Nọ Yí Alọnuwe Pẹvi lẹ Zan Nado Hẹn Wẹndagbe lọ Gbayipe
1. Nawẹ omẹ Jiwheyẹwhe tọn lẹ nọ yí alọnuwe pẹvi lẹ zan gbọn?
1 Omẹ Jehovah tọn lẹ ko nọ yí alọnuwe pẹvi sinai do Biblu ji lẹ zan sọn ojlẹ dindẹn die nado hẹn wẹndagbe lọ gbayipe. To 1880, C. T. Russell po gbẹdohẹmẹtọ etọn lẹ po jẹ Bible Students’ Tracts (Alọnuwe Pẹvi Biblu Plọntọ lẹ tọn) zinjẹgbonu ji, bo nọ yí yé na mẹhe nọ hia Atọ̀họ̀-Nuhihọ́ lọ Tọn lẹ na yé nido má yé na gbẹtọ lẹ. Alọnuwe pẹvi lẹ yin nujọnu sọmọ bọ to whenue C. T. Russell ze nuyizan sọgbe hẹ osẹ́n he ma yin ajọwiwa tọn de dai to 1884 po lẹndai lọ po nado nọgodona Ahọluduta lọ, e ylọ ẹ dọ Zion’s Watch Tower Tract Society. Hogbe lọ “tract” he zẹẹmẹdo alọnuwe pẹvi to Gungbe mẹ sọawuhia to yinkọ lọ mẹ. Nuyizan enẹ nọ yin yiylọdọ Watch Tower Bible and Tract Society of Pennsylvania todin. To 1918, Biblu Plọntọ lẹ ko má alọnuwe pẹvi livi 300 linlán. Alọnuwe pẹvi lẹ gbẹ́ yin azọ́nwanu dagbe de na kunnudide kakajẹ egbé.
2. Naegbọn alọnuwe pẹvi lẹ do yọ́n-na-yizan?
2 Naegbọn Alọnuwe Pẹvi lẹ Do Yọ́n-Na-Yizan? Alọnuwe pẹvi lẹ nọ yọnwhanpẹ bo nọ dọnmẹdogo. Owẹ̀n kleun he yé nọ bẹhẹn lẹ nọ bẹ nudọnamẹ susu hẹn bosọ nọ dọ̀n ayidonugo mẹtọn. Yé nọ dọ̀n whétọ he sọgan tindo numọtolanmẹ dọ linlinnamẹwe kavi owe de hihia nọ hẹn apọṣimẹ lẹ. Alọnuwe pẹvi lẹ zizedonukọnnamẹ nọ bọawu, etlẹ yin na wẹnlatọ yọyọ lẹ po yọpọvu lẹ po. Humọ, alọnuwe pẹvi lẹ nọ whè taun bo nọ bọawu nado hẹn.
3. Dọ numimọ mẹdetiti tọn kavi dehe yin zinzinjẹgbonu to owe mítọn mẹ de he do nuhọakuẹ-yinyin alọnuwe pẹvi lẹ tọn hia.
3 Mẹsusu wẹ mọ nugbo lọ to tintan whenu gbọn alọnuwe pẹvi de gblamẹ. Di apajlẹ, nawe de to Haïti mọ dopo to alọnuwe pẹvi mítọn lẹ mẹ to aliji. E ze e bo hia ẹ bo dawhá dọ, “N’ko mọ nugbo lọ!” To nukọn mẹ, e yì Plitẹnhọ Ahọluduta tọn mẹ bo jẹ Biblu plọn ji bosọ yí baptẹm—ehe lẹpo jọ na huhlọn Ohó Jiwheyẹwhe tọn he tin to alọnuwe pẹvi de mẹ wutu.
4. Etẹwẹ nọ yin yanwle mítọn to whenue mí to alọnuwe pẹvi lẹ zedonukọnnamẹ to osun de mẹ?
4 Sọn Whédegbè jẹ Whédegbè: To whenuena e yindọ azọ́nwanu dagbe de wẹ alọnuwe pẹvi lẹ yin na kunnudide, mí na nọ ze yé donukọnnamẹ to osun lẹ mẹ sọn ojlẹ de mẹ jẹ devo mẹ, bẹsọn osun novembre tọn mẹ. Yanwle mítọn ma yin nado nọ ze alọnuwe pẹvi lẹ namẹ kẹdẹ gba, ṣigba nado nọ yí alọnuwe pẹvi lẹ zan nado bẹ hodọdopọ jẹeji. Eyin whétọ de do ojlo hia to dlapọn tintan whenu kavi to gọyìpọn whenu, mí sọgan do lehe mí nọ plọnmẹ Biblu do hia ẹ gbọn owe Biblu Plọn Mí kavi owe nupinplọn tọn devo yiyizan dali. Nawẹ mí sọgan ze alọnuwe pẹvi lẹ donukọnnamẹ sọn whédegbè jẹ whédegbè gbọn? Alọnuwe pẹvi lẹ dopodopo wẹ gbọnvo, enẹwutu mí dona jẹakọ hẹ dehe mí to yiyizan lẹ.
5. Nawẹ mí sọgan ze alọnuwe pẹvi lẹ donukọnnamẹ sọn whédegbè jẹ whédegbè gbọn?
5 Nuzedonukọnnamẹ mítọn dona sọgbe hẹ aigba-denamẹ lọ po nuhe ji alọnuwe pẹvi lọ dọhodo po. Mí sọgan bẹ hodọdopọ jẹeji gbọn alọnuwe pẹvi de zize na whétọ lọ dali. Weda tintan alọnuwe pẹvi lẹ tọn nọ saba dọnmẹdogo podọ ehe sọgan fọnjlodotena ẹn. Kavi mí sọgan do alọnuwe pẹvi voovo lẹ hia whétọ lọ bo dọna ẹn nado de dehe e yiwanna. Eyin mí to azọ́nwa to aigba-denamẹ he ji gbẹtọ lẹ ma nọ jlo na hùn ohọ̀n yetọn te, mí sọgan hẹn alọnuwe pẹvi lọ to aliho de mẹ na whétọ lọ nido sọgan mọ weda tintan etọn, kavi mí sọgan dọna ẹn dọ mí na ze alọnuwe pẹvi de do ohọ̀n etọn glọ bo na sè nuhe e lẹn gandego. Eyin kanbiọ de wẹ hosọ alọnuwe pẹvi lọ tọn yin, mí sọgan dọna ẹn nado dọ nuhe e lẹn gandego. Kavi mí sọgan wleawuna kanbiọ de he na fọnjlodotena ẹn bo whàn ẹn nado dọhodopọ hẹ mí. Enẹgodo, mí sọgan hia apadewhe alọnuwe pẹvi lọ tọn hẹ whétọ lọ, bo nọ nọte to fie kanbiọ lẹ tin te bosọ nọ biọ to e si nado dọ linlẹn etọn. Wefọ tangan lẹ sọgan yin hihia sọn Biblu mẹ. To whenue mí ko gbadopọnna delẹ to nudọnamẹ lọ lẹ mẹ godo, mí sọgan dotana hodọdopọ lọ bo basi tito dagbe nado lẹkọyi. Eyin agun lọ nọ saba ze owe mítọn lẹ dai na mẹhe ma tin to whégbè lẹ, mí sọgan ze alọnuwe pẹvi de dai na whétọ lọ do fie mẹdevo lẹ ma sọgan yawu mọ ẹn te.
6. Nawẹ mí sọgan yí alọnuwe pẹvi lẹ zan to kunnudide tòhomẹ-liho ji tọn whenu gbọn?
6 Kunnudide Tòhomẹ-Liho Ji Tọn: Be hiẹ ko yí alọnuwe pẹvi lẹ zan to kunnudide tòhomẹ-liho ji tọn whenu ya? Aligbọntọ delẹ nọ to whlẹndo ji bo ma nọ jlo na nọte nado dọho hẹ mí. E sọgan vẹawu nado yọnẹn eyin yé tindo ojlo kavi lala. Kakati nado ze linlinnamẹwe agọe tọn lẹ donukọnna yé to whenue mí ma yọnẹn eyin yé na hia yé, naegbọn mí ma na yí alọnuwe pẹvi de na yé? Na yé nọ bẹ owẹ̀n kleun de hẹn bọ weda tintan yetọn nọ dọnmẹdogo wutu, tlintlindo dindin sọgan whàn gbẹtọ lẹ nado hia alọnuwe pẹvi lọ eyin yé wá tindo vivò pẹẹde. Ṣigba, eyin yé ma to whlẹndo ji, mí sọgan dọhodopọ hẹ yé do delẹ to nudọnamẹ alọnuwe pẹvi lọ tọn lẹ mẹ ji.
7. Dọ numimọ delẹ he do lehe mí sọgan yí alọnuwe pẹvi lẹ zan nado dekunnu mayin aṣa tọn do hia.
7 Kunnudide Mayin Aṣa Tọn: E bọawu nado yí alọnuwe pẹvi lẹ zan nado dekunnu mayin aṣa tọn. Mẹmẹsunnu de nọ yí alọnuwe pẹvi delẹ do apòmẹ to whedepopenu he e jlo na tọ́n sọn whégbè. Eyin e dukosọna mẹde, vlavo nusàtọ de to ṣọfu mẹ, e nọ dọna ẹn dọ emi jlo na ze owe de na ẹn nado hia bo nọ yí alọnuwe pẹvi de na mẹlọ. To whenue asu po asi po de jlo na yì tòdaho New York City tọn mẹ nado disa bo mọdọ emi na dukosọ hẹ gbẹtọ he wá sọn otò voovo mẹ lẹ, yé hẹn alọnuwe apòmẹ tọn lọ Une bonne nouvelle pour des gens de toutes nations po alọnuwe pẹvi lẹ po to ogbè voovo mẹ. Eyin yé sè bọ mẹhe to nusà to alitó kavi mẹhe sinai sẹpọ yé to jipa de mẹ kavi mẹhe sinai sẹpọ yé to núdùdù-satẹn de to jonọgbè de do, yé nọ ze alọnuwe pẹvi de donukọnna mẹlọ do ogbè etọn mẹ.
8. Aliho tẹ mẹ wẹ alọnuwe pẹvi lẹ sọgan yin yiyijlẹdo jinukun go te?
8 ‘Do Jinukun Towe’: Alọnuwe pẹvi lẹ ṣogan yin yiyijlẹdo jinukun go. Glesi lẹ nọ vúnvún jinukun lẹ pé do ogle yetọn mẹ, na yé ma yọ́n dehe na wú bo whẹ́n. Yẹwhehodọtọ 11:6 dọmọ: “Donú towe to afọnnu fuu, podọ to whèjai a hẹn alọ towe dote blo: na hiẹ ma yọ́n ehe na wà dagbe, ehe kavi dọ́n tọn, kavi eyin yé omẹ awe lẹ na yọ́n do zẹnzẹn.” Enẹwutu, mì gbọ mí ni nọ “[vúnvún] nuyọnẹn pé” gbọn azọ́nwanu kunnudide tọn dagbe ehe yiyizan dali.—Howh. 15:7.
[Blurb on page 3]
To whenuena e yindọ azọ́nwanu dagbe de wẹ alọnuwe pẹvi lẹ yin na kunnudide, mí na nọ ze yé donukọnnamẹ to osun lẹ mẹ sọn ojlẹ de mẹ jẹ devo mẹ, bẹsọn osun novembre tọn mẹ