Whetẹnu Wẹ Ahọluduta Jiwheyẹwhe Tọn Jẹ Gandu Ji? (Apá 1)

NỌ TO NUKUNNUMỌJẸNUMẸ ‘DÍN MAPOTE’

Sọnayọn: Nudewhenu, a mọ, n’nọ yiwanna hodọdopọ he yẹn po hiẹ po nọ tindo do Biblu ji to sẹmẹsẹmẹ lẹ taun.a Azán diẹ die he mí dọho, a kàn nude sè gando Ahọluduta Jiwheyẹwhe tọn go. A kanse nuhewutu Kunnudetọ Jehovah tọn lẹ do yise dọ owhe 1914 mẹ wẹ Ahọluduta lọ jẹ gandu ji te.

Nudewhenu: Mọwẹ, owe mìtọn de hia n’te bo mọ bọ yè dọ to e mẹ dọ Ahọluduta Jiwheyẹwhe tọn jẹ gandu ji to 1914. Enẹ paṣa mi taun bọ n’jlo na dindona, na a dọna mi dọ Biblu ji wẹ mì nọ ze nuyise mìtọn lẹpo sinai do wutu.

Sọnayọn: Pẹẹ, mọwẹ.

Nudewhenu: N’ka ko hia Biblu ṣie pete. Ṣogan, n’ma mọ wefọ dopo tata he donù owhe 1914 go. N’gbọ bo yì Intẹnẹt ji, bo kàn “1914” do Biblu Intẹnẹt ji tọn de mẹ. N’dín kaka, amọ́ n’ma mọ nudepope gando owhe enẹ go to finẹ.

Sọnayọn: Nudewhenu, a jẹna pipà, e whè gbau na onú awe delẹ wutu. Tintan wẹ yindọ, a penugo nado hia Biblu blebu. N’mọdọ a yiwanna Ohó Jiwheyẹwhe tọn taun.

Nudewhenu: Gbau. Nude ma yọ́n sọ ẹ.

Sọnayọn: Nugbo a dọ. Onú awetọ he n’pà we na wẹ yindọ, a tẹnpọn nado dín gblọndo kanbiọ he to ahunmẹduna we tọn sọn Biblu mẹ. A wà nuhe Biblu na mí tuli nado nọ wà lọ pẹẹ, enẹ wẹ nado: Nọ to nukunnumọjẹnumẹ ‘dín mapote.’b Homẹhunnu wẹ e yin nado mọdọ a to vivẹnudo jẹ obá enẹ mẹ.

Nudewhenu: A wanu taun. Ojlo ṣie wẹ nado plọn nususu dogọ. N’tlẹ bayi dodinnanu vude yinukọn bo mọ nudọnamẹ delẹ gando owhe 1914 lọ go to owe he mí nọ plọn dopọ lọ mẹ. N’hia dọ ahọlu de kudlọ de—e mọ atin daho de he yin sinsán liai bosọ wá gọ̀ wú. Onú mọnkọ de ṣá.

Sọnayọn: Nugbo wẹ. Dọdai he tin to Daniẹli weta 4 mẹ wẹ. E dọho gando odlọ de he Ahọlu Nẹbukadnẹzali Babilọni tọn kú go.

Nudewhenu: Pẹẹ, u niyẹn. N’ko hia dọdai lọ whla dedeji. Amọ́ nado dọ hójọhó, n’ma ko mọ kanṣiṣa he e do hẹ Ahọluduta Jiwheyẹwhe tọn kavi owhe 1914.

Sọnayọn: A mọ an, Nudewhenu, yẹwhegán Daniẹli lọsu ma mọnukunnujẹ zẹẹmẹ nuhe e yin gbigbọdo nado kàn dai lọ tọn mẹ to gigọ́ mẹ!

Nudewhenu: Hójọhó a?

Sọnayọn: Gbau. To Daniẹli 12:8 mẹ, ewọ lọsu dọ dọ: “Todin n’sè, ṣigba n’ma mọnukunnujẹemẹ.”

Nudewhenu: Hún, e ma yin yẹn ṣo niyẹn maa. Enẹ na mi jide pẹẹde.

Sọnayọn: Nugbo lọ wẹ yindọ, Daniẹli ma mọnukunnujẹ dọdai lọ mẹ, na ojlẹ ma ko sọ̀ na Jiwheyẹwhe to whenẹnu nado hẹn zẹẹmẹ dọdai he to owe Daniẹli tọn mẹ lẹ tọn họnwun na gbẹtọ lẹ to gigọ́ mẹ. Amọ́ to ojlẹ mítọn mẹ din, mí gán mọnukunnujẹ yé mẹ gblegede.

Nudewhenu: Naegbọn a do dọ mọ?

Sọnayọn: Jaale bo doayi nuhe wefọ he bọdego tlolo dọ go. Daniẹli 12:9 dọmọ: “Ohó lọ lẹ dona yin hinhẹn taidi aṣli bo yin hiadonu yí do tlẹ́ kakajẹ ojlẹ opodo tọn mẹ.” Hún, dọdai ehelẹ na wá yin nukunnumọjẹemẹ to ojlẹ susu godo, enẹ wẹ to “ojlẹ opodo tọn” mẹ. Podọ dile mí na mọ do zande to Biblu pinplọn mítọn mẹ, kunnudenu lẹpo wẹ dohia dọ ojlẹ enẹ mẹ wẹ mí to gbẹnọ te.c

Nudewhenu: Din, be a gán bayi zẹẹmẹ dọdai he to owe Daniẹli tọn mẹ lọ tọn na mi ya?

Sọnayọn: N’na tẹnpọn.

ODLỌ NẸBUKADNẸZALI TỌN

Sọnayọn: Nado bẹjẹeji, dike ma dọ nuhe Ahọlu Nẹbukadnẹzali mọ to odlọ etọn mẹ na we to kleun mẹ. Enẹgodo mí na dọhodo nuhe e zẹẹmẹdo ji.

Nudewhenu: Eyọ́n.

Sọnayọn: To odlọ lọ mẹ, Nẹbukadnẹzali mọ atin daho de bọ jiyiyi etọn sọ́ olọn. Enẹgodo, e sè bọ wẹnsagun Jiwheyẹwhe tọn de degbe dọ atin lọ ni yin sinsán liai. Ṣigba, Jiwheyẹwhe dọ dọ yè ni jo dodonu po adọ̀ etọn lẹ po do aigba mẹ. To “ojlẹ ṣinawe” godo, atin lọ na gọ̀ wú.d To tintan whenu, Ahọlu Nẹbukadnẹzali lọsu go wẹ dọdai ehe gando. Dile ewọ tlẹ yin ahọlu daho he diyin de—taidi atin he yiji sọ́ olọn lọ—Nẹbukadnẹzali yin sinsán liai na “ojlẹ ṣinawe.” Be a flin lehe enẹ yì do a?

Nudewhenu: Eyeo, n’masọ flin nẹ.

Sọnayọn: E ma do hó de. Biblu dohia dọ Nẹbukadnẹzali hùnalẹ̀, bo nọ mọ na owhe ṣinawe plipli. To ojlẹ enẹ mẹ, e ma penugo nado deanananu di ahọlu. Amọ́ to vivọnu ojlẹ ṣinawe lọ lẹ tọn, Nẹbukadnẹzali gọ̀ jẹgangan bọ gandudu etọn zindonukọn whladopo dogọ.e

Nudewhenu: Kakajẹ fi, n’to hihodo we ganji. Amọ́, n’ma ko mọ nuhe zẹẹmẹ enẹ lẹpo do bo na wà hẹ Ahọluduta Jiwheyẹwhe tọn po owhe 1914 po?

Sọnayọn: Do glido, dọdai de wẹ he na mọ hẹndi do whla awe ji. Hẹndi tintan lọ wá aimẹ whenue gandudu Ahọlu Nẹbukadnẹzali tọn yin alọhẹndotena. Podọ hẹndi awetọ lọ gando alọhinhẹndotena gandudu Jiwheyẹwhe tọn to aigba ji go. Hún, hẹndi awetọ ehe wẹ gando Ahọluduta Jiwheyẹwhe tọn go.

Nudewhenu: Nawẹ mì wagbọn do yọnẹn dọ dọdai lọ na mọ hẹndi do whla awe ji bọ awetọ lọ wẹ do kanṣiṣa hẹ Ahọluduta Jiwheyẹwhe tọn?

Sọnayọn: Whẹwhinwhẹ́n dopo wẹ nudọnamẹ de he mí mọ to dọdai lọ lọsu mẹ. Daniẹli 4:17 dọ gando dọdai ehe go dọ, e yin didọ, “na mẹhe togbẹ̀ lẹ nido yọnẹn dọ Gigogán lọ wẹ Gandutọ to ahọluduta gbẹtọvi lẹ tọn mẹ bo nọ ze e na mẹdepope he jlo e.” Be a doayi hodidọ lọ “ahọluduta gbẹtọvi lẹ tọn” go ya?

Nudewhenu: Gbau, wefọ lọ dọ “Gigogán lọ wẹ Gandutọ to ahọluduta gbẹtọvi lẹ tọn mẹ.”

Sọnayọn: Mọwẹ. Mẹnu wẹ a lẹndọ e yin “Gigogán lọ”?

Nudewhenu: N’didọ Jiwheyẹwhe hodọ wẹ yè te.

Sọnayọn: Pẹẹ. Po ehe po, e dohia dọ dọdai lọ ma gando Nẹbukadnẹzali kẹdẹ go. Kakatimọ, e do kanṣiṣa hẹ “ahọluduta gbẹtọvi lẹ tọn” ga—enẹ wẹ, gandudu Jiwheyẹwhe tọn do gbẹtọvi lẹ ji. Podọ mí na mọdọ zẹẹmẹ ehe sọgbe taun, eyin mí gbadopọnna nuhe yin didọ jẹnukọn podọ bọdo dọdai ehe go lẹ.

Nudewhenu: N’ma ko mọnukunnujẹemẹ.

NUHE JI OWE LỌ DỌHODO HUGAN

Sọnayọn: To Biblu mẹ, owe Daniẹli tọn dọho pludopludo do onú tangan de ji hugan. Whlasusu wẹ e donù didoai Ahọluduta Jiwheyẹwhe tọn to gandudu Visunnu etọn Jesu tọn glọ go. Di apajlẹ, gbọ mí ni gọyìgodo vude yì weta owe Daniẹli tọn he jẹnukọn de ji—Daniẹli 2:44 wẹ. Eyin a mọ, be a gán jaale bo hia ya?

Nudewhenu: Eyọ́n. E dọmọ: “To ojlẹ ahọlu enẹlẹ tọn mẹ wẹ Jiwheyẹwhe olọn tọn na ze ahọluduta de dai he ma na yin vivasudo gbede. Ahọluduta ehe ma nasọ yin jijodo na akọta devo depope. E na gídí ahọluduta ehe lẹpo bo na hẹn yé wá opodo, bọ ewọ kẹdẹ wẹ na nọte kakadoi.”

Sọnayọn: A wanu. Po nue wefọ ehe bẹhẹn po, be a lẹndọ Ahọluduta Jiwheyẹwhe tọn go wẹ e to hodọ gando ya?

Nudewhenu: Hum! N’ma gán dọ taun.

Sọnayọn: Eyọ́n, doayi e go dọ wefọ lọ dọ dọ Ahọluduta ehe “na nọte kakadoi.” Na nugbo tọn, mí sọgan dọ dọ Ahọluduta Jiwheyẹwhe tọn hodọ wẹ e te, na gandudu gbẹtọvi tọn de ma gán nọte kakadoi, kavi etẹ a lẹn?

Nudewhenu: Nugbo taun wẹ.

Sọnayọn: Sọ pọ́n dọdai devo to owe Daniẹli tọn mẹ, he dọho gando Ahọluduta Jiwheyẹwhe tọn go ga. E tin to Daniẹli 7:13, 14 mẹ. Dọdai lọ dọ gando gandutọ sọgodo tọn de go dọmọ: “Yè sọ yí gandudu, gbégbò po ahọluduta de po na ẹn, na gbẹtọ lẹ, akọta lẹ po akọ̀ lẹpo po nido nọ wadevizọn na ẹn. Gandudu madopodo de wẹ gandudu etọn bo ma na juwayi, ahọluduta etọn ma nasọ yin vivasudo.” Be a doayi hogbe tangan de go to dọdai ehe mẹ ya?

Nudewhenu: E donù ahọluduta de go.

Sọnayọn: Mọwẹ. E ma ka yin ahọluduta depope poun. Wefọ lọ dọ dọ Ahọluduta ehe na paṣẹ do “gbẹtọ lẹ, akọta lẹ po akọ̀ lẹpo po” ji. To hogbe devo mẹ, Ahọluduta ehe na dugán do aihọn lọ blebu ji.

Nudewhenu: N’ma wle adà enẹ uwọ ganji dai, amọ́ nue a dọ sọgbe. Wefọ lọ dọ mọ nugbo.

Sọnayọn: Gbọnvona enẹ, doayi nudevo he dọdai lọ dọ go. E dọmọ: “Gandudu madopodo de wẹ gandudu etọn bo ma na juwayi, ahọluduta etọn ma nasọ yin vivasudo.” E taidi nudopolọ pẹẹ hẹ dọdai he mí hia jẹnukọn to Daniẹli 2:44 mẹ, kavi?

Nudewhenu: Gbau.

Sọnayọn: Din, mí ni basi bladopọ nuhe mí ko dọ kakajẹ din lẹ tọn. Dọdai he to Daniẹli weta 4 mẹ yin didọ na gbẹtọ lẹ nido yọnẹn dọ “Gigogán lọ wẹ Gandutọ to ahọluduta gbẹtọvi lẹ tọn mẹ.” Ehe kẹdẹ ko dohia dọ dọdai lọ na tindo hẹndi daho hugan devo gbọnvona dehe gando Nẹbukadnẹzali go lọ. Podọ to owe Daniẹli tọn blebu mẹ, mí mọ dọdai susu he dohia dọ Ahọluduta Jiwheyẹwhe tọn na yin didoai to gandudu Visunnu etọn tọn glọ. Enẹwutu, be a lẹndọ e sọgbe hẹ lẹnpọn dagbe nado wá tadona kọ̀n, dọ dọdai he to Daniẹli weta 4 mẹ lọ do kanṣiṣa hẹ Ahọluduta Jiwheyẹwhe tọn ya?

Nudewhenu: N’lẹnmọ gbau. Amọ́, e pò kanṣiṣa he e do hẹ owhe 1914, enẹ uwọ ma ko họnwun na mi.

“DIKE OJLẸ ṢINAWE NI JUWAYI”

Sọnayọn: Eyọ́n, mí ni lẹkọwa Ahọlu Nẹbukadnẹzali ji. Ewọ wẹ nọtena atin lọ to hẹndi tintan dọdai lọ tọn mẹ. Kẹdẹdile atin lọ yin sinsán liai bo nọ mọ na ojlẹ ṣinawe do, gandudu etọn yin alọhẹndotena to whenue e hùnalẹ̀ bo nọ mọ na ojlẹ de. Ojlẹ ṣinawe lọ lẹ wá vivọnu to whenue Nẹbukadnẹzali wá jẹgangan bo gọjẹ gandu ji. To hẹndi awetọ dọdai lọ tọn mẹ, gandudu Jiwheyẹwhe tọn to aigba ji yin alọhẹndotena na ojlẹ de—amọ́ e ma yindọ na Jiwheyẹwhe gboawupo to tito etọn mẹ wutu wẹ e do yinmọ gba.

Nudewhenu: Gbọnna? E ma họnwun na mi.

Sọnayọn: A mọ, to ojlẹ he mẹ yè kàn Biblu te, ahọlu he yin Islaelivi bo dugán to Jelusalẹm lẹ nọ sin “ofìn Jehovah tọn” ji.f Taidi afọzedaitọ Jiwheyẹwhe tọn lẹ, yé nọ deanana omẹ etọn lẹ. Enẹwutu, na taun tọn, gandudu ahọlu enẹlẹ tọn nọtena gandudu Jiwheyẹwhe tọn. Amọ́, to nukọn mẹ, suhugan ahọlu enẹlẹ tọn wẹ vẹtolina Jiwheyẹwhe, podọ suhugan mẹjidugando yetọn lẹ tọn hodo apajlẹ ylankan yetọn. Na Islaelivi lẹ vẹtọli wutu, Jiwheyẹwhe jo yé do bọ Babilọninu lẹ gbawhàn yetọn to 607 J.W.M. Sọn ojlẹ enẹ mẹ sọyi, ahọlu de ma sọ yin afọzedaitọ Jehovah tọn to Jelusalẹm ba. Po enẹ po, to linlẹn de mẹ, mí gán dọ dọ gandudu Jiwheyẹwhe tọn yin alọhẹndotena. Be a to nukunnumọjẹ nue dọ n’te mẹ ya?

Nudewhenu: Ẹn, n’to nukunnumọjẹemẹ.

Sọnayọn: Enẹwutu, owhe 607 J.W.M. wẹ ojlẹ ṣinawe lọ lẹ bẹjẹeji te, yèdọ ojlẹ he mẹ gandudu Jiwheyẹwhe tọn na yin alọhẹndotena. To vivọnu ojlẹ ṣinawe lọ lẹ tọn, Jiwheyẹwhe na do ahọlu yọyọ de ai he na ze afọ Etọn dai, amọ́ e ma na yin mẹde sọn aigba ji ba kakatimọ sọn olọn mẹ. Whenẹnu wẹ dọdai devo he mí hia to owe Daniẹli tọn mẹ lẹ na mọ hẹndi. Enẹwutu, kanbiọ titengbe lọ wẹ yindọ: Whetẹnu wẹ ojlẹ ṣinawe lọ lẹ wá vivọnu? Eyin mí mọ gblọndo na kanbiọ enẹ, mí na yọ́n whenue Ahọluduta Jiwheyẹwhe tọn jẹ gandu ji.

Nudewhenu: N’mọ nue dọ a te. N’didọ ojlẹ ṣinawe lọ lẹ wá vivọnu to 1914, kavi?

Sọnayọn: Pẹẹ! Gblọndo towe sọgbe taun.

Nudewhenu: Amọ́, nawẹ mí wagbọn do yọnẹn?

Sọnayọn: Whenue Jesu to yẹwhehodọ to aigba ji, e dohia dọ ojlẹ ṣinawe lọ lẹ ma ko wá vivọnu.g Enẹwutu, ojlẹ enẹ na ko dẹn taun. Ojlẹ ṣinawe lọ lẹ ko bẹjẹeji owhe kanweko susu lẹ jẹnukọn whẹpo Jesu do wá aigba ji, podọ yé gbẹ́ zindonukọn na ojlẹ de to whenue e lẹkọyi olọn mẹ godo. Sọ flindọ, “ojlẹ opodo tọn mẹ”h wẹ zẹẹmẹ dọdai Daniẹli tọn lẹ tọn na wá họnwun te. E jẹna ayidego dọ, jei vivọnu owhe 1800 lẹ tọn, Biblu plọntọ ahundoponọ lẹ yin whinwhàn nado yí sọwhiwhe do gbadopọnna dọdai enẹ po devo lẹ po. Yé wá mọnukunnujẹemẹ dọ ojlẹ ṣinawe lọ lẹ na wá vivọnu to owhe 1914 mẹ. Podọ nujijọ ayidego tọn he wá aimẹ lẹdo aihọn pé to 1914 lẹ dohia nugbo dọ owhe enẹ mẹ wẹ Ahọluduta Jiwheyẹwhe tọn jẹ gandu ji te to olọn mẹ. Owhe enẹ mẹ wẹ aihọn ehe biọ azán godo tọn etọn lẹ, kavi ojlẹ opodo tọn mẹ te. A mọ, n’yọnẹn dọ nudọnamẹ ehelẹ gán di nuhe sù gbau bo vẹawu nado mọnukunnujẹemẹ . . .

Nudewhenu: Nugbo wẹ. E na biọ dọ n’ma vọ́ gọ̀ gbọn e ji, na nido họnwun na mi dogọ.

Sọnayọn: Ma hanú blo. E yí whenu pẹẹde to yẹnlọsu si whẹpo n’do wá mọ lehe dọdai lọ lẹ po hẹndi yetọn lẹ po sọgbe sọ. Amọ́ n’didọ e whè gbau, hodọdopọ mítọn gọalọna we nado mọdọ nuhe Kunnudetọ Jehovah tọn lẹ yise gando Ahọluduta lọ go lẹ sinai do Biblu ji.

Nudewhenu: Gbau. Aliho he mẹ a nọ yí Biblu do basi zẹẹmẹ nuyise mìtọn lẹ tọn te nọ whàn mi taun.

Sọnayọn: N’mọdọ nuhe hiẹ lọsu nọ jlo na wà niyẹn. Dile n’dọ do, e gán vẹawu nado yí onú ehe lẹpo hẹn to oplọn dopo poun whenu. E yọnbasi dọ kanbiọ delẹ gbẹ́ to ahunmẹduna we. Di apajlẹ, mí ko mọdọ ojlẹ ṣinawe lọ lẹ gando Ahọluduta Jiwheyẹwhe tọn go bo bẹjẹeji to 607 J.W.M. Amọ́ din, nawẹ mí wagbọn do yọnẹn nugbonugbo dọ ojlẹ ṣinawe lọ lẹ wá vivọnu to 1914?i

Nudewhenu: Gbau, kanbiọ enẹ to ahunmẹduna mi.

Sọnayọn: Biblu lọsu wẹ gọalọna mí nado yọ́n lehe ojlẹ ṣinawe lọ lẹ dẹnsọ po gbesisọ po. Be e na jlo we nado gbadopọnna adà hosọ lọ tọn ehe to whedevonu he n’na wá ya?j

Nudewhenu: Enẹ ma na ylan.