Basi Tito Todin Nado Gbloada Na Lizọnyizọn Towe
1. Dotẹnmẹ tẹwẹ ojlẹ Oflin tọn nọ hundote na mí, podọ nawẹ mí sọgan wleawudaina ẹn gbọn?
1 Ojlẹ Oflin tọn dopodopo nọ hùn dotẹnmẹ devo lẹ dote na mí nado ‘pagigona OKLUNỌ tlala.’ (Ps. 109:30) Be hiẹ na gbloada na lizọnyizọn towe to mars mẹ nado do pinpẹn-nutọn hia Mẹhe wleawuna ofligọ lọ ya? Ojlẹ lọ die nado jẹ tito basi ji.—Howh. 21:5.
2. Etẹwẹ yin numọtolanmẹ towe to whenue gànmẹ he yin bibiọ to gbehosọnalitọ alọgọtọ tọn lẹ si yin didepo to avril he wayi, podọ nawẹ mẹmẹsunnu devo lẹ do numọtolanmẹ yetọn hia gbọn?
2 Gbehosọnalitọ Alọgọtọ Tọn Bibasi: To owhe he wayi, homẹ mẹlẹpo tọn wẹ hùn nado sè dọ mẹhe jlo na basi gbehosọnalitọ alọgọ tọn to avril mẹ lẹ sọgan na gànmẹ 30. Mẹmẹsunnu de wlan dọmọ: “N’gbẹ́ pò to wehọmẹ daho, podọ e ma ko yọnbasi na mi nado lẹzun gbehosọnalitọ whepoponu tọn. Ṣigba n’na ze yinkọ dai nado na gànmẹ 30 bo dovivẹnu nado jẹ gànmẹ 50 kọ̀n to osun avril tọn mẹ.” Mẹmẹyọnnu he nọ wà agbasazọ́n whenu-gigọ́ tọn de wlan dọmọ: “Gànmẹ 30—bleun wẹ gbẹtọ na jẹ enẹ kọ̀n!” To whenue tito ehe yin lilá, mẹmẹyọnnu de he ko basi gbehosọnalitọ whepoponu tọn wayi bo tindo owhe 80 linlán todin dọmọ: “Ojlẹ he n’to tepọn die! Jehovah yọnẹn dọ ojlẹ he n’duvivi etọn hugan wẹ dehe n’yizan taidi gbehosọnalitọ!” Mẹhe ma sọgan basi gbehosọnalitọ alọgọ tọn lẹ ze yanwle lọ dai nado wà susu dogọ to lizọnyizọn lọ mẹ.
3. Etẹwutu mí dona lẹnnupọndo gbehosọnalitọ alọgọtọ tọn bibasi ji to mars, avril po mai po mẹ?
3 Mí nasọ tindo dotẹnmẹ hundote nado basi gbehosọnalitọ alọgọtọ tọn to mars, na wẹnlatọ lẹ sọgan de vlavo nado jẹ nubiọtomẹsi gànmẹ 30 kavi gànmẹ 50 tọn kọ̀n. Humọ, bẹsọn samedi 17 mars, mí na tindo mahẹ to nujijla vonọtaun de mẹ nado basi oylọna mẹdevo lẹ wá hùnwhẹ Oflin tọn lọ tẹnmẹ to 5 avril. Mẹsusu na duvivi nuwiwa ehe tọn sọmọ bọ yé na jlo nado basi gbehosọnalitọ alọgọ tọn to avril po mai po mẹ bo na jẹ nubiọtomẹsi gànmẹ 50 tọn kọ̀n.
4. Nawẹ mí sọgan gbloada na lizọnyizọn mítọn gbọn, po kọdetọn tẹ po?
4 To sinsẹ̀n-bibasi whẹndo tọn mìtọn he na bọdego whenu, naegbọn mì ma na dọhodo lehe hagbẹ whẹndo lọ tọn dopodopo sọgan gbloada na lizọnyizọn etọn to ojlẹ Oflin tọn lọ mẹ do ji? (Howh. 15:22) Biọ to Jehovah si nado dona vivẹnudido towe lẹ. (1 Joh. 3:22) Eyin hiẹ gbloada na lizọnyizọn towe, a na yidogọna pipà he a nọ na Jehovah bo nasọ yidogọna ayajẹ towe.—2 Kọl. 9:6.