Naegbọn Mí Dona Plọn Biblu?

Be hiẹ ko kàn kanbiọ mọnkọtọn lẹ sè dewe pọ́n ya? Eyin mọ wẹ, e ma yin hiẹ kẹdẹ wẹ kanbiọ enẹlẹ nọ duahunmẹna. Lẹdo aihọn pé, gbẹtọ lẹ nọ lẹnnupọndo kanbiọ titengbe gbẹ̀mẹ tọn lẹ ji. Be hiẹ sọgan mọ gblọndo lọ lẹ ya?

Gbẹtọ livi susu wẹ na yigbe dọ, “Mọwẹ!” Etẹwutu? Na yé ko mọ gblọndo kọfanamẹ tọn lẹ to Biblu mẹ. Be hiẹ jlo na yọ́n nuhe Biblu dọ ya? Eyin mọ wẹ, tito Biblu pinplọn tọn vọnu he Kunnudetọ Jehovah tọn lẹ nọ basi hẹ gbẹtọ lẹ sọgan gọalọna we.a

Na nugbo tọn, na nuhe dù Biblu pinplọn, mẹdelẹ nọ dọ dọ, “Alọnu ṣie nọ ján gbau,” “Biblu pinplọn ma nọ bọawu paali,” “N’ma jlo na dota e mẹ.” Ṣigba, mẹdevo lẹ tindo pọndohlan devo pete. Yé nọ kẹalọyi nado plọn Biblu bo yọ́n nuhe e plọnmẹ lẹ. Pọ́n apajlẹ he bọdego ehelẹ:

• “N’yì ṣọṣi Katoliki po Plọtẹstant po tọn, podọ tẹmpli sinsẹ̀n Sikh tọn, gọna opá yẹwhenọ Bouddha tọn lẹ, podọ n’plọn sinsẹ̀n-nuplọnmẹ to wehọmẹ alavọ tọn de. Ṣogan, n’ma mọ gblọndo na susu kanbiọ he n’tindo lẹ tọn. Enẹgodo wẹ Kunnudetọ Jehovah tọn de wá owhé ṣie gbè. Gblọndo he e na sọn Biblu mẹ lẹ yinuwado ji e sọmọ bọ n’kẹalọyi nado plọn Biblu.”—Gill, Angleterre.

• “N’tindo kanbiọ susu gando ogbẹ̀ go, ṣigba gblọndo he sinsẹ̀ngán ṣie na lẹ ma hẹn pekọ wá na mi. Amọ́, dopo to Kunnudetọ Jehovah tọn lẹ mẹ yí Biblu zan nado na gblọndo na kanbiọ ṣie lẹ. To whenue e kanse eyin n’jlo na plọnnu dogọ, po homẹhunhun po wẹ n’yigbe.”—Koffi, Bénin.

• “N’nọ jlo na yọ́n ninọmẹ he mẹ oṣiọ lẹ te taun. N’yise dọ oṣiọ lẹ sọgan gbleawuna mẹhe to ogbẹ̀ lẹ, etomọṣo n’jlo na yọ́n nuhe Biblu dọ. Enẹwutu, n’jẹ Biblu plọn ji hẹ họntọn ṣie de he yin Kunnudetọ.”—José, Brésil.

• “N’tẹnpọn nado hia Biblu, ṣigba n’ma mọnukunnujẹemẹ. Enẹgodo, Kunnudetọ Jehovah tọn lẹ wá owhé ṣie gbè bo basi zẹẹmẹ he họnwun do dọdai Biblu tọn susu ji na mi. N’jlo na yọ́n nudevo he n’sọgan plọn lẹ.”—Dennize, Mexique.

• “N’ma yọnẹn eyin Jiwheyẹwhe nọ hò ṣie pọ́n nugbonugbo. Enẹwutu, n’basi dide nado hodẹ̀ hlan Jiwheyẹwhe Biblu mẹ tọn. To wunkẹngbe, Kunnudetọ lẹ wá húhúhọ̀n na mi, bọ n’kẹalọyi nado plọn Biblu.”—Anju, Népal.

Apajlẹ omẹ ehelẹ tọn flin mí ohó Jesu tọn lẹ dọmọ: “Ayajẹnọ wẹ mẹhe yọnẹn dọ yé tindo nuhudo gbigbọmẹ tọn lẹ.” (Matiu 5:3) Na nugbo tọn, gbẹtọvi lẹ tindo nuhudo jọwamọ tọn nado yọ́n Jiwheyẹwhe. Jiwheyẹwhe kẹdẹ wẹ sọgan súdo nuhudo enẹ tọn, podọ e nọ wàmọ gbọn Ohó etọn Biblu gblamẹ.

Enẹwutu, etẹwẹ Biblu pinplọn bẹhẹn? Nawẹ e sọgan hẹn ale wá na we gbọn? Mí na mọ gblọndo kanbiọ ehelẹ tọn to hosọ he bọdego mẹ.