Mẹho Agun Tọn lẹ Emi—Mì Nọ Miọnhomẹna ‘Alindọn He Nuṣikọna’ Lẹ!
Angela,a mẹmẹyọnnu tlẹnnọ de he tindo owhe 30 linlán ma voawu depope. E to tepọn mẹho agun tọn lẹ. E to nulẹnpọn dọ, ‘Etẹwẹ yé jlo na dọna mi? Nugbo wẹ dọ n’ko gọ̀n opli delẹ, ṣigba na mẹhomẹ lẹ go wẹ n’nọ penukundo to azán lọ blebu ji wutu, agbọ́ nọ pé mi eyin n’lẹkọwa whégbè.’ Gbọnvona enẹ, agbasalilo onọ̀ Angela tọn sọ to ahunmẹduna ẹn.
Eyin hiẹ wẹ jlo na dla Angela pọ́n, nawẹ a na na tuli ‘alindọn he nuṣikọna’ enẹ gbọn? (Jel. 31:25) Tintan whẹ́, nawẹ hiẹ na wleawu nado basi dlapọn lẹngbọhọtọ tọn he na miọnhomẹnamẹ de gbọn?
NỌ LẸNNUPỌNDO NINỌMẸ MẸMẸSUNNU TOWE LẸ TỌN JI
To whedelẹnu, mímẹpo wẹ onú nọ ṣikọna, vlavo na agbasazọ́n kavi azọngban yẹwhehọluduta tọn lẹ wutu. Di apajlẹ, yẹwhegán Daniẹli “kúṣiọ” to whenue e mọ numimọ de he mẹ e ma mọnukunnujẹ. (Dan. 8:27) E mọ alọgọ yí to whenue angẹli Gabliẹli sọawuhia ẹ. Wẹnsagun Jiwheyẹwhe tọn lọ na nukunnumọjẹnumẹ Daniẹli, bo hẹn ẹn deji dọ Jehovah ko sè odẹ̀ etọn lẹ bo gbẹ́ sọ “yiwanna [ẹn] tlala.” (Dan. 9:21-23) To ninọmẹ devo mẹ, hogbe mẹjlọdote tọn he angẹli de dọ lẹ vọ́ huhlọn na yẹwhegán he ko gbọjọ enẹ.—Dan. 10:19.
Mọdopolọ, whẹpo hiẹ nido dla yisenọ hatọ he onú sọgan ko ṣikọna kavi he sọgan ko gbọjọ de pọ́n, nọ yí whenu do lẹnnupọndo ninọmẹ etọn ji. Nuhahun tẹlẹ wẹ e to pipehẹ? Nawẹ nuhahun enẹlẹ to huhlọn etọn depò gbọn? Jẹhẹnu tẹlẹ wẹ ewọ nọ dohia? Richard he yin mẹho agun tọn sọn owhe 20 linlán die dọmọ: “N’nọ ze ayidonugo ṣie do jẹhẹnu mẹmẹsunnu ṣie lẹ tọn ji. Eyin n’yí sọwhiwhe do lẹnnupọndo ninọmẹ mẹmẹsunnu lọ tọn ji jẹnukọnna dlapọn lọ, e nọ bọawuna mi nado na ẹn tuli sọgbe hẹ nuhudo he e tindo.” Eyin mẹho agun tọn devo na hodo we yì dlapọn lọ tẹnmẹ, naegbọn mì ma na lẹnnupọndo ninọmẹ mẹmẹsunnu lọ tọn ji to pọmẹ?
NỌ HẸN MẸMẸSUNNU TOWE LẸ VOAWU
E sọgan vẹawuna mẹmẹsunnu de nado dọ numọtolanmẹ etọn lẹ na mẹho agun tọn de. Di dohia: E sọgan vẹawuna mẹmẹsunnu lọ nado dọ nuhe tin to ahun etọn mẹ na mẹho he wá dla ẹ pọ́n lẹ. Ṣigba, nawẹ hiẹ sọgan hẹn ẹn voawu gbọn? Nukiko yẹsẹ po hogbe jidevọnamẹ tọn lẹ po sọgan yinuwadeji to aliho dagbe mẹ. Michael, he yin mẹho agun tọn sọn owhe 40 die nọ saba bẹ dlapọn etọn lẹ jẹeji po hogbe delẹ po taidi: “Be hiẹ yọnẹn dọ dopo to lẹblanulọkẹyi dagbe hugan he mẹho agun tọn de tindo lẹ mẹ wẹ nado nọ dla mẹmẹsunnu lẹ pọ́n to owhé yetọn lẹ gbè bo jẹakọ hẹ yé dogọ ya? Enẹwutu, n’ko to jejeji nado wá dla we pọ́n to egbé.”
Hiẹ sọgan de nado hodẹ̀ ahundopo tọn de to bẹjẹeji dlapọn lọ tọn. To odẹ̀ apọsteli Paulu tọn lẹ mẹ, ewọ nọ gbọn gbesisọ dali zinnudo yise, owanyi po akọndonanu mẹmẹsunnu etọn lẹ tọn po ji. (1 Tẹs. 1:2, 3) Eyin hiẹ nọ dọ numọtolanmẹ he a tindo gando jẹhẹnu voovo he mẹmẹsunnu towe tindo go, hiẹ na wleawuna ahun towe po etọn po nado tindo hodọdopọ mẹjlọdote tọn. Hogbe towe lẹ sọgan sọ miọnhomẹna mẹmẹsunnu lọ taun. Ray he yin mẹho agun tọn numimọnọ de dọmọ: “To whedelẹnu, mímẹpo wẹ nọ wọn dagbe he mí nọ wà lẹ. Enẹwutu, eyin mẹde flinnu mí gando yé go, enẹ nọ miọnhomẹna mí taun.”
NỌ NAMẸ NUNINA GBIGBỌ TỌN
Taidi Paulu, hiẹ sọgan namẹ “nunina gbigbọ tọn” de gbọn hodidọ do nudọnamẹ de ji sọn Owe-wiwe lẹ mẹ dali, etlẹ yin sọn wefọ dopo poun mẹ. (Lom. 1:11) Di apajlẹ, mẹmẹsunnu he jẹflumẹ de sọgan tindo numọtolanmẹ dọ emi ma yọ́n-na-yizan ba, kẹdẹdile e yindo na Psalm-kantọ lọ he yí ede jlẹdo ‘ayúgò he to azọ̀ nù’ de go. (Ps. 119:83, 176) To whenue hiẹ ko basi zẹẹmẹ kleun do hogbe lọ ‘ayúgò he to azọ̀ nù’ ji godo, hiẹ sọgan dọna mẹmẹsunnu towe dọ emi tindo jide dọ ewọ ma “wọnji” gbedide Jiwheyẹwhe tọn lẹ go gba.
Mọdopolọ, apajlẹ abọgan-kuẹ dlakma he bu lọ tọn sọgan yinuwado mẹmẹyọnnu he ko danbú sọn agun mẹ kavi he zohunhun etọn ko depò de ji. (Luku 15:8-10) Abọgan-kuẹ he bu lọ sọgan ko yin apadewhe kọnu họakuẹ he yè yí fataka susu do basi de tọn. Gbọn hodidọ do apajlẹ enẹ ji dali, hiẹ sọgan gọalọna ẹn nado mọdọ ewọ yin nuhọakuẹ de to agun Klistiani tọn mẹ. To hodidọ do ehe ji godo, hiẹ sọgan zinnudo obá he mẹ Jehovah to etọn hòpọn taidi dopo to lẹngbọvu etọn lẹ mẹ jẹ ji.
Homẹ yisenọ hatọ mítọn lẹ tọn nọ saba hùn nado dọ linlẹn yetọn lẹ do nuhe Biblu dọ lẹ ji. Enẹwutu, hiẹ kẹdẹ ni ma yin hodọtọ blo! To whenue hiẹ ko hia wefọ de he gando ninọmẹ etọn go godo, hiẹ sọgan donù hogbe kavi hodidọ tangan de go bo biọ to e si nado dọ nuhe e lẹn. Di apajlẹ, to 2 Kọlintinu lẹ 4:16 hihia godo, mẹho agun tọn de sọgan kanse dọ, “Be a flin aliho delẹ he mẹ Jehovah ko hẹn we jẹ yọyọ te ya?” Mọwiwà sọgan dekọtọn do ‘tuli nujọnu tọn nina ode awetọ’ mẹ.—Lom. 1:12.
Hiẹ sọgan sọ miọnhomẹna yisenọ hatọ de gbọn hodidọ do mẹhe jugbọn ninọmẹ etọn nkọ mẹ de ji he go Biblu donù dali. Mẹhe ko gbọjọ de sọgan tindo numọtolanmẹ Hanna kavi Epafloditu tọn nkọ, na yé jẹflumẹ to ojlẹ de mẹ, ṣogan bo gbẹ́ yin nuhọakuẹ to nukun Jiwheyẹwhe tọn mẹ. (1 Sam. 1:9-11, 20; Flp. 2:25-30) Naegbọn mì ma na dọhodo mẹhe yin apajlẹ dagbenọ to Biblu mẹ delẹ ji eyin dotẹnmẹ etọn hundote?
ZINDONUKỌN NADO NỌ DO OJLO HIA YÉ
Hiẹ sọgan dohia mẹmẹsunnu po mẹmẹyọnnu towe lẹ po dọ onú yetọn nọ duahunmẹna we eyin hiẹ zindonukọn nado nọ do ojlo nujọnu tọn hia yé to dlapọn lọ godo. (Owalọ 15:36) To vivọnu dlapọn lọ tọn, hiẹ sọgan basi tito hẹ ẹ nado tọ́n dopọ to lizọnyizọn lọ mẹ. Eyin Bernard, mẹho agun tọn numimọnọ de dukosọ hẹ mẹmẹsunnu kavi mẹmẹyọnnu he ewọ dlapọn to agọe de, e nọ yí zinzin do dọho hẹ ẹ gando ayinamẹ he e ko na ẹn go, bo nọ kanse e dọmọ, “Be ayinamẹ lọ wazọ́n ya?” Eyin hiẹ nọ do ojlo nujọnu tọn hia mẹhe a dlapọn lọ, a na yọnẹn eyin ewọ gbẹ́ tindo nuhudo alọgọ tọn.
Mẹmẹsunnu po mẹmẹyọnnu mítọn lẹ po tindo nuhudo todin hugan gbede pọ́n dọ mẹho agun tọn lẹ ni nọ penukundo yé go bo mọnukunnujẹ ninọmẹ yetọn mẹ bosọ nọ do owanyi hia yé. (1 Tẹs. 5:11) Enẹwutu, whẹpo hiẹ nado basi dlapọn lẹngbọhọtọ tọn, nọ yí whenu zan nado lẹnnupọndo ninọmẹ wẹnlatọ lọ tọn ji. Nọ hodẹ̀ gando dlapọn lọ go. Nọ yí sọwhiwhe do de wefọ he sọgbe lẹ. Gbọnmọ dali, hiẹ na mọ hogbe he sọgbe lẹ nado miọnhomẹna ‘alindọn he nuṣikọna’ lẹ!
[Nudọnamẹ odò tọn]
a Yinkọ lẹ ko yin didiọ.
[Yẹdide to weda 29]
Whẹpo hiẹ nado basi dlapọn lẹngbọhọtọ tọn, nọ lẹnnupọndo ninọmẹ yisenọ hatọ towe tọn ji
[Yẹdide to weda 30]
Homẹ yisenọ hatọ mítọn lẹ tọn nọ saba hùn nado dọ linlẹn yetọn lẹ do nuhe Biblu dọ ji
[Yẹdide to weda 31]
Zindonukọn nado nọ do ojlo nujọnu tọn hia yé