Gbọṣi Agbàdo Hihọ́-basinamẹ Jehovah Tọn Mẹ

1, 2. Awhàn nujọnu tọn tẹwẹ to dindọnsẹpọ po awuyiya po, podọ etẹwẹ devizọnwatọ Jiwheyẹwhe tọn lẹ ma na wà to awhàn enẹ whenu?

GBẸTỌ livi susu to États-Unis to todoai na tito-to-whinnu ladio ji tọn de to 30 octobre 1938. To tito-to-whinnu lọ whenu, aihundatọ lẹ na linlin dọ nudida delẹ wá sọn planẹti devo ji bo jlo na và Aigba lọ sudo. Dile etlẹ ko yin lilá dọ aihundida de poun wẹ to yìyì to ladio lọ ji, obu jẹ todoaitọ susu ji na yé lẹndọ awhàn nujọnu tọn de wẹ bẹjẹeji. Mẹdelẹ tlẹ ze afọdide delẹ nado basi hihọ́na yede sọta nudida enẹlẹ na yé lẹndọ yé sọgan gbleawuna yé wutu.

² To egbehe, awhàn nujọnu tọn de to dindọnsẹpọ po awuyiya po. Etomọṣo, gbẹtọ lẹ ma kẹalọyi dọ awhàn enẹ to dindọnsẹpọ. Ehe ma yin aihundida ladio ji tọn de poun, ṣigba Ohó gbọdo Jiwheyẹwhe tọn, Biblu wẹ dọ dọdai gandego. Awhàn Amagẹdọni tọn wẹ, yèdọ awhàn Jiwheyẹwhe tọn sọta titonu ylankan ehe. (Osọ. 16:14-16) To awhàn ehe whenu, devizọnwatọ Jiwheyẹwhe tọn he tin to aigba ji lẹ ma na hoavùn sọta nudida ylankan he wá sọn planẹti devo ji lẹ gba. Etomọṣo, awú na ji yé dile yé na yí nukun do mọ nujijọ dobu po huhlọn jiawu he Jiwheyẹwhe na dohia po.

3. Dọdai tẹwẹ mí na gbadopọnna, podọ naegbọn mí dona tindo ojlo to e mẹ?

³ Dọdai Biblu tọn de he yin kinkandai do Zekalia weta 14 mẹ dlẹnalọdo awhàn Amagẹdọni tọn tlọlọ. Dile etlẹ yindọ e yin kinkandai to owhe 2 500 lẹ die, e gando dopodopo mítọn go to egbehe. (Lom. 15:4) Susu nuhe yin didọ to weta enẹ mẹ lẹ tọn tindo kanṣiṣa hẹ nuhe jọ do omẹ Jiwheyẹwhe tọn lẹ go sọn whenue Ahọluduta Mẹsia tọn yin didoai to olọn mẹ to 1914. E sọ tindo kanṣiṣa hẹ nujijọ ayidego tọn he na wá aimẹ to madẹnmẹ lẹ. Adà titengbe dọdai lọ tọn lẹ bẹ “agbàdo daho tlala de” po “osin gbẹnọ” he tọ́n jẹgbonu lẹ po hẹn. (Zek. 14:4, 8) Agbàdo ehe yí adà titengbe de wà nado basi hihọ́na sinsẹ̀n-basitọ Jehovah tọn lẹ. Eyin mí mọnukunnujẹ dagbe he osin gbẹnọ lọ sọgan wà na mí mẹ, e ma yindọ mí na mọdọ mí tindo nuhudo etọn kẹdẹ wẹ gba, ṣigba mí na jlo nado nù sọn e mẹ. Enẹwutu, e na yọ́n dọ mí ni gbadopọnna dọdai enẹ po sọwhiwhe po.—2 Pita 1:19, 20.

‘AZÁN JEHOVAH TỌN DE’ BẸJẸEJI

4. (a) Whetẹnu wẹ ‘azán Jehovah tọn’ bẹjẹeji? (b) Owhe susu lẹ jẹnukọnna 1914, etẹwẹ sinsẹ̀n-basitọ Jehovah tọn lẹ lá, podọ nawẹ aṣẹpatọ aihọn tọn lẹ yinuwa gbọn?

⁴ To bẹjẹeji Zekalia weta 14 tọn, yẹwhegán lọ dlẹnalọdo ‘azán Jehovah tọn de.’ (Hia Zekalia 14:1, 2.) Azán tẹwẹ azán enẹ yin? “Azán Oklunọ tọn” wẹ, ehe bẹjẹeji to whenue “ahọluduta aihọn tọn lẹzun ahọluduta Oklunọ mítọn tọn po Klisti etọn tọn po.” (Osọ. 1:10; 11:15) Azán enẹ bẹjẹeji to 1914 to whenue Ahọluduta Mẹsia tọn yin zizedai to olọn mẹ. Owhe susu lẹ jẹnukọnna 1914, sinsẹ̀n-basitọ Jehovah tọn lẹ lá na akọta lẹ dọ opodo “ojlẹ dide akọta lẹ tọn” na wá to owhe enẹ mẹ, podọ aihọn lọ na biọ ojlẹ hunyanhunyan tọn he nkọ ma ko tin pọ́n de mẹ. (Luku 21:24) Nawẹ akọta lẹ yinuwa gbọn? Kakati nado payi avase he wá do gànmẹ enẹ go, sinsẹ̀ngán po tonudọtọ lẹ po yí nukunpẹvi do pọ́n owẹ̀n lọ bosọ diọnukunsọ wẹndagbe-jlatọ zohunhunnọ podọ yiamisisadode enẹlẹ. Gbọnmọ dali, Jiwheyẹwhe Ganhunupotọ lọ lọsu wẹ aṣẹpatọ aihọn tọn ehelẹ vlẹ, na mẹyiamisisadode lẹ yin afọzedaitọ “Jelusalẹm olọn tọn” wutu, yèdọ Ahọluduta Mẹsia tọn, ehe yé yin apadewhe etọn.—Heb. 12:22, 28.

5, 6. (a) Nuhe yin didọdai tẹwẹ akọta lẹ wà na “tòdaho” lọ po ‘tòvi’ etọn lẹ po? (b) Mẹnu lẹ wẹ yin “pipotọ gbẹtọ lẹ tọn”?

⁵ Zekalia dọ dọdai gando lehe akọta lẹ na yinuwa do go dọmọ: “Tòdaho lọ [Jelusalẹm] nasọ yin yíyí.” “Tòdaho lọ” nọtena Ahọluduta Mẹsia tọn he Jiwheyẹwhe zedai. Mẹhe yin afọzedaitọ etọn lẹ to aigba ji wẹ ‘tòvi’ etọn lẹ, enẹ wẹ pipotọ Klistiani yiamisisadode lẹ tọn. (Flp. 3:20) To Wẹkẹ-Whàn I whenu, mẹhe yin nukọntọ to adà aigba ji tọn titobasinanu Jehovah tọn mẹ lẹ yin “yíyí” kavi yin wiwle, bo yin bibẹ sọyi gànpa de mẹ to Atlanta, Géorgie to États-Unis. “Owhé lẹ [yin] gbigbà” to linlẹn lọ mẹ dọ nukundiọsọmẹtọ lẹ yinuwa hẹ Klistiani yiamisisadode lẹ to aliho agọ̀ mẹ, po kanyinylan po, bo ṣinyọ́nalọ owe yetọn lẹ ji bosọ dibla doalọtena azọ́n yẹwhehodidọ tọn yetọn.

⁶ Dile etlẹ yindọ omẹ Jiwheyẹwhe tọn lẹ ma sù bọ kẹntọ yetọn lẹ nọ dọ onú agọ̀ gando yé go bo nọ diọnukunsọ yé bosọ nọ dohomẹkẹn yé, sinsẹ̀n-bibasi nugbo ma sọgan yin kúnsúdona. “Pipotọ gbẹtọ lẹ tọn” de gbẹ́ tin, enẹ wẹ pipotọ mẹyiamisisadode lẹ tọn de he gbẹ́ ma nado “yin sinsán sẹ̀ sọn tòdaho lọ mẹ.”

7. Apajlẹ tẹwẹ Kunnudetọ yiamisisadode Jehovah tọn lẹ zedai na sinsẹ̀n-basitọ nugbo lẹpo to egbehe?

⁷ Be dọdai ehe mọ hẹndi mlẹnmlẹn to vivọnu Wẹkẹ-Whàn I tọn wẹ ya? Lala. Akọta lẹ na gbẹ́ zindonukọn nado to nukundiọsọ pipotọ mẹyiamisisadode lẹ tọn po gbẹdohẹmẹtọ nugbonọ yetọn he tindo todido aigba ji tọn lẹ po. (Osọ. 12:17) Wẹkẹ-Whàn II do nugbo enẹ hia. Apajlẹ tenọgligo-hinhẹn Kunnudetọ nugbonọ yiamisisadode Jiwheyẹwhe tọn lẹ tọn nọ whàn devizọnwatọ Jiwheyẹwhe tọn lẹ to egbehe nado doakọnna whlepọn depope he yé nọ pehẹ, gọna nukundiọsọmẹ sọn hẹnnumẹ mayisenọ lẹ, azọ́nwatọgbẹ́ lẹ, kavi wehọmẹvigbẹ́ he nọ ṣàn yé ko na yise yetọn wutu lẹ dè. (1 Pita 1:6, 7) Mahopọnna fidepope he yé nọ nọ̀, sinsẹ̀n-basitọ nugbo lẹ ko magbe hugan gbede pọ́n nado “[nọtegligli] to gbigbọ dopo mẹ” bo ma yin ‘budona gbọn agọjẹdomẹtọ yetọn lẹ dali.’ (Flp. 1:27, 28) To whelọnu lo, fie wẹ omẹ Jehovah tọn lẹ na mọ hihọ́ te to aihọn he gbẹwanna yé ehe mẹ?—Joh. 15:17-19.

JEHOVAH WLEAWUNA “AGBÀDO DAHO TLALA DE”

8. (a) To Biblu mẹ, etẹwẹ osó lẹ sọgan nọtena? (b) Etẹwẹ ‘osó olivieli lẹ tọn’ lọ nọtena?

⁸ To whenuena e yindọ Jelusalẹm, “tòdaho lọ” nọtena Jelusalẹm olọn tọn, ‘osó olivieli lẹ tọn he tin to Jelusalẹm nukọn’ lọsu dona yin nukunnumọjẹemẹ to yẹhiadonu-liho. Etẹwẹ osó enẹ nọtena? Nawẹ e na yin “[zizẹ do awe] to gblagbla etọn mẹ” bo lẹzun osó awe gbọn? To Heblugbe dowhenu tọn mẹ, Jehovah ylọ osó awe he wá aimẹ to whenue osó tintan lọ yin zizẹ do awe mẹ lọ lẹ dọ “osó ṣie lẹ.” Naegbọn e do dọmọ? (Hia Zekalia 14:3-5.) To Biblu mẹ, osó lẹ sọgan nọtena ahọluduta lẹ kavi gandudu lẹ. Podọ osó Jiwheyẹwhe tọn nọ tindo kanṣiṣa hẹ dona po hihọ́ po. (Ps. 72:3; Isa. 25:6, 7) Enẹwutu, osó olivieli lẹ tọn he ji Jiwheyẹwhe nọte do to whèzẹtẹn-waji Jelusalẹm aigba ji tọn lọ, nọtena nupojipetọ-yinyin Jehovah tọn, yèdọ ganhunupotọ-yinyin etọn.

9. Linlẹn tẹ mẹ wẹ osó olivieli lẹ tọn lọ zẹ̀ do awe te?

⁹ Etẹwẹ zizẹ do awe osó olivieli lẹ tọn lọ zẹẹmẹdo? Osó lọ he tin to whèzẹtẹn-waji Jelusalẹm tọn zẹ̀ do awe to linlẹn lọ mẹ dọ Jehovah ze gandudu devo dai, yèdọ awetọ de. Gandudu awetọ enẹ wẹ Ahọluduta Mẹsia tọn he yin zizedo alọmẹ na Jesu Klisti. Enẹwutu wẹ Jehovah do ylọ osó awe he wá aimẹ to whenue ‘osó Olivieli lẹ tọn’ lọ zẹ̀ do awe dọ “osó ṣie lẹ.” (Zek. 14:4) Etọn wẹ osó awe lọ lẹ yin.

10. Etẹwẹ “agbàdo daho tlala” he tin to osó awe lọ lẹ ṣẹnṣẹn nọtena?

¹⁰ To whenue osó yẹhiadonu tọn lọ zẹ̀ do awe, odaa hlan agewaji podọ odaa hlan hùwaji, afọ Jehovah tọn lẹ gbẹ́ pò to yé omẹ awe lẹpo ji. “Agbàdo daho tlala de” wá aimẹ to asá Jehovah tọn mẹ. Agbàdo yẹhiadonu tọn enẹ nọtena hihọ́-basinamẹ Jiwheyẹwhe tọn he mẹ devizọnwatọ Jehovah tọn lẹ nọ mọ hihọ́ te to nupojipetọ-yinyin etọn po Ahọluduta Mẹsia tọn he yin Visunnu etọn tọn po glọ. Jehovah na hẹn ẹn diun dọ sinsẹ̀n-bibasi wiwe ṣeke ma na yin kúnsúdona gbede. Whetẹnu wẹ osó olivieli lẹ tọn ehe zẹ̀ do awe? Ehe jọ to whenue Ahọluduta Mẹsia tọn yin zizedai to vivọnu Ojlẹ Kosi lẹ tọn to 1914. Whetẹnu wẹ sinsẹ̀n-basitọ nugbo lẹ họnyi agbàdo yẹhiadonu tọn enẹ mẹ?

SINSẸ̀N-BASITỌ NUGBO LẸ HỌNYI AGBÀDO LỌ MẸ

11, 12. (a) Whetẹnu wẹ sinsẹ̀n-basitọ nugbo lẹ họnyi agbàdo yẹhiadonu tọn lọ mẹ? (b) Etẹwẹ dohia dọ alọ huhlọnnọ Jehovah tọn tin hẹ omẹ etọn lẹ?

¹¹ Jesu na avase hodotọ etọn lẹ dọmọ: “Akọta lẹpo na gbẹwanna mì na oyín ṣie tọn wutu.” (Mat. 24:9) To azán godo tọn titonu ehe tọn lẹ mẹ, bẹsọn 1914 gbọ́n, wangbẹna enẹ ko sinyẹn deji. Mahopọnna dọ kẹntọ lẹ yangbé pipotọ mẹyiamisisadode lẹ tọn to aliho sinsinyẹn mẹ to Wẹkẹ-Whàn I whenu, mẹhe tin to pipli ehe mẹ lẹpo ma yin hùhù. To 1919, yé yin tuntundote sọn nuyiwadomẹji Babilọni Daho lọ tọn si, yèdọ sinsẹ̀n lalo lẹpo to pọmẹ. (Osọ. 11:11, 12)a Ojlẹ enẹ mẹ wẹ sinsẹ̀n-basitọ nugbo lẹ jẹ hinhọnyi agbàdo osó Jehovah tọn lẹ tọn mẹ ji.

¹² Sọn 1919 gbọ́n, agbàdo hihọ́-basinamẹ Jiwheyẹwhe tọn to hihọ́-basina sinsẹ̀n-basitọ nugbo lẹ lẹdo aihọn pé. To otò susu mẹ, lizọnyizọn kunnudegbe tọn po owe sinai do Biblu ji Kunnudetọ Jehovah tọn lẹ tọn po ko yin alọhẹndotena na owhe susu lẹ. Alọhẹndotenamẹ mọnkọtọn lẹ gbẹ́ pò to yìyì to otò delẹ mẹ. Ṣigba, mahopọnna nuhe akọta lẹ na wà, yé ma na penugo nado de sinsẹ̀n-bibasi nugbo sẹ̀ sọn aimẹ. Alọ huhlọnnọ Jehovah tọn na tin hẹ omẹ etọn lẹ.—Deut. 11:2.

13. Nawẹ mí nọ gbọṣi agbàdo hihọ́-basinamẹ Jehovah tọn mẹ gbọn, podọ naegbọn e do yin onú titengbe dọ mí ni wàmọ todin hugan gbede pọ́n?

¹³ Eyin mí tẹdo Jehovah go bo nọtegli to nugbo lọ mẹ, ewọ po Visunnu etọn Jesu Klisti po na yí adà yetọn wà, podọ Jiwheyẹwhe ma na dike mẹdepope kavi nudepope ni ‘hò mí yí sọn alọ Etọn mẹ.’ (Joh. 10:28, 29) Jehovah ko wleawufo nado gọalọ to whedepopenu he nuhudo tin, na mí nido sọgan nọ setonuna ẹn taidi Nupojipetọ Wẹkẹ lọ tọn bo yin mẹjidugando nugbonọ Ahọluduta Mẹsia tọn zọnmii. Onú titengbe lọ wẹ yindọ mí ni gbọṣi agbàdo hihọ́-basinamẹ tọn lọ mẹ, na agbàdo enẹ na basi hihọ́ vonọtaun na sinsẹ̀n-basitọ nugbo lẹ to nukunbibia daho he to dindọnsẹpọ po awuyiya po lọ whenu.

“AZÁN AWHÀN TỌN” LỌ TO SISẸPỌ

14, 15. To “azán awhàn [Jiwheyẹwhe] tọn” sọta kẹntọ etọn lẹ tọn gbè, etẹwẹ na jọ do mẹhe ma tin to agbàdo lọ mẹ lẹ go?

¹⁴ Dile vivọnu titonu ehe tọn to sisẹpọ, Satani na hẹn mẹgbeyinyan etọn sọta devizọnwatọ Jehovah tọn lẹ sinyẹn dogọ. Enẹgodo, “azán awhàn [Jiwheyẹwhe] tọn” sọta kẹntọ etọn lẹ na wá. Jehovah na hẹn ẹn diun dọ mẹgbeyinyan Satani tọn enẹ wẹ na yin godo tọn. To azán enẹ gbè, Nupojipetọ Wẹkẹ lọ tọn na do ede hia taidi Awhànfuntọ to aliho jiawu de mẹ hugan gbede pọ́n tọn.—Zek. 14:3.

¹⁵ To gbeegbe Jiwheyẹwhe na funawhàn sọta kẹntọ etọn lẹ, etẹwẹ na jọ do mẹhe ma tin to “agbàdo daho” hihọ́-basinamẹ tọn lọ mẹ lẹ go? Zekalia dọmọ: “E nasọ wá jọ to azán enẹ gbè, wẹ hinhọ́n ma na tin finẹ, [onú lẹ na dọ̀n whè] dopọ.” (Zek. 14:6) Enẹ zẹẹmẹdo dọ omẹ enẹlẹ ma na tindo nukundagbe Jiwheyẹwhe tọn. Dọdai lọ zindonukọn dọ ‘osọ́ lọ, otlòsọ́ lọ, kanklosọpoawenọ lọ, kẹtẹkẹtẹ lọ, po whékanlin wunmẹ lẹpo po’ na “dọ̀n whè dopọ.” Ehe zẹẹmẹdo dọ awhànfunnu po maṣinu awhàn tọn lẹ po na whè dopọ kavi to hogbe devo mẹ, ma na yọ́n-na-yizan ba. Zekalia sọ dọ dọ Jehovah na yí “azọ̀nylankan” do hò kẹntọ etọn lẹ. Nukun yetọn lẹ po odẹ́ yetọn lẹ po “nasọ dusúdo.” Mí ma yọnẹn eyin azọ̀nylankan ehe na yin jọwamọ tọn. Ṣigba, nuhe mí yọnẹn wẹ yindọ kẹntọ ehelẹ ma na penugo nado gbleawuna mí kavi dọ nudepope jẹagọdo Jiwheyẹwhe. (Zek. 14: 7, 12, 15) ‘Ahọlu aigba ji tọn lẹ gọna awhànpa yetọn lẹpo’ na nọ adà Satani tọn mẹ. Ṣigba, mahopọnna fidepope he yé na te to aigba ji, yé na yin vivasudo. (Osọ. 19:19-21) “Alántọṣiọ OKLUNỌ tọn lẹ na tin to azán nẹ gbè sọn opodo de aigba lọ tọn yèdọ jẹ opodo awetọ aigba lọ tọn.”—Jel. 25:32, 33.

16. Dile azán awhàn Jiwheyẹwhe tọn to sisẹpọ, kanbiọ tẹlẹ ji wẹ mí dona lẹnnupọndo, podọ etẹwẹ mí dona wà?

¹⁶ To paa mẹ, awhànfunfun nọ saba hẹn yajiji wá, etlẹ yin na mẹhe gbawhàn lẹ. Núdùdù sọgan whèdomẹ. Nutindo lẹ sọgan yin hinhẹnbu. Gbẹninọ sọgan vẹawu taun. Podọ mẹdekannujẹ sọgan yin hihòyi. Eyin onú mọnkọtọn lẹ wá jọ do mí go to nukunbibia daho lọ whenu, nawẹ mí na yinuwa gbọn? Be mí na jẹflumẹ wẹ ya? Be mí na mọ́n yise mítọn to kọgbidinamẹ glọ wẹ ya? Be mí na hẹn todido bu bo gbọjọ wẹ ya? Lehe e na yin nujọnu dọ mí ni dejido huhlọn mẹwhlẹngán tọn Jehovah tọn go to nukunbibia daho lọ whenu, bo gbọṣi agbàdo hihọ́-basinamẹ Jehovah tọn mẹ do sọ!—Hia Habbakuk 3:17, 18.

“OSIN GBẸNỌ LẸ NA JẸGBONU YÌ”

17, 18. (a) Etẹwẹ “osin gbẹnọ lẹ” nọtena? (b) Etẹwẹ “ohù whèzẹtẹn ji tọn” po “ohù whèyihọ ji tọn” po nọtena? (c) Dile hiẹ to nukọnpọnhlan sọgodo, etẹwẹ yin gbemima towe?

¹⁷ To Amagẹdọni godo, “osin gbẹnọ lẹ” na to sisà sọn ofìn Ahọluduta Mẹsia tọn lọ tọn kọ̀n zọnmii. “Osin gbẹnọ” ehelẹ nọtena awuwledainanu Jehovah tọn lẹ, na gbẹtọ lẹ nido nọgbẹ̀ kakadoi. “Ohù whèzẹtẹn ji tọn” dlẹnalọdo Ohù Kúkú podọ “Ohù whèyihọ ji tọn” dlẹnalọdo Ohù Meditelane tọn. Ohù awe lọ lẹpo nọ yin yiyizan nado dlẹnalọdo gbẹtọ lẹ. Ohù Kúkú lọ nọtena mẹhe tin to yọdò paa gbẹtọvi tọn mẹ bo na yin finfọnsọnku lẹ. To whenuena e yindọ nutogbẹ̀ susu wẹ tin to Ohù Meditelane tọn mẹ, e sọgbe dọ ni nọtena “gbẹtọ susugege” he na lùn Amagẹdọni tọ́n lẹ. (Hia Zekalia 14:8, 9; Osọ. 7:9-15) Enẹwutu, pipli awe enẹ lẹpo na mọaleyi to whenue yé na yin tuntundote sọn whẹgbledomẹ okú Adam tọn si, dile yé na to osin gbẹnọ yẹhiadonu tọn kavi “tọ̀sisa osin ogbẹ̀ tọn” lọ nù.—Osọ. 22:1, 2.

¹⁸ To hihọ́-basinamẹ Jehovah tọn glọ, mí na lùn opodo titonu ylankan ehe tọn tọ́n bo na biọ aihọn yọyọ dodowiwa Jiwheyẹwhe tọn mẹ. Dile etlẹ yindọ akọta lẹpo gbẹwanna mí, mì gbọ mí ni magbe sinsinyẹn nado yin mẹjidugando nugbonọ Ahọluduta Jiwheyẹwhe tọn lẹ tọn zọnmii bo gbọṣi agbàdo hihọ́-basinamẹ Jehovah tọn mẹ.