To ‘Tenọpọn Jiwheyẹwhe’ Zọnmii
“Yẹn na nọtepọn Jiwheyẹwhe.”—MIKA 7:7.
NAWẸ HIẸ NA NA GBLỌNDO GBỌN?
Etẹwẹ mí sọgan plọn sọn apajlẹ Mika tọn mẹ?
Nujijọ tẹlẹ wẹ mí to tenọpọn?
Etẹwẹ yin delẹ to aliho he mẹ mí sọgan dopẹna Jehovah na homẹfa etọn te lẹ mẹ?
1. Naegbọn mí sọgan lẹndọ opodo lọ to dindẹn gbau?
TO WHENUE Ahọluduta Mẹsia tọn yin didoai to 1914, azán godo tọn titonu Satani tọn lẹ bẹjẹeji. Taidi kọdetọn awhàn he yin fùnfùn to olọn mẹ tọn, Jesu dlan Lẹgba po aovi etọn lẹ po do aigba ji. (Hia Osọhia 12:7-9.) Satani yọnẹn dọ “whenu gli de” janwẹ emi tindo. (Osọ. 12:12) Ṣigba, “whenu” enẹ ko bẹjẹeji sọn owhe susu lẹ die, podọ mẹdelẹ sọgan nọ mọdọ azán godo tọn lẹ to dindẹn gbau. Dile mí to tenọpọn Jehovah nado yinuwa, be dopodopo mítọn nọ mọdọ opodo lọ to dindẹn gbau wẹ ya?
2. Etẹwẹ mí na gbadopọnna to hosọ ehe mẹ?
2 Eyin mí ma tindo homẹfa, enẹ sọgan yin owù na mí, na e sọgan zọ́n bọ mí na yinuwa po sọmawhe po. Nawẹ mí sọgan to tenọpọn Jiwheyẹwhe zọnmii gbọn? Hosọ ehe na gọalọna mí nado wàmọ gbọn gblọndo kanbiọ he bọdego ehelẹ tọn nina dali. (1) Etẹwẹ apajlẹ yẹwhegán Mika tọn plọn mí gando homẹfa go? (2) Nujijọ tẹlẹ wẹ na dohia dọ opodo lọ ko sẹpọ pete? (3) Nawẹ mí sọgan do pinpẹn-nutọn-yinyọnẹn hia Jehovah na homẹfa etọn gbọn?
ETẸWẸ MÍ SỌGAN PLỌN SỌN APAJLẸ MIKA TỌN MẸ?
3. Ninọmẹ tẹ mẹ wẹ Islaelivi lẹ tin te to azán Mika tọn gbè?
3 Hia Mika 7:2-6. Yẹwhegán Jehovah tọn Mika mọ bọ Islaelivi lẹ to gbigbọjọ to gbigbọ-liho kaka bo wá gbọjọ pete to gandudu ahọlu ylankan Ahazi tọn glọ. Mika yí Islaelivi he ma yin nugbonọ enẹlẹ jlẹdo “owùn de” po “opá owùnnọ de” po go. Kẹdẹdile owùn nọ gbleawuna mẹdepope he zinzọnlin gbọn e ji do, mọdopolọ Islaelivi he gblezọn enẹlẹ nọ yinuwa hẹ mẹdevo lẹ to aliho agọ̀ mẹ, bo nọ gbleawuna yé. Ninọmẹ lọ wá ylan sọmọ bọ hagbẹ whẹndo dopolọ tọn lẹ ma tlẹ nọ tindo haṣinṣan dagbe de hẹ ode awetọ ba. Na Mika doayi e go dọ emi ma sọgan wà nude nado diọ ninọmẹ lọ na emide wutu, ewọ dọ nuhe to ahun ji na ẹn lẹ na Jehovah to odẹ̀ mẹ. Enẹgodo, e yí homẹfa do nọtepọn Jiwheyẹwhe nado yinuwa. Mika deji dọ Jehovah na dádo whẹho lọ mẹ to ojlẹ dide Etọn mẹ.
4. Avùnnukundiọsọmẹnu tẹlẹ wẹ mí nọ pehẹ?
4 Taidi Mika, mílọsu to gbẹnọ to gbẹtọ ṣejannabinọ lẹ ṣẹnṣẹn. Mẹsusu wẹ yin “mayọndagbenọ, nugbomadọtọ, owanyi jọwamọ tọn matindotọ.” (2 Tim. 3:2, 3) E nọ vẹna mí to whenue wehọmẹvigbẹ́, azọ́nwatọgbẹ́ po kọmẹnu mítọn lẹ po nọ yinuwa po ṣejannabi po. Humọ, avùnnukundiọsọmẹnu he devizọnwatọ Jiwheyẹwhe tọn delẹ nọ pehẹ tlẹ sinyẹn taun. Jesu dọ dọ hodotọ emitọn lẹ na pehẹ nukundiọsọmẹ to whẹndo mẹ, podọ e yí hogbe he tin to Mika 7:6 mẹ nkọ lẹ zan nado do kọdetọn he owẹ̀n etọn na tindo hia. Jesu dọmọ: “Yẹn wá nado hẹn kinklan wá, yèdọ visunnu sọta otọ́ etọn, viyọnnu sọta onọ̀ etọn, podọ asi jọja de sọta asu-nọ̀ etọn. Na nugbo tọn, mẹhe tin to whédo mẹtọn titi mẹ lẹ wẹ na yin kẹntọ mẹtọn lẹ.” (Mat. 10:35, 36) Lehe e nọ vẹawu nado doakọnna mẹṣanko po nukundiọsọmẹ hagbẹ whẹndo mítọn tọn he ma yin Klistiani lẹ tọn po do sọ! Eyin mí pehẹ kọgbidinamẹ hagbẹ whẹndo tọn lẹ tọn, mì dike mí jogbe gbede blo. Kakatimọ, mì gbọ mí ni yin nugbonọ bo yí homẹfa do nọtepọn Jehovah nado didẹ whẹho lẹ. Eyin mí nọ biọ alọgọ etọn to whepoponu, ewọ na na mí huhlọn po nuyọnẹn he jẹ po nado doakọnnanu.
5, 6. Nawẹ Jehovah suahọ Mika gbọn, ṣigba etẹwẹ Mika ma yí nukun do mọ?
5 Jehovah suahọ Mika na homẹfa he e dohia. Mika yí nukun do mọ whenue gandudu ylankan Ahọlu Ahazi tọn wá vivọnu. Ewọ mọ to whenue visunnu Ahazi tọn Hẹzekia hẹ ofìn ji, yèdọ ahọlu dagbe de he hẹn sinsẹ̀n-bibasi wiwe-ṣeke gọwá. Podọ Mika sọ mọ lehe whẹdida Jehovah tọn he ewọ lá sọta Samalia mọ hẹndi do to whenue Asilianu lẹ gbawhàn ahọluduta Islaeli tọn to agewaji.—Mika 1:6.
6 Ṣigba, Mika ma yí nukun do mọ hẹndi dọdai he Jehovah gbọdo e nado dọ lẹpo tọn gba. Di apajlẹ, Mika wlan dọmọ: ‘To azán godo tọn lẹ mẹ, osó ohọ̀ OKLUNỌ tọn lọ tọn na yin hinhẹn lodo to ota osó lẹ lọ tọn, podọ e na yin zizedaga to okọ́ta lẹ ji; podọ gbẹtọ lẹ nasọ nọ sà jẹ e dè. Akọta susu bo nasọ yì bo dọmọ, mì wá, bosọ gbọ mí ni jẹte yì osó OKLUNỌ tọn kọ̀n.’ (Mika 4:1, 2) Mika ko kú ojlẹ dindẹn whẹpo dọdai enẹ do mọ hẹndi. Etomọṣo, ewọ magbe nado yin nugbonọ na Jehovah kakajẹ okú mahopọnna nuhe mẹhe lẹdo e lẹ to wiwà. Enẹwutu, Mika wlan dọmọ: “Na gbẹtọ lẹpo wẹ zọnlinzin omẹ dopodopo to oyín yẹwhe etọn tọn mẹ, míwlẹ bo nasọ nọ zinzọnlin to oyín OKLUNỌ Jiwheyẹwhe mítọn tọn mẹ kakadoi podọ doidoi.” (Mika 4:5) Mika penugo nado do homẹfa hia to ojlẹ awusinyẹn tọn lẹ mẹ, na ewọ tindo jide mlẹnmlẹn dọ Jehovah na hẹn opagbe Etọn lẹpo di. Yẹwhegán nugbonọ lọ dejido Jehovah go.
7, 8. (a) Naegbọn mí do tindo whẹwhinwhẹ́n lẹpo nado deji? (b) Etẹwẹ na zọ́n bọ ojlẹ he pò lọ na juwayi po awuyiya po?
7 Be mílọsu nọ do jide dopolọ hia to Jehovah mẹ ya? Mí tindo whẹwhinwhẹ́n dagbe nado tindo jidide mọnkọtọn. Dọdai Mika tọn ko to hẹndi mọ to nukun mítọn mẹ. “To azán godo tọn lẹ mẹ,” gbẹtọ livi susu he wá sọn akọta lẹpo mẹ, sọn whẹndo lẹpo mẹ podọ sọn ogbè lẹpo mẹ ko wá “osó ohọ̀ OKLUNỌ tọn” kọ̀n. Mahopọnna dọ yé wá sọn otò voovo he nọ funawhàn sọta ode awetọ mẹ, sinsẹ̀n-basitọ ehelẹ ko “yí ohí yetọn lẹ do tùn glepọnugàn lẹ” bo ko sọ gbẹ́ ma nado “plọn awhàn gbede ba.” (Mika 4:3) Lẹblanulọkẹyi nankọ die nado tin to omẹ Jehovah tọn he yin jijọhonọ lẹ mẹ!
8 Na nugbo tọn, mí jlo dọ Jehovah ni yawu hẹn titonu ylankan ehe wá opodo. Ṣigba, eyin mí na penugo nado yí homẹfa do nọtepọn Jehovah, e na biọ dọ mí ni nọ pọ́n nulẹ hlan dile ewọ nọ wà do. Ewọ ko de azán de he gbè ewọ na dawhẹna gbẹtọvi lẹ “gbọn dawe de he ewọ ko de” dali, yèdọ Jesu Klisti. (Owalọ 17:31) Ṣigba jẹnukọnna enẹ, Jiwheyẹwhe to dotẹnmẹ na gbẹtọ wunmẹ lẹpo nado wá “oyọnẹn he pegan nugbo tọn kọ̀n,” bo yinuwa sọgbe hẹ oyọnẹn enẹ nado yin whinwhlẹngán. Flindọ ogbẹ̀ gbẹtọvi lẹ tọn tin to owù mẹ. (Hia 1 Timoti 2:3, 4.) Eyin mí nọ hẹn alọnu ján nado gọalọna mẹdevo lẹ nado tindo oyọnẹn he pegan gando Jiwheyẹwhe go, ojlẹ he pò whẹpo whẹdida Jehovah tọn nado wá lọ na juwayi po awuyiya po. Opodo lọ na wá to madẹnmẹ, yèdọ to ajiji mẹ. To whenue e na wá, lehe homẹ mítọn na hùn dọ mí hẹn alọnu ján to azọ́n yẹwhehodidọ Ahọluduta lọ tọn mẹ do sọ!
NUJIJỌ TẸLẸ WẸ NA DOHIA DỌ OPODO LỌ KO SẸPỌ PETE?
9-11. Be 1 Tẹsalonikanu lẹ 5:3 ko mọ hẹndi wẹ ya? Basi zẹẹmẹ.
9 Hia 1 Tẹsalonikanu lẹ 5:1-3. To madẹnmẹ, akọta lẹ na dọmọ: “Jijọho po hihọ́ po!” Eyin mí ma na yin kiklọ gbọn hodidọ ehe dali, mí dona “nọ nukle bo gbọṣi lẹnpọn dagbenọ-yinyin mítọn mẹ.” (1 Tẹs. 5:6) Nado sọgan gbọṣi nukle to gbigbọ-liho, mì gbọ mí ni gbadopọnna nujijọ delẹ he na wá aimẹ jẹnukọnna hodidọ ayidego tọn enẹ.
10 To wẹkẹ-whàn awe lọ lẹ dopodopo godo, ojlo vẹkuvẹku akọta lẹ tọn wẹ nado tindo jijọho. To wẹkẹ-whàn tintan godo, Alẹnu Akọta lẹ tọn yin didoai po yanwle lọ po nado hẹn jijọho wá. To nukọn mẹ, to wẹkẹ-whàn awetọ godo, gbẹtọ lẹ tindo todido dọ Plidopọ Akọta lẹ tọn na hẹn jijọho wá aigba ji. Gandudu lẹ po sinsẹ̀ngán lẹ po dejido titobasinanu enẹlẹ go nado hẹn jijọho wá na gbẹtọvi lẹ. Di apajlẹ, to 1986 Plidopọ Akọta lẹ tọn lá dọ owhe enẹ yin owhe Jijọho Lẹdo Aihọn Pé tọn de. To owhe enẹ mẹ, togán po sinsẹ̀ngán he wá sọn otò susu mẹ lẹ po pli dopọ hẹ ogán Ṣọṣi Katoliki tọn to Assise, Italie nado hodẹ̀ bo biọ jijọho.
11 Etomọṣo, jijọho po hihọ́ po didọ enẹ kavi mọnkọtọn devo lẹ ma yin hẹndi dọdai he tin to 1 Tẹsalonikanu lẹ 5:3 mẹ tọn gba. Etẹwutu? Na “vasudo ajiji” he yin didọdai lọ ma ko jọ wutu.
12. Etẹwẹ mí yọnẹn gando lehe “Jijọho po hihọ́ po” na yin didọ do go?
12 Mẹnu lẹ wẹ na dọ “Jijọho po hihọ́ po” to aliho ayidego tọn de mẹ to sọgodo? Adà tẹwẹ sinsẹ̀ngán Mẹylọhodotọklisti tọn lẹ po sinsẹ̀n devo lẹ tọn po na yiwà? Mahẹ tẹwẹ nukọntọ gandudu voovo lẹ tọn na tindo to hodidọ ehe mẹ? Owe-wiwe lẹ ma dọna mí. Nuhe mí yọnẹn wẹ yindọ mahopọnna aliho he mẹ yé na dọ ẹ te kavi lehe e sọgan dutomẹji do, oklọ de poun wẹ e na yin. Titonu ehe na gbọṣi anademẹ Satani tọn glọ. Titonu lọ ko gble pete podọ ninọmẹ etọn ma na pọnte. Lehe e na blawu dọ depope to mí mẹ ni tindo yise to hodidọ oklọ tọn Satani tọn enẹ mẹ bo jẹ mahẹ tindo to tonudidọ mẹ ji do sọ!
13. Naegbọn angẹli lẹ do hẹn jẹhọn vasudo tọn lẹ go?
13 Hia Osọhia 7:1-4. Dile míwlẹ to tenọpọn hẹndi 1 Tẹsalonikanu lẹ 5:3 tọn, angẹli huhlọnnọ lẹ hẹn jẹhọn vasudo tọn nukunbibia daho lọ tọn lẹ go gligli. Etẹwẹ yé to tenọpọn? Apọsteli Johanu basi zẹẹmẹ gando nujijọ ayidego tọn he yé to tenọpọn dopo go, yèdọ hiadogonamẹ godo tọn mẹyiamisisadode he yin “afanumẹ Jiwheyẹwhe mítọn tọn lẹ” tọn.a To whenue hiadogonamẹ godo tọn enẹ na wá vivọnu, angẹli lẹ na jo jẹhọn vasudo tọn lọ lẹ do. Etẹwẹ na jọ bọdego?
14. Etẹwẹ na dohia dọ opodo Babilọni daho lọ tọn ko sẹpọ pete?
14 To madẹnmẹ, Babilọni Daho lọ, yèdọ sinsẹ̀n lalo lẹpo to pọmẹ, na yin vivasudo dile e jẹ do. “Gbẹtọ lẹ, gbẹtọgun lẹ, akọta lẹ po ogbè lẹ po” ma nasọ penugo nado nọgodona ẹn ba. Todin, mí ko to ohia lẹ mọ dọ opodo etọn ko sẹpọ. (Osọ. 16:12; 17:15-18; 18:7, 8, 21) Na nugbo tọn, linlinnamẹnu lẹ nọ mọhodọdo sinsẹ̀n po sinsẹ̀ngán lẹ po go, ehe dohia dọ gbẹtọ lẹ masọ nọ nọgodona ẹn sọmọ ba. Etomọṣo, sinsẹ̀ngán Babilọni Daho lọ tọn lẹ ma nọ mọdọ emi tin to owù mẹ. Lehe yé to yede klọ do sọ! To whenue “Jijọho po hihọ́ po!” na yin didọ godo, tonudọtọ he tin to titonu Satani tọn mẹ lẹ na diọnukunsọ sinsẹ̀n lalo bo na và ẹ sudo. Babilọni Daho lọ ma nasọ yin mimọ gbede ba! Na nugbo tọn, e jẹ dọ mí ni yí homẹfa do nọtepọn nujijọ ayidego tọn enẹlẹ.—Osọ. 18:8, 10.
NAWẸ MÍ SỌGAN DOPẸNA JIWHEYẸWHE NA HOMẸFA ETỌN GBỌN?
15. Naegbọn Jehovah nọ yinuwa po homẹfa po?
15 Mahopọnna vlẹko he gbẹtọ lẹ ko hẹn wá oyín etọn ji, Jehovah yí homẹfa do to tenọpọn ojlẹ he sọgbe lọ nado yinuwa. Jehovah ma jlo dọ ahunjijlọnọ depope ni yin vivasudo. (2 Pita 3:9, 10) Be numọtolanmẹ dopolọ wẹ mílọsu tindo ya? Whẹpo azán Jehovah tọn nado wá, mì gbọ mí ni nọ do pinpẹn-nutọn-yinyọnẹn hia Jehovah na homẹfa etọn to aliho he bọdego ehelẹ mẹ.
16, 17. (a) Naegbọn mí dona tindo ojlo nado gọalọna mẹhe gbọjọ lẹ? (b) Naegbọn e do yin whẹho niyaniya tọn dọ mẹhe gbọjọ lẹ ni lẹkọwa Jehovah dè?
16 Gọalọna mẹhe gbọjọ lẹ. Jesu dọ dọ ayajẹ nọ tin to olọn mẹ eyin lẹngbọ he danbú dopo tata yin dindinmọ. (Mat. 18:14; Luku 15:3-7) Na nugbo tọn, Jehovah nọ hò mẹhe do owanyi hia yinkọ etọn lẹ tọn pọ́n taun, eyin yé ma tlẹ to devizọnwa na ẹn to alọnu din. To whenue mí gọalọna omẹ mọnkọtọn lẹ nado lẹkọwa agun lọ mẹ, mí nọ hẹn Jehovah po angẹli lẹ po jaya.
17 Be hiẹ yin dopo to mẹhe gbọjọ to Jiwheyẹwhe sinsẹ̀n mẹ lẹ mẹ wẹ ya? Vlavo mẹde to agun lọ mẹ wẹ ṣinuwa do we bọ a doalọtena gbẹdido hẹ titobasinanu Jehovah tọn. Todin he ojlẹ de sọgan ko juwayi, kanse dewe dọ: ‘Be gbẹzan ṣie pọnte hugan dai tọn wẹ ya, podọ be n’tindo ayajẹ hugan dai tọn wẹ ya? Be Jehovah wẹ ṣinuwa do mi ya kavi gbẹtọ mapenọ de? Be Jehovah Jiwheyẹwhe ko wà nude pọ́n nado gbleawuna mi wẹ ya?’ Na nugbo tọn, nudagbe wẹ ewọ nọ wà na mí to whepoponu. Eyin mí ma tlẹ to gbẹnọ sọgbe hẹ klandowiwe mítọn na ewọ, e nọ na mí dotẹnmẹ nado duvivi nudagbe he ewọ nọ na mí lẹ tọn. (Jak. 1:16, 17) To madẹnmẹ, azán Jehovah tọn na wá. Din wẹ ojlẹ lọ nado lẹkọwa awà Otọ́ owanyinọ mítọn tọn lẹ mẹ podọ wá agun lọ mẹ, yèdọ bẹtẹn hihọ́ tọn dopo gee lọ to azán godo tọn ehelẹ mẹ.—Deut. 33:27; Heb. 10:24, 25.
18. Naegbọn mí dona nọ nọgodona mẹhe to anadenanu to ṣẹnṣẹn mítọn lẹ?
18 Nọ nọgodona mẹhe to anadenanu lẹ po nugbonọ-yinyin po. Taidi Lẹngbọhọtọ owanyinọ de, Jehovah nọ deanana mí bosọ nọ basi hihọ́na mí. Ewọ ko de Visunnu etọn nado yin Ogán Lẹngbọhọtọ tọn na lẹngbọpa lọ. (1 Pita 5:4) Mẹho agun tọn lẹ nọ yìn lẹngbọ Jiwheyẹwhe tọn lẹ dopodopo to agun he hugan 100 000 lẹ mẹ. (Owalọ 20:28) Eyin mí nọgodona mẹhe yin dide nado nọ deanananu to ṣẹnṣẹn mítọn lẹ, mí to pinpẹn-nutọn-yinyọnẹn dohia Jehovah po Jesu po, na nuhe yé wà na mí lẹpo.
19. Nawẹ mí sọgan dọnsẹpọ ode awetọ pẹkipẹki gbọn?
19 Mì nọ dọnsẹpọ ode awetọ. Etẹwẹ enẹ zẹẹmẹdo? Eyin kẹntọ lẹ yangbé awhànpa he plọn awhàn ganji de tọn, awhànfuntọ lọ lẹ nọ dọnsẹpọ ode awetọ pẹkipẹki. Gbọnmọ dali, yé nọ yin awhànpa huhlọnnọ de. Satani ko hẹn mẹgbeyinyan etọn sọta omẹ Jiwheyẹwhe tọn lẹ sinyẹn deji. E ma yin ojlẹ lọ die nado hoavùn to mídelẹ ṣẹnṣẹn gba. Ojlẹ lọ die nado dọnsẹpọ ode awetọ, bo nọ mọnú zẹ̀ awugbopo mẹdevo lẹ tọn go, bosọ nọ dejido anademẹ Jehovah tọn go.
20. Etẹlẹ wẹ mí dona nọ wà todin?
20 Mì gbọ mímẹpo ni nọ nukle to gbigbọ-liho bo nọtepọn Jiwheyẹwhe. Humọ, mì gbọ mí ni yí homẹfa do nọtepọn “Jijọho po hihọ́ po!” he na yin didọ gọna hiadogonamẹ godo tọn mẹdide lẹ tọn. Enẹgodo, angẹli ẹnẹ lẹ na jo jẹhọn vasudo tọn lẹ do, podọ Babilọni Daho lọ na yin vivasudo. Dile mí to tenọpọn nujijọ ayidego tọn enẹlẹ, mì gbọ mí ni nọ kẹalọyi anademẹ he nọ wá sọn mẹhe to anadenanu to titobasinanu Jehovah tọn mẹ lẹ dè. Mì nọ dọnsẹpọ ode awetọ pẹkipẹki nado diọnukunsọ Lẹgba po aovi lẹ po! Din wẹ ojlẹ lọ nado setonuna tudohomẹnamẹ psalm-kantọ lọ tọn he dọmọ: “Mì yin huhlọnnọ bo gbọ ayiha mìtọn ni deji, mì he [tindo] todido to OKLUNỌ mẹ lẹpo.”—Ps. 31:24.
[Nudọnamẹ odò tọn]
a Nado gbadopọnna vogbingbọn he tin to hiadogonamẹ tintan po hiadogonamẹ godo tọn mẹyiamisisadode lẹ tọn po ṣẹnṣẹn, pọ́n Atọ̀họ̀-Nuhihọ́ lọ Tọn 1er janvier 2007, weda 30-31.
[Zẹẹmẹ yẹdide lẹ tọn to weda 12]
Omẹ Jehovah tọn lẹ to nuhe go yé pé lẹpo wà nado gọalọna mẹhe gbọjọ lẹ nado lẹkọwa Jehovah dè (Pọ́n hukan 16, 17)
[Zẹẹmẹ yẹdide lẹ tọn to weda 14]
Ojlẹ lọ die nado dọnsẹpọ ode awetọ pẹkipẹki nado diọnukunsọ Satani po aovi lẹ po (Pọ́n hukan 19)