Lehe Mí Na Plọn Mẹyọyọ lẹ Nado Dọyẹwheho Do
1. Etẹwẹ yin numọtolanmẹ towe whla tintan he a tindo mahẹ to lizọnyizọn lọ mẹ?
1 Be hiẹ flin whla tintan he a tindo mahẹ to lizọnyizọn whédegbè jẹ whédegbè tọn mẹ ya? Matin ayihaawe, obu di we taun. Eyin mẹhe plọn Biblu hẹ we kavi wẹnlatọ devo wẹ a wazọ́n hẹ, ayihaawe matin dọ homẹ towe hùn nado mọdọ ewọ gọalọna we. Todin he a ko yin lizọnyizọnwatọ numimọnọ de, hiẹ sọgan plọnazọ́n mẹyọyọ lẹ nado dọyẹwheho.
2. Etẹwẹ wẹnlatọ yọyọ lẹ dona plọn?
2 Wẹnlatọ yọyọ lẹ dona plọn lehe yé na bẹ hodọdopọ de jẹeji hẹ whétọ de do, lehe yé na yí Biblu zan to ohọ̀n lẹ kọ̀n do, lehe yé na basi gọyìpọn lẹ do podọ lehe yé na bẹ plọnmẹ Biblu de jẹeji bo deanana ẹn do. Yé sọ dona plọn lehe yé na tindo mahẹ to adà voovo yẹwhehodidọ tọn lẹ mẹ do, taidi kunnudide to aliho ji podọ yẹwhehodidọ na gbẹtọ lẹ to nọtẹn ajọwiwa tọn lẹ. Hiẹ dona gọalọna yé nado yọ́n azọ́n to adà enẹlẹ mẹ gbọn apajlẹ towe po ayinamẹ towe lẹ po dali.
3. Nawẹ mí sọgan gọalọna mẹdevo lẹ gbọn apajlẹ mítọn dali gbọn?
3 Nọ Plọnmẹ Gbọn Apajlẹ Dali: Jesu dohia devi etọn lẹ lehe yé na dọyẹwheho do. (Luku 8:1; 1 Pita 2:21) Eyin a basi tito nado wazọ́n dopọ hẹ wẹnlatọ yọyọ de, wleawuna nuzedonukọnnamẹ he bọawu de he wẹnlatọ lọ sọgan hodo apajlẹ etọn, vlavo gbọn dopo to nuzedonukọnnamẹ he tin to owe mítọn lẹ mẹ yiyizan dali. Enẹgodo, wleawufo nado dọho to họntonu tintan kavi awetọ na wẹnlatọ lọ nido sọgan sè nuhe a dọ lẹ. Dile mì to zọnlinzin jei ohọ̀n devo lẹ kọ̀n, hiẹ sọgan nọ kanse wẹnlatọ lọ nado dọhodo lehe nuzedonukọnnamẹ towe tindo kọdetọn dagbe do ji. Ehe na gọalọna ẹn nado yọ́n pinpẹn azọ́nwiwa dopọ hẹ mẹdevo lẹ tọn bo na hẹn ẹn bọawuna ẹn nado kẹalọyi ayinamẹ depope he a na na ẹn to nuzedonukọnnamẹ etọn godo.
4. Nawẹ mí sọgan gọalọna wẹnlatọ de to whenue mí dotoaina nuzedonukọnnamẹ etọn godo gbọn?
4 Nọ Na Ayinamẹ: Jesu lọsu na anademẹ devi etọn lẹ gando lehe yé na dọyẹwheho do go. (Mat. 10:5-14) Hiẹ sọgan gọalọna wẹnlatọ yọyọ de to aliho dopolọ mẹ. Eyin wẹnlatọ yọyọ lọ wẹ to hodọ, yí sọwhiwhe do dotoaina ẹn. Enẹgodo, eyin mì tọ́n sọn ohọ̀n lọ kọ̀n godo, yí ahundopo do pà ẹ do adà dagbe lẹ ji, ni etlẹ yindọ a doayi adà nuzedonukọnnamẹ etọn delẹ go he biọ vọjlado. Whẹpo a na na ẹn ayinamẹ, hiẹ sọgan de nado pọ́n eyin e na wà dagbe to adà enẹ mẹ to ohọ̀n devo kọ̀n. Vlavo obu wẹ di i dai. Sọ flindọ, wẹnlatọ lẹ ma tindo nugopipe dopolọ, podọ aliho he sọgbe susu mẹ wẹ yè sọgan wà nude te.—1 Kọl. 12:4-7.
5. Etẹwẹ mí sọgan dọ to whenue mí ze afọdide tintan nado na ayinamẹ?
5 To whedelẹnu wẹnlatọ yọyọ de sọgan kàn ayinamẹ biọ we. Ṣigba eyin e ma wàmọ, ze afọdide tintan nado gọalọna ẹn. Nawẹ hiẹ sọgan yí zinzin do wà ehe gbọn? Wẹnlatọ numimọnọ delẹ nọ kanse poun dọ, “Jaale, dike ma na we ayinamẹ de” kavi, “Nawẹ a mọ nuzedonukọnnamẹ towe do?” Aliho devo wẹ nado dọ, “to whenue n’yin wẹnlatọ yọyọ de, e nọ vẹawuna mi nado . . . , ṣigba n’mọdọ ehe wiwà gọalọna mi. . . .” To whedelẹnu, e nọ yin alenu nado gbadopọnna alọnuwe lọ Zindonukọn to Hodọdopọ Biblu Tọn lẹ Mẹ dopọ. Na ayinamẹ do adà nuzedonukọnnamẹ etọn dopo ji, na hiẹ nikaa hẹn ẹn jẹflumẹ.
6. Na nuhe dù lizọnyizọn lọ, nawẹ ‘ogàn nọ gàn ogàn’ gbọn?
6 Ogàn Nọ Gàn Ogàn: Paulu na tuli Timoti, he yin wẹndagbe-jlatọ numimọnọ de nado zindonukọn bo jo ede na mẹpinplọn podọ nado basi nukọnyiyi. (1 Tim. 4:13, 15) Dile etlẹ yindọ owhe susu ko juwayi sọn whenue gbọ́n hiẹ tọ́n to tintan whenu na lizọnyizọn lọ, hiẹ dona zindonukọn nado nọ hẹn azọ́nyinyọnẹn towe lẹ pọnte dogọ. Plọnnu sọn wẹnlatọ he hiẹ nọ dọyẹwheho hẹ lẹ dè, etlẹ yin sọn mẹhe ma tindo numimọ sọmọ to lizọnyizọn lọ mẹ lẹ dè, podọ nọ tin to aṣeji nado gọalọna mẹdevo lẹ po homẹdagbe po, titengbe mẹyọyọ lẹ, na yé nido lẹzun lizọnyizọnwatọ he yọ́n azọ́n to wẹndagbe lọ lilá mẹ.—Howh. 27:17.