Nọ Yí Nuyọnẹn Zan to Lizọnyizọn lọ Mẹ
1. Nawẹ 1 Kọlintinu lẹ 9:26 yọ́n-na-yizan na lizọnyizọn lọ gbọn?
1 Apọsteli Paulu wlan dọmọ: “Aliho he mẹ yẹn to wezundo te ma yin po nujikudo matindo po gba; aliho he mẹ yẹn to akotokún ṣie lẹ yìn te ma yin nado to nuli jẹhọn gba.” (1 Kọl. 9:26) Tofi, Paulu to alọdlẹndo gbemima etọn po ayidonugo he e na yanwle etọn nado sẹ̀n Jehovah dogọ lẹ po. Etomọṣo, nunọwhinnusẹ́n he tin to wefọ ehe mẹ sọ yọ́n-na-yizan na lizọnyizọn lọ ga. Mí jlo na yí nuyọnẹn zan nado deanana “akotokún,” kavi vivẹnudido mítọn lẹ, na yé nido sọgan hẹn ale dagbe hugan lẹ wá. Gbọnna?
2. Taidi Paulu po wẹndagbe-jlatọ owhe kanweko tintan tọn devo lẹ po, nawẹ mí sọgan nọ de whenue po fie mí na nọ dọyẹwheho te lẹ po gbọn?
2 Nọ Yì Fie Gbẹtọ lẹ Tin Te: Paulu po wẹndagbe-jlatọ owhe kanweko tintan tọn devo lẹ po dọyẹwheho to fie yé sọgan mọ gbẹtọ lẹ te. (Owalọ 5:42; 16:13; 17:17) Enẹwutu, eyin whèjai wẹ mẹsusu nọ nọ̀ whégbè to aigba-denamẹ mítọn ji, be ojlẹ enẹ wẹ yin dagbe hugan nado dekunnu sọn whédegbè jẹ whédegbè. Be húnglintẹn kavi pinpán-glintẹn lẹdo lọ tọn nọ gọ́ to afọnnu lẹ kavi whèjai lẹ to whenue gbẹtọ lẹ jei kavi lẹkọ sọn azọ́nmẹ wẹ ya? Whetẹnu wẹ gbẹtọ lẹ nọ sù to nusatẹn lẹ to aigba-denamẹ lọ ji? Kunnudide tòhomẹ-liho ji tọn sọgan tindo kọdetọn dagbe hugan to ojlẹ mọnkọtọn lẹ mẹ.
3. Nawẹ mí sọgan yí nuyọnẹn zan to aliho he mẹ mí nọ wazọ́n to aigba-denamẹ mítọn ji te gbọn?
3 Nọ Wazọ́n to Aigba-Denamẹ lọ ji po Nuyọnẹn Po: Mí sọ dona nọ yí nuyọnẹn zan to lizọnyizọn lọ mẹ gando aliho he mẹ mí nọ wazọ́n te to aigba-denamẹ mítọn ji go. Di apajlẹ, kakati nado plan pipli wẹnlatọ susu tọn yì lẹdo dopolọ mẹ, fie e na biọ whenu po vivẹnudido susu po te nado deanana bosọ deazọ́nna yé, e na yọ́n hugan nado má pipli lọ. Mọdopolọ, to whenue mí to azọ́nwa to gbétatò de mẹ, mí na yawu wazọ́n to aigba-denamẹ lọ ji to gigọ́ mẹ bo tindo dotẹnmẹ hundote susu nado dọho eyin wẹnlatọ lẹ ma sù zẹjlẹgo to pipli lẹ mẹ. Be e yọnbasi nado tindo aigba-denamẹ mẹdetiti tọn de sẹpọ owhé mítọn, he na zọ́n bọ whenu he mí na yizan nado yì aigba-denamẹ lọ ji na depò ya?
4. Etẹwẹ na gọalọna mí nado yin “whèhutọ gbẹtọ lẹ tọn” azọ́nyọnẹntọ lẹ?
4 Jesu yí wẹndagbe-jlatọ lẹ jlẹdo “whèhutọ gbẹtọ lẹ tọn” go. (Malku 1:17) Yanwle whèhutọ de tọn ma yin nado yìn odọ̀ do otọ̀ mẹ poun gba, ṣigba nado wle whèvi. Enẹwutu, whèhutọ azọ́nyọnẹntọ lẹ nọ yì fihe yé donukun nado mọ whèvi te to ojlẹ he sọgbe mẹ bo nọ jẹ odọ̀ yìn ji madọngbàn. Mọwẹ, yé nọ yí nuyọnẹn zan to vivẹnudido yetọn mẹ. Mì gbọ mí ni nọ dovivẹnu to aliho dopolọ mẹ to lizọnyizọn mítọn mẹ.—Heb. 6:11.