Do Lehe Plọnmẹ Biblu Nọ Yin Bibasi Do Hia to Dlapọn Tintan Whenu
To whenue plọnmẹ Biblu yin zizedonukọnna whétọ delẹ, yé nọ dọ dọ emi ma tindo ojlo kavi dọ yé ko tindo plọnmẹ Biblu to ṣọṣi yetọn mẹ. To whenuena e yindọ numimọ he yé tindo wayi lẹ kẹdẹ wẹ yé sọgan yijlẹdo Biblu pinplọn go, yé ma yọ́n nukunnumọjẹnumẹ po awuvivi he e sọgan hẹnwana yé po. Enẹwutu, kakati nado ze tito Biblu pinplọn tọn donukọnnamẹ poun, naegbọn hiẹ ma na yí nukunwhiwhe delẹ zan nado do nuhe tito Biblu pinplọn tọn yin hia to dlapọn tintan whenu? Di apajlẹ: Ma dọna gbẹtọ lẹ poun dọ nudàtọ dagbe de wẹ a yin bo yidogọ dọ a na hẹn núdùdù de wá na yé to whedevonu blo; na yé nude nado dọ́pọ́n to afọdopolọji! Hiẹ sọgan wà enẹ to nukunwhiwhe vude mẹ, gbọn ayinamẹ he tin to weda 6 Lizọnyizọn Ahọluduta Tọn Mítọn février 2006 tọn mẹ lẹ hihodo dali, di apajlẹ:
“Be hiẹ lẹndọ ai de na họ́n to gbèdopo bọ hogbe ehelẹ na mọ hẹndi ya? [Hia Isaia 33:24, bo jotẹnna gblọndo.] Gbọ ma do ojlofọndotenamẹnu de he sinai do hosọ lọ ji hia we.” Yí vọkan owe Biblu Plọn Mí tọn dopo na whétọ lọ bo do hukan 22tọ hia ẹ to weda 36 ji. Hia kanbiọ he tin to odò weda lọ tọn bo biọ to whétọ lọ si nado dín gblọndo lọ dile hiẹ to hukan lọ hia. Enẹgodo, vọ́ kanbiọ lọ kanse bo dotoaina gblọndo whétọ lọ tọn. Hia dopo to wefọ devo lẹ mẹ dopọ hẹ ẹ. Fọ́n kanbiọ he a na na gblọndo etọn to dlapọn he bọdego whenu dote bo basi tito dagbe nado lẹkọyi. Hiẹ ko bẹ plọnmẹ Biblu de jẹeji niyẹn!