Gọalọna Gbẹtọ lẹ Nado Dotoaina Jiwheyẹwhe
1. Alọnuwe tẹlẹ wẹ yin didetọn to plidopọ agbegbe “Ahọluduta Jiwheyẹwhe Tọn Ni Wá!” tọn ji, podọ naegbọn yé do yin azọ́nwanu dagbe lẹ?
1 To plidopọ agbegbe “Ahọluduta Jiwheyẹwhe Tọn Ni Wá!” tọn ji, alọnuwe yọyọ awe yin didetọn, enẹ wẹ Dotoaina Jiwheyẹwhe bo Nọgbẹ̀ Kakadoi po vọkan etọn he bọawu lọ Dotoaina Jiwheyẹwhe po. Na yé ma bẹ nukinkan susu hẹn wutu, yé sọgan yawu yin lilẹdogbedevomẹ po awubibọ po. To whenue Dotoaina Jiwheyẹwhe bo Nọgbẹ̀ Kakadoi yin didetọn to Glẹnsigbe mẹ, e ko yin alọkẹyi dọ lẹdogbedevomẹ etọn ni yin bibasi do ogbè 431 mẹ.
2. Mẹnu lẹ wẹ na mọaleyi sọn alọnuwe ehelẹ mẹ?
2 Mẹnu lẹ na taun tọn wẹ na mọaleyi sọn alọnuwe ehelẹ mẹ? Lẹnnupọndo ninọmẹ he nọ saba wá aimẹ lẹdo aihọn pé ehelẹ ji:
• Wẹnlatọ he to hodọdopọ hẹ whétọ de, vlavo to dlapọn tintan kavi to gọyìpọn de whenu, doayi e go dọ whétọ lọ ma yọ́n wehia kavi ma nọ hiawe ganji.
• Wẹnlatọ de to yẹwhehodọ na mẹhe nọ do ogbè he mẹ owe mítọn susu kavi depope ma tin te de. Kavi mẹsusu to aigba-denamẹ lọ ji ma sọgan hia ogbè he yé sè ganji.
• Wẹnlatọ de to yẹwhehodọ to ogbè alọ-yido-dọho tọn mẹ na tókunọ de to aigba-denamẹ etọn ji.
• Mẹjitọ de jlo na plọn nugbo lọ ovi etọn he ma ko yọ́n wehia.
3. Nawẹ alọnuwe Dotoaina Jiwheyẹwhe yin awuwlena gbọn?
3 Lehe Nudọnamẹ He Tin to Alọnuwe lọ lẹ mẹ Yin Awuwlena Do: Alọnuwe Dotoaina Jiwheyẹwhe ma bẹ nukinkan susu hẹn. To paa mẹ, e bẹ nukinkan kleun delẹ hẹn gọna wefọ he zinnudo nuagokun lẹ ji bo yin dide do odò weda dopodopo tọn. Etẹwutu? Mí ni dọ dọ mẹde na we owe de he yin kinkando ogbè he a ma sọgan hia mẹ, vlavo po wekun he a ma jẹakọ hẹ lẹ po. Be e na fọnjlodotena we eyin e tlẹ bẹ yẹdide whanpẹnọ lẹ hẹn ya? E na vẹawu. Mọdopolọ mẹhe ma sọgan hiawe lẹ nọ yawu hònúpla eyin owe de tindo nukinkan kẹdẹ. Enẹwutu, yẹdide he yin awuwlena po sọwhiwhe po lẹ wẹ tin to weda dopodopo ji gọna ohia he na deanana mẹde nado yọ́n yẹdide he ji e na dọhodo debọdo-dego.
4. Nawẹ alọnuwe Dotoaina Jiwheyẹwhe bo Nọgbẹ̀ Kakadoi yin awuwlena gbọn?
4 Yẹdide he tin to Dotoaina Jiwheyẹwhe mẹ lẹ pẹpẹ wẹ tin to Dotoaina Jiwheyẹwhe bo Nọgbẹ̀ Kakadoi lọsu mẹ. E yin awuwlena to aliho de mẹ na mí nido plọnnu hẹ mẹhe ma yọ́n wehia ganji lẹ kavi mẹhe to wehihia plọn lẹ. Mẹhe to anadena oplọn lọ sọgan zan Dotoaina Jiwheyẹwhe bo Nọgbẹ̀ Kakadoi eyin nuplọntọ lọ tlẹ hẹn alọnuwe Dotoaina Jiwheyẹwhe. Kanbiọ de tin to amiyọnwhé to aga weda awe to pọmẹ nupinplọn dopodopo tọn, ehe gblọndo etọn yin nina to weda lọ lẹ ji. Nudọnamẹ po wefọ he yin dide delẹ po yin yiyidogọna yẹdide lẹ. Apotin he bẹ nuagokun po wefọ he yin dide dogọ delẹ po hẹn tin sẹpọ odò to weda susu ji, ehe sọgan yin hodọdeji sọgbe hẹ nugopipe nuplọntọ lọ tọn.
5. Whetẹnu wẹ mí sọgan ze alọnuwe ehelẹ donukọnnamẹ, podọ gbọnna?
5 Lehe Yé Sọgan Yin Yiyizan Do: Hiẹ sọgan ze depope to alọnuwe lọ lẹ mẹ donukọnnamẹ to lizọnyizọn whédegbè jẹ whédegbè tọn mẹ to whedepopenu he a mọdọ e sọgbe nado wàmọ, eyin e tlẹ yindọ alọnuwe lọ lẹ ma na yin dido gbonu to osun lọ mẹ. (Pọ́n apotin lọ “Lehe Yé Sọgan Yin Zizedonukọnnamẹ Do.”) Nado ze yé donukọnnamẹ to gọyìpọn lẹ whenu, hiẹ sọgan dọna jlodotọ lọ dọ a tindo nude he a jlo na dohia ẹ bo ze alọnuwe dopo na ẹn.
6. Nawẹ mí sọgan yí alọnuwe ehelẹ zan nado deanana plọnmẹ Biblu de gbọn?
6 To whenue e yindọ alọnuwe Dotoaina Jiwheyẹwhe ma bẹ kanbiọ lẹ hẹn, nupinplọn lọ ma dona yin kanbiọ po gblọndo po dile mí nọ saba basi do to whenue mí to nuplọn hẹ mẹde to owe Biblu Plọn Mí mẹ. To paa mẹ, homẹ gbẹtọ lẹ tọn nọ hùn nado dotoaina otàn lẹ. Enẹwutu, nọ yí yẹdide lọ lẹ zan nado pìntàn he tin to Biblu mẹ lẹ na yé. Basi zẹẹmẹ nuhe dọ yẹdide lọ lẹ te tọn. Do zohunhun hia. Biọ to nuplọntọ lọ si nado dọ nuhe e mọ po nuhe e lẹn po. Hia wefọ he tin to odò weda lọ tọn lẹ bo yihojlẹdohogo hẹ ẹ gando nuhe yé dọ go. Kàn kanbiọ lẹ sè nado dọ̀n ẹn biọ hodọdopọ lọ mẹ bo hẹn ẹn diun dọ e mọnukunnujẹ nuplọnmẹ lọ mẹ. Eyin alọnuwe Dotoaina Jiwheyẹwhe bo Nọgbẹ̀ Kakadoi wẹ e hẹn, mì hia nudọnamẹ po wefọ he yin dide lẹ po to whenue mì to hodọdo yẹdide dopodopo ji.
7. Nawẹ mí sọgan gọalọna plọnmẹ Biblu mítọn nado yinukọn gbọn?
7 Gọalọna Nuplọntọ lọ Nado Yinukọn: E họnwun dọ, hodọdopọ mìtọn na fọnjlodotena nuplọntọ lọ nado plọn wehihia na ewọ nido sọgan plọnnu gando Jehovah go na ede. (Mat. 5:3; Joh. 17:3) Enẹwutu, eyin alọnuwe Dotoaina Jiwheyẹwhe mẹ wẹ mì to nuplọn te, to nukọn mẹ hiẹ sọgan biọ nado plọn nuplọntọ lọ wehihia, podọ mì sọgan zindonukọn to nupinplọn lọ to alọnuwe Dotoaina Jiwheyẹwhe bo Nọgbẹ̀ Kakadoi mẹ. Mahopọnna alọnuwe he mì to yiyizan, nuplọntọ lọ ma na pegan na baptẹm eyin mì plọn alọnuwe lọ fó. Mì dona zindonukọn to nupinplọn lọ mẹ to owe Biblu Plọn Mí mẹ kavi to owe devo he sọgbe bo sọgan gọalọna ẹn nado tindo nukunnumọjẹnumẹ dogọ gando Biblu go mẹ.
8. Naegbọn hiẹ yọ́n pinpẹn azọ́nwanu yọyọ he mí sọgan yizan to lizọnyizọn lọ mẹ ehelẹ tọn?
8 Gbẹtọ lẹ dona dotoaina Nupojipetọ wẹkẹ lọ tọn eyin yé jlo na nọgbẹ̀ kakadoi. (Isa. 55:3) Podọ ojlo Jehovah tọn wẹ yindọ “gbẹtọ wunmẹ lẹpo,” kakajẹ mẹhe ma yọ́n wehia lẹ ji, ni plọn lehe yé na dotoaina ẹn do. (1 Tim. 2:3, 4) Lehe mí gọ́ na pinpẹn-nutọn-yinyọnẹn do sọ dọ mí tindo azọ́nwanu yọyọ ehelẹ he mí sọgan yizan nado plọn gbẹtọ lẹ lehe yé na dotoaina Jiwheyẹwhe do!
[Apotin to weda 3]
Lehe Yé Sọgan Yin Zizedonukọnnamẹ Do
Do weda 2-3 hia whétọ lọ bo dọmọ: “Be e na jlo we nado nọgbẹ̀ to aihọn he taidi ehe de mẹ ya? [Jotẹnna gblọndo.] Owe-wiwe lẹ [kavi owe wiwe ehe] dopagbe dọ Jiwheyẹwhe na hẹn aihọn lọ zun nọtẹn whanpẹnọ de to madẹnmẹ, yèdọ nọtẹn jijọho tọn de, fie ohẹ́n po azọ̀n po ma na tin te. Pọ́n nuhe mí dona wà nado nọgbẹ̀ to finẹ. [Hia Isaia 55:3, he yin dide do aga weda 3tọ tọn.] E dọna mí nado “wá” Jiwheyẹwhe dè bo ‘dotoaina’ ẹn. Ṣigba nawẹ mí nọ dotoaina Jiwheyẹwhe gbọn?” Hùn weda 4-5 bo dọhodo gblọndo lọ ji hẹ ẹ. Eyin e ma tindo whenu, jo alọnuwe lọ do na ẹn bo basi tito nado lẹkọwa bo na gblọndo kanbiọ lọ tọn.