“Nawẹ N’Dona Nọ Hia Gànmẹ Gbọn?”
Be hiẹ ko kàn kanbiọ enẹ sè pọ́n ya? Anademẹ paa lẹ tin to weda 86-87 owe Mí Yin Tito-Basina tọn ji. Anademẹ dogọ lẹ nọ yin nina sọn ojlẹ de mẹ jẹ devo mẹ, taidi dehe tin to Apotin Kanbiọ Tọn Lizọnyizọn Ahọluduta Tọn Mítọn septembre 2008 tọn mẹ. To whenuena e yindọ ninọmẹ lẹ nọ gbọnvo, todohukanji gblẹlẹ osẹ̀n tọn depope ma ko yin nina gando ehe go pọ́n gba. Enẹwutu, e ma sọgbe dọ mẹho agun tọn lẹ kavi mẹdevo depope ni ze anademẹ devo lẹ dai gando whẹho ehe go.
Eyin kanbiọ de fọ́n do whẹho ehe ji bọ owe mítọn lẹ ma na anademẹ depope gandego, wẹnlatọ dopodopo sọgan kanse ede dọ: Be gànmẹ he n’yizan lọ gando lizọnyizọn lọ go ya? Kavi n’yí i zan na nudevo he ma gando azọ́n yẹwhehodidọ tọn lọ go wẹ ya? Nuhe mí nọ kàn do gànmẹ wema mítọn ji to sunmẹsunmẹ dona nọ hẹn mí jaya kakati dọ ni nọ dotukla ayihadawhẹnamẹnu mítọn. (Owalọ 23:1) Na nugbo tọn, e ma yin lehe mí na nọ hia gànmẹ do wẹ dona nọ yin ahunmẹdunamẹnu tangan mítọn gba, ṣigba lehe mí na nọ yí gànmẹ mítọn zan ganji do gbọn vivẹnudido to lizọnyizọn lọ mẹ dali.—Heb. 6:11.