Nọ Fli Ojlẹ He Jẹ lẹ to Lizọnyizọn Towe Mẹ
Kunnudetọ Jehovah tọn lẹ yí gànmẹ 1 945 487 604 zan to lizọnyizọn lọ mẹ to owhe sinsẹ̀nzọn 2014 tọn mẹ—ehe dohia dọ mí magbe nado hẹn alọnu ján to sinsẹ̀nzọn Jehovah tọn mẹ! (Ps. 110:3; 1 Kọl. 15:58) To whenuena e yindọ “gli wẹ ojlẹ he pò lọ,” be e yọnbasi dọ mí ni yí whenu họakuẹ mítọn lẹ zan to lizọnyizọn lọ mẹ nado jẹ mẹsusu devo lẹ dè ya?—1 Kọl. 7:29.
Nado fli ojlẹ he jẹ lẹ to lizọnyizọn mítọn mẹ, mí dona nọ diọalọ. Di apajlẹ, eyin hiẹ nọ yí gànhiho dopo kavi humọ zan to adà tangan lizọnyizọn lọ tọn de mẹ bo ma nọ mọ mẹdepope nado dọhona, be hiẹ sọgan basi vọjlado nado sọgan dín mẹsusu dogọ mọ bo dọhona yé ya? Ninọmẹ lẹ nọ gbọnvo sọn fide jẹ fide. Ṣigba, ayinamẹ he bọdego ehelẹ sọgan gọalọna we nado nọ fli ojlẹ he jẹ lẹ na hiẹ ni ma do “to nuli jẹhọn” blo.—1 Kọl. 9:26.
Kunnudide sọn Whédegbè jẹ Whédegbè: Na owhe susu lẹ, wẹnlatọ lẹ nọ saba bẹ lizọnyizọn yetọn jẹeji to afọnnu lẹ gbọn yẹwhehodidọ sọn whédegbè jẹ whédegbè dali. Ṣigba, to whenuena e yindọ mẹsusu nọ to azọ́nmẹ to afọnnu lẹ, naegbọn mí ma na tẹnpọn nado nọ dọyẹwheho sọn whédegbè jẹ whédegbè to whèmẹ kavi whèjai lẹ, yèdọ ojlẹ he mẹ mẹsusu nọ tin to whégbè bo nọ to gbigbọjẹ? To okle, kunnudide to tòhomẹ-liho ji kavi to ajọwatẹn lẹ sọgan tindo kọdetọn dagbe.
Kunnudide Gbangba Tọn: Tafo kavi kẹkẹvi he ji owe mítọn lẹ nọ yin titẹ́ do dona nọ yin zizedo fie mẹsusu nọ zọ̀n afọ gbọn lẹ to aigba-denamẹ agun lọ tọn lẹ ji. (Pọ́n Lizọnyizọn Ahọluduta Tọn Mítọn juillet 2013, w. 5.) Eyin mẹsusu masọ nọ zọ̀n afọ gbọn fie mì de na kunnudide gbangba tọn lẹ, Wedegbẹ́ Sinsẹ̀nzọn tọn agun lọ tọn sọgan basi nudide nado ze kẹkẹvi lọ kavi tafo he ji owe mítọn lẹ nọ yin titẹ́ do sọn finẹ yì fidevo he afọzọ̀ntọ susu nọ gbọn to aigba-denamẹ lọ ji.
Gọyìpọn lẹ po Plọnmẹ Biblu lẹ Po: Be hiẹ sọgan nọ yí ojlẹ he mẹ adà lizọnyizọn lọ tọn delẹ ma nọ de sinsẹ́n tọ́n te lẹ zan nado basi gọyìpọn po plọnmẹ Biblu towe lẹ po ya? Di apajlẹ, eyin kunnudide sọn whédegbè jẹ whédegbè nọ tindo kọdetọn dagbe to Sibigbe afọnnu lẹ, be hiẹ sọgan basi tito plọnmẹ Biblu towe lẹ tọn do whèmẹ kavi whèjai ya? To gọyìpọn lẹ bibasi whenu, be wẹnlatọ lẹ sọgan nọ yì nuplọntọ yetọn he nọ nọ̀ lẹdo dopolọ mẹ lẹ dè to ojlẹ tangan de mẹ nado sọgan wà nususu dogọ to lizọnyizọn lọ mẹ ya?
Dile etlẹ yindọ mí sọgan hia gànmẹ he mí yizan to whenue mí tọ́n na lizọnyizọn lọ, ayajẹ mítọn nọ jideji to whenue azọ́n mítọn de sinsẹ́n tọ́n. Eyin a mọdọ adà lizọnyizọn lọ tọn de ma to kọdetọn dagbe tindo to ojlẹ tangan de mẹ, tẹ́n adà devo pọ́n. Hodẹ̀ hlan Jehovah he yin “Ogán jibẹwawhé lọ tọn,” na ewọ nido na we anademẹ he na gọalọna we lẹ nado nọ fli ojlẹ he jẹ lẹ to lizọnyizọn towe mẹ!—Mat. 9:38.