“Jiwheyẹwhe Sè Odẹ̀ Ṣie”
To owhe fọtọ̀n die, Emilia to sinsẹ̀n taidi gbehosọnalitọ whepoponu tọn. Ṣigba, e wá tin to dandannu glọ nado doalọtena sinsẹ̀nzọn whenu-gigọ́ tọn. To owhe agọe tọn lẹ mẹ, e nọ lẹnnupọndo ojlẹ he mẹ e tindo ayajẹ te hugan to gbẹzan etọn mẹ enẹ ji bo jlo nado yidogọna mahẹ he e nọ tindo to lizọnyizọn lọ mẹ whladopo dogọ.
Ṣigba, agbasazọ́n nọ yí whenu Emilia tọn taun, podọ enẹ nọ hò ayajẹ etọn yí. To gbèdopo to azọ́nwatọgbẹ́ etọn lẹ nukọn, e wule dọmọ: “E na jlo mi nado nọ wazọ́n na gànhiho vude!” Ogán etọn sè nuhe e dọ bo kanse e eyin hójọhó dọ wẹ e te. Emilia yigbena ẹn. Ṣigba, whẹpo ehe nado yọnbasi, azọ́nmẹyimẹdotọ lọ dona na ẹn gbè whẹ́, na nunọwhinnusẹ́n azọ́nwhé lọ tọn biọ dọ azọ́nwatọ lẹpo ni ze yede jo mlẹnmlẹn. Mẹmẹyọnnu lọ wleawu nado dọho hẹ azọ́nmẹyimẹdotọ lọ bo hodẹ̀ nado tindo jijọho ahun mẹ tọn po adọgbigbo po.
To hodọdopọ lọ whenu, Emilia yí zinzin po adọgbigbo po do biọ dọ gànmẹ azọ́nwiwa tọn emitọn ni yin didepo. E basi zẹẹmẹ dọ emi nọ yí whenu zan nado gọalọna mẹdevo lẹ eyin emi ma to azọ́nmẹ. E yidogọ dọmọ: “N’yin dopo to Kunnudetọ Jehovah tọn lẹ mẹ, podọ n’nọ gọalọna gbẹtọ lẹ to gbigbọ-liho. To egbehe, walọ dagbe mẹsusu tọn to doyi. Yé tindo nuhudo nado yọ́n nujinọtedo walọ dagbe tọn lẹ ganji, podọ nuyọnẹn he n’nọ má hẹ yé sọn Biblu mẹ yin nuhọakuẹ na yé. N’ma jlo dọ nuhe n’nọ wà to whenue n’ma tin to azọ́nmẹ lẹ ni dekanpona azọ́n ṣie tofi, ṣigba e jlo mi dọ ma nọ wazọ́n na gànhiho vude nado sọgan gọalọna gbẹtọ lẹ. Nuhewutu n’jlo dọ azọ́n gànmẹ ṣie ni yin didepo niyẹn.”
Azọ́nmẹyimẹdotọ lọ dotoai ganji bo dọ dọ emi lọsu ko lẹnnupọn wayi nado wà azọ́n alọgigọna mẹdevo lẹ tọn. Enẹgodo e dọmọ: “Na whẹwhinwhẹ́n he a na lẹ wutu, n’mọdọ n’dona kẹalọyi obiọ towe. Ṣigba be a yọnẹn dọ azọ́nkuẹ towe na depò ya?” Emilia yigbe bo dọ dọ emi na hẹn gbẹzan emitọn bọawu eyin nuhudo etọn tin. E yidogọ dọmọ: “Yanwle titengbe hugan ṣie wẹ nado nọ wà nuhe na hẹn pekọ wá na gbẹtọ lẹ.” Azọ́nmẹyimẹdotọ lọ dọna ẹn dọmọ: “N’yọ́n pinpẹn mẹhe nọ gbọn ṣejannabi matindo dali yí whenu yetọn zan do mẹdevo lẹ tamẹ lẹ tọn.”
Depope to mẹhe nọ wazọ́n to azọ́nwhé enẹ mẹ lẹ ma ko mọ pipà mọnkọtọn yí pọ́n. Todin Emilia yin dotẹnmẹna nado nọ wazọ́n na azán ẹnẹ poun to osẹ dopo mẹ. E paṣa ẹ dọ yè do akuẹ azọ́nkuẹ etọn ji bọ dibla yin akuẹ he e nọ dù dai janwẹ e nọ dù todin! E dọmọ: “Jiwheyẹwhe sè odẹ̀ ṣie, podọ n’sọgan lẹzun gbehosọnalitọ whladopo dogọ!”
Be a ko lẹnnupọn nado vọ́ tito towe lẹ jlado nado sọgan biọ sinsẹ̀nzọn gbehosọnalitọ tọn mẹ kavi nado biọ e mẹ whladopo dogọ ya?
[Nudọnamẹ tangan lẹ to weda 32]
Azọ́nmẹyimẹdotọ lọ dọna ẹn dọmọ: “N’yọ́n pinpẹn mẹhe nọ gbọn ṣejannabi matindo dali yí whenu yetọn zan do mẹdevo lẹ tamẹ lẹ tọn”