Nọ Dọyẹwheho Na “Gbẹtọ Wunmẹ Lẹpo” — WESẸDOTẸN INTẸNẸT JI TỌN Watchtower Tọn

Nọ Dọyẹwheho Na “Gbẹtọ Wunmẹ Lẹpo”

1. Nawẹ wẹndagbe-jlatọ kọdetọn dagbenọ lẹ taidi anazọ́nwatọ azọ́nyọnẹntọ lẹ gbọn?

¹ Anazọ́nwatọ azọ́nyọnẹntọ de nọ tindo azọ́nwanu susu, podọ e nọ yọ́n whenue po lehe e na yí dopodopo yetọn zan do po. Mọdopolọ, mí tindo azọ́nwanu voovo lẹ he nọ gọalọna mí nado hẹn azọ́n mítọn di taidi wẹndagbe-jlatọ lẹ. Di apajlẹ, alọnuwe he bẹ hosọ voovo hẹn lẹ wẹ ko yin awuwlena nado gọalọna mí nado dọyẹwheho na “gbẹtọ wunmẹ lẹpo.” (1 Kọl. 9:22) Owe-to-wemẹ he tin to Lizọnyizọn Ahọluduta Tọn Mítọn ehe mẹ slẹ delẹ to alọnuwe enẹlẹ mẹ, basi zẹẹmẹ mẹhe wutu yé do yin awuwlena lẹ tọn, bo dọ lehe yé sọgan yin zizedonukọnnamẹ do.

2. Whetẹnu wẹ mí sọgan yí alọnuwe lẹ zan to lizọnyizọn lọ mẹ?

² Whenue Mí Sọgan Yí Alọnuwe lẹ Zan: Anazọ́nwatọ de nọ yí azọ́nwanu de zan to whedepopenu he mọwiwà sọgan hẹn ale wá. Mọdopolọ, mí sọgan ze alọnuwe de donukọnnamẹ to whedepopenu he mí mọdọ mẹlọ sọgan mọaleyi sọn e mẹ, e ma yin to osun he mẹ e tin to nuzedonukọnnamẹ lẹ mẹ dandan gba. Di apajlẹ, eyin owe Biblu Plọn Mí wẹ mí to zizedonukọnnamẹ, bo ka to yẹwhehodọ na mẹhe ma yin Klistiani bo ma tindo ojlo to Biblu mẹ sọmọ de, e sọgan yin alenu nado ze alọnuwe he sọgbe de donukọnna ẹn bo wá donù owe lọ Biblu Plọn Mí go to whenue mí ko fọ́n ojlo etọn dote godo.

3. Naegbọn mí dona bikan to azọ́nwanu kunnudide tọn mítọn lẹ yiyizan mẹ?

³ Owe-wiwe lẹ na pipà mẹhe nọ bikan to azọ́n yetọn mẹ lẹ. (Howh. 22:29) Na nugbo tọn, azọ́n de masọ yin nujọnu to egbehe hugan “azọ́n wiwe wẹndagbe” lọ tọn. (Lom. 15:16) Nado yin “azọ́nwatọ de he ma nọ kuwinyan nudepope tọn,” mí dona dovivẹnu nado bikan to azọ́nwanu mítọn lẹ yiyizan mẹ.—2 Tim. 2:15.