Apotin Kanbiọ Tọn

◼ Whẹpo wẹnlatọ he ma ko yí baptẹm de nado yin alọkẹyi na baptẹm, obá tẹ mẹ wẹ ewọ dona ko to opli lẹ wá bosọ to mahẹ tindo to lizọnyizọn lọ mẹ jẹ?

Baptẹm yíyí wẹ yin nudide titengbe hugan he mẹde sọgan basi. Enẹwutu, whẹpo mẹde nado yin alọkẹyi na baptẹm, nuhe Jiwheyẹwhe biọ to e si lẹ dona họnwun na ẹn. Humọ, e dona ko to didohia dọ gbemima emitọn wẹ nado nọgbẹ̀ sọgbe hẹ nubiọtomẹsi Jiwheyẹwhe tọn lẹ.

Klistiani lẹ yin gbedena ma nado nọ gbẹkọ pipli dopọ yetọn lẹ go, enẹwutu, wẹnlatọ he ma ko yí baptẹm de dona ko to opli agun tọn lẹ wá to gbesisọ mẹ. (Heb. 10:24, 25) To paa mẹ, e sọ sọgan ko to mahẹ tindo to opli lẹ mẹ gbọn gblọndo nina dali. E yọnbasi dọ e na ko ze yinkọ dai to Wehọmẹ Lizọnyizọn Yẹwhehọluduta tọn mẹ, ṣigba enẹ ma yin nubiọtomẹsi de.

Humọ, to whenuena e yindọ Klistiani lẹ yin azọ́ndena nado nọ dọyẹwheho wẹndagbe lọ tọn bo hẹn gbẹtọ lẹ zun devi, wẹnlatọ he ma ko yí baptẹm de dona ko to mahẹ gbesisọ tọn tindo to lizọnyizọn lọ mẹ jẹnukọnna baptẹm. (Mat. 24:14; 28:19, 20) Na osun nẹmu wẹ e dona ko to mahẹ tindo to lizọnyizọn lọ mẹ whẹpo do sọgan yí baptẹm? Nuhe na sọgbe wẹ nado jo whenu he pemẹnu do na ẹn na ewọ nido dohia dọ emi ko magbe nugbonugbo nado nọ tindo mahẹ zohunhun tọn to lizọnyizọn lọ mẹ to sunmẹsunmẹ podọ to gbesisọ mẹ. (Ps. 78:37) Etomọṣo, e ma yin dandan dọ ewọ ni ko yin wẹnlatọ na ojlẹ dindẹn whẹpo do pegan na baptẹm; vlavo e sọgan yin to osun vude godo. Gànmẹ nẹmu wẹ e dona ko to nina? Osẹ́n tangan de ma tin gando ehe go. Mẹho lẹ dona lẹnnupọndo ninọmẹ wẹnlatọ dopodopo tọn ji po sọwhiwhe po bosọ yin lẹnpọn dagbenọ.—Luku 21:1-4.

Mẹho (kavi devizọnwatọ lizọnyizọnwiwa tọn he tin to agun he mẹ mẹho ma sù te lẹ mẹ lẹ) he jlo na gbadopọnna kanbiọ he nọ yin kinkanse mẹhe ze yinkọ dai na baptẹm lẹ dona flindọ yemẹpo ma tindo ninọmẹ dopolọ, podọ yé dona yí zinzin zan nado yọnẹn eyin wẹnlatọ de pegan na baptẹm. Yé dona mọdọ mẹlọ tindo ojlo nujọnu tọn nado yin dopo to Kunnudetọ Jehovah tọn lẹ mẹ bosọ jlo na dohia dọ emi yọ́n pinpẹn lẹblanulọkẹyi he emi tindo tọn, enẹ wẹ nado to awukọndopọ hẹ titobasinanu Jehovah tọn podọ nado to mahẹ tindo to lizọnyizọn lọ mẹ. Mẹho lẹ nọ hẹn do ayiha mẹ dọ wẹnlatọ lọ ma ko jẹ whinwhẹ́n gbigbọmẹ tọn kọ̀n kavi ma ko tindo nugopipe po numimọ he wẹnlatọ he ko yí baptẹm lẹ nọ tindo po gba. Eyin mẹho lẹ mọdọ ewọ ma pegan na baptẹm, yé dona yí walọmimiọn do dó whẹwhinwhẹ́n Owe-wiwe tọn lẹ he wutu yé do basi nudide enẹ hia ẹ bosọ gọalọna ẹn to gbigbọ-liho.