HOSỌ HE JẸNUKỌN | NAEGBỌN MÍ DONA NỌ DỌ NUGBO?

Be E Gbẹ́ Sọgbe Nado Nọ Dọ Nugbo Ya?

Hitoshi nọ penukundo akuẹ go to azọ́nwhé he nọ dín azọ́n namẹ de to Japon. To gbèdopo he e to dogbapọnna kandai akuẹzinzan tọn hẹ ogán etọn, ogán lọ biọ to e si nado dolalo to linlin akuẹzinzan tọn etọn mẹ. Hitoshi basi zẹẹmẹ dọ emi ma sọgan wàmọ na ayihadawhẹnamẹnu emitọn wutu. Taidi kọdetọn de, ogán lọ sìn-adán na Hitoshi nado yàn ẹn, podọ azọ́n sọ gbledo e nugbo.

To osun he bọdego lẹ mẹ, Hitoshi jẹflumẹ taun. To whenue yè to hokanse e gbèdopo nado sọgan yí i do azọ́nmẹ, Hitoshi dọ dọ emi ma sọgan wazọ́n depope he na biọ dọ emi ni dolalo. Hokansemẹtọ lọ dọ dọ, “Amọ́ nulẹnpọn hiẹ tọn gbọnvo mọọ!” Whẹndo Hitoshi tọn po họntọn etọn lẹ po na ẹn tuli nado tẹdo gbemima etọn nado nọ dọ nugbo go, ṣigba e wá jẹ ayihaawe tindo ji. Di apajlẹ, e dọ dọ “n’nọ hanú eyin nugbodidọ na yise ṣie wutu yin nuyọnẹnnu nugbo.”

E blawu dọ numimọ Hitoshi tọn flin mí dọ, e ma yin mẹlẹpo wẹ nọ ylọ nugbodidọ dọ nujọnu. Nado dọ hójọhó, mẹdelẹ tlẹ nọ pọ́n ẹn hlan taidi nulunu, titengbe na nuhe dù ajọwiwa. Nawe de he to azọ́nwa to Afrique du Sud dọmọ: “Nugbomadọtọ lẹ wẹ lẹdo mi pé, podọ e nọ vẹawu to whedelẹnu ma nado wà nudopolọ.”

Dopo to wunmẹ nugbomadọ tọn he gbayipe to egbehe lẹ mẹ wẹ lalodido. To owhe delẹ die wayi, dodinnanu de he yin bibasi gbọn weyọnẹntọ Robert S. Feldman dali to wehọmẹ alavọ tọn Massachusetts Amherst tọn dohia dọ 60 to 100 ji gbẹtọ lẹ tọn wẹ nọ dolalo e whè gbau whladopo to hodọdopọ nukunwhiwhe ao tọn de mẹ. Feldman dọmọ: “Kọdetọn dodinnanu lọ tọn paṣamẹ taun. Mí ma lẹndọ mẹsusu ko yí nugbomadọ do dó aṣa sọmọ.” Be e ma yin nupaṣamẹ de dọ mẹsusu ma nọ jlo dọ yè ni dolalo na emi, ṣogan bọ yewlẹ ma nọ whleawu nado dolalo na mẹdevo lẹ ya?

Naegbọn lalodido, ajojijẹ, po wunmẹ nugbomadọ tọn devo lẹ po do gbayipe sọmọ to egbehe? Nuyiwadomẹji tẹwẹ nugbomadọ nọ tindo do gbẹtọ lẹ ji to paa mẹ? Podọ hú popolẹpo, nawẹ mí sọgan dapana nugbomadọ wunmẹ lẹpo gbọn?