Yidogọna Ayajẹ Towe to Ojlẹ Oflin Tọn Ehe Mẹ!
1. Aliho tẹ mẹ wẹ mí sọgan yidogọna ayajẹ mítọn to ojlẹ Oflin tọn ehe mẹ te?
1 Be hiẹ na jlo nado hẹn ayajẹ towe jideji to osun mars, avril, po mai po tọn mẹ ya? Aliho dopo nado wàmọ wẹ nado wà nususu dogọ to lizọnyizọn towe mẹ, podọ eyin e yọnbasi nado basi gbehosọnalitọ alọgọtọ tọn. Nawẹ ehe na yidogọna ayajẹ towe gbọn?
2. Nawẹ lizọnyizọn mítọn hinhẹn gblodeji nọ yidogọna ayajẹ mítọn gbọn?
2 Yidogọna Ayajẹ Towe: Jehovah dá mí po nugopipe lọ po nado nọ mọ ayajẹ sọn sinsẹ̀n-bibasi hlan ẹn mẹ dile mí to pekọ hẹnwana nuhudo jọwamọ tọn mítọn na gbigbọnu lẹ. (Mat. 5:3) E sọ dá mí to aliho de mẹ bọ mí sọgan nọ mọ ayajẹ sọn nunamẹ mẹ. (Owalọ 20:35) Lizọnyizọn lọ nọ hẹn yọnbasi na mí nado wà onú awe enẹlẹ—yèdọ nado sẹ̀n Jiwheyẹwhe podọ nado gọalọna mẹdevo lẹ. Abajọ, mahẹ gigọ́ tintindo to lizọnyizọn lọ mẹ do nọ hẹn ayajẹ mítọn sudeji. Humọ, lehe mí to yẹwhehodọ do, mọ wẹ azọ́nyinyọnẹn mítọn nọ yin hinhẹn pọnte dogọ do niyẹn. Dile mí to azọ́nyọnẹn dogọ, mí nọ wleawuna jidide bọ obu mítọn nọ depò. Mí na tindo dotẹnmẹ hundote susu nado dekunnu podọ nado bẹ plọnmẹ Biblu lẹ jẹeji. Ehe lẹpo nọ yidogọna ayajẹ mítọn to lizọnyizọn lọ mẹ.
3. Naegbọn mars po avril po na yin osun dagbe lẹ nado basi gbehosọnalitọ alọgọtọ tọn?
3 Mars po avril po na yin osun dagbe lẹ nado basi gbehosọnalitọ alọgọtọ tọn, na mí sọgan de nado jẹ nubiọtomẹsi gànhiho 30 kavi 50 tọn kọ̀n. Humọ, bẹsọn Sibigbe 22 mars jẹ Tẹnigbe 14 avril he yin azán Oflin tọn lọ, mí na tindo mahẹ to nujijla vonọtaun de mẹ nado basi oylọna mẹdevo lẹ wá Oflin lọ. Agun lẹ na gọ́ na ayajẹ taun dile mẹsusu na to azọ́nwa ‘abọ́ to abọ́ go’ gbọn aigba-denamẹ lọ ji to gigọ́ mẹ to ojlẹ he yin dide lọ gblamẹ.—Zẹf. 3:9.
4. Eyin mí jlo na basi gbehosọnalitọ alọgọtọ tọn, etẹwẹ mí dona wà?
4 Wleawudai Bẹsọn Din: Eyin a ma ko wàmọ, yí whenu zan nado gbeje tito towe pọ́n bo yọ́n vọjlado voovo he a sọgan basi nado sọgan hẹn lizọnyizọn towe gblodeji na osun dopo kavi awe. Hodẹ̀ do whẹho lọ ji. (Jak. 1:5) Dọhodeji hẹ whẹndo towe podọ hẹ mẹdevo lẹ to agun lọ mẹ. (Howh. 15:22) A na mọdọ eyin a tlẹ tindo nuhahun agbasalilo tọn kavi tito-to-whinnu azọ́nmẹ tọn he ján de, hiẹ lọsu sọgan duvivi ayajẹ he nọ wá sọn gbehosọnalitọ alọgọtọ tọn bibasi mẹ tọn.
5. Etẹwẹ na yin kọdetọn lọ eyin mí gbloada na lizọnyizọn mítọn to ojlẹ Oflin tọn ehe mẹ?
5 Jehovah jlo dọ devizọnwatọ etọn lẹ ni yin ayajẹnọ. (Ps. 32:11) Eyin mí dovivẹnu nado gbloada na lizọnyizọn mítọn to ojlẹ Oflin tọn ehe mẹ, mí na hẹn ayajẹ mítọn jideji bo nasọ hẹn homẹ Otọ́ olọn mẹ tọn mítọn tọn hùn.—Howh. 23:24; 27:11.