Oylọ-Basinamẹ Vonọtaun De
1. Whetẹnu wẹ oylọ-basinamẹwe plidopọ agbegbe 2014 tọn lọ lẹ mimá na bẹjẹeji?
1 Eyin a to tito basi nado yí jonọ họntọn kavi hẹnnumẹ delẹ tọn, yèdọ tito de he a dovivẹnu na taun bosọ zan akuẹ susu na, ayihaawe ma tin dọ po zohunhun po wẹ a na basi oylọna yé. To aliho dopolọ mẹ, azọ́n susu wẹ ko yin wiwà nado wleawuna núdùdù gbigbọmẹ tọn he na yin zizedonukọnna mí to plidopọ agbegbe po akọjọpli tọn 2014 tọn mítọn lẹ po whenu. Bẹsọn osẹ atọ̀n jẹnukọnna plidopọ lọ, mí na tindo lẹblanulọkẹyi nado basi oylọna mẹdevo lẹ wá plidopọ lọ. Etẹwẹ na gọalọna mí nado yí zohunhun do má oylọ-basinamẹwe lọ lẹ?
2. Etẹwẹ na whàn mí nado tindo mahẹ gigọ́ to nujijla lọ mẹ?
2 Eyin mí nọ lẹnnupọndo ale susu he mílọsu nọ mọyi sọn núdùdù gbigbọmẹ tọn he Jehovah nọ na mí to plidopọ agbegbe tọn mítọn lẹ mẹ ji, enẹ na whàn mí nado tindo mahẹ gigọ́ to nujijla lọ mẹ. (Isa. 65:13, 14) Mí sọ dona flindọ nujijla whemẹwhemẹ tọn mítọn lẹ nọ de sinsẹ́n tọ́n. Delẹ to mẹhe mí basi oylọna lẹ mẹ na wá plidopọ lọ. Eyin mẹhe mí basi oylọna lẹpo ma tlẹ wá, vivẹnudido nujọnu tọn mítọn to nujijla lọ whenu na pagigona Jehovah bo do alọtútlú etọn hia.—Ps. 145:3, 7; Osọ. 22:17.
3. Nawẹ oylọ-basinamẹwe lọ lẹ na yin mimá gbọn?
3 Pipli mẹho lẹ tọn dopodopo na basi dide lehe agun lọ sọgan má oylọ-basinamẹwe lọ to gigọ́ mẹ do tọn, gọna lehe yè sọgan ze e dai na mẹhe ma to whégbè lẹ kavi má ẹn to kunnudide gbangba tọn mẹ to aigba-denamẹ lọ ji do. To sẹfifo lẹ, linlinnamẹwe lẹ dona yin zizedonukọnnamẹ to pọmẹ po oylọ-basinamẹwe lọ po eyin e biọ domọ. Eyin Sibigbe tintan osun de tọn jẹ do ojlẹ nujijla lọ tọn mẹ, oylọ-basinamẹwe lọ lẹ mimá wẹ mí dona na ayidonugo kakati nido yin plọnmẹ Biblu lẹ bibẹjẹeji. To vivọnu nujijla lọ tọn, homẹ mítọn na hùn taun dọ mí tindo mahẹ zohunhun tọn bosọ basi oylọna mẹsusu dile e yọnbasi do nado wá kọnawudopọ hẹ mí bo duvivi núdùdù gbigbọmẹ tọn he Jehovah wleawu etọn lọ tọn!
[Zẹẹmẹ yẹdide lẹ tọn to weda 4]
Etẹwẹ A Na Dọ?
To whenue a ko dọnudo whétọ lọ sọgbe hẹ aṣa lẹdo lọ tọn godo, a sọgan dọmọ: “Mí to mahẹ tindo to nujijla he to yìyì lẹdo aihọn pé de mẹ nado basi oylọna gbẹtọ lẹ wá nujijọ vonọtaun de tẹnmẹ. Azán, gànmẹ po nọtẹn lọ po yin kinkan do oylọ-basinamẹwe ehe ji.”