HOSỌ HE JẸNUKỌN | NAEGBỌN MÍ DONA NỌ DỌ NUGBO?

Nugbomadọ Sọgan Bẹpla We

Nawe de he nọ yin Samantha to Afrique du Sud dọmọ: “Ninọmẹ sinsinyẹn delẹ nọ wá fọ́n, ehe nugbomadọ vude sọgan yawu didẹ.”

Be hiẹ lọsu kọngbedopọ hẹ linlẹn enẹ ya? Taidi Samantha, mímẹpo wẹ ko pehẹ ninọmẹ sinsinyẹn de to aliho de kavi devo mẹ pọ́n. Lehe mí nọ yinuwa do to ninọmẹ enẹlẹ he sọgan sisẹ́ mí nado dolalo mẹ, nọ do nuhe họakuẹ na mí hia. Di apajlẹ, eyin mí ma nọ jlo na duwinyan to aliho depope mẹ, mí sọgan nọ yawu joawuna nugbomadọ. Ṣigba, to whenue nugbo lọ wá họnwun na mẹsusu, nugbomadọ nọ saba hẹn kọdetọn ylankan lẹ wá. Lẹnnupọndo nuhe bọdego ehelẹ ji.

NUGBOMADỌ NỌ HẸN JIMADEDOMẸGO WÁ

Jidedomẹgo ji wẹ haṣinṣan lẹ nọ sinai do. To whenue omẹ awe dejido yede go, yé nọ tindo numọtolanmẹ hihọ́ tọn. Ṣigba, jidedomẹgo ma nọ yin awuwlena to zánto dopo mẹ. To paa mẹ, gbẹtọ lẹ nọ dejido ode awetọ go eyin yé nọ yí whenu zan dopọ, nọ dọhodopọ po ahundopo po bo masọ nọ yinuwa po ṣejannabi po. Ṣigba, nuyiwa nugbomadọ tọn dopo sọgan zọ́n bọ yè ma na dejido mẹde go ba. Podọ eyin jidide busẹ, e sọgan vẹawu taun nado vọ́ awuwlena ẹn.

Be mẹde he a ylọdọ họntọn vivẹ́ towe ko doyẹklọ we pọ́n ya? Eyin mọwẹ, etẹwẹ yin numọtolanmẹ towe? E yọnbasi dọ, enẹ na ko vẹna we taun. Numọtolanmẹ towe enẹ sọgbe. E họnwun dọ nugbomadọ sọgan hẹn dodonu haṣinṣan họakuẹ de tọn gble.

NUGBOMADỌ NỌ BẸPLAMẸ

Mẹplọntọ de he nọ yin Robert Innes to wehọmẹ alavọ tọn Californie tọn basi dodinnanu de he dohia dọ “na nugbo tọn, nugbomadọ nọ bẹplamẹ.” Enẹwutu, nugbomadọ sọgan yin yiyijlẹdo azọ̀n bẹplamẹ de go—eyin a nọ yí whenu zan hẹ nugbomadọtọ de, e yọnbasi taun dọ hiẹ lọsu ni “lẹzun” nugbomadọtọ.

Etẹwẹ na gọalọna we ma nado jai jẹ omọ̀ nugbomadọ tọn mẹ? Biblu wẹ. Gbọ mí ni pọ́n nunọwhinnusẹ́n Biblu tọn kleun delẹ.

Wunmẹ Nugbomadọ Tọn Lẹ

Lalodido

ETẸWẸ E ZẸẸMẸDO? Nugbomadọ na mẹde he e jẹ dọ yè ni dọ nugbo na. Lalodido sọgan bẹ nuyiwa delẹ hẹn taidi, nado gada whẹho de kavi klọ mẹde, nugbo daa didọ nado doyẹklọmẹ, podọ osin dido ohó ji nado do nuhe dọ yè te hia di nugbo.

NUHE BIBLU DỌ: “Osùnú de wẹ tasinyẹntọ yin hlan OKLUNỌ, ṣigba aṣli etọn tin to dodonọ lẹ dè.” (Howhinwhẹn lẹ 3:32) “Todin he mì ko klọ́n lalodido dai, dopodopo mìtọn ni nọ dọ nugbo hẹ kọmẹnu etọn.”—Efesunu lẹ 4:25.

Mẹhẹngble

ETẸWẸ E ZẸẸMẸDO? Lalo po ohó he ma sọgbe lẹ po fúfú pé nado hẹn yinkọ dagbe mẹde tọn gble.

NUHE BIBLU DỌ: “Gbẹtọ yẹwàtọ do avùn dai, nuglọ-hodọtọ sọ klan họntọn dovo.” (Howhinwhẹn lẹ 16:28) “Fie nake de ma tin te wẹ miyọ́n nọ ṣí te; mọ wẹ fie ajàndotọ ma tin te, avùn nọ doalọte.”—Howhinwhẹn lẹ 26:20.

Mẹhodu

ETẸWẸ E ZẸẸMẸDO? Akuẹ kavi nutindo mẹdevo tọn yíyí to aliho oklọ tọn mẹ.

NUHE BIBLU DỌ: “Hiẹ ma na bianukunna devi pakanọ de he yin wamọnọ podọ agbátọnọ.” (Deutelonomi 24:14, 15) “Ewọ he to nukunbiana wamọnọ to [Mẹdatọ] etọn vlẹ, ṣigba ewọ he wàlẹblanuna wamọnọ gbògbéna Ẹn.”—Howhinwhẹn lẹ 14:31.

Ajojijẹ

ETẸWẸ E ZẸẸMẸDO? Onú mẹdevo tọn yíyí matin gbebibiọ.

NUHE BIBLU DỌ: “Mì dike mẹhe nọ fìnnú sọ fìnnú ba blo, ṣigba mì gbọ ewọ ni nọ wazọ́n sinsinyẹn, bo nọ yí alọ etọn lẹ do wà azọ́n dagbe lẹ, na ewọ nido sọgan tindo nude nado má na mẹhe to nuhudo mẹ.” (Efesunu lẹ 4:28) “Yè klọ mì blo. . . . Ajotọ lẹ, kavi nukunkẹnnọ lẹ, kavi ahànnumunọ lẹ, kavi mẹvlẹtọ lẹ, kavi alọslonamẹtọ lẹ ma na dugu ahọluduta Jiwheyẹwhe tọn.”—1 Kọlintinu lẹ 6:9, 10.