Nugbo lọ Gando Sọgodo Go

Jesu basi zẹẹmẹ lehe mí na wagbọn do “yọnẹn dọ Ahọluduta Jiwheyẹwhe tọn ko sẹpọ” tọn. (Luku 21:31) E dọ dọdai dọ delẹ to nuhe na do ehe hia lẹ mẹ wẹ awhàn, aigba sisọsisọ daho, núdùdù whèdomẹ po azọ̀nylankan lẹ po, bọ onú ehelẹ ko to adusi po amiyọn po to egbehe.—Luku 21:10-17.

Humọ, Biblu sọ dohia dọ dopo to nuhe na dohia dọ gandudu gbẹtọvi lẹ tọn ko to “azán godo tọn lẹ” mẹ wẹ walọ ylankan gbẹtọ lẹ tọn. Hiẹ lọsu gán hia zẹẹmẹ lọ to 2 Timoti 3:1-5 mẹ. Eyin a to walọ po nuyiwa ehelẹ po mọ to egbehe, be e họnwun dọ dọdai ehe wẹ to hẹndi mọ.

Etẹwẹ na bọdo ehe go? To madẹnmẹ, Ahọluduta Jiwheyẹwhe tọn na hẹn diọdo lẹ wá nado hẹn gbẹzan gbẹtọvi lẹ tọn pọnte. (Luku 21:36) To Biblu mẹ, Jiwheyẹwhe dopagbe onú dagbe lẹ tọn na aigba po mẹhe to e ji lẹ po. Pọ́n vude to yé mẹ.

GANDUDU DAGBE

“Yè sọ yí gandudu, gbégbò po ahọluduta de po na [Jesu], na gbẹtọ lẹ, akọta lẹ po akọ̀ lẹpo po nido nọ wadevizọn na ẹn. Gandudu madopodo de wẹ gandudu etọn bo ma na juwayi, ahọluduta etọn ma nasọ yin vivasudo.”​—DANIẸLI 7:14.

Nuhe ehe zẹẹmẹdo: A gán duvivi ogbẹ̀ tọn to gandudu dagbe lẹdo aihọn pé de glọ, ehe Jiwheyẹwhe ko de Visunnu etọn taidi Ahọlu etọn.

AGBASALILO

“Depope to mẹhe nọ nọ̀ aigba lọ ji lẹ mẹ ma na dọmọ: ‘N’to azọ̀njẹ.’”​—ISAIA 33:24.

Nuhe ehe zẹẹmẹdo: A ma na jẹazọ̀n kavi lẹzun madogánnọ gbede ba; a na nọgbẹ̀ kakadoi bo ma na kú.

JIJỌHO PETEPETE

“Ewọ to awhàn hẹnwa opodo lẹdo aigba pé.”​—SALMU LẸ 46:9.

Nuhe ehe zẹẹmẹdo: Awhàn ma na tin ba, gọna yajiji he e nọ hẹnwa lẹpo.

MẸDAGBE LẸ KẸDẸ WẸ NA GỌ́ AIGBA JI

“Mẹylankan lẹ ma na tin ba . . . Homẹmimiọnnọ lẹ wẹ na dugu aigba tọn.”​—SALMU LẸ 37:10, 11.

Nuhe ehe zẹẹmẹdo: Mẹylankan de ma na tin ba, adavo mẹhe nọ setonuna Jiwheyẹwhe lẹ kẹdẹ.

AIGBA PETE NA LẸZUN PALADISI

“Yé na gbá ohọ̀ lẹ bo nasọ nọ nọ̀ yé mẹ, yé na do vẹngle lẹ bo nasọ nọ dù sinsẹ́n yetọn.”—ISAIA 65:21, 22.

Nuhe ehe zẹẹmẹdo: Aigba pete na yin didiọ zun fihe yọnwhanpẹ. Jiwheyẹwhe na hẹn odẹ̀ he mí nọ hò dọ ojlo etọn ni yin wiwà “to aigba ji” lọ di.—Matiu 6:10.