Awuwiwlena Hodidọ lẹ Na Agun

TITO-TO-WHINNU Wehọmẹ Lizọnyizọn Yẹwhehọluduta tọn yin awuwlena nado hẹn ale wá na agun lọ blebu. Nudọnamẹ họakuẹ sọ nọ yin zizedonukọnnamẹ to opli agun tọn devo lẹ ji gọna plidopọ lẹ po plidopọ agbegbe tọn lẹ po. Eyin adà de yin didena we to tito-to-whinnu ehelẹ dopo ji, azọngban pinpẹn de wẹ yin nina we. Apọsteli Paulu dotuhomẹna Timoti heyin nugopọntọ Klistiani de nado nọ payi mẹpinplọn etọn go whepoponu. (1 Tim. 4:16) Mẹhe nọ tin to pipli Klistiani tọn tẹnmẹ lẹ ko klan ojlẹ he họakuẹ dovo—podọ mẹdelẹ ko dovivẹnu susu—nado wá nado mọ anademẹ yí to whẹho he gando haṣinṣan yetọn hẹ Jiwheyẹwhe go lẹ mẹ. Na nugbo tọn anademẹ mọnkọtọn nina yin lẹblanulọkẹyi daho de! Nawẹ hiẹ sọgan penukundego ganji gbọn?

Nuagokun lẹ sọn Biblu Hihia Mẹ

Adà wehọmẹ lọ tọn ehe yin zize sinai do Biblu hihia heyin didena osẹ lọ ji. Lehe nudọnamẹ lọ gando mí go to egbehe do dona yin nùzindeji. Dile Nẹhemia 8:8 dọ do, Ẹzla po gbẹdohẹmẹtọ etọn lẹ po nọ hia Ohó Jiwheyẹwhe tọn to gbangba, nọ basi zẹẹmẹ etọn, ‘bo nọ detana ẹn,’ bosọ nọ namẹ nukunnumọjẹnumẹ do e ji. Nukunpipedo bladopọ Biblu tọn lẹ go nọ na we dotẹnmẹ hundote lọ nado wàmọ ga.

Nawẹ hiẹ dona wleawuna azọ́ndenamẹ mọnkọtọn gbọn? Eyin e yọnbasi, hia weta Biblu tọn heyin didenamẹ lọ to osẹ dopo kavi humọ jẹnukọn. Enẹgodo lẹnnupọndo agun towe po nuhudo etọn lẹ po ji. Hodẹ̀ dogbọn dali etọn. Ayinamẹ tẹ, apajlẹ tẹlẹ, nunọwhinnusẹ́n tẹlẹ to adà Ohó Jiwheyẹwhe tọn ehe mẹ wẹ na hẹn pekọ wá na nuhudo enẹlẹ?

Dodinnanu yin dandannu. Be Watchtower Library to CD-ROM ji kavi Index des publications de la Société Watch Tower tin to ogbè he hiẹ sè de mẹ ya? Eyin e ma tin, hiẹ sọgan yí alọdlẹndonu hosọ tọn to vivọnu owhe tọn zan ganji to Atọ̀họ̀-Nuhihọ́ Lọ Tọn mẹ. Gbọn dodinna nuhe ko yin zinzinjẹgbonu do wefọ he hiẹ ko de nado na ayidonugo lẹ ji dali, hiẹ sọgan mọ nudọnamẹ dodonu tọn he họnwun, zẹẹmẹ hẹndi dọdai lẹ tọn, dogbapọnnanu nuhe wefọ delẹ dohia gando Jehovah go, kavi hodọdopọ do nunọwhinnusẹ́n lẹ ji. Ma tẹnpọn nado dọhodo nuagokun susu ji blo. Ze ayidonugo do wefọ taun taun vude poun ji. E pọnte hugan nado dọhodo wefọ vude ji bo wà ẹ ganji.

Azọ́ndenamẹ towe sọgan sọ biọ dọ hiẹ ni kanse mẹplidopọ lẹ nado basi zẹẹmẹ do lehe yé ko mọaleyi sọn Biblu hihia osẹ lọ tọn mẹ do ji. Etẹwẹ yé mọ he na hẹn ale wá na yé to oplọn mẹdetiti tọn po whẹndo tọn yetọn po mẹ kavi to lizọnyizọn yetọn kavi aliho gbẹninọ tọn yetọn mẹ? Jẹhẹnu Jehovah tọn tẹlẹ wẹ yin didohia to nuyiwa etọn hẹ gbẹtọ lẹ po akọta lẹ po mẹ? Etẹwẹ mẹplidopọ lẹ plọn he hẹn yise yetọn lodo bo wleawuna pinpẹn-nutọn-yinyọnẹn na Jehovah? Ma tẹdo nuagokun he doglẹ lẹ go blo. Zinnudo zẹẹmẹ po nuhọakuẹ yọn-na-yizan nuagokun heyin dide lẹ tọn po ji.

Anademẹhó

Ehe nọ yin zize sinai do zinjẹgbonu de ji, taidi hosọ de to Atọ̀họ̀-Nuhihọ́ Lọ Tọn kavi vlavo adà owe de tọn mẹ. To suhugan whẹho lẹ tọn mẹ nudọnamẹ nọ sù hugan na ganmẹ heyin ninamẹ lọ. Nawẹ hiẹ dona penukundo azọ́ndenamẹ lọ go gbọn? Taidi mẹplọntọ de, e mayin taidi mẹhe to dogbapọnna nudọnamẹ de poun gba. Nugopọntọ de dona “pegan nado plọnmẹ.”—1 Tim. 3:2, NW.

Bẹ awuwle towe jẹeji gbọn fihe yin didena we lọ pinplọn dali. Hia wefọ lẹ. Lẹnayihamẹpọn. Dovivẹnu nado wà enẹ ganji jẹnukọnna azán hodidọ towe tọn. Hẹn do ayiha mẹ dọ mẹmẹsunnu lẹ nọ yin tulina nado hia zinjẹgbonu he ji hodidọ towe sinai do jẹnukọn. Azọ́ndenamẹ towe mayin nado gbadopọnna ẹn kavi nado basi bladopọ etọn poun gba, ṣigba nado do lehe yè na yí ì zan do hia. Yí adà he sọgbe to owe lọ mẹ lẹ zan to aliho de mẹ he na hẹn agun lọ mọaleyi na nugbo tọn.

Kẹdẹdile ovi dopodopo tindo gbẹtọ-yinyin etọn do, agun dopodopo tindo jẹhẹnu he gbọnvo lẹ. Mẹjitọ he nọ plọnmẹ po kọdetọn dagbe po ma nọ vọ́ osẹ́n walọ dagbe tọn lẹ dọ na ovi etọn poun gba. E nọ yihojlẹdohogo hẹ ovi lọ. E nọ ze gbẹtọ-yinyin ovi lọ tọn po nuhahun he ovi lọ to ahidihẹ lẹ po do lẹnpọn mẹ. Mọdopolọ, mẹplọntọ agun mẹ tọn lẹ nọ dovivẹnu nado yọ́n nuhudo pipli he yé to hodọna lẹ tọn bo dọhodeji. Ṣigba, mẹplọntọ he tindo wuntuntun na dapana apajlẹ he sọgan dowinyan mẹde to mẹplidopọ lẹ mẹ yiyizan. E na dlẹnalọdo dona he zọnlinzinzin to aliho Jehovah tọn ji ko hẹnwa lẹ bo na zinnudo ayinamẹ sọn Owe-wiwe mẹ he na gọalọna agun lọ nado didẹ̀ nuhahun he yé pannukọn lẹ po kọdetọn dagbe po ji.

Mẹpinplọn dagbe nọ yinuwado ahun mẹplidopọ lẹ tọn ji. E mayin nugbo lẹ didọ poun wẹ ehe nọ biọ gba, ṣigba e sọ biọ awuwiwlena pinpẹn-nutọn-yinyọnẹn na nuhe ehelẹ nọtena. E nọ biọ dọ yè ni tin to lẹnpọn nujọnu tọn mẹ na mẹhe to yinyin pinplọn lẹ. Lẹngbọhọtọ gbigbọmẹ tọn lẹ dona yọ́n apó lọ. Eyin yé gbọn owanyi dali hẹn nuhahun he omẹ voovo lẹ to pipehẹ do ayiha mẹ, yé na penugo nado dọho to aliho tulinamẹ tọn mẹ, bo do nukunnumọjẹnumẹ, lẹblanu, po awuvẹmẹ po hia.

Dile mẹplọntọ kọdetọn dagbenọ lẹ yọnẹn do, hodidọ de dona tindo yanwle tangan he họnwun de. Nudọnamẹ dona yin zizedonukọnnamẹ to aliho de mẹ bọ nuagokun tangan lẹ na họnwun bo yin finflin. Mẹplidopọ lẹ dona penugo nado flin nuagokun he yọn-na-yizan bo na yinuwado gbẹzan yetọn ji lẹ.

Opli Sinsẹ̀nzọn Tọn

To hodidọ he sinai do hosọ de ji to Lizọnyizọn Ahọluduta Tọn Mítọn mẹ nina whenu, avùnnukundiọsọmẹ lọ sọgan gbọnvo. Tofi hiẹ na mọ dọ e nọ saba yin bibiọ to hiẹ si nado basi zẹẹmẹ gigọ́ nuhe ko yin awuwlena lọ tọn na mẹplidopọ lẹ, e mayin nado de nuhe na sọgbe hugan gba. Gọalọna mẹplidopọ lẹ nado lẹnnupọndo wefọ he yin dodonu na ayinamẹ depope heyin nina lẹ ji. (Titu 1:9) To suhugan whẹho lẹ tọn mẹ, whenu ma nọ tin na nudọnamẹ dogọ lẹ gba.

To alọ devo mẹ, hiẹ sọgan yin azọ́ndena nado ze azọ́n de donukọnnamẹ he hosọ etọn matin to Lizọnyizọn Ahọluduta Tọn Mítọn mẹ. Alọdlẹndonu sọgan yin bibasi hlan hosọ Atọ̀họ̀-Nuhihọ́ Lọ Tọn de, kavi azọ́ndenamẹ lọ sọgan bẹ nudọnamẹ kleun de hẹn. E pò to hiẹ si taidi mẹplọntọ de nado gbadopọnna nuhudo agun lọ tọn lẹ to kọndopọmẹ hẹ azọ́ndenamẹ towe. Hiẹ sọgan tindo nuhudo nado yí apajlẹ kleun, tlọlọ de zan kavi dọ numimọ he sọgbe de. Flin dọ azọ́ndenamẹ towe mayin nado dọhodo hosọ lọ ji poun gba, ṣigba nado penukundego to aliho de mẹ bọ agun lọ na yin alọgọna nado basi wadotana azọ́n he Ohó Jiwheyẹwhe tọn bẹhẹn lẹ tọn bo mọ ayajẹ to mọwiwà mẹ.—Owalọ 20:20, 21.

Dile hiẹ to awuwlena azọ́ndenamẹ towe, lẹnnupọndo ninọmẹ mẹhe agun lọ bẹhẹn lẹ tọn ji. Pà yé na nuhe yé ko to wiwà. Nawẹ ayinamẹ heyin nina to owe lọ mẹ lẹ yíyí-do-yizan mẹ na hẹn kọdetọn dagbenọ-yinyin yetọn po ayajẹ yetọn to lizọnyizọn lọ mẹ po jideji gbọn?

Be azọ́ndenamẹ towe biọ wadohia kavi hokansemẹ wẹ ya? Eyin mọwẹ, e dona yin tito basina ganji jẹnukọn. Mí ni ma biọ to mẹdevo si poun nado basi tito etọn blo, na enẹ ma nọ de kọdetọn dagbe lẹ tọ́n to whepoponu gba. Eyin e yọnbasi janwẹ, basi zepọn wadohia kavi hokansemẹ lọ tọn jẹnukọnna opli-zán lọ. Hẹn ẹn diun dọ adà azọ́ndenamẹ towe tọn ehe yin nukunpedego to aliho he na hẹn nudọnamẹ he to yinyin nina lẹ họnwun mẹ nugbonugbo.

Plidopọ lẹ po Plidopọ Agbegbe Tọn lẹ Po

Mẹmẹsunnu he wleawuna jẹhẹnu gbigbọmẹ tọn dagbe lẹ bo lẹzun hodọtọ po mẹplọntọ gbangba tọn kọdetọn dagbenọ lẹ po sọgan yin azọ́ndena to nukọn mẹ nado tindo mahẹ to tito-to-whinnu plidopọ kavi plidopọ agbegbe tọn de mẹ. Na nugbo tọn ojlẹ vonọtaun wẹ ehelẹ yin na nuplọnmẹ yẹwhehọluduta tọn. Azọ́ndenamẹ mọnkọtọn sọgan yin alọnuwe-hihia de, todohukanji de, anademẹ lẹ na nupinpọn-do-plọnnu Biblu tọn po yizan egbezangbe tọn po, kavi hukan anademẹ tọn lẹ poun. Eyin hiẹ tindo lẹblanulọkẹyi lọ nado tindo mahẹ to tito-to-whinnu mọnkọtọn mẹ, yí sọwhiwhe do plọn azọ́n heyin nina we. Wazọ́n do e ji kakajẹ whenuena hiẹ mọnukunnujẹ nuhọakuẹ-yinyin etọn mẹ.

Mẹhe hodidọ alọnuwe-hihia tọn yin didena lẹ dona hia nudọnamẹ lọ debọdo-dego. Yé ma nọ diọ hogbe lẹ kavi vọ́ nudọnamẹ lọ tò gba. Yé nọ plọn ẹn nado yọ́n nuagokun tangan lẹ hezeheze podọ lehe ehelẹ yin hodọdeji do. Yé nọ plọn wehihia daga kakajẹ whenuena yé sọgan na hodidọ lọ po nùzindo linlẹn he sọgbe ji po, zohunhun, numọtolanmẹ, awuvẹmẹ, vivẹnunọ-yinyin, po nujikudo po, gọna agayiyi ogbè tọn he sọgbe na gbẹtọ susu.

Mẹmẹsunnu he hodidọ todohukanji tọn yin didena lẹ wẹ tindo azọngban lọ nado ze azọ́n yetọn donukọnnamẹ to aliho he sọgbe pẹkipẹki hẹ todohukanji lọ mẹ. Kakati nado nọ hia todohukanji lọ to hodidọ lọ whenu kavi wleawuna ẹn taidi alọnuwe-hihia de, hodọtọ lọ dona ze azọ́n lọ donukọnnamẹ tlọlọ, sọn ahun mẹ wá. Onú titengbe wẹ e yin nado payi ganmẹ heyin didenamẹ to todohukanji lọ ji go nado sọgan ze nuagokun tangan heyin didohia lẹ dopodopo donukọnnamẹ ganji. Hodọtọ lọ dona yí linlẹn po wefọ heyin dide do nuagokun lọ lẹ glọ po zan ganji. E ma dona hẹn nuagokun devo he ewọ lọsu jlo lẹ biọ e mẹ bọ nuhe tin to todohukanji lọ mẹ lẹ na wá yin jijodo gba. Na nugbo tọn, Ohó Jiwheyẹwhe tọn wẹ dodonu nuplọnmẹ lọ tọn. Azọngban mẹho Klistiani tọn lẹ wẹ nado “nọ dọyẹwheho ohó lọ tọn.” (2 Tim. 4:1, 2) Enẹwutu hodọtọ de dona na ayidonugo vonọtaun hlan wefọ he tin to todohukanji lọ mẹ lẹ—bo yihojlẹdohogo do yé ji bo basi yizan yetọn.

Ma Hẹn Onú lẹ Dọngbàn Blo

Be hiẹ nọ wadevizọn to agun he mẹ dotẹnmẹ hundote susu tin te nado dọho ya? Nawẹ hiẹ sọgan na ayidonugo he pé hlan yemẹpo gbọn? Dapana awuwiwlena adà towe lẹ to nukunwhiwhe godo tọn mẹ.

Na nugbo tọn hodidọ he nọ hẹn ale wá na agun lẹ biọ nulẹnpọn ganji jẹnukọn. Enẹwutu, wleawuna aṣa lọ nado nọ hia nudọnamẹ lọ tlolo he hiẹ mọ azọ́ndenamẹ dopodopo yí. Ehe na hẹn we penugo nado lẹnayihamẹpọndeji dile hiẹ to nukunpedo nuwiwa devo lẹ go. To gblagbla azán kavi osẹ lẹ tọn mẹ whẹpo hiẹ nado na hodidọ towe, hiẹ sọgan sè zẹẹmẹ he na gọalọna we nado mọ lehe nudọnamẹ lọ sọgan yin yiyizan to aliho dagbe hugan mẹ do. Ninọmẹ lẹ sọgan fọ́n he na do wiwá do ganmẹ etọn hia. Hihia po nulẹnpọndo azọ́ndenamẹ towe ji po to tlolo he hiẹ mọ ẹn yí godo nọ biọ whenu, ṣigba whenu heyin yiyizan ganji wẹ ehe yin. To whenuena hiẹ wá sinai nado wleawuna todohukanji lọ, hiẹ na mọ ale he tin to e mẹ nado lẹnnupọndeji ganji jẹnukọn. Nukunpipedo azọ́ndenamẹ lẹ go to aliho ehe mẹ na dè flumẹjijẹ pò tlala bo na gọalọna we nado ze nudọnamẹ lẹ donukọnnamẹ to aliho he yọn-na-yizan bo biọ ahun mẹhe tin to agun lọ mẹ lẹ tọn mẹ.

Eyin hiẹ yọ́n pinpẹn nunina he ko yin nina we to kọndopọmẹ hẹ tito-to-whinnu nuplọnmẹ Jehovah tọn na omẹ etọn lẹ, hiẹ na gbògbéna ẹn bo do dewe hia nado yin dona de na mẹhe yiwanna ẹn lẹ.—Isa. 54:13; Lom. 12:6-8.