Oylọ-Basinamẹwe Oflin Tọn Na Yin Mimá Bẹsọn 1^er Mars

1. Whetẹnu wẹ oylọ-basinamẹwe Oflin tọn lẹ mimá na bẹjẹeji, podọ naegbọn e na dẹn pẹẹde hugan owhe he wayi lẹ tọn?

¹ Nujijla he mí nọ basi to whemẹwhemẹ nado ylọ gbẹtọ lẹ na yé nido wá kọnawudopọ hẹ mí na hùnwhẹ Oflin tọn lọ na bẹjẹeji to Ahọluzangbe 1^er mars. Oflin lọ na yin bibasi to 26 mars, ehe dohia dọ oylọ-basinamẹwe lẹ mimá na dẹn pẹẹde to owhe ehe mẹ hugan owhe he wayi lẹ. Ehe na hùn dotẹnmẹ dote na mẹsusu dogọ nado mọ oylọ-basinamẹwe de yí, titengbe to fie agun lẹ tindo aigba-denamẹ susu te.

2. Tito tẹlẹ wẹ ko yin bibasi gando oylọ-basinamẹwe lọ lẹ mimọyi po lehe yé na yin mimá gbọn aigba-denamẹ mítọn blebu ji do po go?

² Lehe Tito lẹ Na Yì Do: Mẹho agun tọn lẹ na na anademẹ gando lehe oylọ-basinamẹwe lẹ na yin mimá gbọn aigba-denamẹ mítọn blebu ji do go, podọ eyin oylọ-basinamẹwe lẹ dona yin zizedai na mẹhe ma tin to whégbè lẹ kavi lala. Eyin oylọ-basinamẹwe lọ lẹ gbẹ́ pò to whenue yé ko yin mimá sọn whédegbè jẹ whédegbè to aigba-denamẹ mìtọn lẹ ji godo, dehe pò lẹ sọgan yin mimá gbọn kunnudide gbangba tọn dali. Nugopọntọ sinsẹ̀nzọn tọn na hẹn ẹn diun dọ oylọ-basinamẹwe he ji nọtẹn po gànmẹ lọ po ko yin kinkan do lẹ yin zizedo fie owe kavi linlinnamẹwe lẹ nọ yin yíyí te na wẹnlatọ lẹ nido sọgan mọ yé yí to finẹ, ṣigba oylọ-basinamẹwe lọ lẹpo ma dona yin didetọn. Sọha he mí na tindo nuhudo etọn to osẹ dopo mẹ kẹdẹ wẹ mí dona yí.

3. Etẹlẹ wẹ mí dona hẹn do ayiha mẹ to oylọ-basinamẹwe lọ mimá whenu?

³ Etẹwẹ Mí Na Dọ? E na yọ́n dọ mí ni nọ glido, ehe na gọalọna mí nado jẹ mẹsusu dè. Weda 4tọ bẹ nuzedonukọnnamẹ de hẹn he mí sọgan yizan sọgbe hẹ aigba-denamẹ mítọn. Etomọṣo, mí ma dona nọ plaplaji eyin whétọ de do ojlo hia kavi tindo kanbiọ lẹ. To whenue mí na to oylọ-basinamẹwe lọ lẹ má to sẹfifo lẹ, mí ma dona wọnji nado ze linlinnamẹwe lẹ donukọnnamẹ eyin dotẹnmẹ lọ hundote. To 2 mars, mí na na ayidonugo oylọ-basinamẹwe lọ lẹ mimá kakati nado bẹ plọnmẹ Biblu lẹ jẹeji.

4. Naegbọn mí dona yí zohunhun do tindo mahẹ to oylọ-basinamẹwe lọ lẹ mimá mẹ?

⁴ Todido mítọn wẹ yindọ mẹsusu na wá kọnawudopọ hẹ mí na hùnwhẹ Oflin tọn lọ. Hodidọ lọ na basi zẹẹmẹ do mẹhe Jesu yin na taun tọn ji. (1 Kọl. 11:26) E nasọ zinnudo ale he okú etọn hẹnwa na mí ji. (Lom. 6:23) Humọ, e na do nuhewutu e do yin nujọnu dọ mí ni nọ flin in hia. (Joh. 17:3) Mì gbọ mí ni yí zohunhun do tindo mahẹ to oylọ-basinamẹwe lọ lẹ mimá mẹ.