Nọ Wazọ́n Dopọ hẹ Jehovah Egbesọegbesọ

“Azọ́nwatọ hatọ Jiwheyẹwhe tọn lẹ wẹ mí yin.”—1 KỌL. 3:9.

1. Aliho tẹlẹ mẹ wẹ mí sọgan wazọ́n dopọ hẹ Jehovah te?

TITO Mẹdatọ lọ tọn wẹ yindọ gbẹtọvi pipé lẹ na wazọ́n dopọ hẹ ewọ nado hẹn lẹndai etọn lẹ di. Mahopọnna dọ gbẹtọvi lẹ yin mapenọ todin, nugbonọ lẹ gbẹ́ sọgan nọ wazọ́n dopọ hẹ Jehovah egbesọegbesọ. Di apajlẹ, mí nọ lẹzun “azọ́nwatọ hatọ Jiwheyẹwhe tọn lẹ” gbọn yẹwheho wẹndagbe Ahọluduta etọn tọn didọ po gbẹtọ lẹ hinhẹn zun devi lẹ po dali. (1 Kọl. 3:5-9) Lẹblanulọkẹyi nankọ die nado yin hihia dogọ mẹhe jẹ nado wazọ́n dopọ hẹ Mẹdatọ ganhunupotọ wẹkẹ lọ tọn lẹ to azọ́n he yin nujọnu to nukun etọn mẹ de mẹ! Etomọṣo, e ma yin yẹwhehodidọ po gbẹtọ lẹ hinhẹn zun devi lẹ po kẹdẹ wẹ yin aliho he mẹ mí nọ wazọ́n dopọ hẹ Jehovah te gba. Hosọ ehe na gbadopọnna aliho devo lẹ he mẹ mí sọgan wàmọ te—enẹ wẹ alọgigọna whẹndo mítọn po yisenọ hatọ lẹ po, johẹmẹ didohia, míde zizejo nado gọalọ to tito yẹwhehọluduta tọn lẹ mẹ, podọ adagbigblona sinsẹ̀nzọn wiwe mítọn.—Kol. 3:23.

2. Naegbọn e ma na yin nuyọnẹnnu nado yí nuhe mí nọ wà nado nọgodona lẹndai Jehovah tọn lẹ jlẹdo nuhe mẹdevo lẹ nọ wà go?

² Dile mí to dogbapọnna hosọ ehe, ma yí nuhe a sọgan wà na Jehovah jlẹdo nuhe mẹdevo lẹ sọgan wà go blo. Flindọ owhe, agbasalilo, ninọmẹ po nugopipe mẹlẹpo tọn po ma yin dopolọ. Apọsteli Paulu dọ to gbọdo glọ dọmọ: “Mì gbọ mẹdopodopo ni nọ dindona nuyiwa edetiti tọn lẹ, podọ to whenẹnu, ewọ na tindo whẹwhinwhẹ́n nado jaya gando edetiti kẹdẹ go, bọ e ma yin nado nọ yí ede jlẹdo mẹdevo go gba.”—Gal. 6:4.

NỌ GỌALỌNA WHẸNDO TOWE PO SINSẸ̀N-BASITỌ HATỌ LẸ PO

3. Naegbọn e sọgan yin didọ dọ mẹhe nọ penukundo whẹndo yetọn go lẹpo nọ wazọ́n dopọ hẹ Jiwheyẹwhe?

³ Jehovah nọ donukun dọ devizọnwatọ emitọn lẹ ni penukundo whẹndo yetọn lẹ go. Di apajlẹ, e sọgan nọ biọ dọ a ni wazọ́n nado penukundo mẹyiwanna towe lẹ go to akuẹzinzan-liho. Onọ̀ susu wẹ nọ nọ̀ whégbè nado penukundo ovi flinflin yetọn lẹ go. Podọ e sọgan biọ dọ ovi he ko whẹ́n mẹho delẹ ni nọ penukundo mẹjitọ madogánnọ lẹ go. Nuwiwa dandan tọn wẹ ehelẹ yin. Ohó Jiwheyẹwhe tọn dọmọ: “Eyin mẹdepope ma wleawudaina mẹhe yin etọn titi lẹ, podọ titengbe na mẹhe yin hagbẹ whédo etọn tọn lẹ, ewọ ko mọ́n yise lọ bosọ ylanhu mayisenọ.” (1 Tim. 5:8) Eyin a tindo azọngban mọnkọtọn lẹ, a sọgan nọma penugo nado de whenu susu dovo na nuwiwa yẹwhehọluduta tọn lẹ dile a na ko jlo do. Ṣigba, gboadọ! Homẹ Jehovah tọn nọ hùn eyin a nọ wleawudaina whẹndo towe.—1 Kọl. 10:31.

4. Nawẹ mẹjitọ lẹ sọgan gọalọna ovi yetọn lẹ nado ze Ahọluduta lọ do otẹn tintan mẹ kakati nido yin nuhe yelọsu jlo na ovi lọ lẹ gbọn, podọ ale tẹlẹ wẹ mọwiwà nọ hẹnwa?

⁴ Mẹjitọ Klistiani lẹ nọ wazọ́n dopọ hẹ Jehovah eyin yé nọ ze yanwle yẹwhehọluduta tọn lẹ donukọnna ovi yetọn lẹ. Mẹjitọ susu he wàmọ lẹ wá mọ to godo mẹ dọ visunnu po viyọnnu yetọn lẹ po nọ kẹalọyi azọ́ndenamẹ sinsẹ̀nzọn whenu-gigọ́ tọn lẹ to fie dẹn do whé lẹ. Mẹdelẹ yin mẹdehlan; mẹdevo lẹ yin gbehosọnalitọ to fie nuhudo wẹnlatọ tọn sù te; podọ mẹdevo lẹ to sinsẹ̀n to Bẹtẹli. Fidindẹn he yé te gán zọ́n bọ mẹjitọ yetọn lẹ ma na nọ saba penugo nado yí whenu zan dopọ hẹ yé dile yé na ko jlo do. Etomọṣo, mẹjitọ mẹde-yido-sanvọ́ tọ́ lẹ nọ na tuli ovi yetọn lẹ nado zindonukọn to azọ́ndenamẹ yetọn lẹ mẹ. Etẹwutu? Yé nọ mọ ayajẹ po pekọ susu po to yinyọnẹn mẹ dọ ovi yetọn lẹ to Ahọluduta lọ zedo otẹn tintan mẹ. (3 Joh. 4) Vlavo susu mẹjitọ ehelẹ tọn nọ tindo numọtolanmẹ Hanna tọn nkọ, mẹhe dọ dọ emi ‘whé’ visunnu emitọn Samuẹli na Jehovah. E sọgbe dọ mẹjitọ ehelẹ ni nọ pọ́n azọ́nwiwa dopọ hẹ Jiwheyẹwhe to aliho enẹ mẹ hlan taidi lẹblanulọkẹyi họakuẹ de. Yé ma na ko jlo nudevo hú enẹ.—1 Sam. 1:28.

5. Nawẹ a sọgan gọalọna hagbẹ agun towe tọn lẹ to aliho yọ́n-na-yizan mẹ gbọn? (Pọ́n yẹdide he tin to bẹjẹeji hosọ ehe tọn.)

⁵ Eyin a ma tindo azọngban whẹndo tọn pinpẹn lẹ, be a sọgan gọalọna sinsẹ̀n-basitọ hatọ he yin nukunpedomẹgotọ, madogánnọ, mẹhomẹ kavi mẹdevo he to nuhudo mẹ lẹ ya? Naegbọn a ma na ze nukun dai to agun towe mẹ nado doayi mẹhe tindo nuhudo alọgọ tọn de go? Mí ni dọ dọ mẹmẹyọnnu de nọ penukundo mẹjitọ mẹhomẹ etọn lẹ go, be a sọgan nọ yí whenu zan dopọ hẹ mẹjitọ lọ lẹ to whenue ewọ to nukunpedo whẹho devo lẹ go ya? Kavi vlavo a sọgan gọalọna mẹhe do hudo alọgọ tọn lẹ gbọn dewe zizejo nado nọ ze yé yì opli lẹ, nado yì whleahi, nado yilizọn na yé kavi nado yì dla mẹhe to dotowhé de pọ́n dali. Eyin a nọ wàmọ, a sọgan to azọ́nwadopọ hẹ Jehovah nado na gblọndo odẹ̀ de tọn.—Hia 1 Kọlintinu lẹ 10:24.

NỌ HẸJÓMẸ

6. Etẹwẹ johẹmẹ didohia bẹhẹn?

⁶ Azọ́nwatọ hatọ Jiwheyẹwhe tọn lẹ nọ yin yinyọnẹn na johẹmẹ yetọn. To Owe-wiwe Glẹki tọn lẹ mẹ, hogbe he yin lilẹdo “johẹmẹ” zẹẹmẹdo “homẹdagbe didohia jonọ lẹ.” (Heb. 13:2; Odò.) Biblu donù nujijọ delẹ go he plọn mí nado nọ do owanyi mọnkọtọn hia. (Jen. 18:1-5) Mí sọgan nọ yí dotẹnmẹ hundote lẹ zan nado nọ gọalọna mẹdevo lẹ to gbesisọ mẹ, podọ mí dona nọ wàmọ, vlavo yé “gando mí go to yise mẹ” kavi lala.—Gal. 6:10.

7. Naegbọn e sọgan yọ́n nado lẹnnupọndo johẹmẹ didohia devizọnwatọ whenu-gigọ́ tọn lẹ to dlapọn yetọn lẹ whenu ji?

⁷ Be a sọgan wazọ́n dopọ hẹ Jiwheyẹwhe gbọn johihẹ devizọnwatọ whenu-gigọ́ tọn lẹ dali to dlapọn yetọn lẹ whenu ya? (Hia 3 Johanu 5, 8.) Ojlẹ enẹlẹ nọ saba hùn dotẹnmẹ “tulinina ode awetọ” tọn dote. (Lom. 1:11, 12) Lẹnnupọndo numimọ Olaf tọn ji. E flindọ to owhe susu lẹ die whenue emi to jọja, mẹdepope to agun emitọn mẹ ma penugo nado mọ adọtẹn na nugopọntọ lẹdo tọn he yin tlẹnnọ de. Olaf kanse mẹjitọ etọn he ma yin Kunnudetọ lẹ eyin nugopọntọ lẹdo tọn lọ sọgan nọ owhé yetọn gbè. Yé yigbe, ṣigba bo dọ dọ Olaf na tin to dandannu glọ nado dọ́ oján gaa de mẹ. Tito enẹ hẹn ale susu lẹ wá. Olaf flin dọmọ: “Osẹ ayidego tọn de wẹ! Yẹn po nugopọntọ lẹdo tọn po nọ yawu fọ́n to afọnnu lẹpo bo nọ dọhodo hosọ ojlofọndotenamẹ tọn susu lẹ ji to núdùdù afọnnu tọn whenu. Tulinamẹ he n’mọyi lọ whàn mi nado bẹ sinsẹ̀nzọn whenu-gigọ́ tọn jẹeji.” To owhe 40 he wayi lẹ gblamẹ, Olaf ko sẹ̀n to azọ́ndenamẹ mẹdehlan tọn voovo lẹ mẹ.

8. Whẹwhinwhẹ́n tẹlẹ wẹ mí tindo nado nọ do homẹdagbe hia eyin to tintan whenu etlẹ taidi dọ yè ma yọ́n pinpẹn etọn? Na apajlẹ.

⁸ A sọgan do owanyi hia jonọ lẹ to aliho susu mẹ, eyin yé ma tlẹ yọ́n pinpẹn vivẹnudido towe lẹ tọn to tintan whenu. Lẹnnupọndo apajlẹ ehe ji. To whenue wẹnlatọ de to Espagne to anadena plọnmẹ Biblu de, e doayi e go dọ nuplọntọ emitọn Yesica he wá sọn Équateur, to avivi mapote. Wẹnlatọ lọ kanse e nuhewutu e do to avivi. Yesica dọ dọ, whẹpo emi do sẹtẹn, emi jẹhẹ́n sọmọ bọ to gbèdopo emi ma do núdùdù depope. Nuhe e do nado na viyọnnu etọn ma hugan osin. Dile Yesica to tintẹnpọn nado tẹ́ ovi etọn, e hodẹ̀ nado biọ alọgọ. Ojlẹ kleun de to enẹgodo, Kunnudetọ awe wá dla ẹ pọ́n, ṣigba Yesica ma jọmẹ hẹ yé bo vún linlinnamẹwe he mẹmẹyọnnu lọ lẹ na ẹn. E kanse dọmọ: “Be ehe wẹ n’na na viyọnnu ṣie bọ e na dù a?” Mẹmẹyọnnu lọ lẹ dovivẹnu nado miọnhomẹna ẹn, amọ́ e ma pà yé. To enẹgodo, mẹmẹyọnnu lọ lẹ ze ohà he mẹ núdùdù tin te de do ohọ̀n etọn ji. Homẹdagbe yetọn yinuwado Yesica ji, podọ e wá vẹna ẹn to whenue e flindọ emi dovọ́na gblọndo he Jiwheyẹwhe na na odẹ̀ emitọn. Ṣigba todin, ewọ ko magbe nado sẹ̀n Jehovah. Lehe alọtútlú yetọn hẹn kọdetọn dagbe wá do sọ!—Yẹwh. 11:1, 6.

NỌ ZE DEWE JO NA TITO YẸWHEHỌLUDUTA TỌN LẸ

9, 10. (a) To ojlẹ Biblu tọn lẹ mẹ, nujijọ tẹlẹ whenu wẹ nuhudo mẹdezejotọ lẹ tọn tin te to omẹ Jiwheyẹwhe tọn lẹ ṣẹnṣẹn? (b) To egbehe, etẹwẹ yin delẹ to nuhudo he go sunnu mẹdezejotọ lẹ nọ penukundo to paa mẹ to agun mẹ lẹ mẹ?

⁹ Nuhudo mẹdezejotọ lẹ tọn tin to ojlẹ voovo lẹ mẹ to whenuho Islaeli hohowhenu tọn mẹ. (Eks. 36:2; 1 Otàn. 29:5; Nẹh. 11:2) To egbehe, hiẹ lọsu tindo dotẹnmẹ hundote susu nado yí whenu, nutindo po nugopipe towe lẹ po zan nado gọalọna mẹmẹsunnu po mẹmẹyọnnu towe lẹ po. Podọ eyin a nọ ze dewe jo, a na mọ ayajẹ mayọnjlẹ po dona susu po yí.

¹⁰ Ohó Jiwheyẹwhe tọn dotuhomẹna sunnu lẹ nado wazọ́n dopọ hẹ Jehovah to agun mẹ gbọn vivẹnudido nado pegan na lẹblanulọkẹyi sinsẹ̀nzọn tọn po anadenanu tọn lẹ po dali. (1 Tim. 3:1, 8, 9; 1 Pita 5:2, 3) Mẹhe nọ wàmọ lẹ nọ jlo na gọalọna mẹdevo lẹ to whẹho agbasa tọn po gbigbọmẹ tọn lẹ po mẹ. (Owalọ 6:1-4) Be mẹho agun tọn lẹ ko kanse we pọ́n eyin e na jlo we nado yin aisinnunamẹtọ kavi gọalọ nado penukundo linlinnamẹwe lẹ, aigba-denamẹ, plitẹnhọ po mọmọ po sọyi go ya? Mẹhe nọ penukundo azọ́n mọnkọtọn lẹ go na dọna we dọ alọgigọna mẹdevo lẹ nọ hẹn awuvivi wá taun.

Mẹmẹyọnnu awe wazọ́n dopọ to tito yẹwhehọluduta tọn de mẹ bo lẹzun họntọn — Mẹdezizejo nado gọalọ to tito yẹwhehọluduta tọn lẹ mẹ nọ hùn dotẹnmẹ lẹ dote nado jihọntọn yọyọ lẹ (Pọ́n hukan 11tọ)

11. Nawẹ mẹmẹyọnnu de mọaleyi sọn mẹhe e jihọntọn hẹ to tito yẹwhehọluduta tọn lẹ whenu lẹ dè gbọn?

¹¹ Mẹhe nọ ze yede jo na tito yẹwhehọluduta tọn lẹ nọ saba jihọntọn yọyọ lẹ. Lẹnnupọndo apajlẹ Margie tọn ji, yèdọ mẹmẹyọnnu de he wazọ́n na owhe 18 to tito Plitẹnhọ Ahọluduta tọn gbigbá tọn lẹ mẹ. To owhe lẹ gblamẹ, ewọ ko dọ̀n mẹmẹyọnnu jọja susu dogo nado na yé azọ́nplọnmẹ. E ko mọdọ dotẹnmẹ enẹlẹ yin aliho dagbe de nado na tuli ode awetọ to gbigbọ-liho. (Lom. 1:12) To ojlẹ whlepọn tọn lẹ mẹ to gbẹzan Margie tọn mẹ, ewọ mọ homẹmiọnnamẹ yí sọn mẹhe e jihọntọn hẹ to tito họ̀gbigbá tọn whenu lẹ dè. Be a ko ze dewe jo na tito họ̀gbigbá tọn mọnkọtọn de pọ́n ya? Vlavo a tindo nugopipe kavi lala, be a sọgan ze dewe jo ya?

12. Nawẹ a sọgan gọalọ to nugbajẹmẹji de godo gbọn?

¹² To whenue nugbajẹmẹji lẹ jọ, dotẹnmẹ nọ hundote na omẹ Jiwheyẹwhe tọn lẹ nado wazọ́n dopọ hẹ ewọ gbọn alọgigọna mẹmẹsunnu yetọn lẹ to aliho yọ́n-na-yizan lẹ mẹ dali. Di apajlẹ, yé nọ gọalọna mẹhe adán gbò lẹ to akuẹzinzan-liho. (Joh. 13:34, 35; Owalọ 11:27-30) Aliho yọ́n-na-yizan devo wẹ nado bẹ nuhe gble lẹ sẹ̀ kavi vọ́ ohọ̀ devo lẹ gbá. Gabriela, yèdọ mẹmẹyọnnu de he wá sọn Pologne jaya taun whenue mẹmẹsunnu he tin to agun he to yakẹ lẹ mẹ lẹ wá gọalọna ẹn to whenue jikun sinsinyẹn de hẹn owhé etọn gble godo. E dọmọ: “N’ma jlo na dọho gando nuhe n’hẹnbu lẹ go, onú agbasa tọn lẹ poun wẹ yé yin. Kakatimọ, n’na dọhona mì gando ale susu he n’ko mọyi lẹ go. Numimọ ehe vọ́ jide na mi dọ, nado yin apadewhe agun Klistiani tọn yin lẹblanulọkẹyi vonọtaun de bosọ yin asisa ayajẹ nujọnu tọn de tọn.” Susu mẹhe mọ alọgọ yí to nugbajẹmẹji de godo lẹ tọn wẹ mọdọ numimọ enẹ wà dagbe na emi taun. Podọ mẹhe nọ wazọ́n dopọ hẹ Jehovah nado gọalọ to aliho mọnkọtọn mẹ lẹ lọsu nọ duvivi ayajẹ daho tọn.—Hia Owalọ lẹ 20:35; 2 Kọlintinu lẹ 9:6, 7.

13. Nawẹ mẹdezizejo sọgan hẹn haṣinṣan mítọn hẹ Jehovah lodo gbọn? Na apajlẹ.

¹³ Stephanie po wẹnlatọ devo lẹ po duvivi ayajẹ he azọ́nwiwa dopọ hẹ Jiwheyẹwhe nọ hẹnwa tọn to whenue yé gọalọna Kunnudetọ he wá États-Unis taidi fibẹtado-dintọ lẹ. Yé gọalọ nado dín owhé na whẹndo he sẹtẹn sọn lẹdo he mẹ awhàn ko gbànú te taun lẹ. Stephanie dọmọ: “Ayajẹ po pinpẹn-nutọn-yinyọnẹn yetọn po whàn mí taun dile yé to vivi owanyi pipli mẹmẹsunnu lẹdo aihọn pé tọn dù.” E yidogọ dọ, “Whẹndo lọ lẹ lẹndọ mí gọalọna yé, ṣigba nado dọ hójọhó, yewlẹ wẹ gọalọna mí hugan. Na nugbo tọn, owanyi, pọninọ, yise, gọna jidide do Jehovah go he mí yí nukun mítọn lẹ do mọ ko hẹn owanyi mítọn na Jehovah sinyẹn deji, podọ ehe zọ́n bọ pinpẹn-nutọn-yinyọnẹn mítọn jideji na nuhe mí ko mọyi gbọn titobasinanu etọn gblamẹ lẹpo.”

GBLOADA NA LIZỌNYIZỌN TOWE

14, 15. (a) Pọndohlan tẹwẹ yẹwhegán Isaia dohia? (b) Nawẹ wẹnlatọ Ahọluduta lọ tọn lẹ sọgan do pọndohlan Isaia tọn nkọ hia gbọn?

¹⁴ Be e na jlo we nado wazọ́n dopọ hẹ Jehovah dogọ ya? Be a na jlo nado sẹtẹn nado yì sẹ̀n to fie nuhudo azọ́nwatọ lẹ tọn sù te to titobasinanu etọn mẹ de ya? Na nugbo tọn, e ma biọ dọ devizọnwatọ Jiwheyẹwhe tọn lẹ ni sẹtẹn yì fie dẹn do whé nado do alọtútlú yetọn hia. Ṣigba, ninọmẹ mẹmẹsunnu po mẹmẹyọnnu delẹ po tọn nọ na yé dotẹnmẹ nado ze yede jo nado yì sẹ̀n to fie dẹn taun lẹ. Pọndohlan yetọn taidi dehe yẹwhegán Isaia tindo. To whenue Jehovah kanse dọ, “Mẹnu wẹ yẹn na dohlan, podọ mẹnu wẹ na yì na mí?” e gblọn dọmọ: “Yẹn die! Do mi hlan!” (Isa. 6:8) Be a tindo ojlo po dotẹnmẹ hundote lẹ po nado ze dewe jo to aliho dopolọ mẹ to adà yẹwhehọluduta tọn he mẹ nuhudo tin te lẹ ya? Nuhudo tẹlẹ wẹ tin?

¹⁵ Jesu dọ gando yẹwhehodidọ po azọ́n mẹhẹnzun devi tọn lọ po go dọmọ: “Ojijẹ lọ sù, ṣigba azọ́nwatọ lẹ ma sù. Enẹwutu, mì vẹ̀ Ogán jibẹwawhé lọ tọn nado do azọ́nwatọ lẹ hlan ojijẹ etọn mẹ.” (Mat. 9:37, 38) Be a sọgan sẹ̀n to aigba-denamẹ he ji nuhudo sù te de, vlavo taidi gbehosọnalitọ ya? Kavi be a sọgan gọalọna mẹdevo de nado wàmọ ya? Mẹmẹsunnu po mẹmẹyọnnu susu po ko mọdọ aliho dagbe hugan nado do owanyi na Jiwheyẹwhe podọ na kọmẹnu mítọn hia wẹ nado yin gbehosọnalitọ to aigba-denamẹ he ji nuhudo jibẹwawhétọ tọn sù te lẹ. Be a sọgan lẹnnupọndo aliho devo lẹ ji nado yidogọna kavi gbloada na sinsẹ̀nzọn towe ya? Mọwiwà nọ hẹn ayajẹ daho wá.

16, 17. Dotẹnmẹ hundote devo tẹlẹ wẹ tin eyin a jlo na gbloada na azọ́n he a nọ wà na Jehovah?

¹⁶ Be e na jlo we nado sẹ̀n to Bẹtẹli kavi gọalọ to ohọ̀ yẹwhehọluduta tọn de gbigbá mẹ, vlavo taidi azọ́nwatọ ojlẹ gli tọn kavi whenu-gigọ́ tọn de ya? Nuhudo mẹhe sọgan sẹ̀n Jehovah to fidepope he yé yin azọ́ndena do kavi to azọ́ndenamẹ depope mẹ lẹ tọn gbẹ́ tin. E sọgan yin nado penukundo azọ́n he biọ azọ́nyinyọnẹn tangan de go, eyin yé tlẹ tindo nugopipe kavi numimọ to azọ́n devo de mẹ. Etomọṣo, Jehovah nọ yọ́n pinpẹn gbigbọ mẹde-yido-sanvọ́ tọn he mẹhe nọ ze yede jo nado sẹ̀n to fidepope he nuhudo tin te lẹ nọ dohia tọn.—Salm. 110:3.

¹⁷ Be e na jlo we nado mọ azọ́nplọnmẹ yí nado pegan dogọ to sinsẹ̀nzọn wiwe towe mẹ ya? Eyin mọ wẹ, a sọgan pegan nado yì Wehọmẹ Wẹndagbe-Jlatọ Ahọluduta lọ Tọn lẹ tọn. Wehọmẹ ehe nọ plọnazọ́n mẹmẹsunnu po mẹmẹyọnnu gbigbọnọ he to sinsẹ̀nzọn whenu-gigọ́ tọn mẹ lẹ po nado yí yede zan dogọ na tito yẹwhehọluduta tọn lẹ to aigba-denamẹ lọ ji. Mẹhe nọ doalọwemẹ nado yì wehọmẹ ehe lẹ dona wleawufo nado kẹalọyi azọ́ndenamẹ depope to whenue yé yí gbedewema. Be e na jlo we nado yí dotẹnmẹ hundote ehe zan nado dovivẹnu bo pegan na lẹblanulọkẹyi sinsẹ̀nzọn tọn devo lẹ ya?—1 Kọl. 9:23.

18. Etẹwẹ a sọgan donukun eyin a nọ wazọ́n dopọ hẹ Jehovah egbesọegbesọ?

¹⁸ Taidi omẹ Jehovah tọn lẹ, mí nọ yin whinwhàn nado yí alọtútlú do gọalọna mẹdevo lẹ egbesọegbesọ. Podọ, ehe nọ do dagbewà, homẹdagbe po owanyi mítọn po hia. Mọwiwà nọ hẹn ayajẹ nujọnu tọn po jijọho po wá na mí. (Gal. 5:22, 23) Depope he ninọmẹ towe lẹ na yin, a sọgan tindo ayajẹ eyin a nọ hodo apajlẹ alọtútlú Jehovah tọn, podọ eyin a yin dopo to azọ́nwatọ hatọ vivẹ́ etọn lẹ mẹ!—Howh. 3:9, 10.