “tindo todido” bo tindo yise nujọnu tọn to Jehovah, Jiwheyẹwhe he nọ dawhẹ dodo mẹ, mí sọgan deji dọ ewọ na vọ́ nulẹpo jlado to ojlẹ sisọ mẹ.—Avi. 3:19-24.
20. Nawẹ mí sọgan dohia dọ mí “flin asi Lọti tọn” gbọn?
20 Mí to gbẹnọ to ojlẹ vonọtaun de mẹ. Nujijọ ayidego tọn lẹ to jijọ todin podọ susu gbẹ́ pò to nukọn ja. Mì gbọ dopodopo mítọn ni to zọnlinzin afọsu-afọsi hẹ titobasinanu Jehovah tọn. Mì dike mí ni hodo ayinamẹ Owe-wiwe lẹ tọn nado nọ pọ́n nukọn bo ma pọ́n nuhe to godo lẹ blo. Gbọnmọ dali, mí na dohia dọ mí “flin asi Lọti tọn” nugbonugbo!
[Nudọnamẹ odò tọn]
a Hogbe dowhenu tọn he yin lilẹdo “ogbó” tofi sọ zẹẹmẹdo nuhe “yin zizedlan na avún lẹ” kavi “omí.” Weyọnẹntọ he nọ basi zẹẹmẹ do Biblu ji de dọ dọ Paulu yí hogbe ehe zan nado dlẹnalọdo nuhe mẹde gbẹdai mlẹnmlẹn. Mẹlọ mọdọ onú tata kavi awuhiọnu de wẹ e yin bo ma jlo nado mọ ẹn gbede ba.