Anademẹ Na Mẹhe Tindo Azọ́n to Opli Sinsẹ̀nzọn Tọn Whenu Lẹ

Bẹsọn zinjẹgbonu Lizọnyizọn Ahọluduta Tọn Mítọn ehe ji, hogbe he nọ yin yiyizan to tito-to-whinnu Opli Sinsẹ̀nzọn tọn mẹ lẹ yin sinsán dogli. Anademẹ po nuflinmẹ he bọdego ehelẹ po na diọ bo hẹn nuhe yin didọ to hosọ lọ “Lehe Mí Na Wleawuna Opli Sinsẹ̀nzọn Tọn Do” mẹ to Lizọnyizọn Ahọluduta Tọn Mítọn mai 2009 tọn mẹ lẹ họnwun:

◼ Hodidọ: Ehe nọtena hodidọ he sinai do alọdlẹndonu azọ́ndenamẹ tọn de ji he mẹplidopọ lẹ ma na tindo mahẹ depope to e mẹ. Hodọtọ lọ dona na ayidonugo nuhe na yọ́n-na-yizan hugan na agun lọ.

◼ Kanbiọ po Gblọndo Po: Taidi Oplọn Atọ̀họ̀-Nuhihọ́ lọ Tọn, adà ehe bẹ homẹbibiọ po tadonahó kleun de po hẹn, podọ kanbiọ lẹ nọ yin kinkanse do hukan lẹpo ji. Mẹhe to anadena adà ehe dona dapana yidogọ bibasi zẹjlẹgo. Wefọ tangan lẹ sọgan yin hihia dile whenu na dotẹnmẹ etọn do. Hukan lẹ ma dona yin hihia adavo anademẹ yin nina nado wàmọ.

◼ Hodọdopọ: Hodidọ de wẹ ehe yin he nọ bẹ mahẹ tintindo mẹdelẹ tọn sọn mẹplidopọ lẹ mẹ hẹn. E ma yin hodidọ de poun, podọ e masọ yin kanbiọ po gblọndo po.

◼ Wadohia po Hokansemẹ Po: Anademẹ lọ nado basi wadohia zẹẹmẹdo dọ mẹmẹsunnu he adà lọ yin didena dona basi tito na wadohia de; he ewọ lọsu ma dona basi. Mẹhe e de nado gọalọna ẹn lẹ dona pegan bo yin apajlẹ dagbenọ, podọ e dona basi tito hẹ yé whenu susu jẹnukọn eyin e yọnbasi. E na yọ́n hugan ma nado zan wẹnlatọ yọyọ he ma tindo numimọ lẹ nado basi wadohia lehe azọ́n lọ na yin wiwà do tọn, kiki nado na yé dotẹnmẹ nado hẹ oplò ji poun, ṣigba delẹ to yé mẹ sọgan yin yiyizan taidi whétọ. Wẹnlatọ he to wadohia nuzedonukọnnamẹ tọn basi lẹ dona pannukọn mẹplidopọ lọ. Mẹhe yin yiyizan na hokansemẹ lẹ dona dọho sọn oplò ji, e ma yin sọn aisinnu yetọn ji. Wadohia po hokansemẹ po dona yin zizepọn jẹnukọn. Eyin gànmẹ opli lọ tọn ko yì bọ mẹmẹsunnu de dona sán adà etọn dogli, e ma dona de wadohia kavi hokansemẹ lẹ sẹ̀. Devizọnwatọ lizọnyizọnwiwa tọn lẹ dona dọho hẹ anadenanutọ to pipli mẹho lẹ tọn mẹ kavi mẹho devo whẹpo do de mẹhe e na yizan lẹ.

Na nuhe dù adà he tindo anademẹ vonọtaun lẹ, yé dona yin hihodo po sọwhiwhe po. Eyin mẹmẹsunnu lẹ wazọ́n yetọn to Opli Sinsẹ̀nzọn tọn whenu sọgbe hẹ nudọnamẹ he tin to aga lẹ, yé na yidogọna Opli Sinsẹ̀nzọn tọn he ‘yin bibasi dile e jẹ do podọ to titoji.’—1 Kọl. 14:40.